Libogo la Jehovha kha la rola

1. Mosi a yeyedzide kharini gu khuye a di gu tumba Jehovha tepo a nga dusa Vaisrayeli khu Egipto?

LIBHUKU la Vahebheru la gu ganeya khu vathu nya vangi va manegidego ni gu khodwa ga Jehovha. Moyo wakone khu Mosi, a manegidego ni gukhodwa nyo hlamadzise. (Hebh. 3:2-5; 11:23-25) Uye yeyedzide gukhodwa tepo khiyo a nga thangeya Vaisrayeli tepo va nga duga khu Egipto. Uye kha thava Faro gumogo ni masotshwa yaye. Na gu tumba Jehovha, uye thangede vathu vaye gukhugeya Yiphwani nya gu Fuviye kala giwulani. (Hebh. 11:27-29) Vaisrayeli nya vangi va digide gu tumba gu khavo Jehovha a na va khataleya, ganiolu Mosi a di simama gu tumba Nungungulu. Mosi a di gira isoso khu gighelo nyo pwali, kholu Nungungulu a di gu ningide Vaisrayeli guhodza ni mati gasi gu va simama gu vbanya giwulani.a — Ekiso. 15:22-25; Ndzi. 78:23-25.

2. Khu ginani Nungungulu a nga wudzisa Mosi gu khuye: “Ina libogo la Jehovha li rode?” (Mitengo 11:21-23)

² Ambari olu Mosi a nga ba ari ni gukhodwa nyo tiye, hwane nya mwaga mowo Jehovha na tshudziside Vaisrayeli Egipto, Mosi a di pheya gu dzi wudzisa gu khuye Jehovha a di hadzi gu va ninga nyama a va tumbisidego. Mosi kha nga ba a si kodza gu dundrugeya edzi Jehovha a nga hadzi gu ninga khidzo nyama dzimiliyoni nya vathu va nga ba va romo giwulani. Jehovha a di wudzisa Mosi gu khuye: “Ina libogo la Jehovha li rode?” (Leri Mitengo 11:21-23, Tradução do novo Mundo.) Lito li gu khilo “libogo la Jehovha” la gu thula liphuvbo nya guage la Nungungulu mwendro tshivba a yi thumisago. Khu mambe malito, Jehovha a di gu embeya Mosi gu khuye: ‘Ina wa gu pimisa gu khuwe kha nyi si kodzi gu gira esi nyi ganedego gu kheni nyi na gira?’

3. Khu ginani si gu na ni lisima gu dundrugeya khu giwudziso Jehovha a giredego Mosi?

³ Ina u di nga dzi wudzisa gu khuwe Jehovha a na khathaleya uwe gumogo ni ndranga yago khu nyamani? Abari gu ina mwendro ahihi, hi na wona gu khethu khu ginani Mosi ni Vaisrayeli va nga mba tumba gu khavo Jehovha a di hadzi gu va khathaleya. Nigu hi na wona edzi Milowo nyo khaguri hi nga tiyisago khidzo gutumba gwathu nya gu khethu Jehovha tepo yatshavbo a na hi phasa.

HEVBULA KHU GIYEYEDZO GYA MOSI NI EGI GYA VAISRAYELI

4. Khu ginani Vaisrayeli nya vangi va nga pheya gu kanakana gu khavo Jehovha a di hadzi gu va khathaleya?

⁴ Khu ginani Vaisrayeli nya vangi va nga pheya gu kanakana gu khavo Jehovha a di hadzi gu va khathaleya? Vaisrayeli gumogo ni vambe va nga ba va siri Vaisrayeli va nga ba va dugide khu Egipto, va di gu gimbide giwulani khu tepo nyo laphe na va gu khugeya khu Egipto gasi gu vboha Tigoni nya Gitumbiso. (Ekiso. 12:38; Dhet. 8:15) Vaisrayeli ni vambe va di ngurangureya Mosi kholu va nga ba va garade khu gu hodza mana. (Mite. 11:4-6) Avo va di pheya gu dundrugeya nyama ni gumbe guhodza va nga ba va hodza Egipto. Khu kotani nya olu vathu va nga ba va ngurangureya Mosi, uye a di pimisa gu khuye a di yede gu va vbweteya nyama va nga ba va yi vbweta, ganiolu kha nga ba dziti gu khuye a na yi mana hayi. — Mite. 11:13, 14.

5-6. Ginani hi gi hevbulago khedzi ava va nga ba va siri Vaisrayeli va kutsedzedego khidzo Vaisrayeli nya vangi?

⁵ Vale va nga ba va siri Vaisrayeli kha va nga ba va bonga khu satshavbo esi Jehovha a va giredego, khu kharato Vaisrayeli navo va di pheya gu pimisa khu ndziya yayimweyo. Anethu hi nga giregedwa khu isoso. Tepo vambe va gu mba yeyedza gubonga, anethu hi nga pheya gu mba yeyedza gubonga khu satshavbo esi Jehovha a hi ningago. Isoso si nga girega ha gu dundrugeya khu silo hi nga ba hiri naso gale mwendro gu pweya lidiwo vambe khu kotani nya esi va gu naso. Khu kharato, ethu hi na tsaka ha gu hevbuleya gu eneledwa khesi hi gu naso.

⁶ Vaisrayeli va di yede gu dundruga gu khavo Nungungulu a di gu va tiyisegiside gu khuye va gu vboha gaya gwawe nya guphya, a gu Tigoni nya Gitumbiso, va di hadzi gu dzi buza khu silo nya singi. Gitumbiso gegi gi di hadzi gu tadzisega Tigoni nya Gitumbiso nasiri giwulani. Khu ndziya nyo fane, wulangani nya gu vege gupima ga silo hi gu mba si kodza gu manega naso mafuni momu nyo vivbe, hi yede gu dundrugeya khesi Jehovha a tumbisidego gu hi ninga mafuni nya maphya. Hi nga dundrugeya gambe khu mavhesi nyo khaguri nya Bhibhiliya ma hi phasago gu engedzeya gu tumba Jehovha.

7. Hi nga tiyisega kharini gu khethu libogo la Jehovha kha la rola?

⁷ Ambari ulolo, u nga dzi wudzisa gu khuwe khu ginani Nungungulu a nga wudzisa Mosi gu khuye: “Ina libogo la Jehovha li rode?” Jehovha kha phasa Mosi gu dundrugeya basi khu tshivba nya libogo Laye, ganiolu a mu tshamusede esi li nga girago. Nungungulu a di hadzi gu si kodza gu ninga nyama nya yingi Vaisrayeli ambari olu va nga ba va romo giwulani. “Khu tshivba nya yikhongolo na khusedzide mandza,” Nungungulu yeyedzide tshivba yaye. (Ndzi. 136:11, 12) Khu kharato, tepo hi tshanganago ni gigaradzo hi nga tiyisega gu khethu Jehovha a na si kodza gu hi phasa ambari na hi romo hayini. — Ndzi. 138:6, 7.

8. Ginani gi na hi phasago gu potsa gu gira gihoso gyagimwegyo gi giridwego khu vathu nya vangi giwulani? (Wona fotu.)

⁸ Jehovha a giride esi a tumbisidego, nigu a ningide vathu vaye sikenya nya singi. Ganiolu, Vaisrayeli kha va bonga khu gilewugiso Nungungulu a giridego. Wulangani nya isoso, avo va di dzega sikenya nya singi guvbindra esi va nga ba va si vbweta. Avo va di vbedza litshigu limwedo ni metadu na va gu roleya sikenya khavba va nga si kodza khavbo. Jehovha a di zangareya vale ‘va nga yeyedza gu khavo va diri vamagundrele,’ a bwe a va tsayisa. (Mite. 11:31-34) Hi nga hevbula gilogyo khu giyeyedzo gegi. Hi yede gu dzi woneya gasi hi si khali vamagundrele. Gani hi ghanyide mwendro hi sisiwana, hi yede gu vega gupima avba nya gu hengeledzeye “dzithomba ndzadzini,” khu gu tiyisa wupari wathu ni Jehovha ni Jesu. (Mat. 6:19, 20; Luka 16:9) Tepo hi girago isoso, hi na tiyisega gu khethu Jehovha a na hi ninga esi hi si vbwetago.

9. Ginani gi hi tiyisegisago gu khigyo Nungungulu a na hi phasa?

⁹ Jehovha a dzi emisede gu phasa vathu vaye muhuno. Ina isoso sa gu thula gu khiso kha hi na nga tshuka hi vbweta dzitsapawu ni guhodza. Ahihi.b Ganiolu, Jehovha gima kha na nga hi diga. Uye a na hi phasa gu emisana ni sigaradzo sathu. Hi nga yeyedza kharini gu khethu hi ngu tumba Jehovha gasi a hi khathaleya? Hongoleni hi wona siemo sivili: 1) Tepo hi emisanago ni gigaradzo nya dzitsapawu ni 2) tepo hi garadzegago khedzi hi na manago khidzo esi hi si vbwetago tepo hi na dandrago khu tanga.

TEPO HI EMISANAGO NI GIGARADZO NYA DZITSAPAWU

10. Khu sevbini sigaradzo hi nga tshanganago naso?

¹⁰ Kha nga olu litigo leli nyo vivbe li vbohago mahegiso yalo, ethu hi nga vireya gu khethu silo si engedzeya gu garadza. Khu kotani nya politika, dzinyimbi, dzimhango nya tumbunugo mwendro mitungo si nga hi gira hi luza thumo wathu, dzithomba dzathu mwendro ndranga yathu. Adzina saye, si na vbwetega gu hi vbwetedzeya thumo nya wuphya avba hi vbanyago avbo mwendro gu fuluga ni ndranga yathu hi hongola wumbe wulanga gasi hi si kodza gu yi khathaleya. Ginani gi na hi phasago gu hunga makungo ma yeyedzago gu khayo hi ngu tumba Jehovha?

11. Ginani gi na gu phasago gu emisana ni gigaradzo nya dzitsapawu? (Luka 12:29-31)

¹¹ Gilo nyo pheye hi nga girago, khu gu embeya Jehovha satshavbo si hi garadzago. (Mav. 16:3) Mu lombe gasi a gu ninga guti nya gu hunge makungo nya yadi ni gu rula monyo gasi gu potsa gu “gugaradzega ngudzu.” (Leri Luka 12:29-31.) Simama gu mu lomba gasi a gu phasa gu eneledwa khesi u si vbwetago gasi gu vbanya. (1 Thim. 6:7, 8) Gevesisa omu nya mabhuku yathu edzi u nga emisanago khidzo ni gigaradzo nya dzitsapawu. Vathu nya vangi va ngu ganeya gu khavo dzivhidhyu ni dzindrima dzi gu romo omu nya jw.org dzi ganeyago khu gigaradzo nya dzitsapawu dzi va phaside ngudzu.

12. Siwudziso muni si nga phasago Mukristo gu hunga makungo nya yadi ma gimbileyanago ni ndranga yaye?

¹² Vathu nyo khaguri va dzumede thumo wu nga va gira va khala hwindzo ni dzindranga dzawe, ganiolu khu gu gimbiya nya tepo va tugula gu khavo va di gu hungide makungo nya mba yadi. Na wu si dzumeyi thumo nya wuphya, u nga pimisi basi khu dzitsapawu u na hakhago, ganiolu dundrugeya gu khuwe thumo wowo wu na phasa uwe ni ndranga yago gu simama vbafuvbi ga Jehovha gani. (Luka 14:28) Dzi wudzise gu khuwe: ‘Ginani gi na giregago nya gu khala hwindzo ni pari yangu nya wugadzi? Ina nyi na si kodza gu hongola ga yatshavbo mitshangano, thumoni nyo tshumayele ni gu vbedza tepo ni vandriyangu?’ Abari gu u na ni sanana, dzi gire giwudziso gegi nya lisima: ‘Ina nyi na si kodza gu phasa sanana sangu gu hidzimeya ga Jehovha si bwe si mu engisa na nyi mwalo vbafuvbi gwaso?’ (Efes. 6:4) Tepo u hungago makungo, landra esi Jehovha a pimisago nasiri esi valongo ni dzipari dzago dzi gu mba ninga githawo Bhibhiliya dzi ganeyago.c Tony, a vbanyago Ásia Ocidental, a manide mathomo nya mangi gasi guya thuma omu nya mambe mayigo. Ganiolu, hwane nya gu ba a gombede a bwe a ganeya ni mwangadzi waye, uye a di hunga gu mba dzumeya mithumo a nga ningwa, nigu wulangani nya isoso a di pimisa edzi a nga vbevbugisago khidzo womi waye. Muhuno, Tony a gu ganeya gu khuye: “Nyi manide lithomo nya gu phase vathu nya vangi guti Jehovha nigu sanana sangu si ngu haladza ngudzu Jehovha. Ndranga yangu yi pwisiside gu khiyo ha gu vbanya khu malito ma gu romo omu ga Matewu 6:33, Jehovha a na hi khathaleya.”

TEPO HI GARADZEGAGO KHEDZI HI NA MANAGO KHIDZO ESI HI SI VBWETAGO TEPO HI NA DANDRAGO KHU TANGA

13. Ginani u nga girago olu gasi gu mana esi u na si vbwetago mindru wa tshigu tepo u na ba u dandride khu tanga?

¹³ Gutumba gwathu ga Jehovha, anugo gu nga lingwa tepo hi dundrugeyago khesi hi nga girago gasi si hi phasa ha gu dandra khu tanga. Bhibhiliya ya gu hi kutsa gu thuma khu gu dzi garadza gasi gu hi dzi khathaleya mindru wa tshigu. (Mav. 6:6-11) Sa gu kodzega, khyadi gu vega dzitsapawu nyo khaguri gasi hi dzi thumisa mindru wa tshigu. Lisine gu dzitsapawu dzi nga hi vhikeya khu ndziya nyo khaguri. (Muh. 7:12) Ganiolu, kha hi yeli gu wona dzitsapawu nga gilo nya lisima womini gwathu.

14. Khu ginani hi yedego gu dundrugeya khu Vahebheru 13:5 tepo hi dongiseyago esi hi na si vbwetago mindru wa tshigu?

¹⁴ Jesu a kotarede matimo ma yeyedzago muthu nyo khaguri a hengeledzeyago dzitsapawu, ganiolu “nari gisiwana ga Nungungulu.” (Luka 12:16-21) A mwalo muthu a sitigo esi si na giregago mindru wa tshigu. (Mav. 23:4, 5; Jak. 4:13-15) Ethu hi ngu tshangana ni sigaradzo khu gu ba hiri valandreyi va Kristo. Jesu a di ganeya gu khuye hi yede gu khala na hi dongide gasi gu “diga” satshavbo hi gu naso gasi gu khala vapizane vaye. (Luka 14:33) Esi si giregede Makristo ya Judheya, dziteponi dza vapostoli. Na ma tsakide, ayo ma di dzi emisede gu luza satshavbo ma nga ba ma ri naso. (Hebh. 10:34) Muhuno, vandriyathu nya vangi va luzide mithumo yawe khu kotani nya olu va nga bomba gu seketeya politika. (Gutu. 13:16, 17) Ginani gi va phasidego gu gira isoso? Avo va di gu tumba gitumbiso gya Jehovha gi gu khigyo: “Gima kha nyi na ga gu diga.” (Leri Vahebheru 13:5.) Ethu hi na gira satshavbo hi si kodzago gasi gu dongiseya esi hi na si vbwetago mindru wa tshigu, nigu ha gu dugeledwa khu silo hi nga mba si vireya, ethu hi na tumba giphaso gya Jehovha.

15. Vavelegi nya Makristo va yede gu wona kharini sanana sawe? (Wona fotu.)

¹⁵ Ga mambe mayigo, vathu nya vangi va gu velega sanana ngudzu-ngudzu kholu va vbwetago gu khavo si mana mithumo gasi gu va khathaleya va gu dandra khu tanga. Bhibhiliya yari khiyo vavelegi va yede gu khathaleya esi sanana sawe si si vbwetago. (2 Kor. 12:14) Lisine gu vavelegi va na vbweta giphaso nyo khaguri tepo va dandrago khu tanga, nigu sanana nya singi si ngu tsaka khu gu gira isoso. (1 Thim. 5:4) Ganiolu, vavelegi nya Makristo va ngu dziti gu khayo va nga mana litsako nya likhongolo khu gu phasa sanana sawe gu khala sithumi sa Jehovha nasiri gasi gu si sayisa ni makungo nya gu khavo si na va khathaleya khu nyamani mindru wa tshigu. — 3 Joh. 4.

16. Vavelegi va nga phasa kharini sanana sawe gasi si dzi khathaleya mindru wa tshigu? (Vaefeso 4:28)

¹⁶ Tepo u phasago sanana sago gu hevbuleya edzi si nga dzi khataleyago khidzo mindru wa tshigu, si yeyedze gu khuwe si nga tumba Jehovha. Na si ngari siphya si hevbudze gu khuwe gu thuma khu gu dzi garadza khyadi. (Mav. 29:21; leri Vaefeso 4:28.) Tepo si dandrago, si phase gasi gu dugeleya xikwatuno. Vavelegi nya Makristo va ngu gira gwadi khu gu gevesisa ni gu thumisa matshina nya milayo nya Bhibhiliya gasi gu phasa sanana sawe gu hunga sihevbudzo si na si phasago gu dzi khathaleya mindru wa tshigu ni gu patega thumoni nyo tshumayele tepo yatshavbo.

17. Hi nga tiyisega khu ginani?

¹⁷ Vale va tumbago Jehovha va nga tiyisega gu khavo uye a na ni wu si kodzi nigu a dzi emisede gu va ninga esi va si vbwetago. Kha nga olu mahegiso nya litigo leli ma hidzimeyago, hi nga vireya gu khethu gutumba hi gu nago khu Jehovha gu lingwa. Nya mba khatadzisega esi si na giregago, hongoleni hi dzi emiseya gu tumba gu khethu Jehovha a na thumisa tshivba yaye gasi gu hi ninga esi hi si vbwetago khu nyamani. Hi nga tiyisega gu khethu Jehovha tepo yatshavbo a na hi phasa ambari na hi romo hayini.