Bhibhiliya ya gu ganeya ginani khu gu theya makiyaji ni gu ambala dzijoya?
Hlamulo nya Bhibhiliya
Ambari olu yi ngu mba ganeya silo nya singi khu mahungu yaya, Bhibhiliya kha himbedzeyi gu thumisa makiyaji, dziphera, dzikolar ni simbe silo. Ganiolu, vbavbandze basi nyo dzi garadzeye gu dzi mburiseya khu vbavbandze, Bhibhiliya yo hi kutsa gu vega gupima ga “edzi hi gu idzo khu monyoni.” — 1 Pedro 3:3, 4.
Kha sa vivba gu thumisa silo nyo dzi mburiseyi khiso
Vanyamayi nyo tumbege va khumbugwago omu nya Bhibhiliya va nga ba va dzi mburiseya. Rabheka a di gu vbweta gu tshadha ni Isaki, gyanana gya Abrahama. Rabheka a di ningwa khu nasali waye nya mwama phera nya oru gasi a theya avba nya thonvhu, dziplusera nya oru ni simbe silo nyo dhure. (Genesi 24:22, 30, 53) Khu ndziya nyo fane Esiteri “vbedzide likhumi na mivili migima na gu dzi mburisela” na si hathwi gasi a khala pfhumungadzi nya mufumo wa Perisiya. (Esiteri 2:7, 9, 12.) Nigu isoso si di gu pata gu thumisa ‘mafura’ ni ‘makiyaji’ nyo hambane-hambane. — Nova Versão Internacional; Easy-to-Read Version.
Bhibhiliya yi ngu fananisa dziperola ni silo nya sadi. Khu giyeyedzo, wusingalagadzi nya wadi wu ngu fananiswa ni ‘dziphera nya oru . . . omu nya dzindzeve dzi engisago.’ (Mavingu 25:12) Khu ndziya nyo fane, Nungungulu dzi fananiside ni mwama a ningago mwangadzi waye dzipulsera, kolar ni dziphera. Isoso so yeyedza gu khiso, Nungungulu a di gu sayisa gwadi Vaisrayeli. Bhibhiliya yari khiyo silo sesi si di gu gira Vaisrayeli va ‘engedzeya gumbura.’ — Ezekiyeli 16:11-13.
Malipha ma ganeyago khu makiyaji ni dzijoya
Malipha: Omu ga 1 Pedro 3:3, Bhibhiliya yi ngu himbedzeya “gu luga ndzudzu, ni gu ambala dzioru ni sombo nyo dhure.”
Lisine: Mongo nya livhesi leli yo vbweta gu tshingisa gu khilo esi si gu na ni lisima gumbura ga ndrani nasiri gumbura ga vbavbandze. (1 Pedro 3:3-6) Lisine leli hi ngu li mana gambe ga mambe mavhesi. — 1 Samuweli 16:7; Mavingu 11:22; 31:30; 1 Thimoti 2:9, 10.
Malipha: Si vivbede gu dzi makiyari kholu Bhibhiliya yari khiyo pfhumugadzi nyo vivbedwe khu moyo Jezabheli “a di todza maho yaye, a mburisela hungoni gwaye.” — 2 Dzipfhumu 9:30.
Lisine: Jezabheli a di songa vathu ni gu thumisa wudhemoni. Khu kharato, uye a di lamudwa khu kotani nya wuvivbi waye nasiri khu kotani nya edzi a nga ba ari idzo. — 2 Dzipfhumu 9:7, 22, 36, 37.