Khodwa gu khuwe Jehovha a ngu gu haladza

1. Khu ginani u nga hunga gu dzi hendzeledza ga Jehovha? (Wona fotu.)

INA u ngu dundruga tepo u nga gombeya ga Jehovha u mu embeya gu khuwe wa gu vbweta gu mu thumeya womini gwago watshavbo? Uwe u di hunga isoso kholu u nga pheya gu muti ni gu mu haladza. Uwe u di mu tumbisa gu thangisa gugola gwaye womini gwago ni gu simama gu mu haladza khu monyo wago watshavbo, hefemulo wago, mapimo ni tshivba yago. (Marko 12:30) Gukhugeya tepo yoyo, lihaladzo lago khuye li di engedzeya gu tiya. Ina ka, u di hadzi gu hlamula kharini muthu nyo khaguri a gu gu wudzisa gu khuye, “Ina u ngu tiyisega gu khuwe u ngu haladza Jehovha?” Nya mba kanakana, u di hadzi gu mu hlamula gu khuwe, “Eni nyi ngu mu haladza guvbindra ni wevbini muthu mwendro ni gevbini gilo!”

2-3. Ginani egi Jehovha a vbwetago gu khuye hi tiyisega khigyo, nigu ginani hi na bhulago khigyo avba nya ndrima yeyi? (Jeremiya 31:3)

² Ganiolu, u di hadzi gu hlamula kharini muthu nyo khaguri a gu gu wudzisa gu khuye, “Ina u ngu tiyisega gu khuwe Jehovha a ngu gu haladza?” Adzina u di hadzi gu kanakana gu hlamula khu gu pimisa gu khuwe kha wu ninganedwi khu lihaladzo la Jehovha. Ndriyathu moyo nya nyamayi a nga mba yeyedzwa lihaladzo na ngari gyanana wari khuye: “Eni nyi ngu mu haladza Jehovha. Eni kha nyi kanakani khu isoso. Esi nyi si kanakaneyago khu gu Jehovha a ngu nyi haladza gani.” Ganiolu, ginani gi na gu phasago gu dziti edzi Jehovha a gu wonago khidzo?

³ Jehovha a gu vbweta gu khuye u tiyisega gu khuwe a ngu gu haladza. (Leri Jeremiya 31:3.) Lisine gu Jehovha a di gu vbweta gu khuye u hevbula nya singi khuye ni gu khala pari yaye. Nigu tepo u nga dzi hendzeledza u bwe u bhabhatiswa, u di hakha gilo nya lisima ngudzu, a gu lihaladzo laye nyo tumbege. Isoso so thula gu khiso uye a ngu gu haladza ngudzu nigu gima kha na nga gu diga. Kha nga olu Jehovha a haladzago sithumi saye nyo tumbege, uye a gu si wona satshavbo na siri ni lisima, si thulago gu khiso anuwe a ngu gu wona na wuri ni lisima gwaye. (Mal. 3:17) Jehovha a gu vbweta gu khuye u dzipwa nga edzi a dzipwidego khidzo mupostoli Pawulo. Uye a di gu tiyisega gu khuye Jehovha a ngu mu haladza nyo bwe a lova gu khuye: “Nyi ngu tiyisega gu kheni gani gufa, gani womi, gani dzingilozi, gani mifumo, gani silo si gomogo, gani silo si ngo gutago, gani dzitshivba, gani gulapha, gani gueta, mwendro gimbe givangwa, gimwalo gi na si kodzago gu hi hambanisa ni lihaladzo eli Nungungulu a hi yeyedzidego.” (Rom. 8:38, 39) Avba nya ndrima yeyi, hi na wona gu khethu khu ginani hi yedego gu tiyisega gu khethu Jehovha a ngu hi haladza ni esi si nga hi phasago gasi hi gira isoso.

KHU GINANI SI GU NA NI LISIMA GU KHODWA GU KHUWE JEHOVHA A NGU GU HALADZA?

4. Malipha muni Sathane a vbwetago gu khuye hi khodwa gwawo, nigu hi nga wugeya kharini malipha yoyo?

⁴ Gu khodwa gu khethu Jehovha a ngu hi haladza si nga hi phasa gu dwana ni “mano” ya Sathane. (Efes. 6:11) Sathane a na gira satshavbo a si kodzago gasi gu hi digisa gu thumeya Jehovha. Mano nyo khaguri Sathane a yi thumisago khu gu phalalegiseya malipha ma gu khayo Jehovha kha hi haladzi. Gima u nga divali gu khuwe Sathane magundrele. Dzitepo nya dzingi, uye a gu hi wugeya tepo hi vbedego tshivba, adzina saye tepo hi garadzegago khu silo si nga hi giregeya gale, sigaradzo hi tshanganago naso muhuno mwendro tepo hi garadzegago khu wumindru. (Mav. 24:10) Sathane a gu fana ni ngala yi vbwetedzeyago sirengo si nga pfhala. Khu kharato, uye a gu zama gu londrola tepo hi vbedego tshivba gasi gu hi gira hi tsukula satshavbo. Ganiolu, ha gu simama gu tiyisega gu khethu Jehovha a ngu hi haladza, hi na ba hi dongide gasi gu ‘wugeya’ Sathane ni milaphwi yaye. — 1 Ped. 5:8, 9; Jak. 4:7.

5. Khu ginani si gu na ni lisima gu tiyisega gu khuwe Jehovha a ngu gu haladza ni gu gu ninga lisima?

⁵ Ha gu tiyisega gu khethu Jehovha a ngu hi haladza, wupari wathu naye wu na engedzeya gu tiya. Khu ginani hi ganeyago isoso? Kholu Jehovha a hi vangide ni gudogoreya nya gu haladzwi ni gu haladza vambe. Tepo muthu nyo khaguri a hi haladzago, isoso si ngu hi kutsa gu mu haladza nethu. Khu kharato, tepo hi engedzeyago gu tiyisega gu khethu Jehovha a ngu hi haladza, isoso sa gu hi kutsa gu engedzeya gu mu haladza nethu. (1 Joh. 4:19) Nigu tepo hi engedzeyago gu tiyisa lihaladzo lathu khuye, lihaladzo a gu nalo khethu li na engedzeya gu tiya. Bhibhiliya ya gu si vega vbaguagani gu khiyo: “Hidzimeyani ga Nungungulu, uye a na hidzimeya gwanu.” (Jak. 4:8) Ganiolu, hi nga engedzeya kharini gu tiyisega gu khethu Jehovha a ngu hi haladza?

GINANI GI NA GU PHASAGO GU KHODWA GU KHUWE JEHOVHA A NGU GU HALADZA?

6. Wa gu ba u si tiyisegi gu khuwe Jehovha a ngu gu haladza, ginani u nga girago?

⁶ Simama gu gombeya ga Jehovha gasi a gu phasa gu pwisisa gu khuwe khu ginani a gu haladzago. (Luka 18:1; Rom. 12:12) Adzina si na lombega gu u gombeya dzitepo nya dzingi khu litshigu gasi u si kodza gu wona esi Jehovha a si wonago gwago. Dzimbe dzitepo, u nga dzi woneya ngudzu vbavbatshi nyo bwe si gu garadzeya gu khodwa gu khuwe Jehovha a ngu gu haladza. Ganiolu, dundruga gu khuwe Jehovha khongolo ngudzu guvbindra gu dzipwa gwago. (1 Joh. 3:19, 20) Uye a ngu guti gwadi guvbindra uwe mune, nigu a ngu guti gu hegedwa gwago. (1 Sam. 16:7; 2 Dzik. 6:30) Khu kharato, u nga giri mihuni gu mu ‘embeya’ esi u sipwago ni gu mu lomba giphaso gasi u tiyisega gu khuwe a ngu gu haladza. (Ndzi. 62:8) Nigu hwane nya gu ba u gombede, si na ni lisima gu gira silo sesi si landreyago.

7-8. Libhuku la Dzindzimo lo hi phasa kharini gu tiyisega gu khethu Jehovha a ngu hi haladza?

⁷ Khodwa esi Jehovha a gu embeyago omu nya Lito laye. Jehovha a di ninga liphuvbo laye nyo age valovi nya Bhibhiliya. Khu kharato, esi va nga lova maningano khuye, lisine. Wona esi mulovi nya Dzindzimo Dhavhidhe a nga lova maningano khu Jehovha. “[Jehovha] womo vbafuvbi ga vale myonyo yawe yi vbisegago, a vbanyisa avo mihefemulo yawe yi khuvekidego.” (Ndzi. 34:18) Tepo u garadzegago u nga dzipwa na wuri wenga. Ganiolu, Jehovha a ngu tumbisa gu khuye ga siemo nya nga esi uye a na ba a romo vbafuvbi gwago kholu uye a ngu dziti gu khuye u ngu vbweta ngudzu giphaso gyaye. Ga yimbe ndzimo, Dhavhidhe lovide gu khuye: ‘Hengeledzeya marongo yangu gyomboni.’ (Ndzi. 56:8) Jehovha a ngu gu wona tepo u garadzegago. Uye a ngu khathala ngudzu khuwe ni gu wona esi u tshanganago naso. Marongo yago ma na ni lisima ngudzu ga Jehovha nga edzi muendri a ningago ngudzu lisima mati ma gomogo omu nya liboteri laye. Ga Ndzimo 139:3, ha gu leri gu khethu: “[Uwe Jehovha] u ngu dziti dzindziIa dzangu dzatshavbo.” Jehovha a ngu wona silo satshavbo u girago, ganiolu a gu vega ngudzu gupima avba nya silo nya sadi u girago. (Hebh. 6:10) Khu ginani? Kholu uye a ngu ninga lisima satshavbo u girago gasi gu mu tsakisa.a

⁸ Jehovha a ngu thumisa mavhesi yaya nya Bhibhiliya ma hi thaveleyago gasi gu hi embeya gu khuye: “Nyo vbweta gu kheni u dziti gu khuwe nyi ngu gu haladza ngudzu ni gu gu ninga lisima.” Ganiolu kha nga hi nga si wona gupheyani, Sathane womo a swayela malipha ma gu khayo Jehovha kha hi haladzi. Khu kharato, wa gu tshuka u kanakana gu khuwe Jehovha a ngu gu haladza, dzi wudzise gu khuwe: ‘Nyi na khodwa ga mani, ga “papayi nya malipha” mwendro ga “Nungungulu nya lisine”?’ — Joh. 8:44; Ndzi. 31:5.

9. Gitumbiso muni Jehovha a gireyago ava va mu haladzago? (Ekisodha 20:5, 6)

⁹ Dundrugeya edzi Jehovha a wonago khidzo ava va mu haladzago. Wona esi Jehovha a nga embeya Mosi ni Vaisrayeli. (Leri Ekisodha 20:5, 6.) Jehovha o tumbisa gu simama gu yeyedza lihaladzo nyo tumbege ava va mu haladzago. Kha nga olu Jehovha a nga tumbega, hi nga tiyisega gu khethu uye kha na nga diga gu haladza ava va mu haladzago. (Neh. 1:5) Khu kharato, wa gu vbweta gu tiyisega gu khuwe Jehovha a ngu gu haladza, dzi wudzise gu khuwe: ‘Ina nyi ngu mu haladza Jehovha?’ Khu kharato, wa gu ba u mu haladza ni gu gira satshavbo u si kodzago gasi gu mu tsakisa, u nga tiyisega gu khuwe uye a ngu gu haladza ngudzu. (Dhan. 9:4; 1 Kor. 8:3) Isoso so thula gu khiso wa gu tiyisega gu khuwe Jehovha a ngu gu haladza, kha wu na nga kanakana gu khuwe uye a ngu gu haladza. U nga tiyisega gu khuwe uye tepo yatshavbo a na gu haladza, nigu gima kha na nga gu diga.

10-11. Jehovha o vbweta gu khuye u wona kharini dzegiso? (Vagalatiya 2:20)

¹⁰ Dundrugeya khu dzegiso. Jehovha ningide giningwa nya gikhongolo vathu vatshavbo tepo a nga rumeya gyanana gyaye mafuni, Jesu Kristo, gasi gi ta hi feya. (Joh. 3:16) Ganiolu, Jehovha a di rumeya gyanana gyaye gasi gi ta feya uwe khu gu kongoma. Wona esi si nga giregeya mupostoli Pawulo. Uye giride silo nyo vivbe ngudzu na si khali Mukristo, nigu ambari tepo a nga khala Mukristo a di yede gu simama gu dwana ni gu mba vbeleya gwaye. (Rom. 7:24, 25; 1 Thim. 1:12-14) Ganiolu, uye a di gu tiyisega gu khuye Jehovha a di ningeya gyanana gyaye khu kotani yaye. (Leri Vagalatiya 2:20.) Dundruga gu khuwe Jehovha a di kutsa Pawulo gu lova malito yaya omu nya Bhibhiliya. Nigu satshavbo si lovidwego omu nya Bhibhiliya si lovidwe gasi gu hi hevbudza. (Rom. 15:4) Malito ya Pawulo ma ngu yeyedza gu khayo Jehovha a gu vbweta gu khuye u wona dzegiso kha nga giningwa gyaye gwago. Tepo u wonago dzegiso khu ndziya yeyi, u na engedzeya gu tiyisega gu khuwe Jehovha a ngu gu haladza ngudzu.

¹¹ Hi ngu mu bonga ngudzu Jehovha khu gu rumeya gyanana gyaye gasi gi ta hi feya. Ganiolu, gimbe gighelo gi nga gira Jesu ata mafuni guta embeya vathu lisine maningano khu Nungungulu. (Joh. 18:37) Lisine leli, lo pata edzi Jehovha a dzipwago khidzo khu sanana saye.

EDZI JESU A HI PHASAGO KHIDZO GU KHODWA GU KHETHU JEHOVHA A NGU HI HALADZA

12. Khu ginani hi nga khodwago esi Jesu a nga ganeya khu Jehovha?

¹² Tepo Jesu a nga ba a romo mafuni, uye a di gu gola gu bhuleya vathu khu makhalelo ya Jehovha. (Luka 10:22) Hi na ni sighelo nyo pwali nya gu khodwe esi Jesu a nga ganeya khu Jehovha. Kholu Jesu vbanyide ni Jehovha ndzadzini khu myaga nya yingi ngudzu na siti mafuni. (Kol. 1:15) Jesu a ngu dziti edzi Papayi waye a mu haladzago khidzo. Nigu a wonide gambe edzi Jehovha a nga yeyedza khidzo lihaladzo laye ga dzingilozi nyo tumbege ni satshavbo sanana saye nyo tumbege sa mafuni. Jesu o phasa kharini vambe vathu gu khodwa gu khavo Jehovha a ngu va haladza?

13. Jesu o vbweta gu khuye hi mu wona kharini Jehovha?

¹³ Jesu o vbweta gu khuye hi dziti khu lisine edzi Jehovha a dzipwago khidzo maningano khethu. Omu nya Dziivhangeli, Jesu a di rana Jehovha gu khuye “Papayi” khu gipimo nya 160 dzitepo. Tepo a nga ba a ganeya ni vapizane vaye, uye a di gu thumisa malito nya nga “Papayi wago” mwendro “Papayi wanu.” (Mat. 5:16; 6:26) Nota de estudo ya Matewu 5:16 yari khiyo: “Sithumi sa Nungungulu sa gale si di gu thumisa malito nya mangi nyo khugege gasi gu thula Jehovha, nya nga ‘nya Dzitshivba dzatshavbo,’ ‘Oyu a Khugegidego Ngudzu’ ni ‘Muvangi nya Khongolo,’ ganiolu Jesu a di gu thumisa lito nyo olovelege li gu khilo, ‘Papayi’ gasi gu tshamuseya wupari nya wukhongolo owu Jehovha a gu nawo ni vakhozeyi vaye.” Jesu a di gu hi hevbudza gu khuye Jehovha a ngu hi haladza kha nga edzi papayi nya lihaladzo a haladzago khidzo sanana saye. Hongoleni hi wona siemo sivili Jesu a nga thumisa lito “Papayi” gasi gu thula Jehovha.

14. Jesu yeyedzide kharini gu khuye moyo ni moyo wathu a na ni lisima mahoni ga Jehovha? (Matewu 10:29-31) (Wona fotu.)

¹⁴ Gu pheya, wona malito ya Jesu ma gomogo omu ga Matewu 10:29-31. (Leri.) Sinyoni si mwalo makodzelo nya gu haladze Jehovha ni gu mu khozeya. Ganiolu, Papayi waso a ngu si ninga ngudzu lisima avbo nya gu dziti tepo gimwegyo gyaso gi thegago vbavbatshi. Ne kha hi ganeyi edzi a khathalago khidzo khu gimwegyo ni gimwegyo nya sithumi saye si mu thumeyago khu lihaladzo! Jesu ganede gambe gu khuye Papayi a ngu wuti tengo nya ndzudzu wa hungoni gwathu. Kha nga olu Jehovha a sitigo silo nya nga esi maningano khethu, hi nga tiyisega gu khethu uye a ngu khathala ngudzu khethu. Khu lisine Jesu o vbweta gu khuye moyo ni moyo a khodwa gu khuye a na ni lisima mahoni ga Jehovha.

15. Malito ya Jesu ma gomogo ga Johane 6:44 ma gu tshamuseya ginani khu Jehovha?

¹⁵ Wona giyeyedzo nya wuvili nya edzi Jesu a nga thumisa lito “Papayi.” (Leri Johane 6:44.) Papayi wago wa ndzadzini a gu phaside gu muti ni gu mu haladza. Ganiolu khu ginani a nga gu hatha? Kholu a di wona gilo nya gyadi monyoni gwago. (Mith. 13:48) Tepo Jesu a nga ganeya malito ma gomogo omu ga Johane 6:44, uye adzina a di khumbuga malito ya Jehovha ma gomogo omu ga Jeremiya 31:3, ma gu khayo: ‘Nyi gu ndrindredzede khu kotani nya lihaladzo langu nyo tumbege.’ (Jer. 31:3; fananisa ni Hoseya 11:4.) Dundrugeya esi isoso si tshamuseyago. Papayi wathu wa ndzadzini tepo yatshavbo a ngu wona makhalelo nya yadi u gu nawo adzina saye u gu mba ma wona.

16. a) Ginani Jesu a nga ba a vbweta gu ganeya khu lisine, nigu khu ginani hi nga mu tumbago? b) Ginani gi na gu phasago gu khodwa gu khuwe Jehovha Papayi nya wadi u nga manegago naye? (Wona kwadru “Papayi hatshavbo hi mu vbwetago.”)

¹⁶ Khu gu ba a tshamuseya Jehovha kha nga Papayi wathu, Jesu o hi embeya gu khuye: “Jehovha khandri Papayi wangu basi, ganiolu Papayi wago nuwe. Nigu nyi ngu gu tiyisegisa gu kheni a ngu gu haladza ngudzu ni gu khathala khuwe.” Khu kharato, wa gu kanakana gu khuwe Jehovha a ngu gu haladza, dzi wudzise gu khuwe: ‘Ina nyi yede gu kanakaneya malito ya Jesu, oyu a mutigo gwadi Papayi waye nigu a ganeyago lisine tepo yatshavbo?’ — 1 Ped. 2:22.

GIRA SATSHAVBO U SI KODZAGO GASI U TIYISEGA GU KHUWE JEHOVHA A NGU GU HALADZA

17. Khu ginani hi yedego gu simama gu tiyisega gu khethu Jehovha a ngu hi haladza?

¹⁷ Hi yede gu gira satshavbo hi si kodzago gasi hi simama gu tiyisega gu khethu Jehovha a ngu hi haladza. Kha nga hi si wonidego gupheyani, nala wathu nya khongolo, Sathane, kha na nga mana ligovbe kala a hi digisa gu thumeya Jehovha. Uye o vbweta gu hi vbedza tshivba, khu kharato a na gira satshavbo a si kodzago gasi hi si khodwi gu khethu Jehovha a ngu hi haladza. Hi nga dzumeyi gu padwa khu Sathane! — Joba 27:5.

18. Ginani u nga girago gasi u tiyisega gu khuwe Jehovha a ngu gu haladza?

¹⁸ Gasi u simama gu tiyisega gu khuwe Jehovha a ngu gu haladza, simama gu gombeya gwaye u mu lomba gasi a gu phasa gu dzi wona kha nga edzi a gu wonago khidzo. Dundrugeya khu mavhesi nya Bhibhiliya ma yeyedzago gu khayo Jehovha a ngu khathala khu vale va mu haladzago. Dundruga gu khuwe Jehovha a ngu haladza ava va mu haladzago. Gima u nga divali gu khuwe Jehovha ningede Gyanana gyaye khu kotani yago. Nigu tumba malito ya Jesu ma gu khayo Jehovha, Papayi wago wa ndzadzini. Khu kharato, a gu tshuka muthu nyo khaguri a gu wudzisa gu khuye: “Ina u ngu tiyisega gu khuwe Jehovha a ngu gu haladza kamo?” U na dzegeya gu mu hlamula na wu tiyide gu khuwe: “Ina! Nigu nyi ngu gira satshavbo nyi si kodzago tshigu ni tshigu gasi nyi mu yeyedza lihaladzo langu!”