Ina u ngu si kodza gu hambanisa lisine ni malipha?

1. Wa gu dzipwa kharini khu lisine u li manidego omu nya Lito la Nungungulu?

VATHU va Jehovha va ngu haladza lisine va li manago omu nya Lito la Nungungulu, nigu gukhodwa gwathu gwa gu dzi seketeya omu nya Bhibhiliya. (Rom. 10:17) Hi ngu tumba gu khethu Jehovha wumbide libandla nya Wukristu nga “pilari ni gisekelo nya lisine.” (1 Thim. 3:15) Nigu hi ngu tsaka khu gu engisa “ava va [hi] thangeyago,” a gu ava va hi tshamuseyago Bhibhiliya ni gu hi ninga sileletelo si hi phasago gu gira gugola ga Nungungulu. — Hebh. 13:17.

2. Guya khu Jakobe 5:19, ginani gi nga giregago hwane nya gu ba hi hevbude lisine?

² Ganiolu, ambari hwane nya gu ba hi hevbude lisine ni gu dzumeya gu khethu hi yede gu landrisa sileletelo hi ningwago khu hengeledzano ya Jehovha, hi na tshuka hi ndreyiswa. (Leri Jakobe 5:19.) Sathane o vbweta gu khuye hi ema gu tumba Bhibhiliya mwendro gu tumba sileletelo hi ningwago khu hengeledzano. — Efes. 4:14.

3. Khu ginani hi yedego gu engisa lisine? (Vaefeso 6:13, 14)

³ Leri Vaefeso 6:13, 14. Nya mba hweya, Dhiyabhulosi a na swayela malipha a bwe a gira gu mayigo yatshavbo ma wugeya vathu va Jehovha. (Gutu. 16:13, 14) Hi ngu dziti gambe gu khethu Sathane a na gira satshavbo a si kodzago gasi gu ndreyisa vathu va Jehovha. (Gutu. 12:9) Khu kharato, si na ni lisima gu hi hevbula olu gasi hiti gu hambana nya lisine ni malipha hi bwe hi phareleya lisine. (Rom. 6:17; 1 Ped. 1:22) Hi yede gu gira isoso ha gu ba hi vbweta gu vbuluga avba nya tshanisa nya yikhongolo!

4. Ginani hi na bhulago khigyo avba nya ndrima yeyi?

⁴ Avba nya ndrima yeyi, hi na wona makhalelo mavili hi yedego gu manega nawo gasi hi tugula lisine li gomogo omu nya Bhibhiliya hi bwe hi dzumeya sileletelo hi ningwago khu hengeledzano ya Nungungulu. Khu gu landreya, hi na bhula khu silo siraru hi yedego gu gira gasi hi simama na hi tiyide lisineni.

MAKHALELO HI YEDEGO GU MANEGA NAWO HA GU BA HI VBWETA GU TUGULA LISINE

5. Githawo hi gu nagyo khu Jehovha gya gu hi phasa kharini gu tugula lisine?

⁵ Ninga githawo Jehovha. Gu ninga githawo Jehovha, sa gu thula gu khiso hi ngu mu haladza nigu gima kha hi na nga gira gilo gi gu mba mu tsakisa. Hi virede khu maho nyo fuviye gu hevbula khu gu hambana gu gomogo avba nya silo nya sadi ni silo nyo vivbe mwendro lisine ni malipha gasi hi tsakedwa khu Jehovha. (Mav. 2:3-6; Hebh. 5:14) Khu kotani nya olu vathu va tsakiswago khu gu gira silo si gu mba tsakisa Jehovha, gima kha hi yeli gu dzumeleya gu khethu hi fumwa khu hwanga nya vathu guvbindra lihaladzo hi gu nalo khu Jehovha.

6. Gu thava vathu si kuhide kharini 10 vama va Israyeli nyo bwe va si ganeyi lisine?

⁶ Ha gu thava ngudzu vathu guvbindra gu thava Jehovha, hi na pheya gu khodwa silo si wugeyago lisine hi hevbudzwago khu Jehovha. Wona giyeyedzo nya 12 vama va nga hongola va ya sola litigo eli Jehovha a nga ba a tumbiside gu ninga Vaisrayeli. 10 vasoli va di dzumeleya hwanga va nga ba vari nawo khu Vakhanani wu engedzeya guvbindra lihaladzo va nga ba vari nalo khu Jehovha. Va di embeya vatshavbo Vaisrayeli gu khavo: “Gima kha hi na nga dzi kodza gu va pala, kholu avo va na ni tshivba ngudzu guvbindra ethu.” (Mite. 13:27-31) Lisine gu guya khu mawonelo nya vathu, Vakhanani va diri ni tshivba nya yikhongolo guvbindra Vaisrayeli. Ganiolu, gu ganeya gu khavo Vaisrayeli va di hadzi gu mba si kodza gu pala valala vawe, kha va nga ba va pimisa nga edzi Jehovha a pimisago khidzo. 10 vasoli vale va di yede gu vega gupima ga esi Jehovha a nga ba a vbweta gu khuye Vaisrayeli va gira. Avo gambe va di yede gu dundrugeya khesi Jehovha a nga ba a va girede gale. Khu kharato, avo va di yede gu dundruga gu khavo tshivba va nga ba vari nayo Vakhanani yi di siri ya gilo va gu yi fananisa ni tshivba ya Jehovha. Gu hambana ni 10 vasoli vovo, Josuwa ni Kalebi va di gu vbweta gu tsakedwa khu Jehovha. Avo va di embeya Vaisrayeli gu khavo: “Nari gukhwatshi gugola ga Pfhumu Nungungulu gu na ni ethu, a hi vbohisa ga litigo lolo, a hi ninga li khala Iathu.” — Mite. 14:6-9.

7. Hi nga engedzeya kharini gu ninga githawo Jehovha? (Wona fotu.)

⁷ Gasi hi engedzeya gu ninga githawo Jehovha, hi yede gu vega gupima ga silo si mu tsakisago tepo yatshavbo hi hungago makungo. (Ndzi. 16:8) Tepo u lerigo matimo nya Bhibhiliya dzi wudzise gu khuwe: ‘Nari khatshi nyi di romo ga giemo gegi, ginani nyi nga hadzi gu gira?’ Khu giyeyedzo, nga dundrugeya 10 vasoli va Israyeli na va gu embeya vatshavbo Vaisrayeli gu khavo kha va na nga si kodza gu pala Vakhanani. Ina u di hadzi gukhodwa ga mahungu u mapwidego, u thava vathu mwendro lihaladzo lago khu Jehovha li di hadzi gu engedzeya? Vaisrayeli kha va nga ba va khodwa gu khavo Josuwa ni Kalebi va di gu ganeya lisine. Kha nga handro wakone, Jehovha kha va dzumeleya gu beya Tigoni nya Gitumbiso. — Mite. 14:10, 22, 23.

8. Likhalelo muni hi yedego gu li haguleya, nigu khu ginani?

⁸ Gu dzi nogisa. Jehovha a gu tivegisa lisine ga vale va dzi nogisago. (Mat. 11:25) Nigu khu gu dzi nogisa hi ngu dzumeya giphaso gasi gu hevbula lisine. (Mith. 8:30, 31) Ambari ulolo, hi yede gu dzi woneya gasi hi si dzi khusedzi. Ha gu ba hi dzi khusedza hi na pheya gu pimisa gu khethu mawonelo yathu khyadi ngudzu gu fana ni Milowo ni sileletelo hi ningwago khu hengeledzano ya Jehovha.

9. Hi nga simama kharini gu dzi nogisa?

⁹ Gasi hi simama gu dzi nogisa, hi yede gu dundruga gu khethu hi vadugwana ngudzu ha gu dzi fananisa ni Jehovha. (Ndzi. 8:3, 4) Hi nga lomba gambe Jehovha gasi a hi phasa gu simama gu dzi nogisa ni gu dzumeya gu hevbudzwa. Jehovha a ngu hi phasa gu ninga lisima mapimiselo yaye khu gu thumisa Bhibhiliya ni hengeledzano yaye, nigu a na hi phasa gu ninga lisima isoso guvbindra mapimiselo yathu. Tepo u hevbulago Bhibhiliya zama gu wona edzi Jehovha a haladzago khidzo vathu nyo dzi nogise ni edzi a nyenyago khidzo vathu nya gu dzi khusedze. Nigu dzi garadzeye gu simama gu dzi nogisa wa gu ningwa thumo nyo khaguri wu gu ningago wuthangeyi mwendro wu gu girago wu tidwa khu vathu.

HI NGA SIMAMA KHARINI GU PHARELEYA LISINE

10. Khu vamani Jehovha a nga va thumisa gasi gu ninga sileletelo vathu vaye?

¹⁰ Simama gu tumba sileletelo hi ningwago khu hengeledzano ya Jehovha. Gale, Jehovha thumiside Mosi ni Josuwa gasi gu ningeya sileletelo vathu vaye. (Jos. 1:16, 17) Vaisrayeli va di gu kategiswa tepo va nga ba va wona vama vovo nga vaemeyi va Jehovha Nungungulu. Hwane nya myaga nya yingi, tepo libandla nya Wukristo li nga wumbwa khu tepo nyo pheye, li di gu ningwa sileletelo khu 12 vapostoli. (Mith. 8:14, 15) Khu gu landreya, tsawa wu di engedzedwa gasi gu pata mambe madhota ya Jerusalema. Khu gu landra sileletelo ma nga ba ma ningwa khu vama vava nyo tumbege, “mabandla ma di gu simama gu tiyiswa gukhodwani nigu ma di gu engedzeya tshigu ni tshigu.” (Mith. 16:4, 5) Muhuno wa tshigu, Jehovha a ngu hi kategisa tepo hi landrisago sileletelo hi ningwago khu hengeledzano yaye. Ganiolu, Jehovha a di hadzi gu dzipwa kharini ha gu mba engisa vale a nga va hatha gasi gu hi thangeya? Hi na wona hlamulo nya giwudziso gegi, khu gu wona esi si nga girega tepo Vaisrayeli va nga ba va hongola Tigoni nya Gitumbiso.

11. Ginani gi nga giregeya vale va nga mba ninga githawo Mosi, a gu oyu a nga ba hathidwe khu Jehovha gasi gu thangeya? (Wona fotu.)

¹¹ Khu tepo nyo khaguri, Vaisrayeli na va gu hongola Tigoni nya Gitumbiso, vama nya gu dzi embeye va di wugeya Mosi ni thumo a nga ba a ningidwe khu Jehovha. Avo va di ganeya gu khavo: “Tshangano watshavbo, [vbavbandzi ga Mosi] wu agide, muthu ni muthu nya avo va agide, Pfhumu Nungungulu womo vbakari gwawe.” (Mite. 16:1-3) Ambari olu si nga ba siri lisine gu mahoni gwa Nungungulu “tshangano watshavbo” wu di gu agide, Jehovha a di hathide Mosi gasi gu thangeya vathu Vaye. (Mite. 16:28) Khu gu wugeya Mosi, vama vovo va di gu wugeya Jehovha. Avo kha va nga ba va vega gupima ga esi Jehovha a nga ba a si vbweta kholu avo va di gu vega gupima ga esi avo va nga ba va si vbweta, a gu ndruma. Jehovha songide vama vovo nya vawugeyi, gumogo ni vathu nya vangi va nga ba va dzi patide navo. (Mite. 16:30-35, 41, 49) Muhuno, hi ngu tiyisega gu khethu Jehovha kha tsakiswi khu vale va gu mba engisa sileletelo hi ningwago khu hengeledzano yaye.

12. Khu ginani hi nga tumbago hengeledzano ya Jehovha?

¹² Tepo yatshavbo hi nga tumba hengeledzano ya Jehovha. Sa gu wonega guagani gu khiso gu yedwe gu girwa gu vbindrugedza nyo khaguri avba nya mapwisiselo yathu nya lisine nyo khaguri nya Bhibhiliya mwendro ndziya eyi hi thumeyago khiyo Jehovha, ava va hi thangeyago va gu dzegeya gu gira gu vbindrugedza gogo. (Mav. 4:18) Avo va gu gira isoso kholu guvbindra ni gevbini gilo va gu vbweta gu tsakisa Jehovha. Nigu gambe, guvbindra satshavbo avo va gu hunga makungo na va gu dzi seketeya avba nya Lito la Nungungulu, nigu sithumi satshavbo sa Jehovha si yede gu gira sasimweso.

13. “Malito nya yadi,” ma gu thula ginani, nigu hi yede gu ma gira ginani?

¹³ “Phareleya si tiya avba nya malito nya yadi.” (2 Thim. 1:13) “Malito nya yadi” ma gu thula sihevbudzo nya Wukristo hi si manago omu nya Bhibhiliya. (Joh. 17:17) Sihevbudzo soso, khiso litshina nya satshavbo hi si khodwago. Hengeledzano ya Jehovha ya gu hi hevbudza gasi hi phareleya si tiya avba nya sihevbudzo soso. Ha gu gira isoso, hi na kategiswa.

14. Makristo nyo khaguri ma emide gu phareleya “malito nya yadi” khu ndziya muni?

¹⁴ Ginani gi nga hadzi girega ha gu mba “phareleya si tiya avba nya malito nya yadi?” Wona giyeyedzo gegi. Ga lizana myaga nyo pheye, Makristo nyo khaguri ma di phalalegiseya malipha ma nga ba ma ganeya gu khayo litshigu la Jehovha li di gu vbohide. Adzina saye va di gu hakhide lidangaliya, va nga ba va pimisa gu khavo khu mupostoli Pawulo a nga lova, li nga ba li ganeya khu mahungu yoyo. Khu kotani nya olu ma nga mba gevesisa satshavbo si nga ba si patega, Makristo nyo khaguri ya Tesalonika ma di khodwa ga malipha yoyo ma bwe ma ma vbindriseya ga vambe. Avo na va sa ndreyiswa khu malipha yaya nari khatshi va di gu dundrugede khesi Pawulo a va hevbudzidego tepo a nga ba ari navo. (2 Tes. 2:1-5) Pawulo a di gu ningide wusingalagadzi vandriyaye gasi va si khodwi ga satshavbo va sipwago. Nigu gasi gu va phasa mindru watshigu, Pawulo omu nya lidangaliya nya wuvili a lovedego Vatesalonika a di ganeya gu khuye: “Eni Pawulo, nyi ngu mi rumeya malosedzeya yangu nya gu lowe khu mandza yangu kamo. Egi khigyo giyeyedzo nyi gi thumisago ga madangaliya yangu yatshavbo; khayo malovelo yangu.” — 2 Tes. 3:17.

15. Hi nga dzi vhikeya kharini ga malipha ma girago gu khatshi lisine? Ninga giyeyedzo. (Wona dzifotu.)

¹⁵ Hi nga hevbula ginani khu malangaliya Pawulo a lovedego Vatesalonika? Tepo hipwago silo si gu mba gimbileyana ni esi hi si hevbudego omu nya Bhibhiliya mwendro gupwa silo si nga girega, hi yede gu thumisa wuti hi gu nawo. Ga União Soviética, valala vathu va ningide vandriyathu lidangaliya li nga ba li gira gu khatshi la guta khu Tsindza gwathu nya mafu yatshavbo. Lidangaliya lolo, li di gu kutsa vandriyathu gu wumba yimbe hengeledzano yi gu mba thangedwa khu muthu. Nigu ilo li di gu sinaridwe. Ganiolu, vandriyathu nyo tumbege kha va si khodwa. Avo va di dzegeya gu tugula gu khavo lidangaliya lile kha li nga ba li pwanana ni esi va nga ba va hevbude. Muhuno, valala vathu va gu thumisa interneti gasi gu hi tadza hungo ni gu hi hambanisa. Wulangani nya gu vbiredzeye ‘gu dzuwega mapimo yathu,’ hi yede gu dzi vhikeya ni esi hi sipwago ni gu leri hi bwe hi zama gu tugula gu khethu si ngu gimbileyana ni esi hi hevbulago gani. — 2 Tes. 2:2; 1 Joh. 4:1.

16. Guya khu Varoma 16:17, 18, ginani hi yedego gu gira a gu tshuka muthu nyo khaguri a wugeya lisine?

¹⁶ Simama ni wumowo ni vale va tumbegago ga Jehovha. Nungungulu o vbweta gu khuye hi mu khozeya khu wumowo ni vandriyathu. Ethu hi na simama ni wumowo ha gu phareleya lisine. Ni wevbini a swayelago malipha a bwe a wugeya lisine, a gu hambanisa libandla, khu kharato Nungungulu a gu hi gengedza gasi hi “gimbileyani hwindzo navo.” Ho mba gira isoso, hi na hegisa khu gu ndreyiswa lisineni hi bwe hi si tumbegi ga Jehovha. — Leri Varoma 16:17, 18.

17. Hi na wuyedwa kharini ha gu tugula ni gu phareleya lisine?

¹⁷ Ha gu tugula lisine hi bwe hi li phareleya gwadi, hi na simama ni wupari nyo tiye ni Jehovha hi bwe hi tiyisa gukhodwa gwathu. (Efes. 4:15, 16) Hi na dzi vhikeya ga malipha ni sihevbudzo sa Sathane, nigu hi na simama na hi vhikelegide khu gu phaswa khu Jehovha ndrani nya tshanisa nya yikhongolo. Khu kharato, simamani gu phareleya lisine, nigu “Nungungulu nya gurule a na ba ari ni enu.”— Filp. 4:8, 9.