‘Dzi hatheyeni muhuno oyu mu na mu thumeyago’

1. Ginani hi yedego gu gira gasi gu tsaka khu lisine, nigu khu ginani? (Isaya 48:17, 18)

PAPAYI wathu wa ndzadzini a ngu hi haladza ngudzu, nigu a gu vbweta gu khuye hi tsaka olu ni mindru wa tshigu. (Muh. 3:12, 13) Uye a hi vangide ni makodzelo nyo gire silo nyo khaguri nyo hlamadzise, ganiolu uye kha hi ninga makodzelo nya gu hi dzi fuma habune mwendro gu hunga esi nya sadi ni esi nyo vivbe. (Muh. 8:9; Jer. 10:23) Uye a ngu dziti gu khuye gasi gu tsaka khu lisine, hi yede gu mu thumeya ni gu vbanya khu milayo yaye. — Leri Isaya 48:17, 18.

2. Ginani egi Sathane a vbwetago gu khuye hi khodwa, ganiolu ginani egi Jehovha a giridego?

² Sathane a gu vbweta gu khuye hi khodwa gu khethu hi nga tsaka nya mba na Jehovha womini wathu ni gu khuye vathu va nga dugeleya va gu dzi fuma vabune. (Gen. 3:4, 5) Gasi gu yeyedza gu khuye Sathane muliphi, Jehovha a dzumelede vathu gu dzi fuma vabune khu tepo nyo khaguri. Somo guagani gu khiso vathu kha va kodzi gu dzi fuma. Ganiolu, Bhibhiliya yi ngu ganeya khu vama ni vanyamayi va manidego gutsaka khu gu thumeya Jehovha. Giyeyedzo nya gikhongolo khu Jesu Kristo. Gupheya, hongoleni hi wona gighelo gi mu giridego a hatha gu thumeya Jehovha. Khu gu landreya, hi na wona gu khethu khu ginani Jehovha a fanedwago khu wukhozeyi wathu. Khu gu hegisa, hi na wona sighelo si hi giridego hi vbweta gu thumeya Jehovha.

KHU GINANI JESU A NGA HATHA GU THUMEYA JEHOVHA?

3. Ginani Jesu a ningidwego khu Sathane, nigu a di hatha gu gira ginani?

³ Tepo Jesu a nga ba a romo mafuni, a di yede gu hatha gu khuye a di hadzi gu thumeya mani. Hwanenyana nya gu ba Jesu a bhabhatisidwe, Sathane a di mu embeya gu khuye a di hadzi gu mu ninga mifumo yatshavbo a gu mu khozeya gumogo basi. Jesu a di hlamula gu khuye: “Khuga khavba, Sathane! Kholu gu lovidwe gupwani: ‘Khozeya Jehovha Nungungulu wago, khuye basi u yedego gu mu thumeya.’” (Mat. 4:8-10) Khu ginani Jesu a nga hatha gu gira isoso? Hongoleni hi wona sighelo nyo khaguri.

4-5. Sighelo muni si giridego Jesu a hatha gu thumeya Jehovha?

⁴ Gighelo nya gupheye gi giridego Jesu a hatha gu thumeya Jehovha, lihaladzo nya likhongolo a gu nalo khu Papayi waye. (Joh. 14:31) Nigu Jesu hathide gu thumeya Jehovha kholu isoso si diri silo nya sadi gasi gu gira. (Joh. 8:28, 29; Gutu. 4:11) Uye a di gu dziti gu khuye Jehovha khuye a nga hi ninga womi, a ngu tumbega nigu a ngu hi ninga silo nya singi nya sadi. (Ndzi. 33:4; 36:9; Jak. 1:17) Jehovha dzitepo dzatshavbo a di gu embeya lisine Jesu, nigu khuye a mu ningidego satshavbo a gu naso. (Joh. 1:14) Ganiolu, gu hambana ni Jehovha, Sathane a di vanga gufa basi. Uye muliphi nigu a gu dzi gola ngudzu uye mune. (Joh. 8:44) Jesu a di gu muti gwadi Jehovha nigu a di gu muti gwadi Sathane. Uye kha nga ba a vbweta gu fana ni Sathane a bwe a wugeya Jehovha. — Filp. 2:5-8.

⁵ Gimbe gighelo gi giridego Jesu a hatha gu thumeya Jehovha khu kotani nya silo nya sadi si nga hadzi gu girega khu thumo waye nyo tumbege. (Hebh. 12:2) Uye a di gu dziti gu khuye a gu simama na tumbegide a di hadzi gu agisa lina la Papayi waye ni gu vbedza gu tshaniseka gu vangidwego khu Dhiyabhulosi.

KHU GINANI JEHOVHA A YEDWAGO GU KHOZEDWA

6-7. Khu ginani vathu nya vangi va gu mba thumeya Jehovha, nigu khu ginani hi yedego gu khozeya uye basi?

⁶ Nya vangi muhuno kha va thumeyi Jehovha kholu kha va mati makhalelo yaye nyo mbure nigu kha va siti satshavbo esi a va giredego. Va gu fana ni vathu vale Pawulo a va tshumayedego Atena. — Mith. 17:19, 20, 30, 34.

⁷ Pawulo a di tshamuseya vathu va Atena gu khuye Nungungulu nya lisine a ngu ninga “womi vatshavbo, liphuvbo va hefemulago ni silo satshavbo.” A engedza gambe gu khuye: “Khu kotani yaye hi na ni womi nigu hi ngu gimbiya, hi ngu vbanya.” Nungungulu khuye Muvangi, khu gu gira “muthu moyo basi, tumbulugiside mafumbo yatshavbo nya vathu,” khu kharato a ngu yedwa khu gu hi khozeya uye basi. — Mith. 17:25, 26, 28.

8. Jehovha gima kha na nga gira ginani? Tshamuseya.

⁸ Khu kotani nya olu Jehovha a gu Muvangi ni Pfhumu yi khugegidego ngudzu mafuni ni ndzadzini, adzina saye na gurumedza vathu gasi gu mu thumeya. Ganiolu, Jehovha gima kha na nga gira isoso. Wulangani nya isoso, uye a ngu hi ninga silo nya singi si yeyedzago gu khiso uye womo nigu a ngu haladza moyo ni moyo wathu. Uye a gu vbweta gu khuye vathu nya vangi va khala dzipari dzaye kala gupindruga. (1 Thim. 2:3, 4) Khu kharato, Jehovha a hi trenaride gasi gu hevbudza vambe khu makungo yaye ni gu va bhuleya silo nya sadi a na gireyago vathu. (Mat. 10:11-13; 28:19, 20) Uye gambe a hi ningide mabandla omu hi mu khozeyago umo ni gu hakha giphaso gya madhota ma gu na ni lihaladzo. — Mith. 20:28.

9. Jehovha a gu yeyedza kharini gu khuye a ngu haladza vathu?

⁹ Jehovha a ngu yeyedza lihaladzo laye khu gu ninga silo nya sadi vale va gu mba khodwa gu khavo uye womo. Dundrugeya khesi: Ndrani nya myaga nya yingi, vathu nya vangi va hungide gu gira esi va pimisago gu khavo khyadi mwendro khandri sadi wulangani nya gu engise Jehovha. Ambari ulolo, Jehovha a va ningide esi si vbwetegago gasi va simama gu vbanya ni gu dzi buza khu womi. (Mat. 5:44, 45; Mith. 14:16, 17) Khu kotani yaye, va nga manega ni dzipari, ndranga yi va haladzago, sanana, thumo, nigu va nga tsaka. (Ndzi. 127:3; Muh. 2:24) Silo sesi sa gu yeyedza gu khiso Papayi wathu wa ndzadzini a ngu haladza vathu. (Ekiso. 34:6) Olu hongoleni hi dundrugeya khu sighelo si hi girago hi hatha gu thumeya Jehovha ni edzi a kategisago khidzo vale va mu thumeyago.

KHU GINANI HI HATHAGO GU THUMEYA JEHOVHA?

10. a) Ginani ngudzu-ngudzu gi hi kutsago gu thumeya Jehovha? (Matewu 22:37) b) Jehovha a gu yeyedza kharini gu khuye a ngu gu laphiseya monyo? (Ndzimo 103:13, 14)

¹⁰ Gu fana ni Jesu, ethu ha gu thumeya Jehovha ngudzu-ngudzu kholu hi mu haladzago ngudzu. (Leri Matewu 22:37.) Hi hidzimelede Jehovha tepo hi nga hevbula khu makhalelo yaye nyo mbure. Khu giyeyedzo, wona edzi Jehovha a hi laphiseyago khidzo monyo. Tepo Vaisrayeli va nga mba engisa, uye a di va lomba gu khuye: ‘Muthu ni muthu a na ndreye ndziyani gwaye.’ (Jer. 18:11) Jehovha a ngu dziti gu khuye kha ha vbeleya nigu hi kudzudzwani. (Leri Ndzimo 103:13, 14.) Tepo u dundrugeyago khu dzitepo Jehovha a gu divaledego, ina kha wu kutsegi gu mu thumeya kala gupindruga?

11. Khu sevbini simbe sighelo si hi girago hi hatha gu thumeya Papayi wathu wa ndzadzini?

¹¹ Ha gu kutsega gambe gu thumeya Jehovha kholu hi ngu dziti gu khethu silo nya sadi gasi gu gira. (Mat. 4:10) Gu diga isoso, hi ngu dziti gu khethu si na girega silo nya singi nya sadi khu kotani nya thumo wathu nyo tumbege. Tepo hi thumeyago Jehovha khu gu tumbega, ha gu agisa lina laye, hi yeyedza gu khethu Sathane muliphi hi bwe hi tsakisa monyo wa Papayi wathu. Nigu ha gu hatha gu thumeya Jehovha muhuno, hi na ni lithomo nya gu mu thumeye kala gupindruga. — Joh. 17:3.

12-13. Ha gu hevbula ginani khu giyeyedzo gya Jane ni Pam?

¹² Na hi ngari sanana, hi nga hevbuleya gu haladza ngudzu Jehovha nigu lihaladzo lolo li na simama gu tiya tepo hi dandrago khu tanga. Wona giyeyedzo gya Jane ni Pam,a a gu vandriye nya nyama. Jane a diri ni 11 myaga nigu Pam a diri ni 10 myaga tepo va nga pheya gu hevbula Bhibhiliya. Ambari olu vavelegi vawe va nga mba dzumeya gu hevbula Bhibhiliya, avo va di va dzumeleya gu hevbula ni Dzifakazi dza Jehovha va gu manega tshetsheni gwawe khu ndranga guvbeyani nya semana. Jane wari, khuye: “Esi Dzifakazi dza Jehovha dzi nyi hevbudzidego khu gu thumisa Bhibhiliya, si nyi phaside gu potsa gu daha ni gu gira wubhayi gufana ni sihevbuli khwathu xikwatuno.”

¹³ Hwane nya myaga nyo khaguri, Jane ni Pam va di khala vahuweleyi. Khu gu landreya, avo va di pheya gu thuma kha nga vapiyonero na va gu khathaleya vavelegi vawe va dandridego khu tanga. Jane a gu tshamuseya edzi a dzipwago khidzo khu satshavbo Jehovha a va giredego. Uye wari, khuye: “Eni nyi wonide khu nyabune gu kheni Jehovha a ngu khathaleya dzipari dzaye, nigu kha nga li ganeyago libhuku la 2 Thimoti 2:19 ‘Jehovha a ngu vati vale va mu lumbago.’” Gumwalo gukanakana nya gu khethu Jehovha a ngu khathaleya vale va hathago gu mu haladza ni gu mu thumeya!

14. Hi nga emeya kharini Jehovha? (Wona dzifotu.)

¹⁴ Ethu ha gu vbweta gu khethu vambe vati lisine khu Jehovha. Wona giyeyedzo gegi: U na ni pari nya yadi, yi gu na ni wuhindzi ni gu divaleya. Litshigu limwedo, upwa muthu nyo khaguri na gu ganeya gu khuye pari yago kha yi tumbegi nigu yi vivbedwe khu monyo. U di hadzi gu gira ginani? Khu lisine, u di hadzi gu yi emeya. Khu ndziya nyo fane, tepo hipwago vathu na va gu ganeya silo nyo vivbe khu Jehovha, ethu ha gu mu emeya khu gu embeya vathu lisine maningano Khuye. (Ndzi. 34:1; Isa. 43:10) Ethu ha gu vbweta gu thumeya Jehovha khu malito yathu ni sigiro.

15. Mupostoli Pawulo a wuyedwe kharini khu gu vbindrugedza esi si nga ba si vbwetega womini waye gasi gu thumeya Jehovha? (Vafilipi 3:7, 8)

¹⁵ Ethu hi dzi emisede gu vbindrugedza esi si vbwetegago womini wathu gasi gu tsakisa Jehovha mwendro gu gira nya singi thumoni gwaye. Khu giyeyedzo, mupostoli Pawulo a di diga gikhalo nya lisima avba nya wukhongeyi nya Gijudha gasi gu landra Kristo ni gu thumeya Jehovha. (Gal. 1:14) Kha nga handro wakone, uye a manegide ni womi nyo tsakise ni lithomo nya gu hongole aya fuma gumogo ni Kristo ndzadzini. Uye gima kha dzi laya khu makungo a hathidego nya gu thumeye Jehovha nigu anethu kha hi dzi laye. — Leri Vafilipi 3:7, 8.

16. Ha gu hevbula ginani khu giyeyedzo gya Julia? (Wona dzifotu.)

¹⁶ Ha gu vega gupima avba nya thumo wathu ga Jehovha, ethu hi na wuyedwa olu ni mindru wa tshigu. Wona giyeyedzo gya ndriyathu nya nyamayi nyo pwani khu Julia. Na si hevbuli lisine, Julia a di gu embeleya dzindzimo tshetsheni gwaye na ngari gyanana. Muthu nyo khaguri a nga ba ari muembeleyi khu gale, a di wona gu khuye Julia a ngu kodza gu embeleya gwadi khavbovbo a mu trenari. Nya mba hweya, Julia a di manega ni ndruma a bwe a embeleya malanga ma tidwago ngudzu. Tepo a nga pheya gu hongola xikwatuno gu hevbudzwago gu emba, gihevbuli kwanu gi di mu bhuleya khu Nungungulu gi bwe gi mu tshamuseya gu khigyo lina la Nungungulu khu Jehovha. Nya mba hweya, Julia a di pheya gu hevbula guvili khu semana. Khu kharato, uye a di hunga gu vbedza tepo ni tshivba yaye gasi gu thumeya Jehovha wulangani nya gu khale muembi. Kha sa mu vbevbugeya gu hunga makungo yaya. Uye wari, khuye: “Vathu nya vangi va di nyi embeya gu khavo nyi di gu haganiseya giningwa gyangu, ganiolu nyi di gu vbweta gu thumisa womi wangu gasi gu thumeya Jehovha.” A gu dzipwa kharini muhuno khu gu ba a hungide makungo yaya 30 myaga hwane? Uye a gu engedza gu khuye: “Nyi na ni gurula mapimoni nigu nyi ngu tumba gu kheni Jehovha a na tadzisa gudogoreya ga monyoni gwangu mindru wa tshigu.” — Ndzi. 145:16.

SIMAMA GU THUMEYA JEHOVHA

17. Khu gu ba hi vbanya mahegisotuno, sa gu kuha kharini vale va hathidego gu thumeya Nungungulu ni vale va si hungigo gu gira isoso?

¹⁷ Ha gu vbanya mahegisotuno nya litigo leli nyo vivbe. Mupostoli Pawulo a di lova gu khuye: “Gu tshade ‘tepwana basi,’ nigu ‘oyu a tago a na vboha nigu kha na nga hweya.’” (Hebh. 10:37) Isoso sa gu hi kuha kharini? Ga vale va si hathigo gu thumeya Jehovha, va tshaledwe khu tepo nya yidugwana. (1 Kor. 7:29) Nigu ha gu ba hi hathide gu thumeya Jehovha, hi ngu dziti gu khethu ambari ha gu tshangana ni sigaradzo, hi na emisana naso ‘gitepwana basi.’

18. Ginani egi Jesu ni Jehovha va gi vbwetago gu khavo hi gira?

¹⁸ Jesu kha kutsa valandreyi vaye gasi gu pheya gu mu landreya basi, ganiolu a va kutside gambe gasi va simama gu mu landreya. (Mat. 16:24) Khu kharato, ha gu ba hi thumeya Jehovha khu myaga nya yingi, hi yede gu dzi emiseya gu simama gu mu thumeya. Hi yede gu dzigaradza gasi gu simama gu mu thumeya. Adzina kha si vbevbugi, ganiolu hi na tsaka ni gu mana makategwa nya mangi, ambari olu! — Ndzi. 35:27.

19. Ha gu hevbula ginani khu giyeyedzo gya Gene?

¹⁹ Vathu nya vangi va gu pimisa gu khavo gu thumeya Jehovha kha si resi litsako womini wawe. Abari gu u muphya, ina u ngu dzipwa na wu luza gilo nyo khaguri khu gu thumeya Jehovha? Muphya nyo khaguri nyo pwani khu Gene wari, khuye: “Nyi di gu dzipwa gu khatshi nyi di gu luza silo nya singi khu gu khala mweyo nya Fakazi ya Jehovha. Si di gu gira gu khatshi sanana nya singi si nga dandra gumogo ni eni, si di gu gola dzifesta, gu namorari ni gu jogari dzighemi nya maghilivindra, nari gu eni nyi di yede gu vbedza tepo yangu thumoni nyo tshumayele ni mitshanganoni.” Mapimo yaya ma kuhide kharini Gene? Uye wari, khuye: “Nyi di pheya gu vbanya miwomi mivili, nigu si tsakiside khu tepo nyo khaguri. Ganiolu, isoso kha sa nyi ninga litsako nya lisine. Nyi di pheya gu dundrugeya khu lisine nya Bhibhiliya nyi nga ba nyi li digide nyi bwe nyi hunga gu thumeya Jehovha khu monyo wangu watshavbo. Gukhugeya avbovbo, si di gu gira gu khatshi Jehovha a di gu hlamula yatshavbo milombelo nyi nga ba nyi gira.”

20. Hi yede gu dzi emiseya gu gira ginani?

²⁰ Muembi nya ndzidzimo a di embeleya ga Jehovha gu khuye: “Kategide muthu u mu hathago a hidzimela vbafuvbi gwago, gasi guta vbanya nyumbani gwago.” (Ndzi. 65:4) Khu kharato, hongoleni hi dzi emiseya gu simama gu thumeya Jehovha. Gu fana ni Josuwa hi na ganeya gu khethu: “Gasi eni ni ndranga yangu hi na khozela [Jehovha].” — Jos. 24:15.