Gu manega ni wupari wa vbafuvbi ni vandriyathu khyadi gwathu!

1-2. Ginani gi gu na ni lisima ga Jehovha, nigu ginani egi a gi vbwetago gu khuye hi gira?

NDZIYA eyi hi pharago khiyo vambe vathu yi na ni lisima ga Jehovha. Jesu ganede gu khuye hi yede gu haladza muthu khwathu nga edzi hi dzi haladzago khidzo. (Mat. 22:37-39) Isoso so pata gu phara gwadi ambari kamo vathu va ngu mba thumeya Jehovha. Tepo hi yeyedzago wuwadi wowo, ho pimedzeya giyeyedzo gya Jehovha Nungungulu, oyu a “[dusago] lidambo laye ga vathu nya mba vadi ni ga vathu nya vadi a bwe a wisa ndzadzi ga vathu nya gululame ni ga vathu nya gu mba lulama.” — Mat. 5:45.

² Ambari olu Jehovha a haladzago vathu vatshavbo, uye a ngu haladza ngudzu vale va mu thumeyago. (Joh. 14:21) Uye a gu vbweta gu khuye hi fana naye. Uye gambe a gu hi kutsa gu hi ‘haladzana ngudzu’ khu gyathu hi bwe hi ‘golana khu lihaladzo nya wundruye.’ (1 Ped. 4:8; Rom. 12:10) Lihaladzo nya nga eli, hi nga li fananisa ni lihaladzo hi gu nalo khu muthu nyo khaguri hi mu haladzago mwendro khu pari yathu ya vbafuvbi.

3. Ginani hi yedego gu gi dundruga?

³ Lihaladzo la gu fana ni gifilori, nigu gasi li dandra hi yede gu li khataleya. Pawulo ningide wusingalagadzi wowo Makristo khu gu khuye: “Simamani gu haladzana kha nga vandruye.” (Hebh. 13:1) Jehovha a gu vbweta gu khuye hi simama gu haguleya lihaladzo lathu khu vambe. Ndrima yeyi, yi na hi phasa gu wona gu khethu khu ginani hi yedego gu hidzimeleya vandriyathu ni gu wona edzi hi nga simamago khidzo gu gira isoso.

KHU GINANI HI YEDEGO GU HIDZIMELEYA VANDRIYATHU?

4. Guya khu Ndzimo 133:1, hi nga tiyisega kharini gu khethu hi ngu ninga lisima wumowo hi gu nawo ni vandriyathu? (Wona dzifotu.)

⁴ Leri Ndzimo 133:1. Ethu hi ngu pwana ni muembi nya dzindzimo a nga khuye wupari ni vathu va thumeyago Jehovha gu ngu ‘tshamba’ ni ‘gutsakisa.’ Ganiolu, gu fana ni muthu a nga digago gu wona gu hlamadzisa nya simbo nyo khaguri a wu wonago tshigu ni tshigu, anethu hi nga diga gu wona edzi wu mburidego khidzo wumowo hi gu navo ni vandriyathu. Hi ngu wona vandriyathu dzitepo nya dzingi khu semana, ganiolu hi nga tiyisega kharini gu khethu va ngo gu simama na vari ni lisima gwathu? Lihaladzo hi gu nalo khu vandriyathu li na dandra ha gu dundrugeya khu lisima eli moyo ni moyo a gu nalo libandlani ni avbo gwathu.

5. Vambe vathu va gu kuhwa kharini khu lihaladzo hi gu nalo?

⁵ Vathu nyo khaguri va ngu hlamadziswa ngudzu khu lihaladzo hi gu nalo tepo vatago khu tepo nyo pheye mitshanganoni yathu. Avo va ngu khodwa gu khavo hi Makristo nya lisine khu kotani nya lihaladzo hi li yeyedzago khu gyathu. Jesu ganede gu khuye: “Mwa gu haladzana, khavbo vathu va na dzitigo gu khavo mu vapizane vangu.” (Joh. 13:35) Wona giyeyedzo gya Chaithra, oyu a nga ba a hevbula univhersidhadhi tepo khiyo a nga ba a hevbula ni Dzifakazi dza Jehovha. Uye dzumede konvhite gasi gu hongola kongresu. Hwane nya gu ba a hongode ga litshigu nya gupheye, a di embeya muhevbudzi waye nya Bhibhiliya gu khuye: “Vavelegi vangu va di nga si tshuki va nyi abrasari. Ganiolu, ga kongresu yeyi nyi abrasaridwe tanga nya 52 dzitepo ndrani nya litshigu limwedo. Nyi tugude gu kheni Jehovha a di gu thumisa vathu vaye gasi gu nyi yeyedza lihaladzo laye. Nyo vbweta gu gira gipandre nya ndranga yeyi.” Chaithra a di simama gu gira gu vbindrugedza nyo khaguri womini gwaye kala a nga bhabhatiswa khu 2024. Tepo vathu nya vaphya hengeledzanoni va wonago mithumo yathu nya yadi, gu pata ni lihaladzo lathu, avo va na kutsega gu thumeya Jehovha. — Mat. 5:16.

6. Gu hidzimeleya vandriyathu si nga hi vhikeya kharini?

⁶ Gu hidzimeleya vandriyathu si nga hi vhikeya. Pawulo a di embeya Makristo gu khuye: “Simamani gu tiyisana khu gyanu . . . gasi ne ni moyo wanu a si bangiswi hungo khu tshivba nya gusengedzeye nya gighoho.” (Hebh. 3:13) Ha gu vbeya tshivba nyo bwe hi pimisa gu khethu kha hi na nga si kodza gu gira silo nya sadi, Jehovha a nga kutsa ndriyathu nyo khaguri gasi gu hi phasa. (Ndzi. 73:2, 17, 23) Khu lisine, giphaso gyogyo khyadi gwathu.

7. Khu gwevbini gu pwanana gu gomogo avba nya lihaladzo ni wumowo? (Vakolosi 3:13, 14)

⁷ Ethu ho gira gipandre nya vathu va dzi garadzago gu yeyedzana lihaladzo, khu kharato ethu hi ngu hakha makategwa nya mangi. (1 Joh. 4:11) Khu giyeyedzo, lihaladzo li ngu hi kutsa gu ‘simama gu laphiseyana myonyo,’ nigu isoso si ngu phasa gu hi manega ni wumowo ni vandriyathu. (Leri Vakolosi 3:13, 14; Efes. 4:2-6) Khu kharato, hi ngu tsaka khu gu manega mitshanganoni nigu litsako lolo kha li manwi wumbe wulanga.

YEYEDZA GITHAWO VAMBE

8. Jehovha a gu hi phasa kharini gu manega ni wumowo ni vandriyathu?

⁸ Wumowo hi gu navo ni vandriyathu mafuni gwatshavbo wa gu kodzega khu kotani ya Jehovha. Nigu Jehovha a ngu gira gu isoso si kodzega ambari olu hi nga mba vbeleya. (1 Kor. 12:25) Bhibhiliya ya gu hi embeya gu khiyo ethu ho ‘hevbudzwa khu Nungungulu gu haladzana khu gyathu.’ (1 Tes. 4:9) Isoso so thula gu khiso Jehovha a gu thumisa Bhibhiliya gasi gu hi embeya esi hi yedego gu gira gasi hi hidzimeleyana khu gyathu. Hi nga ‘hevbudzwa khu Nungungulu’ khu gu hevbula ni gu thumisa esi a hi hevbudzago. (Hebh. 4:12; Jak. 1:25) Nigu khiso kamo Dzifakazi dza Jehovha dzi girago.

9. Ginani hi gi hevbulago umo ga Varoma 12:9-13 khu gu yeyedzana githawo?

⁹ Lito la Nungungulu la gu hi hevbudza kharini gu hidzimeleyana khu gyathu? Leri esi Pawulo a ganedego maningano ni isoso, umo ga Varoma 12:9-13. (Leri.) Omu ma gu tshingiswa malito ma gu khayo hi yede ‘gupheya khethu gu ninga githawo vambe.’ So thula ginani isoso? Hi yede gu vbwetedzeya mathomo nyo yeyedze vambe ‘pweya wusiwana,’ gu divaleya, gu hakha gwadi vapfhumba, gu yeyedza wuwadi ni simbe silo. (Efes. 4:32) Kha si vbwetegi gu u vireya ndriyago gasi a gu hidzimeleya. U nga ‘pheya’ khuwe gu gira isoso. Nigu u na wuyedwa khesi Jesu a ganedego khiso tepo a nga khuye: “A ngu tsaka oyu a ningago guvbindra oyu a hakhago.” — Mith. 20:35.

10. Hi nga thuma kharini khu sighingi tepo hi ‘yeyedzago githawo vambe?’ (Wona fotu.)

¹⁰ Hwane nya gu ba mupostoli Pawulo a hi embede gu hi pheya khethu gu ninga githawo vambe, uye a di hi kutsa gu thuma khu “sighingi” hi si khali “migara.” Muthu a gu na ni sighingi a gu thuma khu gu dzigaradza. Muthu a gu na ni sighingi, a gu ningwa thumo nyo khaguri a gu wu gira khu ndziya nya yadi. Mavingu 3:27, 28 o ganeya gu khuye: “U nga bombi gu ninga giphaso ga oyu [a] hamugago gya gu bani giri mandzani gwago.” Khu kharato, tepo hi wonago gu khethu muthu nyo khaguri a ngu vbweta giphaso, ho gira satshavbo hi si kodzago gasi gu mu phasa. Ethu kha hi bweleleyi hwane, nigu kha hi pimisi gu khethu mumbe muthu a na gira isoso. — 1 Joh. 3:17, 18.

11. Ginani gi na hi phasago gu hidzimeleya vambe?

¹¹ Yimbe ndziya nya gu yeyedze gu khethu hi ngu ninga githawo vambe khu gu va divaleya tepo va hi khunguvanyisago. Vaefeso 4:26 wari, khuye: “Mu nga pfodzisi lidambo na mu ngo zangaride.” Khu ginani? Livhesi 27 la gu ganeya gu khilo isoso si di hadzi gu ninga “wulanga Dhiyabhulosi.” Khu gu thumisa lito laye, Jehovha a gu hi embeya khu gu phindra-phindra gu khuye hi yede gu divaleya vambe. Vakolosi 3:13 a gu ganeya gu khuye: “Simamani gu . . . divaleyana khu monyo watshavbo.” Gu divaleya sihoso sa vambe mweyo nya dzindziya nya gu va hidzimeleye. Khu kharato, tepo hi divaleyago vambe ha gu dzi garadzeya gu andrisa gu “pwanana ni gu vbanya khu gurula ni vambe.” (Efes. 4:3) Khu gu piya, gu divaleya gu nga hi phasa gu andrisa gurula ni wumowo vbakari gwathu.

12. Jehovha a gu hi phasa kharini gu divaleya vambe?

¹² Lisine gu si nga hi garadzeya gu divaleya vale va hi khunguvanyisidego. Ganiolu, hi nga va divaleya khu gu phaswa khu liphuvbo nya guage. Hwane nya gu ba a hi gengedzide gasi gu hi “pweyana wusiwana” ni gu hi ‘thuma khu sighingi,’ Milowo ya gu hi embeya gu khiyo: “Dzumeleyani liphuvbo nya guage li mi gira mu vbisega.” Isoso so thula gu khiso liphuvbo nya guage la Nungungulu li nga hi gira hi manega ni gudogoreya ni sighingi. Khu kharato, liphuvbo la Nungungulu li nga hi phasa gu yeyedza pweya-wusiwana ni gu divaleyana khu gyathu. Khu kharato, ethu hi ngu lomba khu monyo wathu watshavbo gasi Jehovha a hi phasa. — Luka 11:13.

“GU NGA MANEGI GU HAMBANA VBAKARI GWANU”

13. Ginani gi nga hi hambanisago ni vambe?

¹³ Libandla la gu wumbwa khu “vathu vatshavbo” va tago khu malanga nyo hambane-hambane. (1 Thim. 2:3, 4) Ha mba dzi woneya, gu hambana nya mavbanyelo yathu, nya nga sombo hi ambalago, sivbungadzo ni edzi hi thumago khidzo madwali si nga hi gira hi dzi hambanisa ni vandriyathu. (Rom. 14:4; 1 Kor. 1:10) Khu kotani nya olu Nungungulu a hi hevbudzago gu haladzana, kha hi yeli gu thangisa esi hi si golago guvbindra esi vambe va si golago. — Filp. 2:3.

14. Ginani hatshavbo hi yedego gu dzi garadzeya gu gira, nigu khu ginani?

¹⁴ Hi nga potsa gu ganedzisana libandlani khu gu hi dzi garadza gu ganeya ni gu tiyisa vambe khu malito yathu tepo yatshavbo. (1 Tes. 5:11) Matshigwana yaya, vathu nya vangi va nga ba va dusidwe libandlani ni ava va nga ba va emide guta mitshanganoni va ngu wuyeleya. Khu kharato, hi yede gu va hoyozeya khu ndziya nya yadi. (2 Kor. 2:8) Wona esi si giregedego ndriyathu nyo khaguri a nga ba a emide gu hongola mitshanganoni khu tanga nya 10 mwaga. Uye wari, khuye: “Vatshavbo va di gu nyi hegeya ni gu vbweta gu nyi phara mandza.” (Mith. 3:19) Wuwadi wowo nya wudugwana wu mu kuhide kharini? Uye a gu engedza gu khuye: “Si nyi giride nyi wona gu kheni Jehovha a di gu nyi phasa gu tsaka gambe.” Ha gu dzi garadzeya gu tiyisa vambe, Kristo a nga hi thumisa gasi gu hi khala giphaso ga vale va “garadego ni gu lemedwa.” — Mat. 11:28, 29.

15. Khu yevbini yimbe ndziya hi nga yi thumisago gasi gu andrisa wumowo? (Wona fotu.)

¹⁵ Yimbe ndziya hi nga yi thumisago gasi hi andrisa wumowo, khu gu thumisa malito yathu. Libhuku la Joba 12:11 la gu ganeya gu khilo: “Gasi ndzeve khandriyo yi hathelago malito, kha nga lidimi li lingago guhodza, gani?” Gu fana ni muphuli a lingago guhodza a phudego na nga si ninge vambe vathu, anethu hi yede gu dundrugeya gwadi khesi hi na ganeyago na hi nga si ganeyi. (Ndzi. 141:3) Ethu ho vbweta gu tiyisega gu khethu esi hi na si ganeyago tepo yatshavbo si ngu vbaha ni gu “phasa ava va engiseyago.” — Efes. 4:29.

16. Khu vamani va yedego gu dzi garadzeya ngudzu gu ganeya malito ma tiyisago?

¹⁶ Vama ni vavelegi va yede gu dzi garadzeya ngudzu gu ganeya malito ma vbahago. (Kol. 3:19, 21; Tit. 2:4) Madhota nayo ma yede gu tiyisa ni gu khathaleya dzinvuta dza Jehovha. (Isa. 32:1, 2; Gal. 6:1) Livingu nyo khaguri nya Bhibhiliya la gu hi dundrugisa gu khilo: “Mahungu ma gu ganedwa khidzo gu vbwetegago khidzo, ma gu tshamba ngudzu.” — Mav. 15:23.

YEYEDZA LIHALADZO “KHU MITHUMO NI LISINE”

17. Hi nga tiyisega kharini gu khethu lihaladzo hi gu nalo khu vandriyathu la gu dugeya kamo khu monyoni?

¹⁷ Mupostoli Johane a gu hi kutsa gu hi si haladzi khu “malito ni likana, ganiolu gu vbwetega hi li yeyedza khu mithumo ni lisine.” (1 Joh. 3:18) Ethu ho vbweta gu khethu lihaladzo hi gu nalo khu vandriyathu li dugeya monyoni. Hi nga si gira kharini isoso? Tepo hi vbedzago tepo nyo laphe ni vandriyathu, hi na hidzimeya vbafuvbi gwawe nigu lihaladzo lathu khavo li na dandra. Khu kharato, hi yede gu vbwetedzeya mathomo gasi hi vbedza tepo navo, adzina saye mitshanganoni ni thumoni nyo tshumayele. Dusa gitepwana gasi u wuseya vandriyago. Ha gu gira isoso, hi na yeyedza gu khethu hi ngu ‘hevbudzwa khu Nungungulu gu haladzana khu gyathu.’ (1 Tes. 4:9) Nigu hi na vbanya guya khu malito ma gu khayo “nga pwani gutshamba ni gutsakisa, valongo va gu vbanya dangamwedo khu gupwanana!” — Ndzi. 133:1.