Hi ngu wuyedwa khu “gu khala vbafuvbi ni Nungungulu”

1-2. a) Ginani hi yedego gu gira gasi hi manega ni wupari wa vbafuvbi ni muthu nyo khaguri? b) Hi na bhula khu ginani avba nya ndrima yeyi?

INA u na ni pari ya vbafuvbi? Ginani u giridego gasi mu khala dzipari? Adzina saye u di vbedza tepo nayo, uti esi yi nga tshangana naso womini ni guti esi a si golago ni gu mba si gola. Uwe u wonide gu khuwe pari yago yi na ni makhalelo nyo mbure u vbwetago gu ma pimedzeya. Khavbovbo, u di pheya gu haladza pari yago.

² Gasi gu manega ni wupari wa vbafuvbi ni muthu nyo khaguri, sa gu vbwetega tepo ni gudzigaradza. Khiso sasimweso hi yedego gu gira ha gu vbweta gu manega ni wupari wa vbafuvbi ni Jehovha Nungungulu. Avba nya ndrima yeyi, hi na bhula khedzi hi nga hidzimeyago khidzo ga Nungungulu wathu ni wuyelo hi na wu manago khu gu gira isoso. Gupheya, hi na wona gu khethu khu ginani si gu sadi gu hidzimeleya Pari yathu nya yadi, Jehovha.

3. Khu ginani si gu na ni lisima gu dundrugeya khu wuyelo hi na wu manago khu gu hidzimeleya Jehovha?

³ Nya mba kanakana u ngu dzumeya gu khuwe khyadi gu hidzimeya ga Jehovha. Ganiolu, gu dundrugeya edzi si gu sadi khidzo gu gira isoso, si na hi kutsa gu simama gu mu hidzimeleya. (Ndzi. 63:6-8) Khu giyeyedzo, hi ngu dziti gu khethu ha gu gira dhiyeta nya yadi, hi gira dziexersisiyu, gu lala ni gu seya mati nyo eneye si nga hi phasa. Ambari ulolo, vathu nya vangi kha va gire isoso, va gu huniseya mawugelo yawe. Khu kharato, tepo hi khaleyago gu dundrugeya edzi hi na wuyedwago khidzo khu gu gira isoso, si na hi kutsa gu mba ema gu gira silo soso. Khu ndziya nyo fane, hi ngu dziti gu khethu gu hidzimeya vbafuvbi ga Jehovha khyadi gwathu, ganiolu gu dundrugeya khu wuyelo nya gu gire isoso si na hi kutsa gu simama gu hidzimeleya Pari yathu, Jehovha. — Ndzi. 119:27-30.

4. Mulovi nya Ndzimo 73:28 ganede ginani?

⁴ Leri Ndzimo 73:28. Mulovi nya Ndzimo 73 a diri Mulevhi a nga hathwa gasi gu thuma tempeleni ga Jehovha kha nga muembeleyi. Uye adzina saye a di gu khozeya Jehovha khu gu tumbega khu myaga nya yingi. Ganiolu, uye a di gu dziti gu khuye si na ni lisima gu dundruga gu khuye “gu khala vbafuvbi ni Nungungulu” khyadi gwaye, nigu a di gu vbweta gu khuye vambe va dziti gu khavo gu manega ni wupari ni Nungungulu khyadi gwawe. I wuyelo muni hi na wu manago khu gu gira isoso?

“GU KHALA VBAFUVBI NI NUNGUNGULU” GU NGU RESA LITSAKO

5. a) Khu ginani gu hidzimeya ga Jehovha si hi reseyago litsako? b) Guti Jehovha a gu ningago gwa gu gu phasa ni gu gu vhikeya khu ndziya muni? (Mavingu 2:6-16)

⁵ Tepo hi hidzimeyago ga Jehovha, hi na engedzeya gu tsaka. (Ndzi. 65:4) Esi lisine khu sighelo nya singi. Khu giyeyedzo, tepo hi lerigo esi Jehovha a hi embeyago omu nya Bhibhiliya hi bwe hi mu engisa, ethu ha gu khala vathu nya guti. Guti gogo gu ngu hi vhikeya avba nya mikutsedzelo ni gu gira sihoso nya sikhongolo. (Leri Mavingu 2:6-16.) Khu kotani nya isoso, Bhibhiliya ya gu ganeya gu khiyo: “Kategide muthu wule a manidego guti ni mapimo.” — Mav. 3:13.

6. Ginani gi giredego muembi nya dzindzimo a luza litsako?

⁶ Lisine gu ambari dzipari dza Jehovha dzi ngu garadzega dzimbe dzitepo. Mulovi nya Ndzimo 73, a luzide litsako tepo a nga pheya gu dundrugeya khu silo nya mba sadi. Uye a di pheya gu pimisa gu khuye vathu nyo vivbedwe khu myonyo va di gu dugeleya ambari olu va nga ba va si khathali khu Nungungulu ni milayo Yaye. Uye a di gu pimisa gu khuye vathu va nga va vivbedwe khu myonyo ni gu dzi khusedza va diri ni satshavbo va nga ba va si vbweta ni mawugelo nya yadi nigu kha va nga ba va tshaniseka. (Ndzi. 73:3-7, 12) Muembi nya dzindzimo a di garadzega ngudzu nyo bwe a dzi wudzisa gu khuye ina gudzigaradza a gu girago gasi gu thumeya Jehovha gu di gu phasa. Uye a di gu garadzegide ngudzu nyo bwe a ganeya gu khuye: “Khu guralo, kha ga phasa gilo gu agisa monyo wangu, gu vbweta guvbanya gwadi ni gu dzi agisa nyi si giri gighoho.” — Ndzi. 73:13.

7. Tepo hi garadzegago hi nga gira ginani? (Wona kapa.)

⁷ Ambari olu muembi nya dzindzimo a nga ba a garadzega, uye a di gira gilogyo gasi gu vbindrugedza mapimo yaye. Uye a di “bela wulangani nya guage wa Nungungulu,” omu Jehovha a nga mu phasa gu vbindrugedza mapimo yaye. (Ndzi. 73:17-19) Tepo hi garadzegago, Jehovha, oyu a gu Pari yathu a ngu siti isoso. Ha gu gombeya gwaye hi mu lomba sileletelo hi bwe hi dzumeya giphaso a hi ningago khu gu thumisa Lito laye ni libandla, hi na hakha tshivba nya gu timiseye sigaradzo sathu. Ambari na hiri ni sigaradzo nya singi, Jehovha a na hi thaveleya ni gu hi phasa gu hi dzipwa na hi rude. — Ndzi. 94:19.a

“GU KHALA VBAFUVBI NI NUNGUNGULU” GU NGU HI NINGA GUTUMBA NI WUMINDRU

8. Khu dzevbini dzimbe dzindziya dzi yeyedzago gu khidzo gu hidzimeya ga Jehovha khyadi gwathu?

⁸ Gu hidzimeleya Nungungulu khyadi khu dzindziya dzimbili nya lisima. Nyo pheye, gu ngu hi ninga womi nya wadi. Nya wuvili, gu ngu hi ninga gutumba nya wumindru. (Jer. 29:11) Hongoleni hi wona gwadi wuyelo wowu.

9. Gu hidzimeya ga Jehovha sa gu hi ninga litsako nya likhongolo khu ndziya muni?

⁹ Jehovha a gu khala pari yathu ya vbafuvbi, hi na mana womi nya wadi. Vathu nya vangi muhuno va gu ganeya gu khavo Nungungulu a mwalo. Khu kharato, avo kha va dziti gu khavo khu ginani vathu va gu romo mafuni momu, nigu va gu khodwa gu khavo vathu mindru wa tshigu va na mwalalega. Ganiolu, khu gu hevbula Lito la Nungungulu, hi nga tiyisega gu khethu Nungungulu “a ngu tshatshazeya ava va mu vbwetedzeyago khu lisine.” (Hebh. 11:6) Kala muhuno, hi ngu vbanya womi nyo tsakise kholu ha gu gira esi hi nga giredwa iso, a gu gu thumeya Papayi wathu wa ndzadzini, Jehovha. — Dhet. 10:12, 13.

10. Ginani egi Jehovha a tumbisago vale va mu tumbago? (Ndzimo 37:29)

¹⁰ Vathu nya vangi va mwalo gutumba nya wumindru. Avo basi va gu thuma, va tshadha, va velega sanana va bwe va dzi dongiseya gasi gu dzi khathaleya mindru wa tshigu. Avo kha va dziti gu khavo Nungungulu a ngu tumbisa wumindru. Ganiolu, ethu hi ngu dziti gu khethu Jehovha a ngu khathaleya sithumi saye. (Ndzi. 25:3-5; 1 Thim. 6:17) Ethu hi ngu tumba Nungungulu wathu, Pari yathu. Nigu hi ngu dziti gu khethu a na tadzisa esi a hi tumbisidego. Ethu hi ngu vireya silo nya singi, ngudzu-ngudzu gu mu khozeya kala gupindruga paradhesini. — Leri Ndzimo 37:29.

11. Ginani gi giregago ha gu khala dzipari dza Nungungulu, nigu isoso sa gu mu kuha kharini?

¹¹ Gu hidzimeya vbafuvbi ga Jehovha khyadi gwathu khu dzindziya nya dzingi. Khu giyeyedzo, Jehovha a ngu tumbisa gu divaleya sighoho sathu tepo hi dzi layago khu lisine. Khu kharato, kha hi yeli gu garadzega khu sighoho hi giridego gale. (Ndzi. 32:1-5) Nigu hi ngu tsaka tepo hi tsakisago Jehovha. (Mav. 23:15) Khu lisine, hi na ni silo nya singi nya sadi si hi ningago litsako khu gu khala dzipari dza Jehovha. Ganiolu, u na simama kharini gu khala vbafuvbi ni Nungungulu?

U NGA ‘KHALA KHARINI VBAFUVBI NI NUNGUNGULU?’

12. Ginani u girago gasi gu hidzimeya ga Nungungulu?

¹² Na hi nga si bhabhatiswe kha nga Dzifakazi dza Jehovha, ethu hi giride silo nya singi gasi gu khala dzipari dza Jehovha. Ethu hi hevbude lisine maningano khuye ni Jesu Kristo, hi dzi layide khu sighoho sathu, hi yeyedzide gu khethu hi ngu khodwa ga Nungungulu hi bwe hi gira satshavbo gasi gu mu engisa. Gasi hi hidzimeya ga Nungungulu hi yede gu simama gu gira silo sesi. — Kol. 2:6.

13. Silo muni nya siraru si nga hi phasago gu simama gu hidzimeya ga Jehovha?

¹³ Ginani gi na hi phasago gu simama gu hidzimeya ga Jehovha? 1) Hi yede gu simama gu leri ni gu hevbula Bhibhiliya. Tepo hi girago isoso, hi yede gu gira nya singi guvbindra basi gu hevbula silo nya litshina maningano ni Nungungulu. Hi yede gu pwisisa gu khethu khu yavbini makungo ya Nungungulu khethu hi bwe hi vbanya khu ndziya a vbwetago gu khuye hi vbanya khiyo. (Efes. 5:15-17) 2) Hi yede gu tiyisa gukhodwa gwathu khu gu dundrugeya silo si yeyedzago gu khiso uye a ngu hi haladza. 3) Hi yede gu simama gu nyenya esi si nyenywago khu Jehovha ni gu potsa gu gira wupari ni vathu va girago silo soso. — Ndzi. 1:1; 101:3.

14. Ginani hi nga girago tshigu ni tshigu gasi gu tsakisa Jehovha? (1 Vakorinto 10:31) (Wona dzifotu.)

¹⁴ Leri 1 Vakorinto 10:31. Si na ni lisima gu gira silo si tsakisago Jehovha. Ganiolu, hi yede gu gira nya singi guvbindra gu hongola thumoni nyo tshumayele ni gu hongola mitshanganoni. Mithumo nya yadi yi tsakisago Jehovha ya gu pata esi hi girago tshigu ni tshigu. Khu giyeyedzo, tepo hi tumbegago ga silo satshavbo ni gu kabana ni vambe esi hi gu naso, ha gu tsakisa Jehovha. (2 Kor. 8:21; 9:7) Uye gambe a gu vbweta gu khuye hi yeyedza gu khethu hi ngu ninga lisima giningwa nya womi. Khu kharato, hi yede gu dzi woneya ni esi hi hodzago, gu seya ni gu dzi khathaleya khu dzimbe dzindziya. Tepo Jehovha a wonago gudzigaradza hi gu girago gasi gu mu tsakisa, uye a na engedzeya gu hi haladza. — Luka 16:10.

15. Jehovha a gu vbweta gu khuye hi phara kharini vambe?

¹⁵ Jehovha khwadi ga vathu vatshavbo, ga vale va mu thumeyago ni vale va gu mba mu thumeya. (Mat. 5:45) Uye a gu vbweta gu khuye hi yeyedza nethu wuwadi vambe. Khu giyeyedzo, kha hi yeli gu ‘ganeya guvivba khu muthu, hi si khali va nya mayunga, ganiolu hi yede gu rula hi bwe hi gireya wuwadi vathu vatshavbo.’ (Tit. 3:2) Khu kharato, ambari vathu va gu mba khodwa ga Jehovha, ethu kha hi pimisi gu khethu hi va tshukwana guvbindra avo. (2 Thim. 2:23-25) Ethu ha gu engedzeya gu hidzimeya ga Jehovha khu gu phara ni wevbini khu wuwadi.

HI NGA “KHALA VBAFUVBI NI NUNGUNGULU” AMBARI HA GU GIRA SIHOSO

16. Mulovi nya Ndzimo 73 a di pheya gudzipwa kharini hwane nya tepo nyo khaguri?

¹⁶ Ganiolu, ahati khu gu gimbiya nya tepo wa gu dzipwa gu khatshi kha wu ninganedwi khu lihaladzo la Jehovha? Kha nga hi si wonidego, esi khiso si nga giregeya mulovi nya Ndzimo 73. Uye a di khuye: “Migondro yangu yi di hadza gu kwiriga; vbadugwana nyi di vbweta gu ndreya nyi thega.” (Ndzi. 73:2) Uye a di dzumeya gu khuye a di gu ‘khunguvanyegide’ nigu a di gu khade “gipumbu” gu fana ni “girengo nyambana mapimo,” mbeli ga Jehovha. (Ndzi. 73:21, 22) Ganiolu, ina a di pimisa gu khuye khu kotani nya sihoso a giridego, Jehovha a di hadzi gu mba mu divaleya gambe?

17. a) Ambari olu muembi nya dzindzimo a nga ba a vbede ngudzu tshivba, ginani a giridego? b) Ha gu hevbula ginani khu giyeyedzo gyaye? (Wona dzifotu.)

¹⁷ Abari gu muembi nya dzindzimo a di pimiside gu khuye Jehovha a di mu digide, uye a dzipwide kharato khu tepo nyo role. Ambari tepo a nga ba a dzipwa kharato, uye a di gu dziti gu khuye a di yede gu khala vbafuvbi ga Jehovha. Uye a di lova gu khuye: “Ambari khu guralo, eni nyi womo gumogo nago [Jehovha] u nyi pharide khu libogo langu la nyamudye. Khuwe u nyi gimbidzisago khu nayo wago khu guhegisa u na nyi hakha gambe khu wuzundzo.” (Ndzi. 73:23, 24) Anethu hi yede gu lomba Jehovha gasi a hi tiyisa tepo hi wonago gu khethu gukhodwa gwathu gwa gu vbola mwendro ha gu vbeya tshivba khu kotani nya sihoso sathu. (Ndzi. 73:26; 94:18) Ambari ha gu gira sihoso nya sikhongolo, hi nga bweleya ga Jehovha hi bwe hi tiyisega gu khethu uye a dzi ‘emisede gu hi divaleya.’ (Ndzi. 86:5) Ha gu dzipwa na hi vbede tshivba, si na ni lisima ngudzu gu hidzimeya ga Nungungulu wathu. — Ndzi. 103:13, 14.

“KHALA VBAFUVBI NI NUNGUNGULU” KALA GUPINDRUGA

18. Khu ginani hi nga simamago gu hidzimeya ga Jehovha kala gupindruga?

¹⁸ Hi nga simama gu hidzimeya ga Jehovha kala gupindruga. Gima kha hi na nga diga gu hevbula khuye. Bhibhiliya ya gu ganeya gu khiyo dzindziya dza Jehovha, guti gwaye ni wugengeyi waye, “a mwalo a kodzago gu si tshamuseya.” — Rom. 11:33.

19. Gitiyisegiso muni hi ningwago khu muembeleyi nya Dzindzimo?

¹⁹ Ndzimo 79:13 ya gu ganeya gu khiyo: “Ethu hi gu vathu vago, dzinvuta nya tshambi wago ethu ni livelego lathu hi na gu dhumisa, hi embelela hi gu bonga kala gupindruga.” Tepo u hidzimeyago vbafuvbi ga Jehovha, u nga tiyisega gu khuwe u na hakha makategwa kala gupindruga nigu u na ganeya na wu tiyisegide gu khuwe: “Nungungulu likhokhola nya monyo wangu khuye thomba yangu nyamba vbela.” — Ndzi. 73:26.