Khu ginani Dzifakazi dza Jehovha dzi simamago gu bhula ni vathu va gu mba yeyedza gutsakeya?
Dzifakazi dza Jehovha, dza gu tshumayela khu gu kutswa khu lihaladzo dzi gu nalo khu Nungungulu ni vambe, gu pata ni vale va nga mba “yeyedza gu tsakeya.” (Matewu 22:37-39) Lihaladzo hi gu nalo khu Nungungulu li ngu hi kutsa gu engisa gileletelo hi ningidwego khu Gyanana gyaye gi gu khigyo “ningeya wufakazi nyo vbeleye.” (Mithumo 10:42; 1 Johane 5:3) Gasi gu gira isoso, ha gu tshumayela khu gu phindra-phindra, gu fana ni edzi va giridego khidzo vaprofeti va Nungungulu va gale. (Jeremiya 25:4) Khu kotani nya olu hi haladzago vathu, ethu ha gu tshumayela “Mahungu nya yadi nya Mufumo” ga vatshavbo gu pata ni vale va nga mba yeyedza gutsakeya ga litshigu nyo pheye. — Matewu 24:14.
Gu tala nya dzitepo, muthu a ngu yeyedza gutsakeya ga litshigu hi mu bweleleyago, ambari na sa yeyedza gutsakeya ga litshigu nyo pheye. Wona sighelo siraru:
Vathu va ngu fuluga.
Vambe va gu yeyedza gutsakeya va ba va romo magaya gwawe.
Vathu va ngu vbindrugedza. Sigiro nya litigo leli mwendro siemo va tshanganago naso vathu si ngu va gira va dziti gu khavo “va ngu vbweta gu thangedwa khu Nungungulu,” khu kharato va yeyedza gutsakeya avbo nya mahungu hi tshumayelago. (Matewu 5:3) Ambari vale va hi wugeyago va nga vbindrugedza mawonelo, gu fana ni esi a giridego mupostoli Pawulo. — 1 Thimoti 1:13.
Ambari ulolo, kha hi gurumedzi muthu gu hakha mahungu yathu. (1 Pedro 3:15) Ethu hi ngu khodwa gu khethu muthu ni muthu a yede gu dzi hatheya maningano ni esi a si khodwago. — Dhewuteronome 30:19, 20.