Ginani egi Bhibhiliya yi hevbudzago khu gu ganeya mambe malimi?
Hlamulo nya Bhibhiliya
‘Gu ganeya mambe malimi’ go thudwa makodzelo nya gilewugiso aya Makristo ya dzitepni dza vapostoli va manegidego nawo nyo ganeya lidimi na va sa pheya khu gu li hevbula. (Mithumo 10:46) Vatshavbo ava va nga ba va ganeya lidimi nyo khaguri va di gu mu pwisisa gwadi oyu a nga ba a ganeya limbe lidimi. (Mithumo 2:4-8) Gu ganeya mambe malimi gu diri gimwegyo nya siningwa nya liphuvbo nya guage egi Nungungulu a nga ba ningide Makristo nyo khaguri nyo pheye. — Vahebheru 2:4; 1 Vakorinto 12:4, 30.
Si phede lini nigu hayi esi nyo ganeye mambe malimi?
Gilewugiso gegi gi giregide khu tepo nyo pheye Jerusalema ni dzimindru khu litshigu nya Festa nya Pentekosta nya 33 Matshiguni Yathu. Vapizane va Jesu nyo dingane 120 va di tshanganide wulanga wumowo tepo ‘vatshavbo va nga tala khu liphuvbo nya guage, va gu phela gu ganela mambe malimi.’ (Mithumo 1:15; 2:1-4) Gitshungu nya gikhongolo nya vathu “nya gute khu mayigoni yatshavbo” gi di tshangana, khavbovbo “muthu ni muthu a di vapwa na va gu ganela khu lidimi laye.” — Mithumo 2:5, 6.
Ma diri yavbi makungo nyo ganeya mambe malimi?
Ma diri nya yeyedze gu Nungungulu a di gu ma seketeya Makristo. Gale, Nungungulu a di gu gira siyeyedzo nya silewugiso gasi gu yeyedza vathu gu khuye khuye a phasago vathu vaye nyo tumbege nga Mosi. (Ekisodha 4:1-9, 29-31; Mitengo 17:10) Gu ganeya mambe malimi nugo gu diri gimbe giyeyedzo gi yeyedzago gu khigyo Nungungulu a ngu seketeya libandla nya Wukristo li nga ba li ngari gu tudwa. Mupostoli Pawulo lovide khuye: “Gu ganela malimi nyamba tidwa giyeyedzo gya Nungungulu ga vale va si khodwigo, nasiri ga ava va khodwago.” — 1 Vakorinto 14:22.
Gasi gu Makristo ma kodza gu tshumayela khu sighingi. Ava va ngapwa vapizane va Jesu kha litshigu nya Pentekosta, va di khavo: “Hi ngu vapwa na va gu huwelela siliwugiso sa Nungungulu khu malimi yathu.” (Mithumo 2:11) Khu kharato, gimbe gighelo nya gilewugiso gegi gu diri gu tuleya ndziya Makristo nya gu ma ninga wufakazi nya guvbeleye ni gu “gira vapizane vathu nya mayigo yatshavbo,” kha nga edzi a ganedego khidzo Jesu. (Mithumo 10:42; Matewu 28:19) Tanga nya 3000 vathu va wonidego gilewugiso gegi ni gupwa wufakazi wu ningidwego va khade vapizane khu litshigu lolo kamo. — Mithumo 2:41.
Ina gu ganeya mambe malimi si di hadzi simama kala gupindruga?
Ahihi. Siningwa nya liphuvbo nya guage, gupata ni egi nyo ganeye mambe malimi, si diri sa gitepwana. Bhibhiliya yi profetide khiyo: “Wu na vbindra wuprofeti, malimi ma na fuva, ni guti gu na vbela.” — 1 Vakorinto 13:8.
Si hegiside lini esi nyo ganeya mambe malimi?
Khu giolovedzo vapostoli va di gu vbindriseya siiningwa sesi nya liphuvbo nya guage ga mambe Makristo, khu gu handzega mandza yawe ga mambe Makristo gasi va hakha siningwa soso. (Mithumo 8:18; 10:44-46) Ava va nga ba va hakha siningwa soso khu ga vapostoli va diri mwalo makodzelo nyo si vbindriseye ga vambe. (Mithumo 8:5-7, 14-17) Khu giyeyedzo, muthu nyo khaguri a thumago wumutunu a nga ninga muthu likarta nyo gimbidzise movha, ganiolu muthu yoyo a mwalo tshivba nyo dzumeleye muthu gu gimbidza movha khu guya khu milayo. Khidzo saye ni gu ganeya mambe malimi, si hegiside tepo vapostoli ni ava va hakhidego giningwa gyogyo va ngafa.
Ina si nga kodzega gu vathu muhuno va ganeya mambe malimi?
Edzi si wonegago khidzo giningwa nya gilewugiso nyo ganeye mambe malimi gi hegiside khu lizana myaga nyo pheye la Matshiguni Yathu. Mwalo muthu muhuno a nga ganeyago khuye a ngu ganeya mambe malimi khu tshivba ya Nungungulu.a
Hi nga ma tugula kharini Makristo nya lisine muhuno?
Jesu ganede khuye vapizane vaye va di hadzi tidwa khu gu haladzana. (Johane 13:34, 35) Khu ndziya nyo fane, mupostoli Pawulo hevbudzide gu khuye Makristo nya lisine ma di hadzi tidwa khu lihaladzo. (1 Vakorinto 13:1, 8) Uye yeyedzide gu khuye liphuvbo nya guage la Nungungulu li di hadzi phasa Makristo gu manega ni makhalelo yaya nya gu mo patwa yatshavbo mo ranwa “mihandro nya liphuvbo nya liphuvbo,” nyo pheye lakona a gu lihaladzo. — Vagalatiya 5:22, 23.
a Wona ndrima “Gu ganeya mambe malimi — Ina sa guta khiyo ga Nungungulu?”