Dzegiso wa gu hi hevbudza ginani?

1. Ha gu wuyedwa kharini khu gu manega avba nya Gidundrugiso nya gufa ga Kristo?

JEHOVHA a hi ningide giningwa nya lisima ngudzu tepo khiyo a nga rumeya Gyanana gyaye gasi gi ta hi feya. (2 Kor. 9:15) Khu kotani nya olu Jesu a ningedego womi waye, u ngu si kodza gu manega ni wupari wa vbafuvbi ni Jehovha. Nigu u na ni gutumba nya gu vbanye kala gupindruga. Hi na ni sighelo nya singi nyo bonge Jehovha khu kotani nya dzegiso, kholu uye a ngu hi haladza ngudzu. (Rom. 5:8) Gasi gu hi phasa gu yeyedza gu bonga ni gu mba divala khesi Jehovha ni Jesu va hi giredego, Jesu a hi rumide gu patega avba nya Gidundrugiso nya gufa gwaye. — Luka 22:19, 20.

2. Ginani hi na bhulago khigyo avba nya ndrima yeyi?

² Mwaga wowu, Gidundrugiso gi na girwa khu Sabhadho, 12 nya Abril nya 2025. Kha hi kanakani gu khethu u ngu dzi dongiseya gasi guta manega avba nya gigiro gegi. Hi na wuyedwa ngudzu avba nya Gidundrugiso, ha gu dundrugeyaa khesi Jehovha ni Gyanana gyaye va hi giredego. Ga ndrima yeyi, hi na wona esi dzegiso wu hi hevbudzago maningano ni Jehovha ni Gyanana gyaye. Ga ndrima yi landreyago, hi na phaswa gu pwisisa edzi hi na wuyedwago khidzo khu dzegiso ni edzi hi nga yeyedzago khidzo gubonga khuwo.

ESI DZEGISO WU HI HEVBUDZAGO KHU JEHOVHA

3. Khu ginani hi ganeyago gu khethu hi nga tshudziswa khu gufa ga muthu moyo basi? (Wona fotu.)

³ Dzegiso wu ngu hi hevbudza gululama ga Jehovha. (Dhet. 32:4) Khu ndziya muni? Dundrugeya khesi: Khu kotani nya gu mba engisa ga Adhamu, ethu hi thapedwe khu gighoho ni gufa. (Rom. 5:12) Gasi gu hi tshudzisa avba nya gighoho ni gufa, Jehovha a di rumeya Jesu gasi gu ta gira malulamiselo nya dzegiso. Ganiolu, gufa nya muthu moyo nyo vbeleye gu di hadzi gu tshudzisa kharini vathu nya vangi avba nya gighoho ni gufa? Mupostoli Pawulo a gu tshamuseya gu khuye: “Kha nga olu gu mba engisa nya muthu moyo basi [Adhamu] gu giridego gu vathu nya vangi va khala sighohi, khu ndziya nyo fane gu engisa nya muthu moyo [Jesu] gu na gira gu vathu nya vangi va wonwa na va lulamide.” (Rom. 5:19; 1 Thim. 2:6) Khu mambe malito, Pawulo a di gu ganeya gu khuye vathu vatshavbo sighohi, nigu va ngufa khu kotani nya muthu moyo nyo vbeleye a nga mba engisa Nungungulu. Khu kharato, gasi hi tshudziswa avba nya gighoho ni gufa gu di gu vbwetega mwama nyo vbeleye a engisago Nungungulu.

4. Khu ginani Jehovha a nga mba dzegeya gu dzumeleya sanana sa Adhamu si nga ba si mu engisa si vbanya kala gupindruga?

⁴ Ina Jehovha a di yede gu rumeya Jesu gasi guta hi feya? Khu ginani Jehovha a nga mba dzegeya gu dzumeleya sanana sa Adhamu si nga ba si mu engisa si vbanya kala gupindruga? Ga vathu nya mba vbeleya, si di gu wonega gu khatshi gu dzumeleya sanana sa Adhamu si vbanya kala gupindruga, yi diri ndziya nya yadi nya gu lulamise gigaradzo. Ganiolu, ga Jehovha kha ya nga ba yiri ndziya nya yadi gasi gu gira isoso. Kholu si di hadzi gu gira gu khatshi Adhamu kha nga ba a giride gighoho nya gikhongolo, nigu sanana saye kha sa nga ba siri sighohi. Ganiolu, isoso si di siri lisine.

5. Khu ginani hi nga tiyisegago gu khethu Jehovha tepo yatshavbo a na gira esi si gu sadi?

⁵ Ahati Jehovha nari khatshi kha gira malulamiselo nya dzegiso a bwe a dzumeleya sanana nya mba vbeleya sa Adhamu si vbanya kala gupindruga? Vathu va di hadzi gu pimisa gu khavo Jehovha a di hadzi gu mba landrisa gambe esi a ganedego gu khuye a na gira mindru wa tshigu. Khu giyeyedzo, vathu adzina va di hadzi gu kanakana gu khavo Jehovha a na tadzisa situmbiso saye satshavbo. Ganiolu, kha hi yeli gu garadzega khu isoso. Khu ginani? Kholu Jehovha a di gira esi si lulamidego, ambari olu a nga ba a yede gu ningeya Gyanana gyaye kha nga dzegiso. Khu kharato, hi nga tiyisega gu khethu tepo yatshavbo uye a na gira esi si gu sadi.

6. Khu levbini limbe likhalelo li kutsidego Jehovha gasi gu rumeya Gyanana gyaye? (1 Johane 4:9, 10)

⁶ Ambari olu dzegiso wu hi phasago gu pwisisa gu khethu Jehovha a lulamide, uwo gambe gu ngu hi phasa gu pwisisa lihaladzo nya likhongolo a gu nalo khethu. (Joh. 3:16; leri 1 Johane 4:9, 10.) Jehovha a rumede Gyanana gyaye gasi guta hi feya, kholu uye a gu vbweta gu khuye hi vbanya kala gupindruga ni gu hi gira gipandre nya ndranga yaye. Dundrugeya khesi: Tepo Adhamu a nga ghoha, uye kha gira gambe gipandre nya ndranga ya Jehovha. Kha nga handro wakone, hatshavbo ha gu velegwa vbavbandze nya ndranga ya Nungungulu. Ganiolu, khu kotani nya dzegiso wu livbidwego, vatshavbo vathu va khodwago ga Nungungulu ni gu mu engisa, va nga gira gipandre nya ndraga yaye. Ambari olu, Jehovha a nga divaleya sighoho sathu hi bwe hi manega ni wupari naye ni vandriyathu. Jehovha a ngu hi haladza khu lisine! — Rom. 5:10, 11.

7. Gutshaniseka ga Jesu gwa gu hi phasa kharini gu pwisisa edzi Jehovha a hi haladzago khidzo?

⁷ Hi nga pwisisa gwadi edzi Jehovha a hi haladzago khidzo khu gu dundrugeya edzi si nga mu vbisa khidzo gu wona Gyanana gyaye na gi gu tshaniseka. Sathane a gu ganeya gu khuye gimwalo githumi gya Nungungulu gi na simamago gutumbega Gwaye tepo si garadzago gu gira isoso. Gasi gu ganedza Sathane, Jehovha a di dzumeleya Jesu a tshaniseka na nga si gufi. (Joba 2:1-5; 1 Ped. 2:21) Jehovha a wonide vathu na va gu tsorodzeya Jesu, na gu vetwa khu masotshwa ni gu khokhotedwa avba nya simbo. Nigu Jehovha a wonide Gyanana gyaye na gifa khu ndziya nya gu vbisi ngudzu. (Mat. 27:28-31, 39) Jehovha a diri ni tshivba nya gu vbedze gutshaniseka ga Jesu. Khu giyeyedzo, vawugeyi tepo va nga ganeya gu khavo: “A na vbulugiswe [khu Nungungulu] olu a gu ba a mu tsakeya,” Jehovha na giride kamo isoso. (Mat. 27:42, 43) Ambari ulolo, nari khatshi Jehovha a di si belede, dzegiso na wa sa livbwa nigu na hiri mwalo gutumba. Khu kharato, Jehovha dzumelede gu khuye Gyanana gyaye gi timiseya gutshaniseka kala gifa.

8. Ina Jehovha a pwide guvbisa tepo a nga wona Gyanana gyaye na gi gu tshaniseka? Tshamuseya. (Wona fotu.)

⁸ Kha hi yeli gu pimisa gu khethu olu Jehovha a gu Nungungulu nya tshivba yatshavbo a mwalo gudzipwa. Uye vangide vathu na vari ni makodzelo nya gudzipwe, nigu Bhibhiliya ya gu ganeya gu khiyo uye a hi vangide khu mufananiso waye, iso si thulago gu khiso anuye a na ni gudzipwa. Bhibhiliya ya gu tshamuseya gu khiyo uye a ngupwa “wuvi” ni gu ‘garadzega.’ (Ndzi. 78:40, 41) Wona Giyeyedzo gya Abrahama ni Isaki. Jehovha a di embeya Abrahama gasi gu ningeya gyanana gyaye kha nga muphaso. (Gen. 22:9-12; Hebh. 11:17-19) Dundrugeya edzi Abrahama a nga dzipwa khidzo tepo a nga ba dongiseya gu songa Isaki khu ngala. Dundrugeya edzi Jehovha apwidego khidzo wuvi ni gu garadzega tepo a nga wona vathu na va gu tshanisa Gyanana gyaye kala gifa. — Wona vhidhyu yi gu khiyo Exemplos de Fé — Abraão (Parte 2)..

9. Ginani hi gi hevbulago umo ga Varoma 8:32, 38, 39 maningano ni lihaladzo la Jehovha?

⁹ Dzegiso wa gu hi hevbudza guti gu khethu a mwalo muthu a hi haladzago ngudzu nga Jehovha, ambari nari nongo mwendro pari yathu. (Leri Varoma 8:32, 38, 39.) Nya mba kanakana, Jehovha a ngu hi haladza ngudzu gu vbindra edzi hi dzi haladzago khidzo. Ina u ngu dzina gu vbanya kala gupindruga? Jehovha a ngu si vbweta ngudzu isoso gwago. Ina u ngu dzina gu khuwe u divaledwa sighoho sago? Jehovha a ngu dzina ngudzu gu divaleya sighoho sago. Satshavbo a hi lombago, khu gu hi yeyedza gubonga khu giningwa nya dzegiso, hi khodwa gwaye ni gu mu engisa. Dzegiso giyeyedzo nya lihaladzo eli Jehovha a gu nalo khethu. Nigu mafuni nya maphya hi na hevbula nya singi khu lihaladzo la Jehovha. — Muh 3:11.

ESI DZEGISO WU HI HEVBUDZAGO KHU JESU

10. a) Khu ginani Jesu a nga ba a garadzega khu gufa gwaye? b) Nigu Jesu agiside kharini lina la Papayi waye? (Wona kwadru yi gu khiyo “Gutumbega ga Jesu gu agiside lina la Jehovha.”)

¹⁰ Jesu a ngu khatala khesi vathu va pimisago khu Papayi waye. (Joh. 14:31) Jesu a di gu garadzega tepo vathu va nga ba va mu singedza khu gu ganeya guvivba khu Papayi waye, kholu Jesu a di hadzi gu songwa kha nga gighevenga ni muthu a nga ba a si ningi githawo Nungungulu. Khu kharato, gombede gu khuye: “Papayi, sa gu kodzega ndreyisa kopo yeyi gwangu.” (Mat. 26:39) Khu gu ba a tumbegide kala afa, Jesu a agiside lina la Papayi waye.

11. Jesu yeyedzide kharini gu khuye a di gu haladza vathu? (Johane 13:1)

¹¹ Dzegiso wa gu hi hevbudza gambe gu khuwo Jesu a ngu khatala ngudzu khu vathu, ngudzu-ngudzu ava va mu landreyago. (Mav. 8:31; leri Johane 13:1.) Khu giyeyedzo, Jesu a di gu dziti gu khuye silo nyo khaguri a nga hadzi gu gira mafuni si di hadzi gu mu garadzeya, nya nga gufa khu ndziya nya guvbise ngudzu. Ambari ulolo, Jesu giride silo satshavbo soso nyo garadze nasiri kholu Jehovha a nga mu ninga thumo nyo gire isoso, ganiolu ngudzu-ngudzu kholu a haladzago ngudzu vathu. Jesu a yeyedzide lihaladzo khu vathu, khu gu va tshumayela, gu va hevbudza nigu va phasa. Ambari litshigu nya gufi gwaye, Jesu a di dusa tepo gasi gu handza migondro ya vapostoli vaye, gu va hevbudza, gu va tiyisa ni gu va thaveleya khu malito yaye. (Joh. 13:12-15) Tepo a nga ba a romo avba nya simbo nya tshanisa, Jesu a di dusa tepo nyo khaguri gasi gu ninga gutumba gighevenga gi nga ba gi vbweta gu songwa ni gu gira malulamiselo nyo lombe muthu gasi a khataleya mamayi waye. (Luka 23:42, 43; Joh. 19:26, 27) Jesu kha yeyedza basi lihaladzo a gu nalo khu vathu tepo a nga ngafa, ganiolu khedzi a va pharidego khidzo khu lihaladzo ni wuwadi womini waye watshavbo mafuni.

12. Ginani egi Jesu a hi gireyago olu?

¹² Tepo Kristo a ngafa, “fude gasi gu fuvisa gighoho khu guvbeleya,” nigu a ngo simama gu hi gireya nya singi. (Rom. 6:10) Khu ndziya muni? Uye a ngo gu simama gu hi ninga silo satshavbo nya sadi si kodzegago khu kotani nya dzegiso. Wona esi a girago olu. Uye a gu thuma kha nga Pfhumu yathu, Muprista nya Khongolo, ni hungo nya libandla. (1 Kor. 15:25; Efes. 5:23; Hebh. 2:17) Uye a na ni thumo nyo tshanganise ava va todzidwego ni gitshungu nya gikhongolo, na yi nga si vbeyi tshanisa nya yikhongolo.b (Mat. 25:32; Marko 13:27) Nigu uye a ngu phasa githumi nyo tumbege nigyo nyo gengeye gasi gi simama gu hi ninga esi hi si vbwetago gasi hi tumbega ga Jehovha matshigu yaya nyo hegise. (Mat. 24:45) Omu nya Mufumo waye nya 1000 myaga, uye a na simama gu hi gireya silo nya sadi. Lisine gu Jehovha a hi ningide Gyanana gyaye!

SIMAMA GU HEVBULA SILO NYA SIPHYA

13. Hi nga simama kharini gu hevbula khu lihaladzo eli Jehovha Nungungulu ni Kristo va gu nalo khethu?

¹³ U nga simama gu hevbula khu lihaladzo la Jehovha Nungungulu ni Jesu Kristo va gu nalo khethu, khu gu u simama gu dundrugeya khilo. Omu nya dzisemana nya Gidundrugiso ni hwane nyo ba gi vbede, u nga leri Dziivhangeli. U nga zami gu hevbula sipimo satshavbo khu gumogo. Wulangani nya isoso, wona simbe sighelo si hi girago hi haladza Jehovha ni Jesu. Nigu embeya vambe esi u si tugudego tepo u nga ba u hevbula.

14. Guya khu Ndzimo 119:97, gu gevisisa gu nga hi phasa kharini gu hevbula khu dzegiso ni mambe mahungu? (Wona fotu.)

¹⁴ Wa ga ba uri ni myaga nya yingi lisineni, adzina u nga dzi wudzisa gu khuwe u nga mana silo nya siphya tepo u lerigo maningano khu gu lulama ga Nungungulu, lihaladzo laye ni dzegiso. Gasi gu ganeya lisine, hi na ni silo nya singi gasi gu hevbula khu mahungu yoyo. Khu kharato, ginani u nga girago? Leri ni gu hevbula mahungu nyo hlamadzise omu nya mabhuku yathu ma seketedwago umo nya Bhibhiliya. Wa gu mba pwisisa esi u lerigo omu nya Bhibhiliya, gira wugevisisi. Khu gu landreya, ndrani nya litshigu dundrugeya khesi u si hevbudego maningano khu Jehovha, Gyanana gyaye ni lihaladzo va gu nalo khuwe. — Leri Ndzimo 119:97.

15. Khu ginani hi yedego gu simama gu vbwetedzeya silo nya siphya omu nya Bhibhiliya?

¹⁵ U nga vbeyi tshivba wa mba mana silo nya siphya mwendro khu gu hevbula tepo yatshavbo ni gu gevisisa. Ga giemo gegi, wa gu fana ni muthu a vbwetago oru. Khu gu laphisa monyo, uye a ngu vbedza dziora mwendro matshigu na gu vbwetedzeya kala a mana oru nya yidugwana ngudzu. Uye a gu timiseya kholu ni yevbini oru nya yidugwana a yi manago khya lisima gwawe. Ganiolu, gu hevbula silo nya siphya umo nya Bhibhiliya si na ni lisima gu vbindra oru! (Ndzi. 119:127; Mav. 8:10) Olu, simama gu leri Bhibhiliya ni gu gevisisa gasi u mana silo nya siphya ni gu hevbula nya singi khiso. — Ndzi. 1:2.

16. Hi nga pimedzeya kharini Jehovha ni Jesu?

¹⁶ Tepo u hevbulago, zama gu vbwetedzeya dzindziya nya gu thumise esi u si hevbudego. Khu giyeyedzo, pimedzeya gululama ga Jehovha khu gu mba na gihatheya. Pimedzeya lihaladzo eli Jesu a gu nalo khu Papayi waye ni vambe, khu gu dzi emiseya gu tshaniseka khu lina la Jehovha ni gu phasa vambe va gu ba va tshangana ni sigaradzo. Nigu gambe pimedzeya Jesu khu gu u tshumayela vambe gasi navo va mana lithomo nya guti silo nyo hlamadzise esi Jehovha a giredego vathu ni gu yeyedza gukhodwa avba nya dzegiso.

17. Ginani hi na bhulago khigyo ga ndrima yi landreyago?

¹⁷ Tepo hi simamago gu hevbula khu dzegiso, lihaladzo hi gu nalo khu Jehovha ni Jesu li na engedzeya. Nigu khu kotani nya olu hi va haladzago, anavo va na hi haladza. (Joh. 14:21; Jak. 4:8) Khu kharato, simama gu thumisa satshavbo esi Jehovha a hi ningago gasi gu hevbula nya singi khu dzegiso. Ga ndrima yi landreyago, hi na hevbula khu makategwa hi gu nawo khu kotani nya gufa ga Jesu ni edzi hi nga yeyedzago khidzo gubonga khu lihaladzo eli Jehovha a hi yeyedzidego.