Tiyisa vambe mitshanganoni

1. Khu ginani hi hlamulago mitshanganoni?

KHU GINANI hi hongolago mitshanganoni nya libandla? Nyo pheye, khugu ha gu dhumisa Jehovha. (Ndzi. 26:12; 111:1) Ethu ha gu hongola gambe mitshanganoni gasi guya tiyisana khu gyathu dziteponi dzedzi nyo garadze. (1 Tes. 5:11) Tepo hi khusedzago libogo hi hlamula, ethu ha gu dhumisa Jehovha hi bwe hi tiyisa vandriyathu.

2. Mathomo muni hi gu nawo nyo ningeye mihlamulo mitshanganoni yathu?

² Dzisemana dzatshavbo, ethu hi na ni mathomo nyo ningeye mihlamulo mitshanganoni yathu. Khu giyeyedzo, guvbeyani nya semana ethu hi nga ningeya mihlamulo mitshanganoni avba nya Gihevbulo nya Mukhedziseyi. Ga mitshangano ya vbakari nya semana ethu hi nga ningeya mihlamulo avba nya gipandre, Kemba dzithomba nya liphuvbo, Gihevbulo nya Bhibhiliya nya libandla ni ga simbe sipandre.

3. Ginani adzina gi nga hi girago hi thava gu ningeya mihlamulo, ganiolu Vahebheru 10:24, 25 a nga hi phasa kharini?

³ Hatshavbo hi ngu dzina gu dhumisa Jehovha ni gu tiyisa vandriyathu. Ganiolu, somo silo si nga hi girago si hi garadzeya gu ningeya mihlamulo mitshanganoni. Adzina hi nga thava gu hlamula, mwendro hi nga khusedza libogo gasi gu hlamula, ganiolu hi si ningedzwi gasi gu gira isoso. Ganiolu, ginani gi na hi phasago ha gu ba hi tshangana ni sigaradzo sesi? Esi Pawulo a lovedego Vahebheru, si na hi phasa gu mana hlamulo nya giwudziso gegi. Tepo a nga ganeya khu lisima nya gu hi tshangana khu gyathu, uye ganede gu khuye hi di yede gu vega gupima avbo nya gu “tiyiselane khu gyathu.” (Leri Vahebheru 10:24, 25.) Ethu kha hi na nga thava gu khusedza libogo hi hlamula ha gu dundrugeya gu khethu hlamulo hi na ningeyago nyo role wu nga tiyisa vambe. Abari gu dzimbe dzitepo kha hi ningedzwi gasi gu hlamula, ethu hi nga tsaka khu guti gu khethu vambe libandlani va manide lithomo nyo hlamule. — 1 Ped. 3:8.

4. Ginani hi na bhulago khigyo avba nya ndrima yeyi?

⁴ Avba nya ndrima yeyi, hi na pheya khu gu bhula khedzi hi nga tiyisago khidzo vambe abari gu ho tshangana ga libandla nya lidugwana gu gu mwalo vathu nya vangi gasi gu hlamula. Khu gu landreya, hi na wona edzi hi nga tiyisago khidzo vambe abari gu ho tshangana ga libandla nya likhongolo avbo nya vangi va khusedzago libogo gasi gu hlamula. Khu gu hegisa, hi na bhula khedzi hi nga tiyisago khidzo vambe khesi hi ganeyago tepo hi hlamulago.

HI NGA TIYISANA AMBARI HO BA HI ROMO GA LIBANDLA NYA LIDUGWANA

5. Hi nga tiyisana kharini abari gu ha gu tshangana ga libandla gu gu na ni vathu nya vadugwana?

⁵ Ga libandla nya lidugwana mwendro tsawa nya wudugwana si ngu garadzeya mugimbidzisi gu mana muthu nyo hlamule, kholu dzimbe dzitepo a yede gu vireya tepo nyo khaguri gasi gu mana muthu nyo hlamule. Khu kharato, mitshangano yi nga kolana yi bwe yi si hi tiyise. Ginani u nga girago? Dzi emiseye gu khusedza libogo tepo yatshavbo. Wa gu gira isoso, u na kutsa vambe gu khusedza navo libogo gasi va ningeya mihlamulo yawe.

6-7. Ginani u nga girago gasi gu mba thava gu ningeya mihlamulo mitshanganoni?

⁶ Ginani u nga girago abari gu, u ngu thava gu ningeya mihlamulo? Nya vangi va ngu dzipwa khu ndziya yeyi. Ganiolu, gasi gu tiyisa vandriyathu, u yede gu vbwetedzeya dzindziya dzi na gu phasago gumba thava tepo u vbwetago gu ningeya mihlamulo. U nga gira kharini isoso?

⁷ Adzina saye u nga mana giphaso omu nya Mikhedziseyi yi dusidwego gale.b Khu giyeyedzo, dzi dongiseye gwadi. (Mav. 21:5) Wa gu dzi dongiseya gwadi, si na gu vbevbugeya gu ningeya mihlamulo. Nigu gambe, ningeya mihlamulo nyo role. (Mav. 15:23; 17:27) Kha wu na nga thava gu ningeya mihlamulo wa gu ningeya iyo nyo role. Nigu isoso, si na vbevbugeya vandriyathu gu pwisisa mihlamulo yago guvbindra gu ningeya mihlamulo nyo laphe. Wa gu ningeya hlamulo nyo role khu gu thumisa malito yago, u na yeyedza gu khuwe u dzi dongisede gwadi nigu u ngu ma pwisisa gwadi mahungu mu bhulago khayo.

8. Jehovha a gu gu wona kharini gudzigaradza hi gu girago?

⁸ Ambari hwane nyo ba u zamide gu thumisa dzindziya hi nga dzi khumbuga, ganiolu u simama gu thava gu ningeya mihlamulo, ginani gi nga gu phasago? Tiyisega gu khuwe Jehovha a ngu tsaka khu gu dzigaradza u gu girago gasi gu ningeya mihlamulo. (Luka 21:1-4) Jehovha gima kha na nga hi lomba gu gira silo si gu mwalo tshivbani gwathu. (Filp. 4:5) Hunga esi u na girago, u dzi vegeya misuwo u bwe u gombeya ga Jehovha gasi a gu phasa gu mba thava. Gupheya, hi nga dzi vegeya misuwo nyo ningeye mihlamulo nyo role.

TIYISA VAMBE AMBARI WA GU BA U ROMO GA LIBANDLA NYA LIKHONGOLO

9. Khu ginani si nga garadzago gu hlamula ga mabandla gu gu na ni vahuweleyi nya vangi?

⁹ Abari gu wo tshangana ga libandla gu gu na ni vahuweleyi nya vangi, u nga tshangana ni gigaradzo nyo hambane. Adzina saye vandriyathu nya vangi va nga ningedzwa gasi gu hlamula, ganiolu gutala nya dzitepo uwe u si ningedzwi. Khu giyeyedzo, Danielle tepo yatshavbo a ngu tsakiswa khu gu ningeya mihlamulo mitshanganoni.c Uye a gu wona mihlamulo kha nga gipandre nya wukhozeyi, gu tiyisa vambe ni gu tiyisa gukhodwa gwaye avba nya esi Bhibhiliya yi hi hevbudzago. Ganiolu, tepo a nga manega ga libandla nya likhongolo kha nga ba a ningedzwa gasi gu hlamula tepo yatshavbo, nigu dzimbe dzitepo yi di gu vbeya mitshangano nya mba hlamula. Uye a di khuye: “Eni nyi di goroga si gira gu khatshi nyi di luzide lithomo nyo khaguri. Tepo si giregago esi khu gu phindra-phindra, adzina u nga pheya gu pimisa gu khuwe sa gu girega esi khu nyagigwenye.”

10. Ginani hi nga girago gasi gu mana mathomo nyo ningeye mihlamulo mitshanganoni?

¹⁰ Ina u ngu dzipwa nga edzi a dzipwidego khidzo Danielle? Abari gu ina, uwe adzina u nga pimisa gu khuwe tshukwana nyi si ningeyi gambe mihlamulo, ganiolu nyi engiseya basi. Ganiolu, simama gu zama gu ningeya mihlamulo. Ginani u nga girago? Ga yatshavbo mitshangano zama gu dongiseya mihlamulo nya yingi. Khu kharato, ambari wa gu mba ningedzwa gupheyani nya gihevbulo, u na ba uri ni mathomo nya mangi nyo ningeye mihlamulo. Tepo u dongiseyago gihevbulo nya Mukhedziseyi, dundrugeya khedzi dziparagarafu dzi pwananago khidzo ni hungo nya mahungu nya ndrima yoyo. Wa gu gira isoso, u na ba uri ni mihlamulo nya yadi gasi gu ningeya mitshanganoni. Gu diga isoso, u nga dongiseya mihlamulo nya dziparagarafu dzi ganeyago khu sihevbudzo nya Bhibhiliya si garadzago gu tshamuseya. (1 Kor. 2:10) Khu ginani? Kholu adzina saye ga dziparagrafu dzodzo, gu na ba guri mwalo vathu nya vangi nyo khusedze libogo. Ambari hwane nyo ba u thumiside dzindziya dzedzi, ganiolu u simama gu mba ningedzwa gasi gu hlamula mitshanganoni, ginani u nga girago? Na yi nga si pheyi mitshangano, vbwetedzeya mugimbidzisi nya Mukhedziseyi u mu embeya gu khuwe, wa gu tsakeya gu hlamula ga paragarafu nyo khaguri.

11. Vafilipi 2:4 a gu hi kutsa gu gira ginani?

¹¹ Leri Vafilipi 2:4. Mupostoli Pawulo kutside Makristo gu khathala khu vambe. Hi nga wu thumisa kharini wusingalagadzi wowu mitshanganoni? Khu gu dundruga gu khuwe vambe navo va ngu dzina gu hlamula mitshanganoni.

12. Khu yevbini ndziya nya yadi nyo tiyise khiyo vandriyathu? (Wona fotu.)

¹² Nga dundrugeya khesi: Tepo u bhulago ni dzipari dzago, ina u di hadzi gu dzi ninga lithomo nyo ganeye nidzo? Khu lisine ina, kholu uwe wa gu vbweta gu khuwe anidzo dzi patega omu nya mabhulo yanu. Khu ndziya nyo fane, ethu ho vbweta gu khethu vatshavbo va manega ni lithomo nyo ningeye mihlamulo mitshanganoni. Khu lisine, ndziya nya yadi nyo tiyise khiyo vandriyathu khu gu va ninga lithomo nyo ganeye khu gukhodwa gwawe. (1 Kor. 10:24) Hongoleni hi wona edzi hi nga girago khidzo isoso.

13. Ginani hi yedego gu gira gasi gu dzumeleya vambe gu ningeya mihlamulo mitshanganoni?

¹³ Ethu gambe hi nga ninga lithomo gasi vambe va patega avba nya mitshangano khu gu hi ningeya mihlamulo nyo role. Madhota ni vahuweleyi va vidzidwego va nga ninga giyeyedzo nya gyadi. Ambari wa gu ningeya hlamulo nyo role, potsa gu ganeya silo nya singi. Kholu wa gu hlamula yatshavbo paragarafu, vambe kha va na nga mana gilo nyo hlamule. Avba nya paragrafu yeyi, hi embedwe silo sivili hi yedego gu gira, a gu gu ningeya mihlamulo nyo role hi bwe hi potsa gu ganeya silo nya singi. Wo pheya khuwe u hlamula avba nya paragarafu nyo khaguri, zama gu veta pontu basi.

14. Khu ginani hi gu mba yela gu khusedza libogo tepo yatshavbo? (Wona fotu.)

¹⁴ Hunga gu khuwe gungani u na khusedzago libogo gasi gu ningeya hlamulo. Ha gu khusedza libogo tepo yatshavbo si na gira gu mugimbidzisi nya gihevbulo a gurumedzega gu hi ningedza, ambari a gu wona vambe va nga mba hlamula. Isoso, si nga gira vambe va si khusedzi gambe libogo. — Muh. 3:7.

15. a) Ginani hi yedego gu gira ha gu mba ningedzwa gasi gu hlamula? b) Vagimbidzisi nya sihevbulo nya libandla va nga yeyedza kharini gu khavo va ngu ninga lisima vathu vatshavbo? (Wona kwadru yi gu khiyo: “Wa gu ba u gimbidzisa gipandre nyo khaguri.”)

¹⁵ Tepo vahuweleyi nya vangi va khusedzago libogo ndrani nya gihevbulo, adzina saye si nga garadza gu ningeya yatshavbo mihlamulo hi nga donga. Dzimbe dzitepo, si nga garadzeya mugimbidzisi gu ningedza vatshavbo gasi va hlamula. Esi si nga hi gira hi goroga, ganiolu hi yede gu dzigaradzeya gu hi si dzipwi khu ndziya yeyi ha gu mba ningedzwa gasi gu hlamula. — Muh. 7:9.

16. Khu yevbini yimbe ndziya hi nga tiyisago khiyo ava va ningeyago mihlamulo mitshanganoni?

¹⁶ Abari gu dzimbe dzitepo kha wu ningedzwi gu hlamula, zama gu engiseya gwadi mihlamulo yi ningedwago khu vambe u bwe hwane nya mitshangano u va zundza khu mihlamulo yawe. Wa gu zundza vandriyathu va na dzipwa na va tiyisidwe gufana ni edzi va nga hadzi tiyiswa khidzo khu mihlamulo u nga hadzi ningeya. (Mav. 10:21) Gu zundza, yimbe ndziya hi nga yi thumisago gasi gu tiyisana khu gyathu.

DZIMBE DZINDZIYA U NGA DZI THUMISAGO GASI GU TIYISA VAMBE

17. a) Vavelegi va nga phasa kharini sanana sawe gu dongiseya mihlamulo? b) Guya khesi u si wonidego avba nya vhidhiyu, silo muni nya 4 u nga si thumisago gasi gu phasa sanana sago gu dongiseya hlamulo? (Wona tshamuselo wa vbavbatshi.)

¹⁷ Khu yevbini yimbe ndziya hi nga yi thumisago gasi gu tiyisana mitshanganoni? Abari gu u muvelegi, phasa sanana sago gu dongiseya mihlamulo yi yelanago ni tanga yaso. (Mat. 21:16) Dzimbe dzitepo ndrani nya gihevbulo nyo khaguri, mu nga hevbula khu mahungu ma ganeyago khu sigaradzo esi ava va tshadhidego va tshanganago naso mwendro mahungu nyo fane ni aya. Ganiolu, adzina saye gu na manega paragarafu mweyo mwendro dzimbili, gyanana gyago gi na si kodzago gu hlamula. Nigu gambe, phasa sanana sago gu pwisisa gu khiso khandri tepo yatshavbo si na ningedzwago gasi si hlamula. Wa gu tshamuseya isoso, si na phasa sanana sago gu mba goroga tepo si gu mba ningedzwa gasi gu hlamula. — 1 Thim. 6:18.d

18. Ginani hi yedego gu gi potsa tepo hi ningeyago mihlamulo? (Mavingu 27:2)

¹⁸ Hatshavbo hi nga dongiseya mihlamulo yi tiyisago vandriyathu ni gu ninga wuzundzo Jehovha. (Mav. 25:11) Ambari wa gu mana lithomo nyo ganeye khu matshango yago, hi yede gu potsa gu ganeya ngudzu khethu. (Leri Mavingu 27:2; 2 Kor. 10:18) Wulangani nya isoso, hi yede gu simama gu vega gupima ga Jehovha, avba nya Lito laye ni ga vathu vaye vatshavbo. (Gutu. 4:11) Abari gu giwudziso nya paragarafu gya gu hi lomba gu ganeya khu matshango yathu, hi yede gu gira isoso. Hi na wona giyeyedzo nya isoso ga paragarafu yi landreyago.

19. a) Ginani gi na giregago ha gu ninga lisima vatshavbo mitshanganoni? (Varoma 1:11, 12) b) Wa gu dzipwa kharini tepo u ningeyago mihlamulo mitshanganoni?

¹⁹ Ambari olu hi gu mwalo sileletelo nyo kongome si ganeyago khedzi hi nga ningago khidzo mihlamulo, hatshavbo hi nga dzigaradzeya gu ningeya mihlamulo yi na tiyisago vambe. Isoso si nga thula gu dzigaradzeya gu ningeya mihamulo mwendro si nga thula gu tsaka khu mathomo u gu nawo nyo ningeye mihlamulo, u bwe u tsaka tepo vambe va manegago ni lithomo nyo hlamule. Ha gu ninga lisima vambe mitshanganoni nya libandla, ethu hi na “tiyiselana hatshavbo.” — Leri Varoma 1:11, 12.