Jehovha o vbweta gu khuye vatshavbo va dzi laya

1. Muthu a dzi layidego a gu gira ginani?

TEPO hi girago gilo nyo vivbe, hi yede gu dzi laya. Guya khu Bhibhiliya, muthu a dzi layago a gu nyenya esi nyo vivbe a giridego, a vbindrugedza mavbanyelo “a bwe a dzi emiseya gu mba gira gighoho gyagimwegyo. — Mt 3:8; Mth 3:19; 2Pe 3:9.”

2. Khu ginani hatshavbo hi yedego gu hevbula maningano ni gudzilaya? (Nehemiya 8:9-11)

² Vathu vatshavbo va yede gu hevbula maningano ni gudzilaya. Khu ginani? Kholu hatshavbo hi ngu ghoha tshigu ni tshigu. Kha nga olu hi gu situgulwana sa Adhamu ni Evha, hatshavbo hi thapedwe khu gighoho ni gufa. (Rom. 3:23; 5:12) Mwalo a vbulugago ga isoso. Ambari vathu va nga ba vari ni gukhodwa nyo tiye, nya nga mupostoli Pawulo kha sa va vbevbugeya gu woneleya gudogoreya gwaye nya mba gwadi. (Rom. 7:21-24) Ina isoso so thula gu khiso hi na khaleya gu vbeya tshivba tepo yatshavbo khu kotani nya sighoho sathu? Ahihi, Jehovha Nungungulu nya wuhindzi nigu o vbweta gu khuye hi tsaka. Wona giyeyedzo gya Vajudha va matshigoni ya Nehemiya. (Leri Nehemiya 8:9-11.) Jehovha kha nga ba a vbweta gu khuye avo va garadzega ngudzu khu kotani nya sighoho va giridego gale. Uye a di gu vbweta gu khuye va mu khozeya na va tsakide. Jehovha a ngu dziti gu khuye tepo hi dzi layago isoso si ngu hi gira hi tsaka. Khu kharato, a gu hi hevbudza maningano ni isoso. Ha gu dzi laya khu sighoho hi giridego, hi nga tiyisega gu khethu Papayi wathu nya wuhindzi a na hi divaleya.

3. Ginani hi na bhulago khigyo avba nya ndrima yeyi?

³ Avba nya ndrima yeyi, hi na wona silo siraru si na hi phasago gu hevbula nya singi maningano ni gu dzi laya. Nyo pheye, ginani egi Jehovha a hevbudzidego Vaisrayeli maningano ni gudzilaya? Nya wuvili, hi na hevbula edzi Jehovha a phasidego khidzo vathu nya mba vbeleya gu dzi laya. Khu gu hegisa, hi na bhula khesi valandreyi va Jesu va si hevbudego maningano ni gudzilaya.

ESI JEHOVHA A HEVBUDZIDEGO VAISRAYELI MANINGANO NI GUDZILAYA

4. Ginani Jehovha a hevbudzidego Vaisrayeli maningano ni gudzilaya?

⁴ Tepo Jehovha a nga ninga milayo yaye Vaisrayeli, avo va di mu tumbisa gu mu engisa. Nigu Jehovha tumbiside gu khuye va gu engisa milayo yoyo, uye a di hadzi gu va vhikeya ni gu va kategisa. Na gu ganeya khu milayo yaye, Jehovha a di khuye: “Kholu Nayo yoyu, nyi gu ningago muhuno, kha wa sihala, wu mwalo hwindzo nago.” (Dhet. 30:11, 16) Ganiolu, va gu mba engisa milayo yaye mwendro va gu hatha gu khozeya vambe vanungungulu, Jehovha a di hadzi gu mba va vhikeya, nigu va di hadzi gu tshaniseka. Ganiolu, kha sa nga ba si thula gu khiso Jehovha na va digide khu gu vbeleya. Avo va diri ni lithomo nya gu ‘va vbindrugedza va wuya ga Pfhumu Nungungulu wawe ni gu engisa lito laye.’ (Dhet. 30:1-3, 17-20) Khu mambe malito, va diri ni tepo gasi va dzi laya. Va gu gira isoso, Jehovha a di hadzi gu hidzimeya gwawe a bwe a va kategisa gambe.

5. Jehovha a yeyedzide kharini gu khuye a di gu laphisa monyo tepo Vaisrayeli va nga ba va si mu engise? (2 Dzipfhumu 17:13, 14)

⁵ Ambari olu Vaisrayeli va nga ba va hathidwe khu Jehovha kha nga vathu vaye, avo va mu wugede dzitepo nya dzingi. Avo va khozede sifananiso ni gu gira simbe silo nyo vivbe ngudzu. Khu kotani nya isoso, avo va tshanisekide ngudzu. Ganiolu, Jehovha kha va tsukula, uye a di zama gu phasa vathu vava gu mu thumeya gambe. Uye a rumede Vaprofeti dzitepo nya dzingi gasi gu va kutsa gu dzi laya ni gu thumeya Jehovha khu monyo wawe watshavbo. — Leri 2 Dzipfhumu 17:13, 14.

6. Jehovha thumiside kharini vaprofeti vaye gasi gu hevbudza vathu vaye lisima nya gu dzi laye? (Wona fotu.)

⁶ Tepo vathu va Jehovha va nga ba va si mu engise, a di gu rumeya vaprofeti vaye gasi gu va gengedza khesi si nga hadzi gu va giregeya va gu mba vbindrugedza ni gu dzi laya. Khu giyeyedzo, Nungungulu a di embeya Jeremiya gasi gu ya embeya Vaisrayeli gu khuye: “Wuya eno gwangu, ambari u ndreyidego. Kholu nyi na gu pwela wuhindzi, kha nyi na gu girela likhulo. Gu vbwetega basi gu dzumela gighoho gyago, kholu khwa tumbega ga Pfhumu Nungungulu wago.” (Jer. 3:12, 13) Jehovha a di embeya Joyele gasi gu embeya vathu vaye gu khuye: “Vbindrugedzani mu wuye gwangu khu monyo wanu watshavbo.” (Joy. 2:12, 13) Jehovha gambe thumiside Isaya gasi gu ganeya gu khuye: “Hambani, mu dzi agisa, ndreyisani mahoni gwangu sigiro sanu nya guvivbe, si yiseni hwindzo ni eni; digani gu gira mithumo nya guvivbe.” (Isa. 1:16-19) Nigu khu gu thumisa Ezekiyeli, Jehovha a di ganeya gu khuye: “Ina kamwe mwa gu alakanya gukhenu, nyi ngu tsaka khu gu wona muthu nya guvivbedwe khu monyo na gufa, gani? . . . Igyo eni nyi gi vbwetago khu gu a vbindrugedza mavbanyelo, a diga dzindzila dzaye nya guvivbe, gasi a vbanye. Eni kha nyi tsakiswi khu gufa ga muthu. Dzi layeni mu na vbanya!” (Ezek. 18:23, 32) Jehovha a ngu tsaka ngudzu tepo a wonago vathu na va gu dzi laya khesi va giridego kholu uye a gu vbweta gu khuye hi vbanya kala gupindruga. Khu kharato, Jehovha kha vireyi gu khuye muthu a vbindrugedza gasi a pheya gu mu phasa. Hongoleni hi wona siyeyedzo nyo khaguri si yeyedzago isoso.

7. Khu gu thumisa giyeyedzo gya mwangadzi wa muprofeti Hoseya, ginani Jehovha a hevbudzidego vathu vaye?

⁷ Wona esi Jehovha a hevbudzidego vathu vaye khu gu thumisa giyeyedzo gya Ghomeri, mwangadzi wa muprofeti Hoseya. Hwane nya gu ba a giride wubhayi a di diga Hoseya aya khala ni vambe vama. Ginani Jehovha a giridego? Jehovha a si kodzago gu wona esi si gomogo myonyoni nya vathu, a di embeya Hoseya gu khuye: “Indra gambe uya haladzana ni nyamayi moyo a haladzwago khu pari yago, ambari olu a gu gibhayi. Mu haladze nga idzo Pfhumu a golago khidzo sanana sa Israyeli, ambari olu avo va mu pfhuraredego va gola vambe vanungungulu.” (Hos. 3:1; Mav. 16:2) Wona gu khuwe mwangadzi wa Hoseya a di gu simama gu gira gighoho nya gikhongolo. Ambari ulolo, Jehovha a di embeya Hoseya gasi gu vbwetedzeya mwangadzi waye a mu divaleya va bwe va simama gumogo.a Khu giyeyedzo gegi, Jehovha a di gu vbweta gu hevbudza vathu vaye edzi a nga ba a dzipwa khidzo maningano khavo. Ambari olu va nga ba va simama gu gira silo nyo vivbe, uye a di gu simama gu va haladza. Uye simamide gu rumeya vaprofeti vaye gasi guya va kutsa gu dzi laya ni gu vbindrugedza mavbanyelo yawe. Giyeyedzo gegi gya gu hi hevbudza gu khigyo Jehovha a ngu yiti myonyo yathu, nigu a gu zama gu phasa muthu nyo khaguri a giridego sighoho nya sikhongolo gasi a dzi laya. (Mav. 17:3) Hongoleni hi wona edzi Jehovha a girago khidzo isoso.

ESI JEHOVHA A GIRAGO GASI GU PHASA VATHU NYA MBA VBELEYA GASI GU DZI LAYA

8. Ginani Jehovha a giridego gasi gu phasa Kayimi gu a dzi laya? (Genesi 4:3-7) (Wona fotu.)

⁸ Kayimi gi diri gyanana nyo pheye gya Adhamu ni Evha. Gu fana ni satshavbo sanana sa Adhamu ni Evha, uye a thapedzisidwe khu vavelegi vaye gudogoreya nya gu gire silo nyo vivbe. Gu diga isoso, Bhibhiliya ya gu ganeya khuye, gu khiyo: “Mithumo yaye yi di gu vivbide.” (1 Joh. 3:12) Isoso adzina si ngu tshamuseya gighelo gi nga gira Jehovha a si ‘tsakiswi khu ningelo waye’ tepo a nga gira muphaso. Wulangani nya gu vbindrugedze mavbanyelo yaye, “Kayimi a di goroga ngudzu a sivbala khovbeni khu lidiwo.” Ginani egi Jehovha a giridego gasi gu mu phasa? Jehovha a di ganeya ni Kayimi. (Leri Genesi 4:3-7.) Wona gu khuwe Jehovha a di ganeya naye khu ndziya nya yadi a bwe a mu embeya gu khuye a di hadzi gu mu kategisa a gu gira silo nya sadi. Jehovha gambe a gengedzide Kayimi gu khuye a gu simama na gorogide a na hegisa khu gu gira silo nyo vivbe. Nya mba tsakisa khu gu Kayimi kha engisa. Uye a di bomba gu phaswa khu Jehovha nigu kha dzi laya. Hwane nya isoso, ina Jehovha a di hunga gu mba phasa gambe vambe vathu gu dzi laya? Ahihi!

9. Ginani Jehovha a giridego gasi gu phasa Dhavhidhe gu a dzi laya?

⁹ Jehovha a di gu gola ngudzu Pfhumu Dhavhidhe nyo bwe a mu rana gu khuye “mwama a tsakisago monyo wangu.” (Mith. 13:22) Ganiolu, Dhavhidhe giride sighoho nya sikhongolo nya nga gu gira wubhayi ni gu songa. Guya Khu Nayo wa Mosi, Dhavhidhe a di yede gu songwa. (Levhi 20:10; Mite. 35:31) Ambari ulolo, Jehovha a di gu vbweta gu phasa Dhavhidhe gu dzi laya.b Jehovha a di hunga gu rumeya muprofeti Natani gasi gu endreya Dhavhidhe, ambari olu a nga ba a si yeyedzi gu khuye a di gu dzi layide. Natani a di thumisa giyeyedzo gi nga phasa Dhavhidhe gu pwisisa gu khuye a di gu giride sighoho nya sikhongolo. Dhavhidhe a di tugula gu khuye a di gu khunguvanyiside Jehovha, khavbovbo a dzi laya. (2 Sam. 12:1-14) Uye a di lova ndzimo yi nga ba yi yeyedza edzi a nga ba a dzi layide khidzo khu monyo waye watshavbo khesi a giridego. (Ndzi. 51, Cabeçalho) Vathu nya vangi va giridego sighoho va gu mana wuthavelo tepo va lerigo ndzimo yeyi va bwe va dzi laya. Wa gu dzipwa kharini tepo u dundrugeyago khu lihaladzo Jehovha a yeyedzidego Dhavhidhe gasi gu mu phasa gu dzi laya?

10. Wa gu dzipwa kharini khu gu dziti gu khuwe Jehovha a ngu hi laphiseya monyo nigu a ngu hi divaleya?

¹⁰ Jehovha a ngu nyenya ni gevbini a gu gighoho. (Ndzi. 5:4, 5) Ganiolu, Jehovha a ngu hi haladza nigu tepo hi ghohago, uye a gu vbweta gu hi phasa. Uye tepo yatshavbo a gu zama gu phasa vathu ambari gighohi nya gikhongolo ngudzu gasi va dzi laya ni gu gira wupari naye. Si ngu thaveleya gu dziti gu khethu Jehovha o vbweta gu hi divaleya. Tepo hi dundrugeyago khu gu laphisa-monyo ni divalelo wa Jehovha, ethu ha gu dzi emiseya gu simama gu tumbega gwaye hi bwe hi dzegeya gu dzi laya tepo hi ghohago. Olu hongoleni hi wona esi Jesu a hevbudzidego vapizane vaye maningano ni gu dzi laya.

ESI JESU A HEVBUDZIDEGO VALANDREYI MANINGANO NI GUDZILAYA

11-12. Giyeyedzo muni Jesu a gi thumisidego gasi gu hi hevbudza gu khuye Jehovha a dzi emisede gu hi divaleya? (Wona kapa.)

¹¹ Khu mwaga nya 29 matshigoni yathu, yi di gu vbohide tepo gasi gu vboha Mesiya. Kha nga si khumbugidwego ga ndrima yi vbindridego, Jehovha a di thumisa Johane Mubhabhatisi ni Jesu Kristo gasi gu hevbudza vathu lisima nya gu dzi laye. — Mat. 3:1, 2; 4:17.

¹² Tepo Jesu a nga ba a romo mafuni, uye hevbudzide vathu gu khuye Papayi waye a dzi emisede gu hi divaleya tepo hi ghohago. Jesu a hi hevbudzide gilo nya lisima tepo a nga ganeya khu matimo nya gyanana gi nga ba gi dzimede. Ga matimo yoyo, muphya a di hunga gu duga khu ndrangani aya pheya gu gira silo nya singi nyo vivbe. Ganiolu, hwane nya tepo nyo khaguri uye ‘a di pimisa gwadi’ a bwe a bweleya gaya. Ginani papayi wakone a giridego? Jesu a di ganeya gu khuye muphya yoyo “na ngari hwindzo, papayi waye a di mu wona, a mu pweya, a khuga khu gututuma a ya mu abrasari a bwe a mu bhejari.” Gyanana gyaye gi di lomba gu khigyo gi khala githumi ndrangani ga papayi wagyo, ganiolu papayi wagyo a di gi embeya gu khuye: “Gyanana gyangu . . . gi di gu dzimede, ganiolu gi wide.” Khavbovbo, a di gi dzumeleya gu gi wuya gaya. (Luka 15:11-32) Tepo Jesu a nga ba a romo ndzadzini, na siti mafuni, khu lisine a wonide edzi Papayi waye a yeyedzidego khidzo pweya-wusiwana ni gu divaleya vale va nga ba va dzi laya khu dzitepo nya dzingi. Matimo yaya Jesu a kontaridego, ma ngu hi thaveleya ni gu yeyedza edzi Papayi wathu Jehovha a gu na ni wuhindzi khidzo.

13-14. Ginani Pedro a hevbudego maningano ni gu dzi laya, nigu ginani uye a hevbudzidego vambe? (Wona fotu.)

¹³ Pedro a hevbude silo nya singi ni Jesu maningano ni gu dzi laya ni divalelo. Pedro a giride sihoso nya singi, nigu Jesu tepo yatshavbo a di gu dzi emisede gu mu divaleya. Khu giyeyedzo, Pedro bombide guraru gu khuye a di gu muti Jesu nigu a garadzegide ngudzu khu kotani nya isoso. (Mat. 26:34, 35, 69-75) Ganiolu, hwane nya gu ba Jesu a wusidwe khu gufani, uye a di dzi wonegisa ga Pedro na romo enga. (Luka 24:33, 34; 1 Kor. 15:3-5) Nya mba kanakana, Jesu a di gu dziti gu khuye Pedro a di gu dzi layide, nigu uye a di gu vbweta gu yeyedza Pedro gu khuye a di gu mu divalede. — Marko 16:7.

¹⁴ Pedro pwisiside gu khuye so thula ginani gu dzi laya ni gu divaledwa khu giyeyedzo gyaye kamo. Khu kharato, a di hadzi gu si kodza gu hevbudza vambe maningano ni gu dzi laya ni divalelo. Hwane nya tepo nyo khaguri khu litshigu nya buzo nya Pentekosta, Pedro a di vega ganelo na gu tshamuseya Vajudha va nga ba va si khodwi ga Jesu gu khuye avo va diri ni nandru khu gufa ga Mesiya. Ambari ulolo, khu lihaladzo a di va embeya gu khuye: “Dzi layeni mu vbindrugedza, gasi gu sighoho sanu si futwa gasi Jehovha a mi ningani dzinangu nya gupepe.” (Mith. 3:14, 15, 17, 19) Pedro a di tshamuseya gu khuye gudzilaya gu girago muthu a vbindrugedza. Isoso so thula gu khiso a gu vbindrugedza mapimiselo yaye nyo vivbe, a ema gu gira esi nyo vivbe ni gu pheya gu gira silo si tsakisago Nungungulu. Pedro gambe yeyedzide gu khuye Jehovha a di hadzi gu va divaleya khu gu vbeleya. Iso si tshulago gu khiso a na si futa khu gu vbeleya. Nigu hwane nya myaga nya yingi, Pedro a di tiyisegisa Makristo gu khuye: “Jehovha . . . a gu laphisa monyo khu kotani yanu kholu kha vbweti gu khuye ne ni moyo a fuviswa, ganiolu a gu vbweta gu khuye vatshavbo va dzi laya.” (2 Ped. 3:9) Tepo hi dzi layago khu sighoho hi giridego, ambari na siri sikhongolo ngudzu, si ngu hi thaveleya gu dziti gu khethu Jehovha a na hi divaleya khu gu vbeleya!

15-16. a) Pawulo a hevbude kharini maningano ni divalelo? (1 Thimoti 1:12-15) b) Hi na bhula khu ginani ga ndrima yi landreyago?

¹⁵ Pawulo wa Tarsu a di gu giride silo nya singi nyo vivbe. Uye a di gu wugede Makristo khu tshivba. Makristo nya mangi adzina ma di gu pimisa gu khayo Pawulo gima kha na nga vbindrugedza. Ganiolu, Jesu a di gu dziti gu khuye Pawulo a nga vbindrugedza a bwe a dzi laya. Uye ni Papayi waye va di gu wona makhalelo nya yadi ya Pawulo. Jesu a di khuye: “Mwama yoyu nyi mu hathide.” (Mith. 9:15) Jesu thumiside gilewugiso gasi gu phasa Pawulo gu dzi laya. (Mith. 7:58–8:3; 9:1-9, 17-20) Hwane nya gu ba a khade Mukristo, Pawulo yeyedzide edzi a nga ba a bonga khidzo khu wuwadi ni wuhindzi Jehovha ni Jesu va mu yeyedzidego. (Leri 1 Thimoti 1:12-15.) Pawulo a di khuye: “Khu wuwadi waye Nungungulu o zama gu gu phasa gasi gu u vbindrugedza.” — Rom. 2:4.

¹⁶ Ga tepo nyo khaguri, Pawulo a dipwa gu khuye libandla la Korinto li di gu dzumelede mwama nyo khaguri a nga gira wubhayi a simama gu gira gipandre nya libandla. Ginani egi Pawulo a va embedego gu gira? Esi Pawulo a lovedego libandla la Korinto sa gu hi hevbudza edzi Jehovha a yeyedzago khidzo lihaladzo tepo a kawukago sithumi saye ni gu yeyedza wuhindzi tepo vathu va dzi layago. Ga ndrima yi landreyago, hi na bhula khesi si giregidego ga libandla la Korinto ni edzi hi nga pimedzeyago khidzo wuhindzi wa Jehovha.