Engedzeya lihaladzo lago khu Jehovha ni vambe

1. Silo muni u si hevbudego tepo u nga pheya gu hevbula Bhibhiliya?

U NGU si dundruga satshavbo u si hevbudego tepo u nga pheya gu hevbula Bhibhiliya? Adzina u samadzisidwe khu gu dziti gu khuwe Nungungulu a na ni lina. Mwendro adzina u tsakide khu gu dziti gu khuwe Nungungulu kha tshanisi vathu hwane nya gu ba va fude, nigu adzina u tsakide khu gu dziti gu khuwe u na wona sigodwa sago si fudego u bwe u ta vbanya naso paradhesini mafuni.

2. Ginani u giridego tepo u nga pheya gu hevbula Bhibhiliya? (Efeso 5:1, 2)

² Tepo u ngaya u hevbula khu Nungungulu lihaladzo lago khu Jehovha li di dandra. Lihaladzo lolo li gu kutside gu thumisa esi u nga hevbula. Uwe u hungide makungu nya yadi na wu gu seketedwa khu matshina nya milayo nya Bhibhiliya. U hevbude ni gu pimisa gu gira silo khu ndziya nya yadi gasi gu tsakisa Nungungulu. Kha nga gyanana gi pimedzeyago papayi wagyo, anuwe u ngu pimedzeya Papayi wago wa ndzadzini. — Leri Vaefesu 5:1, 2.

3. Siwudziso muni adzina hi nga dzi girago?

³ Adzina hi nga dzi wudzisa gu khethu: ‘Ina lihaladzo langu khu Jehovha olu li tiyide ngudzu gu vbindra tepo nyi nga khala Mukristo? Gu khugeya nyi bhabhatiswa ina nyi ngu pimisa ni gu gira silo nga Jehovha ngudzu-ngudzu gu yeyedza lihaladzo ga vandriyangu?’ Ambari ha gu tugula gu khethu lihaladzo lathu khu Jehovha ni vambe li vbode kha hi yeli gu vbeya tshivba. Kholu sasimweso si giregede Makristo nya gu pheye. Ganiolu, Jesu kha ma tsukula ni gu anethu kha na nga hi tsukula. (Gutu. 2:4, 7) Uye a ngu dziti gu khuye hi nga si kodza gu manega ni lihaladzo hi nga ba hiri nalo gupheyani tepo hi nga hevbula lisine.

4. Ginani hi na bhulago khigyo avba nya ndrima yeyi?

⁴ Avba nya ndrima yeyi, hi na bhula khedzi hi nga simamago khidzo gu tiyisa lihaladzo lathu khu Jehovha ni vambe. Nigu hi na wona makategwa hi na ma manago khu gu tiyisa lihaladzo lathu khu Jehovha ni vambe.

TIYISA LIHALADZO LAGO KHU JEHOVHA

5-6. Sigaradzo muni Pawulo a tshanganidego naso ndrani nya thumo waye, nigu ginani gi mu phasidego gu thumeya Jehovha?

⁵ Mupostoli Pawulo a di gu tsakiswa khu gu thumeya Jehovha, ganiolu a di gu tshangana ni sigaradzo nya singi. Pawulo dzitepo nya dzingi a di yede gu endra mipfhuka nya gu laphe nigu matshigoni yaye kha sa nga ba si vbevbuga gu endra. Umo nya maendro yaye, dzimbe dzitepo a tshanganide ni “dzimhango mitsongoni” nigu “thavide gu bedwa khu dzimbafa.” Uye dzimbe dzitepo a tshanisidwe ni gu bedwa khu valala vaye. (2 Kor. 11:23-27) Vandriye va Pawulo nya Makristo khandri tepo yatshavbo va nga ba va yeyedza gubonga khu giphaso a nga ba a va ninga. — 2 Kor. 10:10; Filp. 4:15.

⁶ Ginani gi phasidego Pawulo gu simama gu thumeya Jehovha? Pawulo hevbude nya singi khu makhalelo ya Jehovha omu nya Milowo ni esi a nga ba a siti. Pawulo tiyisegide gu khuye Jehovha Nungungulu a ngu mu haladza. (Rom. 8:38, 39; Efes. 2:4, 5) Nigu uye haladzide ngudzu Jehovha. Pawulo yeyedzide lihaladzo laye khu Jehovha khu gu simama “gu thumeya va nyo aga.” — Heb. 6:10.

7. Khu yevbini mweyo nya dzindziya hi nga tiyisago khiyo lihaladzo lathu khu Jehovha?

⁷ Hi nga tiyisa lihaladzo lathu khu Nungungulu khu gu hi hevbula Lito laye. Tepo u hevbulago Bhibhiliya zama gu tugula esi u nga si hevbulago khu Jehovha. Dzi wudzise khuwe: ‘Matimo yaya ma gu yeyedza kharini gu khayo Jehovha a ngu nyi haladza? Sighelo muni nyi gu naso gasi gu haladza Jehovha?’

8. Gu gombeya gu nga hi phasa kharini gu tiyisa lihaladzo khu Jehovha?

⁸ Yimbe ndziya hi nga tiyisago lihaladzo lathu khu Jehovha khu gu gombeya tshigu ni tshigu hi mu embeya edzi hi dzipwago khidzo. (Ndzi. 25:4, 5) Jehovha a na hlamula milombelo yathu. (1 Joh. 3:21, 22) Ndriyathu moyo nyo pwani khu Khanh a vbanyago Ásia wari khuye: “Gupheyani nyi di haladza Jehovha khu kotani nya esi nyi nga ba nyi hevbula khuye, ganiolu tepo nyi nga wona gu kheni a ngu hlamula milombelo yangu nyi di engedzeya gu mu haladza. Esi si nyi kutside gu gira silo si mu tsakisago.”b

TIYISA LIHALADZO LAGO KHU VANDRIYATHU

9. Thimoti a yeyedzide kharini gu khuye a di gu dandra khu liphuvboni avbo nya gu yeyedze lihaladzo?

⁹ Hwane nya myaga nyo khaguri mupostoli Pawulo na khade mukristo, a diti muphya moyo nyo pwani khu Thimoti. Thimoti a di gu haladza Jehovha ni vathu. Mupostoli Pawulo a embede vavbanyi va Filipi gu khuye: “Nyi mwalo mumbe nya gu fane [ni Thimoti] a na mi khataleyago gwadi.” (Filp. 2:20) Pawulo kha ganeya esi khu kotani nya olu Thimoti a nga ba ari muvegi nya wadi nya dziganelo, ganiolu uye a di samadziswa khedzi Thimoti a nga ba a yeyedza khidzo lihaladzo khu vandriyathu. Vbavbandze nya gu kanakane vandriyathu va mabandla omu Thimoti a nga hadzi gu ma endreya va di gu mu vireya khu maho nya gu fuviye. — 1 Kor. 4:17.

10. Anna ni mwama waye va yeyedzide kharini lihaladzo khu vandriyathu?

¹⁰ Ethu hi ngu vbweta dzindziya nya gu phase vandriyathu nya Makristo. (Hebh. 13:16) Olu hongoleni hi wona giyeyedzo gya Anna a khumbugidwego ga ndrima yi vbindridego. Hwane nya gu ba gi giregide gingulo nya gikhongolo, uye ni mwama waye va di ya wuseya vandriyathu nigu va di ya tugula gu khavo gingulo gi di gu ghohetede vbatshani nya nyumba yawe. Kha nga handro wakone ndranga yile yi diri mwalo sombo nya gu tshuge. Anna wari khuye: “Hi di dzega sombo sawe hi ya handza, nigu hi va bweledzede na hi ngomaride ni gu si peteleya. Esi hi nga va gireya hi di si wona nga khatsi sidugwana, ganiolu gu khugeya litshigu lolo kala muhuno hi ngari dzipari nya dzikhongolo.” Lihaladzo eli Anna ni mwama waye va gu nalo li va kutside gu phasa vandriyathu.— 1 Joh. 3:17, 18.

11. a) Vambe va gu dzipwa kharini tepo hi va yeyedzago gu khethu hi ngu va haladza? b) Guya khu Mavingu 19:17, Jehovha a gu hi hlamula kharini ha gu yeyedza lihaladzo?

¹¹ Ha gu yeyedza lihaladzo vambe, avo va na si wona gu khavo ha gu zama gu pimedzeya Jehovha. Nigu avo va nga hi bonga ngudzu khu wuwadi hi va yeyedzago. Khanh a khumbugidwego gupheyani, khu lihaladzo dundrugide vale va mu phasidego. Uye wari khuye: “Nyi ngu bonga ngudzu vandriyathu va nga nyi phasa khu gu nyi vbwegedza thumoni. Avo va di guta gaya gwangu va ta nyi rana gasi guya hodza gilogyo ni gu bwe va nyi vbwegedza gaya. Olu nya gu wona gu kheni va giride thumo nya wukhongolo. Nigu avo va giride isoso khu lihaladzo.” Khu lisine, khandri vatshavbo va hi bongago khesi hi va gireyago. Khanh a gu ganeya esi khu vale va mu phasidego: “Nyi ngu dzina gu va bweledzeya watshavbo wuwadi va nyi yeyedzidego, ganiolu kha nyi guti omu vatshavbo va khalago. Ambari ulolo, eni nyi ngu gombeya ga Jehovha gasi a va bweledzeya watshavbo wuwadi va nyi yeyedzidego.” Esi a ganedego Khanh lisine. Jehova a ngu wona satshavbo nya sadi u gireyago vambe, ambari so ba siri sidugwana ngudzu. Uye a gu si wona nga ningelo nya lisima nigu kha nga mangava a na ma livbago. — Leri Mavingu 19:17.

12. Vandriyathu va nga yeyedza kharini lihaladzo lawe libandlani? ( Wona fotu.)

¹² U nga yeyedza kharini lihaladzo vambe ni gu va ninga giphaso tepo va gi vbwetago? Muphya moyo nyo pwani khu Jordan a di wudzisa lidhota limwedo khesi a nga girago gasi gu phasedzeya libandlani. Lidhota lile li di zundza muphya wule khu satshavbo esi a nga ba a giride gasi gu dandra khu liphuvboni, a bwe a mu ninga wusingalagadzi nyo khaguri nya esi a nga girago gasi gu engedzeya gu gira nya singi. Khu giyeyedzo, ilo li di embeya Jordan gu heguleya gu vboha Salawuni nya Mufumo, gu losa vandriyathu, gu patega mitshanganoni, gu patega thumoni nyo tshumayele ni gu vbwetedzeya dzimbe dzindziya gasi gu phasa vambe. Tepo Jordan a nga thumisa wusingalagadzi wowu uye a hevbude silo nya singi ni gu gambe a tiyiside lihaladzo laye khu vandriyathu. Jordan a hevbude khuye ndriyathu a gu khala muphasedzeyi nya libandla a yede gu simama gu phasa vambe. — 1 Thim. 3:8-10, 13.

13. Lihaladzo li kutside kharini ndriyathu Christian gu dinganedwa gu thuma gambe kha nga lidhota?

¹³ Ahati a bari gu u thumide kha nga muphasedzeyi nya libandla mwendro lidhota gale yoyo? Jehovha a ngu dundruga thumo u wu giridego ni lihaladzo li gu kutsidego gu gira thumo wowo. (1 Kor. 15:58) Nigu gambe, a ngu wona lihaladzo u simamago gu li yeyedza. Ndriyathu moyo nyo pwani khu Christian khunguvanyegide tepo a nga emiswa gu thuma kha nga lidhota. Ambari ulolo, wari khuye: “Nyi di dzi emiseya gu gira satshavbo nyi nga si kodza gasi gu thumeya Jehovha na si si khatadzisegi gu nyi lidhota mwendro ne.” Khu gu gimbiya nya tepo a hathidwe gambe gu thuma kha nga lidhota. Christian wari khuye: “Nyi di gu thava gu thuma gambe kha nga lidhota. Abari gu Jehovha khu wuhindzi waye a ngu dzina gu khuye nyi thuma gambe kha nga lidhota eni nyi na thuma khu gu kutswa khu lihaladzo langu khuye ni vandriyangu.”

14. Ginani u gi hevbulago khesi a ganedego ndriyathu moyo wa Georgia?

¹⁴ Sithumi sa Jehovha si ngu yeyedza lihaladzo vambe. (Mat. 22:37-39) Khu giyeyedzo, ndriyathu moyo nyo pwani khu Elena wa litigo la Georgia wari khuye: “Gilo nyo pheye gi nga nyi kutsa gu tshumayela lihaladzo langu khu Jehovha. Ganiolu, tepo lihaladzo langu khu Papayi wangu wa ndzadzini li nga ba li dandra anilo lihaladzo langu khu vambe li di gu dandra. Nyi di gu zama gu dundrugeya khu sigaradzo va tshanganago naso ni gu ganeya khu silo si na va kuhago myonyo. Tepo nyi nga ba nyi pimisa khavo khu ndziya yeyi, nyi di gu vbweta ngudzu gu va phasa.” — Rom. 10:13-15.

JEHOVHA A NA HI KATEGISA HA GU YEYEDZA LIHALADZO VAMBE

15-16. Kha nga si yeyedzwago avba nya dzifotu, makategwa muni hi nga ma manago khu gu yeyedza lihaladzo vambe?

¹⁵ Tepo hi yeyedzago lihaladzo vandriyathu khandravo basi va wuyedwago. Tepo tungu nya COVID-19 wu nga pheya, ndriyathu moyo nyo pwani khu Paolo ni mwangadzi waye va phaside vandriyathu nya vangi nya vanyamayi va dandridego khu tanga edzi va nga thumisago khidzo mitshini yawe gasi gu ningeya wufakazi. Ndriyathu moyo gupheyani si nga ba si mu garadzeya gu thumisa mutshini waye khu gu hegisa a si kodzide gu wu thumisa. A thumiside mutshini waye gasi gu raneya gidundrugiso valongo vaye. 60 nya avo va manegide Gidundrugisotuno khu gu thumisa vídeoconferência. Ndriyathu yoyu ni valongo vaye va wuyedwe khu giphaso gya Paolo ni mwangadzi waye. Khu gu landreya, ndriyathu yoyu a di loveya Paolo gu khuye: “Hi ngu gu bonga ngudzu khu gu ba u hi hevbudzide gu thumisa mitshini ethu hi dandridego khu tanga. Kha nyi na nga divala gukhatala ogu Jehovha a hi yeyedzidego ni gudzigaradza u gu giridego gasi gu hi phasa.”

¹⁶ Matshango nya nga aya ya Paolo, ma ngu hi hevbudza silo nya lisima ma bwe ma hi dundrugisa gu khayo lihaladzo li na ni lisima ngudzu gu vbindra guti, mwendro makodzelo hi gu nawo nyo gire gilo nyo khaguri. Paolo wari khuye: “Eni nyi hathidwe gasi gu thuma kha nga muwoneleyi nya sirkwitu. Muhuno nyi tugude gu kheni vandriyathu si nga gira na va divade dziganelo nyi vegidego, ganiolu avo kha va divali giphaso nyi va yeyedzidego.”

17. Khu mani mumbe a na wuyedwago ha gu yeyedza lihaladzo?

¹⁷ Tepo hi yeyedzago lihaladzo vambe, ethu hi ngu wuyedwa khu dzindziya hi nga mba dzi vireya. Jonathan a vbanyago Nova Zelândia a ngu seketeya malito yaya. Khu Sabhadhu nyo khaguri ni siyambu, na gu vbisa ngudzu a di wona ndriyathu moyo nya piyoneru na tshumayela enga. Jonathan a di hunga gu thuma ni piyoneru wule khu Dzisabhadhu nyo khaguri ni siyambu. Kha tugula gu khuye tepo a nga ba a vbedza khu gu yeyedza wuwadi anuye a di gu wuyedwa. Jonathan wari khuye: “Khu tepo yile kha nya nga ba nyi gola gu tshumayela. Ganiolu, tepo nyi nga ba nyi engiseya, nyi wona dzindziya edzi vapiyoneru va nga ba va dzi thumisa gasi gu tshumayela khidzo ni gu wona mihandro va yi manago, aneni nyi di pheya gu gola gu tshumayela. Ndriyathu wule nya piyoneru a khade pari yangu nya yikhongolo ngudzu a bwe a nyi phasa gu gola thumo nyo tshumayele ni gu tiyisa wupari wangu ni Jehovha.”

18. Ginani egi Jehovha a vbwetago gu khuye hi gira?

¹⁸ Jehovha a gu vbweta gu khuye hatshavbo hi tiyisa lihaladzo lathu khuye ni vambe. Kha nga hi hevbudego hi nga tiyisa lihaladzo lathu khu Jehovha khu gu leri Bhibhiliya, gu dundrugeya khesi hi si lerigo ni gu ganeya naye khu nombelo tepo yatshavbo. Hi nga tiyisa lihaladzo lathu khu vandriyathu khu gu vbwetedzeya dzindziya nya gu va phase khidzo. Tepo lihaladzo lathu li engedzeyago, hi na tiyisa wupari wathu ni Jehovha ni vandriyathu, nigu hi na dzi buza khu wupari wowo kala gupindruga.