Dzifakazi dza Jehovha dza gu wona kharini gu tshula mutshadho?
Mawonelo yathu maningano ni gu tshadha ni gu tshula mutshadho ma gu seketedwa khu Bhibhiliya. Nungungulu khuye a nga vanga mutshadho. Nungungulu a gu vbweta gu khuye mutshadho wu wumbwa khu mwama ni nyamayi nigu u simama kala gupindruga. Ganiolu, Milowo ya gu dzumeleya basi gu patwa wu tshula mutshadho khu gighelo gimwegyo, a gu wubhayi. — Matewu 19:5, 6, 9.
Ina Dzifakazi dza Jehovha dzi ngu ninga giphaso mipatwa yi tshanganago ni sigaradzo?
Ina, khu dzindziya nya dzingi:
Mabhuku. Dzirevhista dzathu, mabhuku ni dzivhidhyu tepo yatshavbo dzi na ni mahungu ma phasago ava va tshadhidego, ambari ni vale va pimisago gu khavo va mwalo rendre. Khu giyeyedzo, wona dzindrima dzi gu khidzo: “Manter o compromisso com o seu casamento”, “Aprenda a perdoar” e “Recuperar a confiança no casamento.”
Mitshangano. Mitshangano yathu, dziasembleya ni dzikongresu, tepo yatshavbo dzi ngu ninga wusingalagadzi nya wadi ga ava va tshadhidego. Wusingalagadzi wowo wa gu seketedwa omu nya Bhibhiliya.
Madhota. Madhota libandlani ma nga phasa mipatwa yi tshanganago ni sigaradzo khu gu yi ninga wusingalagadzi nya Bhibhiliya, nya nga gu va yeyedza lowo wa Vaefeso 5:22-25.
Ina madhota ma yede gu hunga gu khayo patwa nyo khaguri nya Dzifakazi wu yede gu tshula mutshadho?
Ahihi. Ambari olu madhota ma phasago mipatwa, ayo kha ma yeli gu embeya mwama mwendro nyamayi esi va yedego gu gira. (Vagalatiya 6:5) Ganiolu, oyu a hungago gu tshula mutshadho na mwalo gighelo nyo pwali gasi gu gira isoso, kha tshulega gu tshadha gambe. — 1 Thimoti 3:1, 5, 12.
Dzifakazi dza Jehovha dza gu wona kharini gu hambana?
Bhibhiliya ya gu kutsa ava va tshadhidego gu simama vatshavbo ambari va gu tshangana ni sigaradzo. (1 Vakorinto 7:10-16) Sigaradzo nya singi si nga lulamiswa khu gu gombeya khu monyo wawe watshavbo, gu thumisa matshina nya Bhibhiliya ni gu yeyedza lihaladzo. — 1 Vakorinto 13:4-8; Vagalatiya 5:22.
Ganiolu, Makristo nyo khaguri ma ngu hunga gu hambana khu kotani nya giemo gyakone gi nga garadza ngudzu nya nga:
Tepo mwama a gu mba sayisa ndranga. — 1 Thimoti 5:8.
Tepo mwama mwendro nyamayi a tshaniswago ngudzu ndrani nya mutshadho. — Ndzimo 11:5.
Tepo mwama mwendro nyamayi a girago gu mumbe a si thumeye Nungungulu. Khu giyeyedzo, mwama mwendro mwangadzi adzina a nga gurumedza mumbe gu ndraga milayo ya Nungungulu. Ga siemo nya nga esi, oyu a gurumedzwago a nga hunga gu hambana gasi “gu engisa Nungungulu kha nga mufumeli, guvbindra vathu.” — Mithumo 5:29.