SIWUDZISO SI GIRWAGO KHU VAPHYA
Nyi nga gira ginani pari yangu ya gu nyi khunguvanyisa?
Ginani u yedego gu giti?
Wu mwalo wupari wu gu mwalo sigaradzo. Pari yago na yi ngari muthu nya mba vbeleya, ambari kamo yile u yi tumbago ngudzu yi na ganeya ni gu gira silo si na gu khunguvanyisago. Ganiolu, u nga divali gu khuwe a nuwe kha wa vbeleya. Ina gima u si khunguvanyisi muthu nyo khaguri? — Jakobe 3:2.
Esi u si wonago omu nya interneti si nga gu khunguvanyisa. Khu giyeyedzo, muphya nyo pwani khu David wari khuye: “Wa gu ba u romo omu nya interneti u wona dzifotu dza pari yago na yi romo festatunu, u nga pheya gu dzi wudzisa gu khuwe khu ginani a nga mba gu rana. Nigu isoso si na gu gira u garadzega.”
U nga hevbuleya gu lulamisa gigaradzo.
Ginani u nga girago
Dzi gevesisi. Bhibhiliya yari khiyo: “U nga vbiredzeli gu goroga, kholu, likhulo lomo myonyoni nya sipumbu.” — Muhevbudzi 7:9.
“Dzimbe dzitepo u nga tugula gu khuwe esi si nga gu zangarisa khandri silo nya sikhongolo.” — Alyssa.
Dundrugeya khesi: Ina u ngu vbiredziseya gu zangari? Ina u nga hevbuleya gu laphiseya monyo gu mba vbeleya ga vambe? — Muhevbudzi 7:21, 22.
Dundrugeya khu wuyelo hi wu manago khu gu divaleya. Bhibhiliya yari khiyo: “Khyadi gu . . . diga sihoso sa vambe si vbindra.” — Mavingu 19:11, Tradução do Novo Mundo.
“Ambari na wu mwalo nandru, khyadi gu divaleya khu gu vbeleya. Ni gu mba khaleya gu gira muthu yoyo a dundruga esi a nga gira mwendro gu mu gira a dzipwa nandru. Wa gu mu divaleya, u nga si dundrugi gambe.” — Mallory.
Dundrugeya khesi: Ina esi si nga girega si na ni lisima? Nyi nga divaleya gasi gu andrisa gurula? — Vakolosi 3:13.
Gu khaleya gu bhula khu sigaradzo satshavbo si manegago vbakari nya wupari si ngu fana ni gu tula lidimba gu beya girame ga wulanga gu furumeyago
Dzi vegi wulangani ga mumbe muthu. Bhibhiliya yari khiyo: “Mu nga vbwetini esi si tsakisago enu basi, ganiolu vbwetani ni esi si tsakisago vambe.” — Vafilipi 2:4.
“Wa gu ba u haladza ni gu ninga githawo pari yago, u na gira satshavbo u si kodzago gasi gu lulamisa gigaradzo khu gu vbiredza, kholu u ngu dzina gu tiyisa wupari wanu nigu kha wu dzini gu luza pari yago.” — Nicole.
Dundrugeya khesi: Ina u ngu si kodza gu ninga lisima mawonelo ya mumbe muthu? — Vafilipi 2:3.
Esi hi si hevbulago: Gu kodza gu emisana ni sigaradzo, nya nga gu khunguvanyiswa, si na gu phasa womini gwago. Wa gu si wona kharini gu hevbuleya gu gira isoso olu?