Ina u na ni gukhodwa?

Hi yede gu manega ni gukhodwa gasi gu tsakisa Jehovha. Khu lisine, Bhibhiliya yo ganeya gu khiyo “gukhodwa khandri ga vatshavbo.” (2 Tes. 3:2) Tepo mupostoli Pawulo a nga ganeya isoso, a di gu ganeya khu “vathu nya guvivbedwe khu myonyo,” va nga ba va mu wugeya. Ganiolu, esi a ganedego khu gukhodwa si ngu kuha vambe. Vambe va hathide gu mba khodwa gu khavo Jehovha khuye a nga vanga silo satshavbo. (Rom. 1:20) Vambe va nga ganeya gu khavo va ngu khodwa ga gilo mwendro muthu nyo khaguri a gu na ni tshivba nya yikhongolo. Ganiolu, gukhodwa gogo khandrugo gu vbwetegago gasi gu tsakisa Jehovha.

Hi yede gu tiyisega gu khethu Jehovha womo nigu uye “a ngu tshatshazeya” vale va gu na ni gukhodwa nya gu tiye. (Hebh. 11:6) Gukhodwa, limwedo nya likhalelo nya mihandro nya liphuvbo. Gasi gu hakha liphuvbo nya guage hi yede gu lomba Jehovha. (Luka 11:9, 10, 13) Yimbe ndziya nya lisima gasi gu hakha liphuvbo nya guage khu gu hevbula Lito laye. Khu gu landreya, hi nga dundrugeya ni gu thumisa esi hi hevbudego. Liphuvbo nya guage li na hi phasa womini gwathu ni gu hi phasa gu manega ni gukhodwa gu mu tsakisago.