Jehovha a na gu phasa wa gu tshangana ni sigaradzo nya mba si vireya

1. Ginani hi yedego gu tiyisega khigyo?

KHA NGA vathu va Jehovha, ethu hi ngu dziti gu khethu uye a ngu hi haladza nigu a gu vbweta gu khuye hi dzi buza khu womi nya wadi. (Rom. 8:35-39) Nigu hi nga tiyisega gambe gu khethu ha gu thumisa matshina nya milayo nya Bhibhiliya womini gwathu, ayo tepo yatshavbo ma na hi phasa. (Isa. 48:17, 18) Ganiolu, ginani hi nga girago ha gu tshangana ni sigaradzo nya mba si vireya?

2. Sigaradzo muni hi nga tshanganago naso, nigu si nga hi gira hi dzi wudzisa ginani?

² Satshavbo sithumi sa Jehovha si ngu tshangana ni sigaradzo. Khu giyeyedzo, givbango nya ndranga yathu adzina gi nga gira gilo gi hi gorosago. Adzina hi na ni madwali nya makhongolo ma hi girago hi si kodzi gu gireya nya singi Jehovha. Adzina hi ngu tshangana ni dzimhango nya tumbunugo mwendro gu wugedwa khu kotani nya gukhodwe gwathu. Tepo hi tshanganago ni sigaradzo sesi, adzina hi nga dzi wudzisa gu khethu: ‘Khu ginani si nyi giregeyago esi? Ginani nyi nga ghoha? Sa gu thula gu khiso Jehovha a nyi digide?’ Ina u di nga dzipwa khu ndziya yeyi? Abari gu ina u nga vbeyi tshivba. Sithumi nya singi nyo tumbege sa Jehovha aniso si dzipwide khu ndziya yeyi. — Ndzi. 22:1, 2; Habh. 1:2, 3.

3. Ginani hi gi hevbulago umo ga Ndzimo 34:19?

³ Leri Ndzimo 34:19. Wona silo sivili nya lisima si gomogo umo ga ndzimo yeyi: 1) Vathu nyo lulame va ngu tshangana ni sigaradzo. 2) Jehovha a ngu hi vbulugisa omu nya sigaradzo sathu. Uye a gu hi vbulugisa khu ndziya muni? Mweyo nya dzindziya a girago khidzo isoso khu hi phasa gu wona gu khethu na hi ngo vbanya mafuni momu, ethu tepo yatshavbo hi na tshangana ni sigaradzo. Ambari olu Jehovha a hi tumbisago gu khuye hi na tsaka khu mu thumeya, uye kha hi tiyisegise gu khuye kha hi na nga tshangana ni sigaradzo. (Isa. 66:14) Uye a gu hi kutsa gu vega gupima avba nya wumindru, a gu tepo hi na manago womi owu a vbwetago gu khuye hi tsaka khuwo kala gupindruga. (2 Kor. 4:16-18) Na yi si vbohi tepo yoyo, uye a na hi phasa gu simama gu mu thumeya. — Gil. 3:22-24.

4. Ginani hi na bhulago khigyo avba nya ndrima yeyi?

⁴ Hongoleni hi bhula khu siyeyedzo nya sithumi nyo tumbege sa Jehovha sa dziteponi nya Bhibhiliya ni esi sa dziteponi dzathu. Kha nga hi si wonidego, ethu hi nga tshangana ni sigaradzo hi gu mba si vireya. Ganiolu, ha gu tumba Jehovha, uye a na hi phasa tepo yatshavbo. (Ndzi. 55:22) Tepo hi bhulago khu siyeyedzo sesi, dzi wudzise gu khuwe: ‘Ginani nyi nga hadzi gu gira ga giemo nya nga egi? Siyeyedzo sesi sa gu tiyisa kharini gutumba nyi gu nago khu Jehovha? Sihevbudzo muni nyi nga si thumisago womini gwangu?’

DZITEPONI NYA BHIBHILIYA

5. Sigaradzo muni Jakobe a tshanganidego naso khu kotani ya Laboni? (Wona fotu avba nya kapa.)

⁵ Sithumi sa Jehovha sa dziteponi nya Bhibhiliya si tshanganide ni sigaradzo si nga mba si vireya. Wona giyeyedzo gya Jakobe. Uye a di embedwa khu papayi waye gasi guya dzega nyamayi vbakari nya sanana sa Laboni, oyu a nga ba a khozeya Nungungulu. Papayi waye a di gu tiyisega gu khuye Jehovha a di hadzi gu mu kategisa. (Gen. 28:1-4) Khu kharato, Jakobe a di gira esi a nga embedwa khu papayi waye. Uye a di khuga khu Khanani a hongola ndrangani ga Laboni, oyu a nga ba ari ni sanana sivili a gu Liya ni Rakeli. Jakobe a di gu gola ngudzu Rakeli oyu nya nandra, nigu a di dzumeya gu thumeya Laboni khu 7 myaga gasi gu tshadha naye. (Gen. 29:18) Ganiolu, khandriso si nga girega, Laboni a di mu kanganyisa. Uye a di mu ninga Liya gyanana gyaye nya koma gasi gu tshadha naye. Laboni a di dzumeleya Jakobe gu tshadha ni Rakeli ga semana yi nga hadzi gu landreya a gu dzumeya gu mu thumeya gambe khu 7 myaga. (Gen. 29:25-27) Laboni kha tumbega gambe avba nya dzinogosi a nga ba a gira ni Jakobe. Gu diga satshavbo, Laboni a di kanganyisa Jakobe khu 20 myaga! — Gen. 31:41, 42.

6. Khu sevbini simbe sigaradzo esi Jakobe a nga si timiseya?

⁶ Jakobe timisede simbe sigaradzo. Uye a diri ni ndranga nya yikhongolo, ganiolu sanana saye si di si vbanyisani khu gurula. Khu kotani nya isoso, avo va di bwe va rengisa ndriyawe Josefa kha nga gumbi. Sanana sivili sa Jakobe, a gu Simiyoni ni Levhi, si di tshundziside lina la Jehovha ni ndranga yawe. Gu diga isoso, mwangadzi waye Rakeli, oyu a nga ba a mu haladza ngudzu, a difa tepo a nga velega gyanana gyaye nya wuvili. Khu kotani nya ndzala yi nga ba yi romo tigoni mule, Jakobe a di gurumedzega gu rura a hongola Egipito, nigu ga tepo yeyi uye a di gu dandride khu tanga. — Gen. 34:30; 35:16-19; 37:28; 45:9-11, 28.

7. Jehovha yeyedzide kharini Jakobe gu khuye a di gu mu tsakeya?

⁷ Ga sigaradzo satshavbo a nga tshangana naso Jakobe, uye gima kha diga gu tumba Jehovha ni situmbiso Saye. Nigu gambe, Jehovha yeyedzide Jakobe gu khuye a di gu mu tsakeya. Khu giyeyedzo, ambari olu Laboni a nga mba tumbega avba nya dzinogosi a nga ba a gira ni Jakobe, Jehovha a di kategisa Jakobe khu gu mu ninga dzithomba nya dzingi. Nigu khu lisine, Jakobe bongide ngudzu Jehovha tepo a nga wona gambe gyanana gyaye Josefa, egi a nga ba a pimisa gu khuye gi fude! Wupari owu Jakobe a nga ba ari nawo ni Jehovha wu mu phaside gu timiseya sigaradzo saye. (Gen. 30:43; 32:9, 10; 46:28-30) Anethu ha gu simama ni wupari ni Jehovha hi na si kodza gu timiseya sigaradzo hi gu mba si vireya.

8. Ginani egi Pfhumu Dhavhidhe a nga ba a vbweta gu gira?

⁸ Pfhumu Dhavhidhe kha gira satshavbo a nga ba a vbweta gu gira thumoni ga Jehovha. Khu giyeyedzo, Dhavhidhe a di gu dzina ngudzu gu vbaheya tempele Nungungulu waye. Uye a di embeya Muprofeti Natani gu khuye a di gu vbweta gu vbaha tempele. Natani a di mu embeya gu khuye: “Gira satshavbo si guromo monyoni gwago, kholu Nungungulu a na ni uwe.” (1 Dzik. 17:1, 2) Nga dundrugeya edzi Dhavhidhe a tiyisidwego khidzo khu malito yaya. Nya mba hweya a di pheya gu dongiseya gasi gu vbaha tempele.

9. A dzipwide kharini Dhavhidhe tepo a nga embedwa mahungu nya mba yadi khu Natani?

⁹ Nya mba hweya, Muprofeti wa Jehovha Natani, a diya embeya Dhavhidhe mahungo nya mba yadi. “Khu wutshigu wowo,” Jehovha a di embeya Natani gu khuye Dhavhidhe khandruye a nga hadzi gu vbaha tempele, ganiolu gimwegyo nya gyanana gyaye khigyo gi nga hadzi gu gira isoso. (1 Dzik. 17:3, 4, 11, 12) Dzipwide kharini Dhavhidhe tepo a nga hakha mahungu yoyo? Uye a di dzi pwananisa ni esi Jehovha a nga ba a si vbweta. Uye a di vega gupima avba nya gu hengeledzeye dzitsapawu ni materiyali aya gyanana gyaye Solomoni a nga hadzi gu ma thumisa gasi gu vbaha tempele. — 1 Dzik. 29:1-5.

10. Jehovha kategiside kharini Dhavhidhe?

¹⁰ Tepo Dhavhidhe a nga embedwa gu pwani kha na nga vbaha tempele, Jehovha a di gira gidzumeledzwano naye. Jehovha tumbiside Dhavhidhe gu khuye gimwegyo nya gitugulwana gyaye gi di hadzi gu fuma kala gupindruga. (2 Sam. 7:16) Mafuni nya maphya, ndrani nya Mufumo nya 1000 myaga, Dhavhidhe a na tsaka khu gu dziti gu khuye ha gu fumwa khu gitugulwana gyaye, Jesu. Matimo yaya, ma gu hi phasa gu wona gu khethu ambari ha gu mba si kodza gu gireya esi hi si vbwetago Jehovha, uye a na hi ninga simbe silo nya sadi nya gu gima kha ha nga ba hi si vireya.

11. Silo muni esi Makristo nyo pheye ma giridego ambari olu va nga ba va si dziti gu khavo lini wu na pheyago gu fuma Mufumu wa Nungungulu (Mithumo 6:7)

¹¹ Makristo nyo pheye ma tshanganide ni sigaradzo nya mba si vireya. Khu giyeyedzo, avo va di gu vireya khu maho nyo fuviye guta nya Mufumo wa Nungungulu, ganiolu kha va nga ba va dziti gu khavo lini si nga hadzi gu girega isoso. (Mith. 1:6, 7) Ganiolu, ginani va giridego? Avo va di pharega thumoni nyo tshumayele. Tepo va nga ba va tshumayela ga malanga nya mangi, avo va wonide edzi Jehovha a nga ba ava phasa khidzo. — Leri Mithumo 6:7.

12. Ginani egi Makristo nyo pheye ma giridego tepo ma nga tshangana ni ndzala nya yikhongolo?

¹² Ga tepo nyo khaguri yi di manega “ndzala nya yikhongolo tigoni gatshavbo.” (Mith. 11:28) Ndzala yoyo yi kuhide gambe Makristo nyo pheye. Nga dundrugeya edzi va tshanisekidego khidzo khu kotani nya ndzala yoyo nya yikhongolo. Khu lisine, mihungo nya dzindranga dzi garadzegide khedzi dzi nga hadzi gu mana guhodza nyo ninge dzindranga dzawe. Vaphya va nga ba vari ni makungo nyo engedzeye thumo wawe nyo tshumayele va dzipwide kharini? Adzina saye va dzi wudziside gu khavo, ina hi yede gu ema kala ndzala yeyi yi vbindra gasi gu gira thumo wowu? Ambari olu ma nga ba ma tshangana ni sigaradzo Makristo ma dzi pwananiside ni giemo. Ayo ma di simama gu gira satshavbo ma nga si kodza gasi gu gira thumo nyo tshumayele, nigu ma di gu tsaka khu gu kabana esi ma nga ba vari naso ni vandriyawe va Judheya. — Mith. 11:29, 30.

13. Makategwa muni Makristo ma ma manidego teponi yile nya ndzala?

¹³ Makategwa muni Makristo ma ma manidego teponi yile nya ndzala? Vale va hakhidego giphaso va wonide edzi Jehovha a va phasidego khidzo. (Mat. 6:31-33) Adzina avo va giride wupari ni vandriyathu vale va nga ba va va phasa. Nigu vale va nga ba va gira miningelo mwendro gu phasedzeya ava va nga ba va vbweta giphaso va pwide gutsaka gu manwago khu gu ningeya. (Mith. 20:35) Jehovha kategiside vatshavbo vale va dzi pwananisidego ni gu vbindrugedza nya siemo.

14. Ginani gi nga giregeya Bharinabha ni mupostoli Pawulo, nigu mihandro muni va yi manidego? (Mithumo 14:21, 22)

¹⁴ Ga dzitepo nyo khaguri, Makristo nyo pheye ma di gu wugedwa nya mba si vireya. Wona esi si nga giregeya Bharinabha ni mupostoli Pawulo tepo va nga ba va tshumayela gipandreni gya Listra. Gupheyani, vathu va di va hoyezeya va bwe va va engiseya. Khu gu landreya, vawugeyi va di “kutsedzela vathu,” nigu vathu nyo khaguri va nga ba va va hoyezede va di veta Pawulo khu siwindri kala va pimisa gu khavo a di fude. (Mith. 14:19) Ganiolu, Bharinabha ni Pawulo va simamide gu tshumayela ga mambe malanga. Mihandro muni va yi manidego? Avo va giride “vapizane nya vangi,” nigu va tiyiside vandriyawe khu malito ni siyeyedzo sawe. (Leri Mithumo 14:21, 22.) Nya vangi va wuyedwe kholu Pawulo ni Bharinabha va nga mba diga gu tshumayela ambari olu va nga ba va wugedwa. Ethu hi na mana makategwa nya mangi ha gu mba diga gu gira thumo owu Jehovha a hi ningidego.

MATSHIGONI YATHU

15. Ginani u gi hevbulago khu giyeydzo gya ndriyathu A. H. Macmillan?

¹⁵ Hwane nya 1914, vathu va Jehovha va di gu vireya gu khavo silo nyo khaguri si girega. Wona giyeyedzo gya ndriyathu A. H. Macmillan. Gufana ni edzi vathu nya vangi va nga ba va pimisa khidzo ga tepo yoyo, ndriyathu Macmillan a di gu pimisa gu khuye nya mba hweya a di hadzi gu hakha tshatshazelo waye nya gu hongole ndzadzini. Avbo nya ganelo a vegedego khu 1914, uye a di khuye: “Adzina saye eyi ganelo yangu nyo hegise nyi girago.” Khu lisine, iyo kha ya khala ganelo yaye nyo hegise. Ndriyathu Macmillan khu gu gimbiya nya tepo uye lovide gu khuye: “Vathu nyo khaguri vbakari gwathu adzina saye va vbiredzisede gu tiyisega gu khavo hi na hongola ndzadzini nya mba hweya.” Uye a di engedza gu khuye: “Egi hi yedego gu gira gu khala na hi pharegide thumoni ga Pfhumu.” Ndriyathu Macmillan a di khala na pharegide. Uye a di gu thuma khu sighingi thumoni nyo tshumayele. Uye a manegide ni lithomo nya gu tiyise vandriyaye va nga ba va romo pasoni khu kotani nya gu khodwe gwawe. Nigu uye a di gu hongola mitshanganoni ambari olu a nga ba a dandride khu tanga. Ndriyathu Macmillan a wuyedwe kharini khu gu thumisa tepo yaye, na gu vireya tshatshazelo yaye? Na si gufi, khu 1966 uye lovide gu khuye: “Gukhodwa gwangu gu tiyide ngudzu olu nga gale.” Khu lisine, egi giyeyedzo nya gyadi hatshavbo hi nga gi pimedzeyago, ngundzungudzu abari gu ha gu timiseya khu tepo nyo laphe eyi hi nga ba hi si yi pimisi! — Hebh. 13:7.

16. Gigaradzo muni va nga mba gi vireya Herbert Jennings ni mwangadzi waye va tshanganidego nagyo? (Jakobe 4:14)

¹⁶ Vathu va Jehovha, nya vangi vakone va ngu tshangana ni sigaradzo va nga mba si vireya. Khu giyeyedzo, omu nya matimo yaye nya gu vbanye, ndriyathu Herbert Jennings ganede edzi uye ni mwangadzi waye vatsakidego khidzo khu gu thuma kha nga vamisiyonariyu Gana.b Khu gu gimbiya nya tepo uye a di popodwa madwali ma nga ba ma mu gira a goroga mwendro a dzipwa na tsakide, ganiolu nyambana gighelo. Ndriyathu a di khumbuga libhuku la Jakobe 4:14, a bwe a ganeya gu khuye: Giemo gyaye “wumindru hi nga ba hi si wu vireyi.” (Leri.) Uye a di lova gu khuye: “Ethu hi di hunga gu khuga khu Gana hi diga dzipari dzathu hi bweleya Canadá [gasi guya thumwa madwali yangu].” Jehovha a phaside ndriyathu Jennings ni mwangadzi waye gu simama gu mu thumeya khu gu tumbega ambari va nga ba va tshangana ni gigaradzo gegi.

17. Giyeyedzo gya ndriyathu Jennings gi phaside kharini vambe vandriyathu?

¹⁷ Malito ya ndriyathu Jennings ma khumbugwago omu nya matimo yaye nya gu vbanye ma kuhide ngudzu vambe vathu. Ndriyathu nya nyamayi lovide gu khuye: “Eni nyi kuhidwe ngudzu tepo nyi nga leri matimo yaye . . .  Khu gu ba ndriyathu Jennings a emide gu gira thumo waye gasi guya khathaleya madwali yaye si nyi phaside gu wona giemo gyangu khu ndziya nya yadi.” Mumbe ndriyathu nya mwama lovide gu khuye: “Hwane nyo ba nyi thumide khu 10 myaga kha nga lidhota libandlani, nyi di yede gu ema gu gira thumo wowu gasi gu thuma madwali nya mapimo. Eni nyi di gu vbede ngudzu tshivba nyo bwe nyi si si kodzi gu leri dzindrima nya matimo nya gu vbanye . . . Ganiolu, matimo ya ndriyathu Jennings ma nyi tiyiside ngudzu.” Isoso sa gu hi dundrugisa gu khethu, ha gu tshangana ni sigaradzo hi gu mba si vireya, ethu hi nga tiyisa vambe. Ambari so girega silo si vbindrugedzago womi wathu, ethu hi na khala siyeyedzo nya sadi nya gukhodwe ni gu timiseya.— 1 Ped. 5:9.

18. Ginani u gi hevbulago khu giyeyedzo gya noni mweyo yi vbanyago Nigéria kha nga u si wonago avba nya dzifotu?

¹⁸ Sigaradzo nya singi nya nga COVID-19 si kuhide ngudzu vathu va Jehovha. Khu giyeyedzo, noni mweyo yi vbanyago Nigéria yi diri ni silo nya sidugwana basi gasi gu dzi vbanyisa. Ga litshigu nyo khaguri ni dzimindru, gyanana gyaye gi di mu wudzisa gu khigyo: Ha gu phula kopu yeyi nyo hegise nya marosa hi na hodza ginani? Ndriyathu wule nya noni a di embeya gyanana gyaye gu khuye va diri mwalo dzitsapawu ambari guhodza. A bwe a gi embeya gu khuye, ethu hi yede gu pimidzeya noni ya Serapita, hi phula guhodza gogu gu tshadego hi bwe hi tumba Jehovha. (1 Dzipf. 17:8-16) Na va si pheyi gu pimisa esi va na alimosarigu ga litshigu lolo, avo va di hakha rava wu nga ba wu tade khu guhodza va ningidwego khu vandriyawe. Rava wowo wu di gu tade khu guhodza va nga hadzi gu hodza khu dzisemana dzimbili. Ndriyathu yoyu nya noni kha nga ba a dziti gu khuye Jehovha a di gu vegide gupima avba nya esi a embedego gyanana gyaye. Khu lisine, tepo hi tumbago Jehovha sigaradzo nya mba si vireya hi tshanganago naso si nga hi phasa gu hidzimeya gwaye. — 1 Ped. 5:6, 7.

19. Gigaradzo muni Aleksey Yershov a tshanganidego nagyo?

¹⁹ Ga myaga yeyi, vandriyathu nya vangi va ngu tshangana ni gu wugedwa nya mba gu vireya. Wona giyeyedzo gya ndriyathu Aleksey Yershov, a vbanyago Rússia. Sithumi sa Jehovha si vbanyago Rússia si tsakide ngudzu khu gu manega ni gu tshulega nyo khaguri tepo ndriyathu Yershov a nga bhabhatiswa khu 1994. Ga myaga yi nga landreya gi di vbindrugedza giemo Rússia. Khu 2020, ndranga ya ndriyathu Yershov yi dhumedwa va bwe va dzega dzithomba dzaye. Ga myaga yi nga landreya, mufumo wu di mu singedza khu sighoho a nga mba gira. Nya mba tsakisa khu gu esi a nga singedzwa khiso, si di gu filmaridwe khu muthu nyo khaguri a nga ba a gira gu khatshi a di gu tsakeya gihevbulo nya Bhibhiliya khu tanga nya mwaga mowo. Esi silo nyo vivbe ngudzu a giridego!

20. Ndriyathu Yershov tiyiside kharini wupari waye ni Jehovha?

²⁰ Ina gu wugedwa ga ndriyathu Yershov gu reside mihandro nya yadi? Ina. Wupari waye ni Jehovha wu di engedzeya gu tiya. Uye a di khuye: “Eni ni mwangadzi wangu ha gu gombeya gumogo tepo yatshavbo. Eni nyi ngu dziti gu kheni na nya sa si kodza gu timiseya gigaradzo gegi nyambana giphaso gya Jehovha.” Uye a gu engedza gu khuye: “Gihevbulo nya muthu enga gi ngu nyi phasa gu mba vbeya tshivba. Eni nya gu dundrugeya khu siyeyedzo nya sithumi nyo tumbege sa Nungungulu sa gale. Gu na ni matimo nya mangi omu nya Bhibhiliya ma tshingisago lisima nya gu simame na hi gu rude ni gu tumba Jehovha.”

21. Ginani u gi hevbudego avba nya ndrima yeyi?

²¹ Ginani hi gi hevbudego avba nya ndrima yeyi? Ga mafu yaya nyo vivbe, ethu hi na tshangana ni sigaradzo hi gu mba si vireya. Ambari ulolo, Jehovha tepo yatshavbo a ngu phasa sithumi saye tepo si mu tumbago. Lowo nya litshina nya ndrima yeyi wari khuwo: “Sigaradzo nya muthu nya gululame singi ngudzu, aholu PFHUMU Nungungulu a gu mu vbulugisa ga satshavbo.” (Ndzi. 34:19) Ethu kha hi yeli gu simama gu vega gupima avba nya sigaradzo sathu, ganiolu ethu hi yede gu vega gupima avba nya edzi Jehovha a hi phasago khidzo. Khu kharato, gufana ni Pawulo hi nga ganeya gu khethu: “Nyi ngu kodza gupala satshavbo tshivbani ya wule a nyi tiyisago.” — Filp. 4:13.