GIHEVBULO 14

Tshingisa malito nya litshina ma seketeyago mahungu yago

Vahebheru 8:1

ESI U YEDEGO GU GIRA: Phasa vaengiseyi vago gu longoloka nago tepo u vegago ganelo, u bwe u yeyedza gwadi edzi litshina ni litshina nya gisekelo nya mahungu li yelanago khidzo ni makungo nya ganelo yago gumogo ni mahungu yatshavbo u ganeyago khayo.

MAGIRELO YAKONA:

Manega ni makungo nyo khaguri avba nya ganelo yago. Dzi wudzise gu khuwe ganelo yago yo vbweta gu bikeya mahungu, gu tiyisa gukhodwa, mwendro gu kutsa vaengiseyi. Khavbovbo dzi pwananise ni giemo u na gi wonago. Tiyisega gu khuwe matshina yatshavbo nya gisekelo ma ngu gu phasa gu vboheya makungo yago gani.

Dzi wudzise gu khuwe: ‘Siwudziso muni mwendro silo muni si va garadzeyago gu si pwisisa avba nya mahungu yaya? Ginani gi va girago va dzi gira siwudziso soso nigu va gu dzi wudzisa kharini?’ Khavbovbo sasamedza mitshamuselo yago khu ndziya nya gu vaengiseyi vago va longoloka nago, va si pwisisa, va bwe va ma dzumeya mahungu yoyo.
Tshingisa litshina nya mahungu nya ganelo yago. Ndrani nya ganelo yago yatshavbo, tshingisa litshina nya mahungu nya ganelo yago khu gu wuyedzeya gu khumbuga malito nya litshina nya mahungu ma tshamusedwego avba nya ganelo yago, mwendro khu gu thumisa malito ma ganeyago sasimweso.
Tshamuseya gwadi matshina nya gisekelo nya ganelo yago u bwe u ma vbevbugisa. Hatha matshina nya gisekelo ma yelanago ni mongo watshavbo ma na gu vbevbugeyago gu ma hevbudza gwadi ndrani nya tepo u ningidwego. U nga tadzi matshina nya gisekelo, ganeya litshina limwedo khu limwedo li pwisisega gwadi, ema u ndrindranyana phuvbo nu si gu beleyi limbe, u bwe u pwananisa litshina u ngarigo gu ganeya khilo ni eli li landreyago.

U nga sasamedza matshina ma seketeyago ganelo yago gupheyani nya ganelo yago gasi gu phasa vaengiseyi vago gu longoloka nago, mwendro gu gira khu gu ma sasamedza tepo u segago ganelo gasi gu va ma dundruga.