Bhibhiliya yi nga gu phasa kharini wa gu ba u emisana ni madwali nya makhongolo?
Hlamulo nya Bhibhiliya
Khu lisine, Nungungulu a ngu garadzega ngudzu tepo githumi gyaye gi dwalago. Bhibhiliya nya gu tumbisa gu khiyo: “Vbadawutunu nya madwali, [Jehovha a] ngu mu sayisa.” (Ndzimo 41:3) Wa gu ba u emisana ni madwalo nyo khaguri nya ma khongolo, dzipontu dzilandreyago dzi na gu phasa ngudzu:
Gombeya u lomba tshivba ni gu timiseya. Gu hakha “gurula ga Nungungulu, gu vbindrago gupwisisa gwatshavbo,” gu nga vbunguwa gugaradzega gwathu ni gu hi phasa gutimiseya. — Vafilipi 4:6, 7.
Manega ni mawonelo nya yadi. Bhibhiliya yo ganeya gu khiyo: “Gutenga nya monyo rendre wu vbanyisago, aholu hefemulo wu khuvekidego, gu bangisa marambo.” Khala na wu tsakide kholu isoso si na gu phasa wa gu dugeledwa khu sigaradzo nigu si na gu vhikeya ga madwali nya mangi. — Mavingu 17:22.
Tiyisa gutumba gwago khu wumindru. Gutumba gu na gu phasa gu simama na wu tsakide ambari wa gu tshangana ni madwali nya ma khongolo. (Varoma 12:12) Bhibhiliya yo ganeya gu khiyo: “Mwalo ni moyo muvbanyi . . . a na gukhuye: “Eni nyi ngu dwala.” (Isaya 33:24) Khu kharato, Nungungulu a na fuvisa madwali yatshavbo gu pata ni aya nya makhongolo, a gu gilo egi siyensiya yi si kodzigo gu gira. Khu giyeyedzo, Bhibhiliya yi ngu tshamuseya edzi vathu vathu va na khalago khidzo vaphya. Yari, khiyo: “Khu kharato, tshonge yaye, yi na bwelela gambe yi mana makhalelo yaye nya wanana, a mana wumburi nga wudzahani gwaye.” — Joba 33:25.
Mawonelo: Tepo Dzifakazi dza Jehovha dzi tshanganago ni madwali nya makhongolo, kha dzi digi gu hongola ospitali, ambari olu dzi tigo gu khidzo Nungungulu a na dzi phasa. (Marko 2:17) Ethu kha hi embeyi muthu mathumelo nyo khaguri nya madwali ma nga mu phasago, muthu ni muthu a yede gu dzi hungeya makungu khu yabune.