Hunga makungo ma tsakisago Jehovha

1. Ginani egi hatshavbo hi yedego gu gira?

MATSHIGU yatshavbo hi ngu hunga makungo. Mambe makungo ma ngu vbevbuga gu ma hunga, nya nga egi u na hodzago mwendro ora u na lalago khiyo. Ganiolu, mambe makungo ma ngu garadza gu ma hunga. Kholu makungo yathu ma nga kuha womi wathu, litsako lathu, vathu hi va haladzago ni wukhozeyi wathu. Ethu ha gu vbweta gu khethu makungo yathu ma hi wuyedzisa ethu vamune gumogo ni va ndrangani gwathu. Gu diga satshavbo, ethu ha gu vbweta gu khethu makungo yathu ma tsakisa Jehovha. — Rom. 12:1, 2.

2. Gasi u hunga makungo nya yadi, ginani u yedego gu gira?

² U na hunga makungo nya yadi wa gu dzigaradzeya: 1) guti satshavbo si pategago, 2) gu wona silo khu mawonelo ya Jehovha, ni 3) gu dundrugeya gwadi khesi u nga hathago. Ga ndrima yeyi, hi na bhula khu silo sesi nya siraru hi yedego gu gira ni gu wona edzi hi nga trenarigo khidzo makodzelo yathu nya gu pimise.— Mav. 2:11.

GUTI SATSHAVBO SI PATEGAGO

3. Ninga giyeyedzo nya gu khu ginani si vbwetegago gu hiti satshavbo si pategago gasi hi hunga makungo nya yadi.

³ Gilo nya gu pheye u yedego u gira gasi u hunga makungo nya yadi, khu guti satshavbo si pategago. Khu ginani si gu ni lisima? Nga dundrugeya khu muthu nyo khaguri a hongolago ga dhogodheya, nari ni madwali nya makhongolo. Ina dhogodheya a di hadzi gu hunga makungo maningano ni mathumelo nya madwali, nya mba pheya khu gu mu gevesisa mwendro kamo gu mu wudzisa silo nyo khaguri? Ahihi. Anuwe u nga hunga makungo nya yadi wa gu pheya khu gu dundrugeya gwadi khu satshavbo si pategago avba nya giemo gyago. U na si gira kharini isoso?

4. Guya khu Mavingu 18:13, u nga yeyedza kharini gu khuwe u nguti satshavbo si pategago? (Wona fotu.)

⁴ U ngati satshavbo si pategago khu gu dzi gira siwudziso. Khu giyeyedzo, nga dundrugeya na wu kovhidharidwe ga tshangano nya vathu. Ina u yede gu hongola? Wa gu ba u si muti oyu a thangeyago tshangano wowo, u yede gu dzi gira siwudziso sesi: “Tshangano wowo wu na girwa hayi nigu lini? Vathu vangani va na ba va romo? Khu mani a na va woneleyago? Khu va mani va na manegago? Ginani gi nga dongisedwa gasi vathu va gira ga tshangano wowo? Gu na ba guri ni wadwa?” Mihlamulo nya siwudziso sesi, yi na gu phasa gu hunga makungo nya yadi khu wugengeyi. — Leri Mavingu 18:13.

5. Ginani u yedego gu gira hwane nya gu ba u siti satshavbo si pategago?

⁵ Hwane nya gu ba u siti satshavbo si pategago, dundrugeya gwadi khu mahungu yatshavbo u gu nawo. Khu giyeyedzo, ginani u nga girago wa gu tugula gu khuwe ga tshangano wowo gu na ba guri ni vathu va si ningigo githawo milayo nya Bhibhiliya, nigu wadwa wu na sedwa nya mu seye? Ina u ngu si kodza gu wona gu khuwe tshangano wowo wu nga khala tshangano nya sidhakwa? (1 Ped. 4:3) Ginani u nga girago wa gu tugula gu khuwe khu kotani nya tshangano wowo, u na luza mitshangano nya libandla mwendro u si hongoli thumoni nyo tshumayele? Tepo u wonago satshavbo si pategago ga mahungo yoyo, u na si kodza gu hunga makungo nya yadi. Ganiolu, gu na ni simbe hi yedego gu gira. Uwe u ngu dziti edzi u dzipwago khidzo khu mahungu yaya, ganiolu dzi wudzise gu khuwe: ‘Jehovha a gu dzipwa kharini khu mahungu yoyo?’— Mav. 2:6.

GU WONA SILO KHU MAWONELO YA JEHOVHA

6. Guya khu Jakobe 1:5, khu ginani hi yedego gu gombeya ga Jehovha?

⁶ Lomba Jehovha gasi a gu phasa gu wona esi a pimisago khu mahungu yoyo. Jehovha a hi tumbiside gu hi ninga guti ni wugengeyi gasi hi hunga makungo ma na mu tsakisago. Nigu uye a ngu hi ninga guti gogo “khu wuhindzi nya mba vbwetedzeya gihoso.” — Leri Jakobe 1:5.

7. U nga mana kharini mipimiso ya Jehovha? Tshamuseya.

⁷ Hwane nya gu ba u lombide giphaso ga Jehovha, zama gu wona hlamulo nya nombelo wago. Khu giyeyedzo: Wa gu ba u endra nigu na wu si dziti gu khuwe u womo hayi, u yede gu wudzisa muthu a vbanyago ga wulanga wowo gasi a gu phasa. Ina u di hadzi gu khuga u hongola na nga si gu hlamuli? Ahihi. Uwe u di hadzi gu engiseya gwadi esi a na gu embeyago. Khu ndziya nya gufane, hwane nya gu ba u lombide guti ga Jehovha, zama gu wona hlamulo nya nombelo wago khu gu vbwetedzeya matshina nya milayo nya Bhibhiliya yi pwananago ni giemo gyago. Khu giyeyedzo, tepo u hungago makungo nyo pategi mwendro ne ga tshangano nya vathu hi ganedego khuwo gupheyani, u yede gu wona esi Bhibhiliya yi si ganeyago khu dzifesta nya mba woneledwa, dzipari nya mba dzadi ni lisima nya gu thangise Mufumo gupheya nasiri esi hi si vbwetago. — Mat. 6:33; Rom. 13:13; 1 Kor. 15:33.

8. U nga gira ginani wa gu ba u vbweta giphaso gasi u mana mahungu u ma vbwetago, nigu u nga ma khedza hayi? (Wona fotu.)

⁸ Dzimbe dzitepo, u nga vbweta giphaso gasi u mana mahungu u ma vbwetago. U nga lomba wusingalagadzi ga ndriyathu a vidzidwego. Ambari ulolo, u nga wuyedwa gambe wa gu peskizari mahungu yoyo khu wabune. Hi na ni dziferamenta dzi hi phasago gu mana mahungo, nya nga Libhuku nyo peskizari khilo nya Dzifakazi dza Jehovha ni Milowo nya Bhibhiliya yi hi phasago gu vbanya kha nga Makristo. Dundruga misuwo yago, a gu gu hunga makungo ma na tsakisago Jehovha.

9. Hi nga tiyisega kharini gu khethu makungo hi ma hungago ma na tsakisa Jehovha? (Vaefeso 5:17)

⁹ Hi nga tiyisega kharini gu khethu makungo yathu ma na tsakisa Jehovha? Gupheya, hi yede guti gugola gwaye. Bhibhiliya yari khiyo: “Wugengeli ni mapimo khu guti uye a Agidego!” (Mav. 9:10.) Isoso lisine, kholu mapwisiselo nya lisine ma guta khiyo nya guti makhalelo ya Jehovha, makungo yaye, esi a si golago niso a si nyenyago. Dzi wudzise esi, ‘Esi nyi sitigo khu Jehovha, si ngu nyi gira nyi hunga makungo ma na mu tsakisago?’ — Leri Vaefeso 5:17.

10. Khu ginani matshina nya milayo nya Bhibhiliya ma gu na ni lisima guvbindra siolovedzo nya ndranga yathu mwendro sa gipandreni gwathu?

¹⁰ Gasi hi tsakisa Jehovha, hi yede gu gira silo si gu mba tsakisa vambe vathu. Khu giyeyedzo, vambe vavelegi na vari ni makungo nya yadi, va nga gurumedza gyanana gyawe gi dandridego gasi gu tshadha ni muthu a gu na ni makodzelo mwendro kamo muthu a na va ningago dzitsapawu nya dzingi, ganiolu nya mba khatadzisega gu a vidzidwe khu liphuvboni mwendro ne. Lisine gu avo va gu vbweta gu gyanana gyawe gi khadzisega khu nyamani, ganiolu khu mani a na mu phasago gu tiyisa wupari waye ni Jehovha? Jehovha a gu ma wona kharini mahungu yoyo? Hi ngu mana hlamulo wakone ga Matewu 6:33. Avba nya libhuku leli, Makristo ma gu kutswa gu “vbwetedzeya Mufumo wa Nungungulu.” Ambari ulolo, ethu hi ngu ninga githawo vavelegi vathu ni vambe vathu va gipandreni gwathu, ganiolu igyo gi gu na ni lisima gwathu gu tsakisa Jehovha.

GU DUNDRUGEYA GWADI KHESI U NGA HATHAGO

11. Khu levbini likhalelo li khumbugwago omu ga Vafilipi 1:9, 10 li na gu phasago gu dundrugeya gwadi khesi u nga hathago?

¹¹ Hwane nya gu ba u manide matshina nya milayo ma yelanago ni makungo yago, pimisa gwadi khesi u nga hathago. (Leri Vafilipi 1:9, 10.) Likhalelo nyo pimise, li na gu phasa gu dundrugeya khesi si na giregago avba nya esi u na si hathago. Dzimbe dzitepo si nga vbevbuga gu hunga makungo, ganiolu khandri yatshavbo makungo ma vbevbugago gu ma hunga. Khu kharato, makodzelo nya gu pimise ma na hi phasa gu hunga makungo khu wugengeyi ambari ga siemo nyo garadze.

12-13. Gu pimisa gu nga gu phasa kharini gu hunga makungo khu wugengeyi maningano ni thumo u na wu hathago?

¹² Dundrugeya khu giyeyedzo gegi. Uwe wa gu vbwetedzeya thumo gasi gu sayisa ndranga yago. U mana mithumo mivili. Khavbovbo, wa gu dundrugeya satshavbo si pategago, nya nga thumo wakone u na girago, longoloko wakone, tepo u na yi vbedzago na wu gu hongola thumotuno ni simbe silo si pategago. Mithumo ya mivili yi ngu dzumelega gu yi girwa khu Makristo. Adzina saye, u nga hatha thumo mowo khu kotani nya thumo wakone mwendro khu gu ba dzitsapawu u na hakhago na dziri dzingi. Somo simbe silo u yedego gu dundrugeya khiso na wu si hungi makungo.

¹³ Khu giyeyedzo. Ina thumo wowo wu na nyi tshiyela tepo nyo hongole mitshanganoni nya libandla? Ina thumo wowo wu na nyi tshiyela tepo nya gu phase ndranga yangu gudzipwa na yi vhikelegide, gu tsaka ni gu hidzimeya ga Jehovha? Gu dzi gira siwudziso sesi, si na gu phasa gu thangisa “silo nya lisima”, nya nga wukhozeyi wago ni ndranga yago, guvbindra gu mana dzitsapawu nya dzingi. Khu kharato, u na hunga makungo ma na kategiswago khu Jehovha.

14. Gu pimisa ni gu yeyedza lihaladzo si na hi phasa kharini gu potsa gu tshunganisa vambe?

¹⁴ Gu pimisa gu ngu hi gira hi wona edzi makungo yathu ma nga kuhago khidzo vambe vathu, gasi hi si “tshunganisi vambe.” (Filp. 1:10) Isoso si na ni lisima tepo hi hungago makungo, nya nga maambalelo yathu. Khu giyeyedzo, hi nga hatha gu ambala sombo nyo khaguri si hi tsakisago. Ganiolu, ahati vambe vbavbandze mwendro ndrani nya libandla va gu khunguvanyega khu isoso? Wugengeyi, wu na hi phasa gu ninga githawo gudzipwa gwawe. Lihaladzo li na hi kutsa gu mba gira silo si na khunguvanyisago “vambe.” (1 Kor. 10:23, 24, 32; 1 Thim. 2:9, 10) Khu gu landreya, hi na hunga makungo ma yeyedzago gu khayo hi ngu haladza ni gu ninga githawo vambe.

15. Ginani u yedego gu gi dundrugeya na wu si hungi makungo nya lisima ngudzu?

¹⁵ Wa gu ba u vbweta gu hunga makungo nya lisima, dundrugeya khesi u yedego gu gira gasi u tadzisa makungo yago. Jesu a hi hevbudzide gu ‘khala vbavbatshi hi wona dzitsapawu hi gu nadzo.’ (Luka 14:28) Khu kharato, wona tepo u na yi vbedzago, esi u gu naso ni tshivba u na yi vbedzago gasi makungo yago ma dugeleya. Ga siemo nyo khaguri, u nga bhula ni ndranga yago gasi gu wona esi moyo ni moyo wawe a yedego gu gira gasi a seketeya makungo yoyo. Khu ginani malulamiselo yaya ma gu na ni lisima? Isoso si na gu phasa gu tugula esi u yedego gu tshukwadzisa avba nya makungo yago mwendro gu mana mawonelo ma na phasago ngudzu. Nigu tepo u patago sivbango nya ndranga yago ni gu engiseya mawonelo yaso, iso si na thuma gumogo nago gasi makungo yoyo ma dugeleya. — Mav. 15:22.

HUNGA MAKUNGO MA NA DUGELEYAGO

16. Silo muni u yedego gu gira gasi makungo yago ma dugeleya? (Wona kwadru yi gu khiyo “U nga hunga kharini makungo khu wugengeyi?”)

¹⁶ Wa gu ba u giride satshavbo si khumbugidwego avba nya ndrima yeyi, u dongide gasi gu hunga makungo nya yadi. U tugude satshavbo si pategago u bwe u wona matshina nya milayo ma na gu phasago gu hunga makungo ma na tsakisago Jehovha. Olu u nga lomba Jehovha a kategisa makungo yago gasi ma dugeleya.

17. Khu gevbini gilo nya lisima gi na hi phasago gu hunga makungo nya yadi?

¹⁷ Ambari na wu hungide makungo gale ma nga dugeleya, dundruga gu khuwe gilo nya lisima gi na gu phasago gu hunga makungo nya yadi, khu gu tumba guti ga Jehovha nasiri guti gwago. Uye khuye basi a nga gu ningago guti nya lisine, gupwisisa ni wugengeyi. (Mav. 2:1-5) Jehovha a na gu phasa gu hunga makungo ma na mu tsakisago. — Ndzi. 23:2, 3.