Bhibhiliya ya gu ganeya ginani khu dzimhango nya tumbunugo?

Hlamulo nya Bhibhiliya

Nungungulu khandruye a vangago dzimhango nya tumbunugo dzi giregago muhuno, ganiolu a ngu garadzega khu gu wona vathu na va gu kuhwa khidzo. Mufumo wa Nungungulu wu na fuvisa satshavbo si vangago gutshaniseka, gupata ni dzimhango nya tumbunugo. Ganiolu, na si si giregi isoso, Nungungulu a ngu ninga wuthavelo vathu va tshanganago ni sigaradzo soso. — 2 Vakorinto 1:3.

• Khu ginani hi nga tiyisegago gu khethu dzimhango nya tumbunugo khandri tsayiso wa Nungungulu?

• Ina dzimhango nya tumbunugo giyeyedzo nya gu khigyo ho vbanya matshigoni nyo hegise?

• Nungungulu a gu phasa kharini ava va thegedwego khu dzimhango nya tumbunugo?

• Ina Bhibhiliya yi nga hi phasa gu dzi dongiseya gasi gu emisana ni dzimhango nya tumbunugo?

• Mavhesi nya Bhibhiliya ma nga thaveleyago ava va nga thegedwa khu dzimhango nya tumbunugo

Khu ginani hi nga tiyisegago gu khethu dzimhango nya tumbunugo khandri tsayiso wa Nungungulu?

Bhibhiliya ya gu yeyedza gu khiyo Nungungulu thumiside tshivba nya tumbunugo gasi gu lamula. Ganiolu, edzi Nungungulu a giridego khidzo isoso si hambanide ni edzi dzi giregago khidzo dzimhango nya tumbunugo.

• Dzimhango nya tumbunugo dzi ngu songa ni gu bayisa vathu. Ganiolu, tepo Nungungulu a nga ba a thumisa tshivba nya tumbunugo, uye a di gu tiyisega gu khuye a di gu fuvisa basi vathu nyo vivbe. Khu giyeyedzo, tepo Nungungulu a nga fuvisa madhoropa ya Sodhoma ni Ghomora, uye a di vhikeya Loti a nga ba ari mwama nya wadi ni sanana saye nya sivili. (Genesi 19:29, 30) Nungungulu a di wona myonyo nya vathu vale a bwe a fuvisa basi ava va nga ba va vivbedwe khu myonyo. — Genesi 18:23-32; 1 Samuweli 16:7.

• Dzimhango nya tumbunugo dzo girega khavba ni avba mwendro nya mba tivisa. Ganiolu, Nungungulu gengedzide vathu nya mba vadi na si thumise tshivba nya tumbunugo gasi gu va lamula. Vathu va nga engisa sigengedzo, va manegide ni lithomo nya gu vbuluge. — Genesi 7:1-5; Matewu 24:38, 39.

• Vathu va gu hunga makungo ni gu gira silo si vangago dzimhango nya tumbunugo. Khu ndziya muni? Vathu va gu ghoha mafu va bwe va vbaha ga malanga si vbevbugago gu manega sirevareva, gu tala mati mwendro dzimbe dzimhango. (Gutuledwa 11:18) Kha hi yeli gu ninga nandru Nungungulu khu makungo nya mba yadi ma hungwago khu vathu. — Mavingu 19:3.

Ina dzimhango nya tumbunugo giyeyedzo nya gu khigyo ho vbanya matshigoni nyo hegise?

Ina, Siprofeto nya Bhibhiliya sa gu yeyedza gu khiso gu na manega dzimhango ‘gu hegisani nya litigo leli’ mwendro “matshigoni nya gu hegise.” (Matewu 24:3; 2 Thimoti 3:1) Khu giyeyedzo, na gu ganeya khu matshigu yaya, Jesu a di khuye: “Gu na manega dzindzala, ni sirevareva malangani nyo hambane-hambane.” (Matewu 24:7) Nya mba hweya, Nungungulu a na vbedza satshavbo si vangago gu vbisa ni gu tshaniseka, gupata dzimhango nya tumbunugo. — Gutuledwa 21:3, 4.

Nungungulu a gu phasa kharini ava va thegedwego khu dzimhango nya tumbunugo?

• Nungungulu a gu thaveleya ava va thegedwego khu dzimhango khu gu thumisa Lito laye, Bhibhiliya. Bhibhiliya ya gu hi tiyisegisa gu khiyo Nungungulu a ngu khathala khethu nigu a ngupwa guvbisa tepo hi tshanisekago. (Isaya 63:9; 1 Pedro 5:6, 7) Iyo ya gu ganeya khu gitumbiso gya Nungungulu nya gu khigyo mindru wa tshigu kha gu na nga manega gambe dzimhango nya tumbunugo. — Wona “Mavhesi nya Bhibhiliya ma nga thaveleyago ava va nga thegedwa khu dzimhango nya tumbunugo.”

• Nungungulu a gu thumisa vakhozeyi vaye gasi gu phasa ava va thegedwego khu dzimhango. Nungungulu a gu thumisa vakhozeyi vaye omu mafuni gasi gu pimedzeya giyeyedzo gi vegidwego khu Jesu. Gu profetidwe gu pwani Jesu a di hadzi gu thaveleya “avo va gu ni myonyo yi khuvekidego” ni “vale va lilago.” (Isaya 61:1, 2) Vakhozeyi va Nungungulu va gu dzi garadza gasi gu gira sasimweso. — Johane 13:15.

  Nungungulu a gu thumisa gambe vakhozeyi vaye gasi gu ninga esi si vbwetegago vandriyathu va thegedwego khu dzimhango nya tumbunugo. — Mithumo 11:28-30; Vagalatiya 6:10.

Ina Bhibhiliya yi nga hi phasa gu dzi dongiseya gasi gu emisana ni dzimhango nya tumbunugo?

Ina. Ambari olu Bhibhiliya yi nga mba lowa ni makungo nya gu hi dongiseye ga dzimhango nya tumbunugo, iyo yi na ni matshina nya milayo yi nga hi phasago. Khu giyeyedzo:

• Dzi dongiseye gasi guti esi u na girago ya gu tshuka yi girega mhango nya tumbunugo. Bhibhiliya ya gu ganeya gu khiyo: “Muthu a gengedego a gu wona mhango yi ngari hwindzo a sihala.” (Mavingu 22:3) Wugengeyi guti esi nyo gire ya gu tshuka yi girega mhango nya tumbunugo. Dongiseya kiti nya emergensiya u bwe u bhula ni ndranga yago avbo mu na mananago avbo ya gu tshuka yi manega mhango nyo khaguri.

• Ninga lisima womi guvbindra dzithomba. Bhibhiliya ya gu ganeya gu khiyo: “Kholu hi velegidwe nya mba gilo mafuni nigu hi nafa nya mba gilo.” (1 Thimoti 6:7, 8) Dzi emiseye gu diga nyumba yago ni esi u gu naso gasi gu vbuluga ga mhango. Hi yede gu dundruga gu khethu womi wu na ni lisima ngudzu guvbindra dzatshavbo dzithomba dzathu. — Matewu 6:25.