Mitshamuselo yi gomogo omu nya mabhuku ma khumbugidwego omu nya Gibhukwana nya mitshangano nya thumo ni mavbanyelo
© 2024 Watch Tower Bible and Tract Society of Pennsylvania
6-12 NYA MAIO
DZITHOMBA NYA LITO LA NUNGUNGULU NDZIMO 36-37
“U nga garadzegi khu kotani nya vathu nya guvivbedwe khu monyo”
Mukhedziseyi 04.17 paj. 10, par. 4
Ginani gi na fuvago tepo Mufumo wa Nungungulu wu na fumago?
4 Vathu nyo vivbe va gu hi kuha kharini? Hwane nya gu ba a ganede gu khuye matshigoni yathu gu na manega “dzitepo nyo garadze gu emisana nadzo,” khu gu kutswa khu liphuvbo nya guage mupostoli Pawulo a di lova gu khuye: “Va nya gu vivbedwa khu myonyo ni vakanganyisi va na engedzeya wuvivbi wawe.” (2 Thim. 3:1-5, 13) Ina u ngu si wona isoso na si gu girega muhuno? Nya vangi gwathu va emisanide ni vathu nya maghilivindra, gihatheya ni sighevenga. Nya vangi vakone kha va sihi edzi va gu idzo. Vambe va gu dzi gira vathu nya vadi nari gu va vivbedwe khu monyo. Ambari va ba va sa hi wugeya khu gu kongoma, mavbanyelo yawe nyo vivbe ma ngu hi kuha. Hi ngu thava ngudzu tepo hipwago silo nyo vivbe vathu vovo va gireyago sanana, vathu va dandridego khu tanga ni vathu va gu mba kodza gu dzi vhikeya. Avo va gu gira silo nga khatshi sirengo mwendro madhemoni. (Jak. 3:15) Egi gi tsakisago khu gu Bhibhiliya yi na ni mahungu nya yadi.
Mukhedziseyi 06.22 paj. 10, par. 10
Jehovha a gu kategisa ava va divaleyago
10 Gu vega giviti mhango nya yikhongolo. Giviti gyo fana ni gu rwala gighodho nya gikhongolo magatani nigu Jehovha o vbweta gu khuye hipwa gurula hi gu manago khu gu rula gighodho gyogyo. (Leri Vaefeso 4:31, 32.) Uye a gu hi kutsa gu ‘diga likhulo, hi nyenya khorodza.’ (Ndzi. 37:8) Ha gu landrisa wusingalagadzi wowu si na hi phasa ngudzu. Tepo hi simamago gu vegeya gitivi muthu a hi khunguvanyisidego hi na dzi vangeya sigaradzo nya singi khu nyamani ni liphuvboni. (Mav. 14:30) Nigu tepo hi simamago gu vegeya giviti muthu nyo khaguri, isoso kha si vangeyi sigaradzo uye; isoso so fana ni gu ba hi seya vheneno, khandruye si na mu vangeyago sigaradzo. Khu kharato, ha gu divaleya vambe si na hi phasa ngudzu. (Mav. 11:17) Hi na rula hi bwe hi si kodza gu simama gu thumeya Jehovha.
Mukhedziseyi 1/12/03 paj. 13, par. 20
‘Vega ga Jehovha Nungungulu gutsaka gwago’
20 Khu kharato, “va nya gurula va na fumela litigo.” (Ndzimo 37:11a) Ganiolu, khu vamani “va nya gurula”? Lito “gurula” la gu tshamuseya gu dzi “vega vbavbatshi ni gu dzirudzisa.” Khu lisine, va nya “gu rula” khavo va dzi vegago vbavbatshi, va vireyago gu khavo Jehovha a lulamisa satshavbo si va garadzago. “Va nya gurula va na fumela litigo.” (Ndzimo 37:11b) Ambari olu, hi gu manide gurula nya gungi paradhesini ga liphuvboni, omu nya libandla nya Wukristo.
Kemba dzithomba nya liphuvbo
Perspicaz-2 paj. 410
Gigomo
Gu mba tsekatseka, gupindruga ni gu lapha. Malito yaya ma gu tshamuseya sigomo. (Isa 54:10; Hab 3:6; fananisa isoso ni Ndz 46:2.) Khu kharato, tepo muembi nya dzindzimo a nga ganeya khu gululama ga Jehovha gu fanago ni “sigomo sa Nungungulu,” (Ndz 36:6, Traduo do Novo Mundo) uye adzina saye a di gu vbweta gu khuye gululama ga Jehovha kha gu vbindrugedzi. Mwendro kha nga olu sigomo si laphidego ngudzu, adzina saye so thula gu khiso gululama ga Nungungulu gukhongolo ngudzu gu vbindra gululama nya vathu. (Wona Isa 55:8, 9.) Na gu ganedwa khu gu vbaladzwa nya 7 dzitijela nya zanga ya Nungungulu, Gutuledwa 16:20 wari, khuye: “Sigomo si mwalalega.” Isoso so thula gu khiso ambari silo nya sikhongolo ngudzu si fanago ni sigomo kha si na nga vbuluga avbo nya zanga ya Nungungulu. — Wona Jer 4:23-26.
13-19 NYA MAIO
DZITHOMBA NYA LITO LA NUNGUNGULU NDZIMO 38-39
U nga simami gudzipwa ngudzu nandru
Mukhedziseyi 11.20 paj. 27, dzipar. 12-13
Vega gupima avba nya wumindru basi
12 Leri 1 Johane 3:19, 20. Hatshavbo dzimbe dzitepo hi ngu tshuka hi dzipwa nandru. Khu giyeyedzo, vambe va ngu dzipwa nandru khu kotani nya silo nyo vivbe va giridego na va nga si hevbuli lisine. (Rom. 3:23) Khu lisine, hi ngu dzina gu gira silo nya sadi. Ganiolu, “ethu hatshavbo hi ngu hosisa.” (Jak. 3:2; Rom. 7:21-23) Ambari olu si si tsakisigo gu dzipwa nandru, iso si ngu hi phasa khu ndziya nyo khaguri. Khu ginani hi ganeya isoso? Kholu gu dzipwa nandru si nga hi kutsa gu vbindrugedza mavbanyelo yathu hi bwe hi dziemiseya gu mba gira sihoso sasimweso. — Vah. 12:12, 13.
13 Khu mambe maganelelo, si ngu kodzega gu hi khaleya gu dzipwa nandru basi, khu kharato, hi nga simama gu dzipwa nandru ambari ha gu ba hi dzi layide nigu Jehovha na yeyedzide gu khuye a hi divalede. Gu khaleya gu dzipwa nandru khu ndziya yeyi si nga hi tshanisa ngudzu. (Ndzi. 31:10; 38:3, 4) Khu ginani hi ganeya isoso? Nga wona giyeyedzo gya ndriyathu nya nyamayi a khaledego gu dzipwa nandru khu sihoso a si giridego gale. Uye a di khuye: “Nyi mwalo gighelo nya gu dzi garadze thumoni wa Jehovha kholu eni kha nyi ngo phasa gilo gambe.” Nya vangi gwathu va ngu dzipwa khu ndziya yamweyo. Khu kharato, gwadi gu hi dzi woneya gu khaleya gu dzipwa nandru basi. Khu ginani? Kholu Sathane a na tsaka ngudzu a gu hi wona na hi gu ema gu thumeya Jehovha ambari hwane nya gu ba Jehovha a hi divalede. — Fananisa ni 2 Vakorinto 2:5-7, 11.
Mukhedziseyi 15/11/02 paj. 20, dzipar. 1-2
Hi nga londrola kharini matshigu yathu gasi gu tsakisa Jehovha?
MATSHIGU yathu ma ngu vbiredza gu vbindra nigu khatshi madugwana ngudzu. Muembi nya dzindzimo Dhavhidhe, a wonide edzi womi wu vbiredzago khidzo gu vbeya, khu kharato a kutsega gu gombeya gu khuye: “Pfhumu Nungungulu, nyi nonedze mahegiso yangu, ni pimo nya matshigu yangu, nyi fela gu pima gurola nya guvbanye gwangu. U giride matshigu yangu kha nga guanama nya gyandza; matshigu nya guvbanye gwangu khandri gilo mbeli gwago.” Dhavhidhe a di gu garadzega khu gu vbweta gu vbanya khu ndziya yi tsakisago Jehovha khu sigiro ni mithumo. Na gu ganeya khedzi a tumbago khidzo Nungungulu, uye a di khuye: “Uwe khuwe gitumbo gyangu.” (Ndzimo 39:4, 5, 7) Jehovha engisede isoso. Uye khu lisine, pimide mwendro khedzide mithumo ya Dhavhidhe a bwe a mu tshatshazeya khu isoso.
Si ngu vbevbuga gu khala na hi pharegide khu mithumo nya yingi litshigu latshavbo. Isoso si nga hi gira hi garadzega, ngudzu-ngudzu ha gu ba hiri ni silo nya singi nyo gire, ganiolu na hiri ni tepo nya yidugwana. Gu fana ni Dhavhidhe, ina hi ngu dzi garadza gasi gu vbanya khu ndziya yi tsakisago Nungungulu? Khu lisine, Jehovha a ngu khedziseya ni gu gevesisa moyo ni moyo wathu. 3 600 myaga hwane, Joba mwama a nga ba a ninga githawo Nungungulu a tiyisegide gu khuye Jehovha a di gu wona esi a nga ba a gira. Joba a di wudzisa gu khuye: “Gikhati a na nyi wudzisago, phindrulo muni nyi na mu ningago?” (Job 31:4-6, 14) Hi nga londrola gwadi matshigu yaya khu gu engisa sileletelo ni gu thumisa gwadi tepo yathu. Hongoleni hi bhulani khu mahungu yaya.
Mukhedziseyi 10.21 paj. 15, par. 4
Wusedza wupari wago ni Jehovha
Gombeya ga Jehovha tepo yatshavbo. Papayi wago a ngu pwisisa gu khuye wa gu simama gu dzipwa nandru khu Kotani nya silo nyo vivbe u giridego, si nga gu garadzeya gu gombeya gwaye. (Rom. 8:26) Ganiolu, “pharisa milombeloni” u bhuleya Jehovha gu khuwe u ngu dzina ngudzu gu khala pari yaye. (Rom. 12:12) Andrej wari khuye: “Eni nyi di gupwa nandru nya wukhongolo ngudzu ni dzitshoni, ganiolu hwane nyo gire nombelo nyi di gu dzipwa gwadi nyi bwe nyi rula mapimo.” Wa gu ba u si giti gilo nyo ganeye avba ya milombelo yago, hevbula Ndzimo sipimo 51 ni 65 si yeyedzago milombelo eyi Pfhumu Dhavhidhe a giridego tepo a nga dzilaya.
Kemba dzithomba nya liphuvbo
Mukhedziseyi 09.22 paj. 13, par. 16
Yeyedza gu khuwe u muthu nyo tumbege
16 Gu dziphara nugo gu na ni lisima ha gu ba hi vbweta gu khethu vambe va hi tumba. Likhalelo leli li na hi phasa gu woneleya gwadi lidimi lathu, tepo hi lingwago gu ganeya silo esi hi embedwego pwani misihalo. (Leri Mavingu 10:19.) Gu dziphara gwathu gu ngu tala gu lingwa ngudzu tepo hi thumisago dzisayiti nya mabhulo. Ha gu mba dzi woneya hi na tshuka hi embeya vathu nya vangi silo si gu misihalo nya mba si tugula. Ha gu tshuka hi rumeya mwendro phalalegiseya mahungu nyo khaguri umo nya internet kha hi na nga si kodza gu woneleya edzi ma na thumiswago khidzo mwendro sigaradzo ma na vangago. Gu dziphara gambe, gu na hi phasa gu simama na hi gu degude tepo vawugeyi va hi girago siwudziso khu ndziya nya wugengeyi, gasi gu hi va embeya mahungu ma na vegago vandriyathu mhangoni. Nigu isoso si nga girega tepo hi wudziswago khu dzipolisiya omu nya mayigo mithumo yathu yi nga emiswa mwendro yi himbedzedwago. Hi nga thumisa litshina leli nya nayo li gu khilo, “nyi na degula heni hwi” omu nya siemo sesi ni ga simbe siemo nyo fane ni isoso. (Ndzi. 39:1) Gu vbwetega hi khala vathu nyo tumbege ga silo si yelanago ni ndranga yathu, dzipari dzathu, vandriyathu ni wevbini muthu. Nigu gasi hi khala vathu nyo tumbege, gu vbwetega hi dzi phara.
20-26 NYA MAIO
DZITHOMBA NYA LITO LA NUNGUNGULU NDZIMO 40-41
Khu ginani hi phasago vambe?
Mukhedziseyi 08.18 paj. 22, dzipar. 16-18
Vathu nya wuhindzi vo khala na va tsakide
16 Vathu va gu na ni wuhindzi khu lisine, kha va giri silo na va gu vireya gu bweledzedwa wuhindzi wawe. Jesu a di khuye: “Wa gu dongisela buzo, rana sisiwana, silima, sikhurubwa ni sikhumu. U na bani u kategide, kholu kha va na mana igyo nya gubweledzele khigyo.” (Luka 14:13, 14) Bhibhiliya yari khiyo: “Muthu nya wuhindzi, a na mana makategwa.” Yi bwe gambe khiyo: “Kategide oyu a alakanyago gisiwana.” (Mavingu 22:9; Ndzimo 41:1) Gu vbwetega gu hi gira wuhindzi kholu ha gu vbweta gu phasa vambe khu lisine.
17 Tepo Pawulo a nga ganeya malito ya Jesu nya gu khayo “kategide ngudzu oyu a ningago guvbindra oyu a hakhago,” kha nga ba a ganeya basi khu gu ninga giphaso nya dzithomba. Hi nga phasa gambe vathu khu gu va tiyisa, gu va ninga wusingalagadzi wa omu nya Bhibhiliya, ni giphaso va gi vbwetago. (Mithumo 20:31-35) Esi Pawulo a ganedego ni gu gira sa gu hi hevbudza lisima nyo gire wuhindzi khu tepo yathu, tshivba yathu, gupima gwathu, ni lihaladzo lathu.
18 Vagevisisi va hevbulago mavbanyelo nya vathu va tugude navo gu khavo gu gira wuhindzi gu ngu gira vathu va tsaka. Khu guya khu ndrima nyo khaguri, vathu vari khavo va ngu tsaka ngudzu hwane nyo ba va girede silo nya sadi vambe. Vagevisisi vari khavo tepo hi phasago vambe, ha gu dzipwa na hi gu vbanyeya gilo nyo giti. Khu kharato vagengeyi nyo khaguri vari khavo vathu vo gira thumo nya gudzine gasi gu va mana womi nya wadi ni gutsaka. Khu lisine, esi va si tugudego kha si hi samadzise, kholu muvangi wathu nya lihaladzo, Jehovha, tepo yatshavbo a ngu hi embeya gu khuye gu gira wuhindzi gu ngu resa gutsaka.— 2 Thim. 3:16, 17.
Mukhedziseyi 15/12/15 paj. 24, par. 7
Jehovha kha hi digi tepo hi dwalago
7 Ambari ulolo, ha gu dwala hi nga lomba Jehovha gasi a hi thaveleya ni gu hi ninga guti gu fana ni esi sithumi saye sa gale si giridego. Pfhumu Dhavhidhe a di lova gu khuye: “Kategide oyu a alakanyago gisiwana; litshigu nya sigaradzo a na vbanyiswa khu Pfhumu Nungungulu. Pfhumu Nungungulu a ngu mu sayisa, a mu ninga guvbanya.” (Ndzi. 41:1, 2) Hi ngu dziti gu khethu, muthu a nga ba a yeyedza wuhindzi sisiwana matshigoni ya Dhavhidhe kha nga ba a vbanya kala gupindruga. Khu kharato, somo guagani gu khiso Dhavhidhe kha nga ba a vbweta gu ganeya gu khuye Nungungulu a di hadzi vbulugisa muthu yoyo a mu ninga womi nyo pindruge khu ndziya nyo hlamadzise. Malito a ganedego Dhavhidhe, ma gu yeyedza gu khayo Nungungulu a di hadzi gu phasa muthu yoyo nyo tumbege, a yeyedzago wuwadi. Khu ndziya muni? Khu gu landreya, Dhavhidhe a di tshamuseya gu khuye: “Vbadawutunu nya madwali, Pfhumu Nungungulu u ngu mu sayisa, u mu vbungulela wuvi waye.” (Ndzi. 41:3) Muthu a dwalago, a nga tiyisega gu khuye Nungungulu kha divale silo nya sadi a giridego ni olu a simamago gu tumbega gwaye. Nigu gambe si ngu thaveleya gu dziti gu khethu Jehovha a giride givili nya muthu ni makodzelo nya gu hawuluge madwali.
Mukhedziseyi 09.17 paj. 12, par. 17
Pimedzeya pweya-wusiwana wa Jehovha
17 Ambari olu u dzitigo gu khuwe gu yeyedza pweya-wusiwana si ngu resa mihandro nya yadi, kha si yeli gu khala gighelo nya litshina gasi gu haguleya likhalelo leli. Gighelo nya litshina gi hi kutsago gu gira isoso, gu pimedzeya Jehovha ni gu mu ninga wuzundzu. (Mav. 14:31) Jehovha giyeyedzo nya gyadi nya lihaladzo ni pweya-wusiwana, nigu ho vbweta gu gira satshavbo hi si kodzago gasi gu mu pimedzeya. Khu kharato, hi na phara gwadi vandriyathu tepo yatshavbo hi bwe hi yeyedza pweya-wusiwana vathu va vbanyago vbafuvbi gwathu.— Gal. 6:10; 1 Joh. 4:16.
Kemba dzithomba nya liphuvbo
Perspicaz-2 paj. 49
Jehovha
Gipandre nya gikhongolo nya Bhibhiliya gya gu ganeya khu gu emeya Mufumo wa Nungungulu, nigu isoso sa gu yeyedza makungo nya litshina ya Jehovha Nungungulu: a gu gu agiswa nya lina laye. Gu agiswa gogo, go pata gu agisa lina la Jehovha ga malipha yatshavbo. Ganiolu, sa gu pata gambe gu lina la Nungungulu li wonwa na li agide khu sivangwa satshavbo nya guti sa ndzadzini ni mafuni. Isoso so thula gu khiso va yede guti ni gu ninga githawo Jehovha kha nga Pfhumu ya ndzadzini ni mafuni, ganiolu khu gu dzina, khu gu vbweta gu mu thumeya, gu gira gugola gwaye ni lihaladzo va gu nalo khuye. Nombelo Dhavhidhe a giridego wu gu romo omu ga Ndzimo 40:5-10, wa gu yeyedza gwadi makhalelo yoyo ni gu agiswa nya lina la Jehovha. (Wona sipandre nyo khaguri nya ndzimo yeyi si ganedwego khu mupostoli maningano ni Jesu Kristo omu ga Heb 10:5-10.)
27 NYA MAIO–2 NYA JUNHO
DZITHOMBA NYA LITO LA NUNGUNGULU NDZIMO 42-44
Thumisa gwadi sihevbudzo hi ningwago khu Jehovha
Mukhedziseyi 1/6/06 paj. 9, par. 4
Tshamuselo nya libhuku la Ndzimo
42:4, 5, 11; 43:3-5. Ha gu dzi hambanisa ni libandla nya Wukristo khu tepo nyo khaguri, gu dundruga khu litsako hi nga ba hiri nalo gale khu gu tshangana ni vandriyathu si na hi thaveleya. Ambari gupheyani sa gu wonega gu khatshi sa gu hi engedzeya guvbisa hi gupwago, si nga hi dundrugisa gu khethu Nungungulu wuthavelo wathu ni gu khethu hi yede gu mu vireya gasi gu hi ninga gurula.
Mukhedziseyi 15/1/12 paj. 15, par. 2
Unga gira ginani gasi u tsaka ni gu wuyedwa khu gihevbulo gyago nya Bhibhiliya?
GU GOMBEYA: Gilo nyo pheye hi yedego gu gira gu gombeya. (Ndzi. 42:8) Khu ginani? Hi yede gu wona gihevbulo nya Lito la Nungungulu kha nga gipandre nya wukhozeyi wathu. Khu kharato, hi yede gu lomba Jehovha makodzelo nyo pimise gwadi ni liphuvbo laye nya guage. (Luka 11:13) Barbara, a thumago kha nga misiyonariya khu tepo nyo laphe wari, khuye: “Tepo yatshavbo nya gu gombeya na nyi si leri mwendro gu hevbula Bhibhiliya.” Gu gombeya na hi si hevbuli, sa gu dongiseya mapimo ni monyo wathu gasi gu dzumeya khu gu vbeleya guhodza ga liphuvboni hi gu nago.
Mukhedziseyi 09.16 paj. 5, dzipar. 11-12
“Mandza yago ma nga vbeli tshivba”
11 Jehovha a ngu hi tiyisa ni gu hi hevbudza khu gu thumisa mitshangano, dziasembleya, dzikongresu ni dzixikola nya Bhibhiliya. Gu hevbudzwa khu ndziya yeyi si ngu hi phasa gu mu thumeya khu gighelo nya gyadi, gu manega ni misuwo nya liphuvbo ni gu khataleya gwadi mithumo yathu ya liphuvboni. (Ndzi. 119:32) Jehovha a gu hi hevbudza khu dzindziya dzatshavbo dzodzo gasi gu hi tiyisa. Ina u ngu ninga lisima giphaso gyogyo?
12 Jehovha phaside Vaisrayeli gu pala Vaamaleki ni Vaetiyopi. Nigu gambe, a ningide tshivba Nehemiya ni Vajudha gasi gu vbedzisa gu vbaha mabhiyo ya Jerusalema. Khu ndziya nyo fane, uye a na hi ninga tshivba gasi gu emisana ni gu wugedwa, gu garadzega ni gu mba tsakedwa nya mahungu yathu thumoni nyo tshumayele. (1 Ped. 5:10) Kha hi vireyi gu khethu Jehovha a hi gireya silewugiso. Wulangani nya isoso, hi yede gu gira gipandre gyathu khu gu leri Bhibhiliya tshigu ni tshigu, gu dongiseya ni gu manega mitshanganoni yatshavbo, gu gira gihevbulo nya muthu enga, gu gira wukhozeyi nya ndranga, gu gombeya ga Jehovha tepo yatshavbo ni gu mu tumba. Jehovha a gu hi ninga satshavbo sesi gasi gu hi tiyisa ni gu hi tsakisa. Ganiolu, a na si kodza kharini gu hi phasa ha gu dzumeleya yimbe mithumo yi tsikedza silo sesi? Wa gu tugula gu khuwe mandza yago ma vbede tshivba, lomba giphaso ga Jehovha. Khu gu landreya, u na wona gu khuwe khu gu thumisa liphuvbo laye nya guage, Jehovha a na gu “ninga gudogoreya ni tshivba nya gu gire isoso.” (Filp. 2:13) Ganiolu, ginani u yedego gu gira gasi gu tiyisa mandza ya vambe?
Kemba dzithomba nya liphuvbo
Perspicaz-1 paj. 479
Ngehe
Umo nya milowo, lito ngehe la gu thumiswa gasi gu tshamuseya silo nyo khaguri. Na gu tshaniseka, Joba a gu tshamuseya giemo gyaye khuye: “Nyi khade ndruye nya migehe.” (Joba 30:29) Na gu dundrugeya khu gu padwa nya vathu va Nungungulu, muembi nya dzindzimo adzina saye a di gu ganeya khomu va nga ba va dwana umo nyimbi, omu migehe hi nga ba yi oloveya gu hodza nyama nya vathu nya gufe (wona Ndz 68:23), uye a di khuye: ‘U di hi pfara avbo yi vbanyago migehe.’ (Ndz 44:19) Tepo Bhabhiloniya a nga wugeya Jerusalema khu 607 na ma si gu vbohi matshigu yathu, yi di manega ndzala nya yikhongolo yi nga gira vamamayi va tshanisa sanana sawe. Khu gu landreya, Jeremiya a di ganeya gu khuye migehe yi ngu mamisa sanana sayo gu hambana ni ‘vathu va tigoni gwaye’ va nga ba va vivbedwe khu monyo. — Gil 4:3, 10.
3-9 NYA JUNHO
DZITHOMBA NYA LITO LA NUNGUNGULU NDZIMO 45-47
Ndzimo yi ganeyago khu mutshadho wa Pfhumu
Mukhedziseyi 15/2/14 dzipaj. 9-10, dzipar. 8-9
Tsaka khu mutshadho nya Ginvutana
8 Leri Ndzimo 45:13, 14a. Noivha ya gu tshamusedwa nga nyamahegyane “nya gumbure ngudzu,” mutshadhutunu ga Pfhumu. Umo ga Gutuledwa 21:2, noivha ya gu fananiswa ni lidhoropa, a gu Jerusalema nya muphya “yi nga mburisedwa mwama wayo.” Lidhoropa lolo la ndzadzini li na ni “wudhumu wa Nungungulu”, nigu li ngu khedziga ‘gu fana ni giwindri nya gu dhure ngudzu, kha nga giwindri nya jaspe nyo ketige nga livhidru.’ (Gutu. 21:10, 11) Gu mbura ga Jerusalema nya muphya gu tshamusedwe khu ndziya nyo mbure omu nya libhuku la Gutuledwa. (Gutu. 21:18-21) Kha si samadzisi gu muembi nya dzindzimo a ganede gu khuye noivha yi ‘mburide ngudzu,’ kholu mutshadhu wakona wu na giredwa ndzadzini.
9 Noivha ya gu dzegwa yi ya ningedwa noivho, a gu Pfhumu Mesiya. Uye a di yi “handza khu lito la Nungungulu nga khatshi a gu li handza khu mati.” Noivha yoyo ‘yi agide nigu yi mwalo gisolo.’ (Efes. 5:26, 27) Iyo yi yede gu ambala gwadi gasi yi manega ga buzu wowo. Nigu khu lisine, iyo yi ambade gwadi! Sombo nya noivha, “sombo nya linyu nya gu khendzige,” nigu iyo ya gu dzegwa yi yiswa ga Pfhumu na yi ambade sombo si nga sonwa gwadi. Gasi gu hongola mutshadhutunu ga Nvutana, yi di “dzumeledw[a] gu ambala sombo nya linyu nya gu khendzige, si agidego, kholu linyu ya gu emeya mithumo nyo lulame ya va nyo aga.”— Gutu. 19:8.
Mukhedziseyi 05.22 paj. 17, dzipar. 10-12
Ginani Libhuku la Gutuledwa li ganeyago khu wumindru wathu?
Ginani egi Jehovha a na girago khu gu wugedwa gogo? Uye wari khuye: “Nyi na mu gorogela ngudzu.” (Ezek. 38:18, 21-23) Gutuledwa gipimo 19 a gu ganeya khesi si na dugeleyago khu gu landreya. Jehovha a na rumeya Gyanana gyaye gasi gu vhikeya vathu vaye ni gu pala valala vawe. Jesu a na patana ni “mabutho ya ndzadzini” a gu dzingilozi nyo tumbege gumogo ni vale nya 144 000 gasi gu dwana ni Goge wa Magoge. (Gutu. 17:14; 19:11-15) Ginani gi na dugeleyago avbo nya nyimbi yoyo? Vathu ni mitsawa va wugeyago Jehovha, vatshavbo va na fuviswa khu gu vbeleya. — Leri Gutuledwa 19:19-21.
11 Nga dundrugeya edzi ava va tumbegidego omu mafuni va na dzipwago khidzo khu gu ba va vbulugide avbo nya gu fuviswe nya valala va Nungungulu! Gu na bari tepo nyo tsakise ngudzu! Ambari olu gu na manegago gutsaka nya gu khongolo ndzadzini tepo Bhabhiloni nya khongolo a na fuviswago, gu na ni gimbe gilo gi na hi ningago litsako nya likhongolo. (Gutu. 19:1-3) Gigiro gegi nya lisima, gyomo omu nya libhuko la Gutuledwa a gu “mutshadho wa Nvutana.” — Gutu. 19:6-9.
12 Lini wu na giregago mutshadho wowo? Vatshavbo nya 144 000 va na ba va romo ndzadzini na gu keneleya vbadugwana gasi gu yi pheya nyimbi ya Harmagedhoni. Ambari ulolo, iyoyo yi na ba siri tepo nya mutshadho wa Nvutana. (Leri Gutuledwa 21:1, 2.) Mutshadho wa Nvutana wu na girega hwane nyo ba yi giregide nyimbi ya Harmagedhoni ni gu na va fuvisidwe valala va Nungungulu. — Ndzi. 45:3, 4, 13-17.
Perspicaz-2 paj. 1099
Nyimbi
Tepo yi na vbeyago nyimbi yeyi, mafuni gu na manega gurula khu mil myaga. Libhuku la ndzimo lari khilo: “Uye a ngu vbedza mayunga kala mahegiso nya litigo, a ngu fanya wulaho, a fanyeledzela siholoma; a rinya niloni dzikareta nya nyimbi.” Malito yaya, ma phede gu tadzisega tepo Nungungulu a nga resa gurula tigoni ga Israyeli khu gu fanyeledzela matshari yatshavbo ya valala. Hwane nya gu ba Kristo a fuviside ava va vangago dzinyimbi, mafuni gwatshavbo gu na rula khu gu vbeleya. (Ndz 46:8-10) Avo va na manago womi nya mba vbeya khu vale va nga vbindrugedza ‘matshari yawe ma khala mavbadza, ni siholoma sawe si khala sivbwero,’ ni gu mba “hevbula gu dwana nyimbi.” “Kholu Pfhumu Nungungulu nya Tshivba Yatshavbo ganede.” — Isa 2:4; Mik 4:3, 4.
Kemba dzithomba nya liphuvbo
Mukhedziseyi 04.17 paj. 11, par. 9
Ginani gi na fuvago tepo Mufumo wa Nungungulu wu na tago?
9 Ginani gi na tshikedzago mifumo yeyi nya sidambani? Hwane nya Arimagedhoni, ina yi na manega yimbe hengeledzano mafuni? Bhibhiliya yari khiyo: “Ha gu vireya ndzadzi nya yiphya ni mafu nya maphya, omu gu na ba guri ni gululama.” (2 Ped. 3:13) Ndzadzi ya gale ya gu thula mifumo ya muhuno nya sidambani; mafu ya gale vathu vakone va fumedwago khu mifumo yoyo. Satshavbo soso, kha si na nga manega gambe. Ganiolu, si na tshikedzwa khu ginani? Lito “ndzadzi nya yiphya” la gu thula mufumo nya wuphya nigu “mafu nya maphya” ma gu thula vathu va na fumedwago khu mufumo wowo. Mufumo wa Nungungulu wu na thangedwa khu Jesu nigu uye a na yeyedza makhalelo ya Jehovha khu gu vbeleya, kholu Jehovha khandri Nungungulu nya pfilupfilu. (1 Kor. 14:33) Khu kharato, “mafu nya maphya” ma na sasamedzwa gwadi nigu vama nyo tumbege va na ma sayisa. (Ndzi. 45:16) Gasi gu khathaleya thumo wowu, vama vovo va na hakha sileletelo va na ningwago khu Jesu ni ava nya 144 000 va na fumago naye. Nga dundrugeya edzi si na tsakisago khidzo tepo mifumo nya sidambane yi na tshikedzwago khu hengeledzano mweyo nya gu pwanani ni gurula.
10-16 NYA JUNHO
DZITHOMBA NYA LITO LA NUNGUNGULU NDZIMO 48-50
Vavelegi, phasani sanana sanu gu tumba sileletelo hi ningwago khu hengeledzano ya Jehovha
Mukhedziseyi 03.22 paj. 22, par. 11
Gu khozeya Jehovha si na gu ninga gutsaka
11 Ethu ha gu khozeya Jehovha tepo hi hevbulago lito laye ni gu hevbudza sanana sathu khuye. Khu sabhadho, Vaisrayeli kha va nga ba va yede gu thuma nigu va di gu thumisa litshigu leli gasi gu tiyisa wupari wawe ni Jehovha. (Ekiso. 31:16, 17) Sithumi sesi nyo tumbege si di gu hevbudza sanana sawe khu Jehovha ni wuwadi waye. Muhuno gambe, ethu hi yede gu dzi tshiyela tepo nyo leri ni gu hevbula lito la Nungungulu. Egi gipandre nya lisima nya wukhozeyi wathu ga Jehovha nigu igyo gi ngu hi phasa gu hidzimeya gwaye. (Ndzi. 73:28) Nigu tepo hi hevbulago hatshavbo kha nga ndranga, hi nga phasa sanana sathu gu tiyisa wupari waso ni Papayi wathu nya lihaladzo wa ndzadzini. — Leri Ndzimo 48:13.
Mukhedziseyi 15/3/11 paj. 19, par. 5-7
U na ni sighelo nyo tsake
“Dzuwulugani Siyoni, mu gimbilagimbila dhoropani gwatshavbo, mu saya makhokhola yaye; samalani mabhiyo yaye, mu khedzisisa dzinyumba dzaye nya wufumu, mu kodza gu embeledzela mimelana yi nga gutago.” (Ndzi. 48:12, 13) Khu ndziya yeyi, muembi nya dzindzimo a di kutsa Vaisrayeli gu wona Jerusalema khu vbafuvbi. Ina u ngu dundrugeya satshavbo silo nya sadi dzindranga dza Israyeli dzi nga si vbanya tepo dzi nga ba dzi hongola dhoropani nya guage, dziya gira mibuzo yi nga ba yi girwa myaga yatshavbo ni gu wona tempele nyo hlamadzise? Khu lisine, avo va di gu kutsega gu bhuleya silo soso ‘mimelana yi nga landreya.’
Dundrugeya khu pfhumugadzi ya Sabha, gupheyani yi nga kanakana khesi si nga ba si ganedwa maningano khu mufumo wa Solomoni ni guti gwaye nya gungi. Ginani gi nga mu gira a khodwa gu khuye esi a nga ba a sipwa si diri lisine? Uye a di ganeya gu khuye: “Nyi di si khodwi khiso va nga bani va nyi embela kala olu nyi ngata si wona khu maho yangu.” (2 Dzik. 9:6) Khu lisine, esi hi si wonago khu “maho yathu” si nga hi kuha ngudzu.
U nga phasa kharini sanana sago gu ‘wona khu maho yaso’ yatshavbo mithumo nyo mbure yi girwago khu hengeledzano ya Jehovha? Wa gu ba u vbanya vbafuvbi ni Bheteli, u nga digi guya wuseya ni ndranga yago. Khu giyeyedzo, avba a nga ba a vbanya Mandy ni Bethany, gu diri pfhuka nya 1.500 dzikilometru gasi gu vboha Bheteli. Ganiolu, tepo yatshavbo vavelegi vawe va di gu hongola navo vaya wuseya Bheteli, ngudzu-ngudzu tepo va nga ba vari vaphya. Avo va gu tshamuseya gu khavo: “Na hi si wuseyi Bheteli, hi di gu pimisa gu khethu iyoyo gu diri wulanga gu nga ba guri ni milayo nya yingi nigu gu nga ba gu vbanywa basi khu vandriyathu va dandridego khu tanga. Ganiolu, hi manide vaphya va nga ba va thumeya Jehovha khu sighingi, nigu va di gu tsaka khu isoso. Hi wonide gu khethu hengeledzano ya Jehovha kha ya nga ba yi romo basi gipandreni gwathu, nigu tepo yatshavbo hi nga ba hi wuseya Bheteli si di gu hi phasa gu manega ni misuwo ya liphuvboni.” Gu wona hengeledzano ya Nungungulu khu vbafuvbi si kutside Mandy ni Bethany gu thuma kha nga vapiyonera nigu khu gu gimbiya nya tepo va ranwa gasi guya phasedzeya Bheteli.
Mukhedziseyi 15/8/12 paj. 12, par. 5
Vbanyani khu gu gimbidzisana ni mahungu nya yadi nya Mufumo
5 Gu hevbula matimo. Oyu a vbwetago gu gira gipandre nya mufumo nyo khaguri, adzina saye gu vbwetega a hevbula matimo maningano ni mufumo wowo. Khu ndziya nyo fane, ava va vbwetago gu gira gipandre nya Mufumo wa Nungungulu va na ma va gira gwadi va gu hevbula satshavbo maningano khu Mufumo wowo. Wona giyeyedzo gya sanana sa Kora, si nga ba si thuma Israyeli wa gale. Iso si di gu gola ngudzu Jerusalema ni avba si nga ba si khozeya avbo Nungungulu ni gu ganeya gambe khu matimo nya lidhoropa lolo. Iso kha sa nga ba si hlamadziswa khu siwindri ni khokhweni, ganiolu khesi lidhoropa ni wulanga wowo nya wukhozeyi si nga ba si emeya iso. Jerusalema gu diri “lidhoropa la Mufumeli nya khongolo,” Jehovha, kholu khumo gu nga ba guri tshindza nya wukhozeyi nya guage. Khavbo vbale gu nga ba gu hevbudzwa Nayo wa Nungungulu. Jehovha a di gu fuma vathu vale kha nga Pfhumu a bwe a va yeyedza wuwadi. (Leri Ndzimo 48:1, 2, 9, 12, 13.) Gu fana navo, ina u na ni gudogoreya nya gu hevbule ni gu ganeya maningano ni hengeledzano ya Jehovha ya mafuni? Tepo u yago u hevbula khu hengeledzano ya Nungungulu ni edzi Jehovha a phasago khidzo vathu vaye, Mufumo wa Nungungulu wu na khala nya lisine gwago. Nigu gudogoreya gwago nyo tshumayele mahungu nya yadi nya Mufumo gu naya gu engedzeya. — Jer. 9:24; Luka 4:43.
Kemba dzithomba nya liphuvbo
Perspicaz-2 paj. 859
Dzithomba
Kha nga olu Vaisrayeli va nga ba va dugeleya, va di gu hodza guhodza nya gwadi ni gu seya wadwa nya wadi (1Dzf 4:20; Muh 5:18, 19), nigu dzithomba dzawe dzi di gu va vhikeya ga simbe sigaradzo. (Mav 10:15; Muh 7:12) Khu kharato, ambari olu Vaisrayeli va nga ba va vbanya guya khu makungo ya Jehovha nya gu londrole mihandro nya thumo wawe (fananisa ni Mav 6:6-11; 20:13; 24:33, 34), uye gambe a va gengedzide gasi va si pheyi gu tumba dithomba dzawe va bwe va divala gu khavo satshavbo va gu naso sa guta khiyo gwaye. (Dhet 8:7-17; Ndz 49:6-9; Mav 11:4; 18:10, 11; Jer 9:23, 24) A di va dundrugisa gu khuye dzithomba dzi ngu vbeya (Mav 23:4, 5), idzo kha dzi ningwi Nungungulu gasi muthu a vbuluga gufa (Ndz 49:6, 7) nigu kha dzi thumi gilo ga muthu a fudego (Ndz 49:16, 17; Muh 5:15). Avo va yeyedzidwe gupwani va gu ninga lisima dzithomba va di hadzi gu khala vamagundrule va bwe va si tsakedwi khu Jehovha. (Mav 28:20; fananisa ni Jer 5:26-28; 17:9-11.) Va di kutswa gambe gu “rungudza [Jehovha] khu silo [va] gu naso.”— Mav 3:9.
17-23 NYA JUNHO
DZITHOMBA NYA LITO LA NUNGUNGULU NDZIMO 51-53
Ginani u yedego gu gira gasi gu potsa sihoso nya sikhongolo?
Mukhedziseyi 01.19 paj. 14, dzipar. 4-5
U nga vhikeya kharini monyo wago?
4 Omu ga Mavingu 4:23, lito “monyo” lo tshamuseya muthu wa ndrani mwendro makhalelo ya monyoni nya muthu. Khu mambe maganelelo, “monyo” so thula mapimo yathu ma sihadego, gudzipwa gwathu, makungo yathu ni gudogoreya gwathu. A gu edzi hi khadego khidzo khu ndrani, na siri edzi hi wonegago khidzo khu vbavbandze.
5 Dundrugeya khedzi womi nya givili gyathu wu fananiswago khidzo ni lisima nya edzi hi yedego gu khala khidzo ndrani. Nyo pheye, gasi hi manega ni givili nyo khadzisege gwadi, gu vbwetega hi manega ni mahodzelo nya yadi, hi bwe hi oloveya gu tiyisa mili. Khu ndziya nyo fane, gasi gu hi khalega gwadi khu liphuvboni, gu vbwetega hi manega ni mahodzelo nya yadi khu liphuvboni hi bwe hi tiyisa gukhodwa gwathu ga Jehovha tepo yatshavbo. Hi nga yeyedza gukhodwa gwathu ga Jehovha khu gu vbanya khesi hi si hevbulago hi bwe hi bhuleya vambe gukhodwa gwathu. (Rom. 10:8-10; Jak. 2:26) Nya wuvili, ha gu khedza givili gyathu khu vbavbandze basi, si nga gira hi pimisa gu khethu hi na ni womi nya wadi narigu khu lisine adzina khu ndrani hi na ni madwali. Khu ndziya nyo fane, ha gu khedza basi sighingi sathu khu liphuvboni, si nga gira hi pimisa gu khethu gukhodwa gwathu gu tiyide, ganiolu adzina na hi gu haguleya gudogoreya nyo vivbe khu ndrani. (1 Kor. 10:12; Jak. 1:14, 15) Gu vbwetega hi dundruga gu khethu Sathane a gu tsakeya gu hi wona na hi pimisa nga uye. Ganiolu gwadi-gwadi, a gu zama kharini gu gira isoso? Nigu hi nga dzi vhikeya kharini?
Mukhedziseyi 15/6/15 paj. 14, dzipar. 5-6
U nga simama na wu agide
5 Si na ni lisima gu tumba Jehovha khu gu vbeleya, nigu ho yeyedza gutumba gogo khu gu gombeya ga Jehovha hi lomba giphaso maningano ni mapimo yathu nya mba handzega. Tepo hi hidzimeyago ga Jehovha khu nombelo, uye a gu hi hidzimeleya. Uye a ngu hi ninga liphuvbo laye nya guage, nigu isoso si ngu hi phasa gu simama gu dwana ni mapimo yathu nya mba hadzega hi bwe hi simama na hi agide. Khu kharato, hongoleni hi embeyani Nungungulu misuwo hi gu nayo nya gu mu tsakise khu mapimo yathu. (Ndzi. 19:14) Ina hi ngu dzi nogisa hi mu lomba gu a hi gevesisa gasi gu wona gu khethu hi “ngu gimbila khu ndzila nya guvivbe”, a gu gudogoreya nya mba gwadi gu na hi girago hi ghoha? (Ndzi. 139:23, 24) Ina tepo yatshavbo hi ngu mu lomba gasi a hi phasa gu simama na hi tumbegide ha gu lingwa? — Mat. 6:13.
6 Adzina saye edzi hi nga dandriswa khidzo mwendro mavbanyelo hi nga ba hiri nawo gale ma hi giride hi gola silo si gu mba tsakisa Jehovha. Ambari ho ba hi romo ga giemo gegi, uye a nga hi phasa gu vbindrugedza esi si vbwetegago gasi gu simama gu mu thumeya khu ndziya yi mu tsakisago. Pfhumu Dhavhidhe a dzumede isoso. Hwane nya gu ba a giride wubhayi ni Bheti-Sebha, a di lomba Jehovha gu khuye: “Vega monyo nya wadi ndrani gwangu u wusedza liphuvbo nya gutiye monyoni gwangu.” (Ndzi. 51:10, 12) Gighoho gi nga tsakisa givili gyathu, ganiolu Jehovha a nga wusedza avbo gwathu liphuvbo nya gu mu engise. Ambari gudogoreya nyo vivbe gwa gu ba gu tshingide monyoni gwathu ni gu tsolopeteya mapimo yathu nya yadi, Jehovha a nga hi phasa gasi hi engisa sileletelo saye hi bwe hi si landrisa tshigu ni tshigu. Uye a nga himbedzeya ni gevbini gilo nyo vivbe gi hi pala. — Ndzi. 119:133.
Kemba dzithomba nya liphuvbo
Perspicaz-1 paj. 719
Dhowegi
Muedhomi a nga ba a thuma kha nga muthangeyi nya vahavisi va Sawule, a diri ni thumo nya lisima ngudzu. (1Sa 21:7; 22:9) Si di gu wonega guagani gu khiso Dhowegi a di gu vbindrugedzide. Khu gu ba a landrisa “siguruvedzo saye mbeli ga Pfhumu” eyi Nobhi, adzina saye khu gisambanyo nyo khaguri a giridego khu gu mba handzega nyo khaguri mwendro gu singedzwa sokono, Dhowegi, a si vbanyide tepo khiyo Muprista nya khongolo Aimeleki a nga ninga Dhavhidhe dzimbuva ni litshari la Gholiya. Khu gu landreya, tepo khiyo Sawule a nga yela sithumi saye a di si embeya gu khuye sa gu hunga makungo nya mba yadi maningano khuye, khu kharato Dhowegi a di mu embeya satshavbo a nga si wona eyi Nobhi. Hwane nya gu ba a raniside muprista nya khongolo gumogo ni vambe vaprista va Nobhi ni gu ba a thethisede Aimeleki, Sawule a di ruma masotshwa gu songa vaprista. Tepo khiyo masotshwa ma nga bomba, Dhowegi a di landra gileletelo gya Sawule, nya mba kanakana a di songa 85 vaprista. Hwane nya gu ba a giride silo sesi nya gu vivbe, Dhowegi a di ningeya Nobhi gasi a tshungunudwa, gu songwa vatshavbo vavbanyi va mule gu pata vaphya, avo va dandridego khu tanga ambari kamo ni sifuyo sawe. — 1Sa 22:6-20.
Kha nga si yeyedzidwego avbo nya hungo nya mahungu wa Ndz 52, Dhavhidhe lovide maningano khu Dhowegi gu khuye: “Lidimi lago la gu luga makungo nya guvivbe; kha nga ngala nya gulodzwe, la luga wukanganyisi. Wa gu gola ngudzu guvivba guvbindra wuwadi, wa gu gola malipha guvbindra lisine. Wa gu tsakiswa basi khu magana nya gumbembise, uwe u gu ni lidimi nya wudambane.” — Ndz 52:2-4.
24-30 NYA JUNHO
DZITHOMBA NYA LITO LA NUNGUNGULU NDZIMO 54-56
Nungungulu a na ni uwe
Mukhedziseyi 1/8/06 paj. 22, dzipar. 10-11
Gengeya, u thava Nungungulu
10 Ga tepo nyo khaguri, Dhavhidhe a di vbweta wulanga nyo sihale, khavbovbo a hongola ga Akisi Pfhumu nya lidhoropa la Vafilistiya va Gati, lidhoropa la Gholiya. (1 Samuweli 21:10-15) Sithumi si di thuledza Dhavhidhe gu khiso nala wa lidhoropa lile. Ginani egi Dhavhidhe a giridego ga giemo gegi nyo garadze? Uye a di tuleya monyo waye Jehovha khu nombelo. (Ndzimo 56:1-4, 11-13) Ambari olu a nga dzi gira muthu nyo handruge gasi gu vbuluga, Dhavhidhe a di gu dziti gu khuye khu Jehovha a nga mu phasa ni gu kategisa mizamo yaye. Khu gu dundruga Jehovha ni gu tumba uye, Dhavhidhe a si yeyedzide gu khuye a ngu thava Nungungulu. — Ndzimo 34:4-6, 9-11.
11 Gu fana ni Dhavhidhe, hi nga yeyedza gu khethu hi ngu thava Nungungulu khu gu tumba gitumbiso gyaye nya gu khuye a na hi phasa gu emisana ni sigaradzo sathu. Dhavhidhe wari, khuye: “Guvbanya gwago gu vege mandzani ga Pfhumu Nungungulu tumba uye, a na gira satshavbo.” (Ndzimo 37:5) Isoso kha si thuli gu khiso hi yede gu embeya sigaradzo sathu Jehovha hi khala khu mawogo hi vireya gu khethu a gira gilogyo. Dhavhidhe kha gombeya ga Nungungulu a lomba giphaso a vbedza a khala khu mawogo. Uye a di thumisa makodzelo yaye ni wugengeyi a ningidwego khu Jehovha gasi a emisana ni gigaradzo gyaye. Khu kharato, Dhavhidhe a di gu dziti gu khuye ka nga ba a yede basi gu tumba giphaso nya vathu gasi gu dugeleya. Anethu hi nga dugeledwa khu silo sasimweso. Hwane nya gu ba hi giride satshavbo si gu romo tshivbani gwathu, hi yede gu diga satshavbo si tshadego mandzani ga Jehovha. Gasi gu ganeya lisine, gu tala nya dzitepo gimwalo hi nga girago vbavbandze nya gu tumbe Jehovha. Ga dzitepo dzodzo, khavbo hi nga yeyedzago gu khethu hi ngu tumba Jehovha khu lisine. Hi nga thaveledwa khu malito ya Dhavhidhe ma gu khayo: “Pfhumu Nungungulu a gu tulela guti sihalo waye vale va mu thavago.” — Ndzimo 25:14.
Achegue-se a Jeová, paj. 243, par. 9
Gimwalo gi nga “hi hambanisago ni lihaladzo la Nungungulu”
9 Jehovha a ngu ninga lisima gutimiseya gwathu. (Matewu 24:13) Dundruga gu khuwe Sathane a gu vbweta gu khuye u diga Jehovha. Litshigu ni litshigu u simamago gu tumbega ga Nungungulu, wa gu mu phasa gu ningeya hlamulo ga malipha ya Sathane. (Mavingu 27:11) Khandri tepo yatshavbo si vbevbugago gu timiseya. Sigaradzo nya madwali, gu hamuga dzitsapawu, gu garadzega ni simbe silo si nga gira gu litshigu ni litshigu hi emisana ni gigaradzo. Gu mba mana iso hi si vbwetago, si nga hi gira hi vbeya tshivba. (Mavingu 13:12) Tepo hi tiyago hi emisana ni sigaradzo sesi, Jehovha a gu engedzeya gu ninga lisima gutimiseya gwathu. Khiso si giridego Pfhumu Dhavhidhe a lomba Nungungulu gu vegedza marongo yaye “gyomboni” a bwe a ganeya gu khuye: ‘Ina kha sa lowa libhukuni gwago, gani?’ (Ndzimo 56:8) U nga divali gu khuwe Jehovha a ngu ninga ngudzu lisima marongo yathu ni gutimiseya gwathu sigaradzo hi tshanganago naso khu kotani nya gutumbege gwathu, nigu uye kha gu divali. Isoso silo nya lisima ngudzu mahoni gwaye.
Mukhedziseyi 06.22 paj. 18, dzipar. 16-17
Lihaladzo li nga hi phasa kharini gu pala hwanga?
16 Sathane a ngu dziti gu khuye hi ngu ninga lisima womi. Uye wari khuye ethu hi na gira ni gevbini ambari sa gu lomba gu diga wupari wathu ni Jehovha khu gu vbweta gu sayisa womi wathu. (Joba 2:4, 5) Sathane vivbedwe khu monyo, nigu kha nga olu a gu na ni “tshivba nya gu songe,” a gu zama gu londrola gu thava nya gufa hi gu nago gasi gu hi gira hi diga Jehovha. (Hebh. 2:14, 15) Ga siemo nyo khaguri, dzimbe dzitepo vathu va thangedwago khu Sathane vo ganeya gu khavo va na hi songa ha gu mba tsukula esi hi si khodwago. Ga simbe siemo ha gu ba hi dwala, Sathane a nga londrola lithomo lolo gasi gu hi gira hi ndraga milayo ya Nungungulu. Gimbe gambe khu gu vadhogodheya mwendro vambe ndrangani gwathu va sirigo Dzifakazi va nga hi kutsedzeya gu thedwa novba a gu silo si fanyago nayo wa Nungungulu. Mwendro muthu nyo khaguri a nga zama gu hi kutsedzeya gu dzumeya mambe mathumelo nya madwali ma gu mba gimbileyana ni matshina nya milayo nya Bhibhiliya.
17 Ambari hi si dzinigo gufa, ethu hi ngu dziti gu khethu Jehovha kha na nga diga gu hi haladza khu gu ba hi fude. (Leri Varoma 8:37-39.) Tepo dzipari dza Jehovha dzi fago, uye a ngo simama gu dzi dundruga nga khatshi dzi ngo vbanya. (Luka 20:37, 38) Uye a ngu dzina gu dzi wusa dzi vbanya gambe. (Joba 14:15) Jehovha livbide tengo nyo dhure khethu “gasi . . . hi mane guvbanya nya gupindruge.” (Joh. 3:16) Ethu hi ngu dziti gu khethu Jehovha a ngu hi haladza ni gu hi khathaleya, khu kharato vbavbandze nya gu hi diga Jehovha tepo hi dwalago ni tepo hi vbwetago gufa ethu ha gu hongola gwaye hi ya lomba guthaveledwa, guti ni tshivba. Isoso khiso Valérie ni mwama waye va giridego. — Ndzi. 41:3.
Kemba dzithomba nya liphuvbo
Perspicaz-1, paj. 708
Siprofeto
Gu mba tumbega ga Judha Sikariyoti gu di tadzisa siprofeto sa Nungungulu nigu si tivegiside makungo ya Jehovha ni Gyanana gyaye. (Ndz 41:9; 55:12, 13; 109:8; Mth 1:16-20) Ganiolu, kha si thuli gu khiso khu Jehovha a nga gira gu Judha a haguleya mavbanyelo nya mba yadi. Siprofeto si di gu ganeya gu khiso mweyo nya dzipari dzaye yi di hadzi gu mu rengisa, ganiolu kha sa ganeya khu gu kongoma gu khiso khu mani. Vbavbandze nya isoso, na si hambanide ni matshina nya milayo nya Bhibhiliya nari khatshi Nungungulu a di ganeya khu sigiro sa Judha. Litshina nya nayo li ganedwago khu mupostoli kheli: “U nga vbiredzeyi gu handzega mandza muthu nigu u nga hengeyi omu nya sighoho sa vambe, khala nu agide.” (1Tm 5:22; fananisa 3:6.) Jesu vegide gwadi guagani gu khuye 12 vapostoli a va hathidego, a va hathide khu wugengeyi, khu kharato vbedzide wutshigu watshavbo na gu gombeya ga Papayi waye na si tivegise makungo a hungidego. (Lu 6:12-16) Nari khatshi Judha a di tivegisidwe khu gu kongoma nga oyu a nga hadzi ningeya Jesu, si di hadzi gira khatshi sileletelo sa Nungungulu kha sa tiya. Nigu guya khu nayo, si di hadzi gu gira gu khatshi a gu patega avbo nya sighoho si nga girwa khu mumbe muthu.
Khu kharato, somo guagani gu khiso tepo Judha a nga hatwa gu khala mupostoli, monyo waye kha wa nga yeyedza mavbanyelo nyo vivbe a nga ba ari nawo. Uye a di dzumeleya gu khuye monyoni gwaye gu ‘buga khamba moyo nya vhenenu’ wu nga mu gira a hambana ni sileletelo sa Nungungulu, a dzumeya gu gimbidziswa khu Sathane, a pheya guba a bwe a rengisa Jesu. (Heb 12:14, 15; Joh 13:2; Mth 1:24, 25; Jak 1:14, 15 wona JUDHA N.º 4.) Tepo khiyo mavbanyelo yoyo nya gu vivbe ma nga pheya gu dandra, Jesu a wonide monyo wa Judha a ganeya khesi a nga hadzi gu gira. — Joh 13:10, 11.