Mitshamuselo yi gomogo omu nya mabhuku ma khumbugidwego omu nya Gibhukwana nya mitshangano nya thumo ni mavbanyelo
© 2024 Watch Tower Bible and Tract Society of Pennsylvania
2-8 NYA SETEMBRO
DZITHOMBA NYA LITO LA NUNGUNGULU NDZIMO 79–81
Yeyedza lihaladzo khu lina nyo khugege la Jehovha
Mukhedziseyi 02.17 paj. 9, par. 5
Gu dzegiswa — ‘Giningwa nyo vbeleye’ gya Jehovha
5 Gasi gu agisa lina la Nungungulu, hi yede gu haladza ni gu ninga githawo lina laye. Hi nga si gira kharini isoso? Hi nga si yeyedza khu mithumo yathu. Jehovha a gu vbweta gu khuye hi aga mavbanyeloni yathu. (Leri 1 Pedro 1:15, 16.) Isoso sa gu thula gu khiso, hi yede gu khozeya Jehovha basi hi bwe hi landrisa milayo yaye khu monyo wathu watshavbo. Ambari ha gu wugedwa, ha gu gira satshavbo hi si kodzago gasi gu vbanya khu milayo ya Jehovha. Ha gu gira silo nya sadi ha gu wenengedza ga vathu vatshavbo, nigu ha gu ninga wuzundzo Jehovha. (Mat. 5:14-16) Ha gu vbanya khu milayo ya Nungungulu, nigu tepo hi girago isoso ha gu yeyedza gu khethu milayo ya Nungungulu khyadi nigu Sathane muliphi. Ha gu tshuka hi phazama hi ghoha, ethu ha gu dzi laya khu lisine hi bwe hi ema gu gira silo si nyenyezisago lina la Jehovha. — Ndzi. 79:9.
Milowo nya Bhibhiliya yi nga tshamusedwa 3, dzipar. 4-5
Varoma 10:13 — ‘Gu rana lina la Jehovha’
Umo nya Bhibhiliya, gu “rana lina la [Jehovha] Nungungulu,” sa gu tshamuseya silo nya singi gu vbindra guti lina la Nungungulu hi bwe hi li thumisa avbo nya wukhozeyi. (Ndzimo 116:12-14) Isoso sa gu pata gu tumba Jehovha hi bwe hi lomba giphaso gyaye. — Ndzimo 20:7; 99:6.
Lina la Nungungulu, li diri ni lisima avbo ga Jesu. Malito yaye avbo nya nombelo a nga hevbudza Vapostoli vaye a di khuye: “Papayi wathu u gu romo ndzadzini, lina lago li na agiswe.” (Matewu 6:9) Jesu, a yeyedzide gambe gu khuye gu vbwetega gu hiti, hi engisa ni gu haladza Jehovha ha gu ba hi vbweta gu vbanya kala gupindruga. — Johane 17:3, 6, 26.
Kemba dzithomba nya liphuvbo
Perspicaz-2 paj. 145
Josefa
Lina la Josefa li pwade ndruma. Khu kotani nya olu lina la Josefa li nga ba liri ni ndruma, li di gu thumiswa gasi gu thula mahundzo yatshavbo ya Israyeli (Ndz 80:1) mwendro vale va nga ba va khala omu nya mufumo wa norte. (Ndz 78:67; Am 5:6, 15; 6:6) Lina laye gambe lomo omu nya siprofeto si khumbugwago omu nya Bhibhiliya. Omu nya giprofeto gya Ezekhiya, thomba ya Josefa yi na ni sipandre sivili (Eze 47:13), lina nya lidhoropa limwedo li gu khilo “Pfhumu Nungungulu womo vbale,” li na ni lina la Josefa (Eze 48:32, 35), na gu ganedwa khu gupwanana nya vathu va Jehovha, ga gu ganedwa gu pwani Josefa a diri muthangeyi nya gipandre nyo khaguri nya vathu, nigu Judha a diri muthangeyi nya gimbe gipandre. (Eze 37:15-26) Giprofeto gya Obhadhiya gya gu yeyedza gu khigyo ‘ndranga ya Josefa’ yi di hadzi gu patega avba nya gu fuvise ‘ndranga ya Esawu’ (Obd 18), nigu giprofeto gya Zakariya gya gu yeyedza gu khigyo Jehovha a di hadzi vbulugisa ‘ndranga ya Josefa’. (Zak 10:6) Wulangani ga Efrayimi, Josefa a gu wonwa nga mweyo nya mahundzo ya Israyeli ya liphuvboni. — Gut 7:8.
9-15 NYA SETEMBRO
DZITHOMBA NYA LITO LA NUNGUNGULU NDZIMO 82–84
Ninga lisima thumo u gu nawo
Mukhedziseyi nya vathu vatshavbo N.° 6.16 paj. 8, dzipar. 2-3
Esi hi si hevbulago khu sinyoni
Avo va nga ba va vbanya Jerusalema, nya mba kanakana va di gu siti sinyoni si ranwago pwani ndrewulewu (andorinha). Iso si di gu oloveya gu vbaha sisakha saso mudzibambe nya dzinyumba. Simbe sakone si di gu vbaha sisakha saso omu nya Tempele ya Solomoni. Sa gu wonegisa gu khatshi si di gu wona ndrani nya tempele nari wulanga nya wadi gasi fuya gwadi sifondro saso.
Ndzimo 84, yi nga lowa khu gimwegyo nya sanana sa Kora, yi ngu ganeya khu sisakha nya dzindrewulewu tempeleni. Sanana sa Kora, si diri ni lithomo nyo thume tempeleni semana mweyo ndrani nya 6 migima. Ganiolu, mulovi nya ndzimo yeyi a di gu vbweta gu fana ni ndrewulewu, yi nga ba yi si kodza gu vbanya nyumbani ga Jehovha. Uye a di khuye: “Edzi yi mburidego khidzo nyumba yago nya miphaso, uwe [Jehovha] Nungungulu nya Tshivba Yatshavbo! Hefemulo wangu wu ngu dogorela ngudzu gu ya bela umo, . . . Ambari sidzengane si manide wulanga nyumbani gwago, ni ndrewulewu ya gu vbaha gihaga vbafuvbi ni giluvelo gyago, gasi gi sayisa umo sifondro saye.” (Ndzimo 84:1-3) Ina anethu hi nago gudogoreya gogu nyo tshangane gumogo ni vandriyathu gumogo ni sanana sathu? — Ndzimo 26:8, 12.
Mukhedziseyi 15/7/08 dzipaj. 30-31 dzipar. 3-4
Ninga lisima esi u si kodzago gu gira u bwe u tsaka
Gu dandra khu tanga mwendro madwali, si nga hi gira hi tandrega gu gira silo nyo khaguri thumoni ga Jehovha. Abari gu u muvelegi u gu na ni sanana nya sidugwana, adzina u nga pimisa gu khuwe wa gu phasega vbadugwana khu gihevbulo gyago nya muthu enga mwendro mitshangano, kholu sanana sago sa gu gu beya ngudzu tepo ni tshivba. Ganiolu, ina gu vega gupima avbo nya guhegedwe gwago, si nga tshuka si gu himbedzeya gu wona esi u nga si kodzago gu gira?
1 000 myaga hwane, Mulevhi nyo khaguri a ganede silo nya gu kha sa nga ba si kodzega gu a si gira. Uye a diri ni lithomo nyo thume tempeleni dzisemana dzimbili khu mwaga. Khu kharato, uye a di ganeya misuwo a nga ba ari nayo nyo vbanye tempeleni womini waye watshavbo, vbafuvbi ni giluvelo. (Ndzi. 84:1-3) Ginani gi phasidego mwama yoyu gu tsaka khesi a nga ba a si kodza gu gira? Uye a di tiyisega gu khuye ambari a gu khala litshigu limwedo tempeleni, gu diri lithomo nya likhongolo gu vbindra matshigu nya mangi vbavbandze nya tempele. (Ndzi. 84:4, 5, 10) Khu ndziya nyo fane, wulangani nyo vege gupima avbo nya guhegedwe gwathu, hi yede gu ninga lisima esi hi si kodzago gu gira.
Mukhedziseyi 01.20 paj. 17, par. 12
Jehovha a ngu gu ninga lisima
12 Wa gu ba u emisana ni madwali nyo khaguri, tiyisega gu khuwe Jehovha a ngu siti esi si gu dugeleyago. Lomba giphaso gwaye gasi a gu phasa gu manega ni mawonelo nya yadi khu gigaradzo gyago. Khavbovbo, thumisa Bhibhiliya gasi gu mana malito nya guthaveleye aya Jehovha a gu lovedego gasi gu gu phasa. Vega gupima omu nya sipandre si yeyedzago edzi Jehovha a ningago khidzo lisima sithumi saye. Tepo u girago isoso u na wona gu khuwe Jehovha khwadi ga vatshavbo vale va mu thumeyago khu gutumbega.— Ndzi. 84:11.
Kemba dzithomba nya liphuvbo
Perspicaz-2 paj. 350
Sanana si nga fedwa khu vavelegi
Kha nga olu si nga ba si vbevbuga gu divala ava va fedwego khu vavelegi, Jehovha a di thumisa lito ‘sanana si nga fedwa khu vavelegi’ gasi gu tshamuseya edzi a na lamulago khidzo Vaisrayeli va gu si wugeya. Tepo Vaisrayeli va nga ba va vbanya gwadi khu liphuvboni, va di gu sayisa sanana si fedwego khu valegi. Ganiolu, tepo gu nga ba gu tshomborosedwa gululama, sanana si fedwego khu vavelegi si di gu vegedwa vbavbatshi ni gu tshaniswa. (Ndz 82:3; 94:6; Isa 1:17, 23; Jer 7:5-7; 22:3; Eze 22:7; Zak 7:9-11; Mal 3:5) Avo va nga ba va tshanisa sanana si fedwego khu valegi, va di gu thegedwa khu libango. (Dhet 27:19; Isa 10:1, 2) Jehovha a gu dzi tshamuseya kha nga mudzegise waso (Mav 23:10, 11), muphasedzeyi (Ndz 10:14) ni Papayi (Ndz 68:5) nya sanana soso. Uye khuye a na si lamuleyago (Dhet 10:17, 18), a si yeyedza pweya-wusiwana (Ho 14:3), a si ninga gurula (Ndz 146:9) ni gu si vbanyisa.— Jer 49:11.
Gimwegyo nya silo si yeyedzago Mukristo nya lisine, khedzi a pharago khidzo vale va fedwego khu valegi mwendro vale va nga fedwa khu pari yawe nya wugadzi. Jakobe lovede Makristo gu khuye: “Wukhozeyi wu agidego, wu gu mwalo gisolo mahoni ga Nungungulu wathu agu Papayi wathu, khowu: Gu sayisa ava va fedwego khu vavelegi ni dzinoni sigaradzoni sawe ni gu mba dzi nyenyezisa khu gilo nya litigo.” — Jak 1:27.
16-22 NYA SETEMBRO
DZITHOMBA NYA LITO LA NUNGUNGULU NDZIMO 85–87
Nombelo wu ngu hi phasa gu timiseya
Mukhedziseyi 15/5/12 paj. 25, par. 10
Ina hi ngu fana ni mabona ma yeyedzago wudhumo wa Jehovha?
10 Gasi hi si kodza gu yeyedza wudhumo wa Jehovha hi yede gu mba ‘diga gu gombeya.’ (Rom. 12:12) Hi yede gu gombeya ga Jehovha gasi a hi phasa gu mu thumeya khu ndziya yi mu tsakisago. Khu kharato, hi nga mu lomba liphuvbo nyo age, gukhodwa, ni tshivba gasi gu emisana ni silingo. Nigu gambe, hi nga mu lomba makodzelo gasi hi si kodza gu ‘thumisa gwadi lito nya lisine.’ (2 Thim. 2:15; Mat. 6:13; Luka 11:13; 17:5) Kha nga gyanana gi tumbago papayi wagyo, anethu ha gu tumba Papayi wathu wa ndzadzini, Jehovha. Ha gu mu lomba giphaso gasi gu hi mu thumeya khu ndziya nya yadi, hi nga tiyisega gu khethu uye a na hi ninga. Gima kha hi yeli gu pimisa gu khethu ha mu garadza! Wulangani nya isoso, hongoleni hi gombeya gasi gu mu dhumisa, gu mu bonga ni gu lomba giphaso ha gu ba hi emisana ni sigaradzo, gasi hi zundza lina laye. — Ndzi. 86:12; Jak. 1:5-7.
Mukhedziseyi 05.23 paj. 13, dzipar. 17-18
Jehovha a gu hlamula kharini milombelo yathu?
17 Leri Ndzimo 86:6, 7. Muembi nya dzindzimo Dhavhidhe a di gu tiyisega gu khuye Jehovha a ngu engiseya ni gu hlamula milombelo yaye. Anuwe u nga manega ni gutumba gogo. Siyeyedzo hi si wonidego avbo nya ndrima yeyi si ngu hi tiyisegisa gu khiso Jehovha a nga hi ninga guti ni tshivba hi yi vbwetago gasi gu timiseya sigaradzo. Uye a ngu thumisa vandriyathu ni vale va gu mba mu khozeya gasi gu hi phasa khu ndziya nyo khaguri.
18 Ambari olu, Jehovha dzimbe dzitepo a si hlamuligo milombelo yathu khu ndziya hi nga mba hi yi vireya, ethu hi ngu dziti gu khethu uye a na hi hlamula. Uye a na hi ninga esi hi si vbwetago khu tepo yakone. Simama gu gombeya na wu tiyisega gu khuwe Jehovha a na gu khathaleya olu ni gu a hi khathaleya mafuni nya maphya matago. — Ndzi. 145:16.
Kemba dzithomba nya liphuvbo
Mukhedziseyi 06.20 paj. 13, dzipar. 17, 18
“Nyi ninge monyo moyo gasi nyi kodza gu ninga githawo lina lago”
17 Gu manega ni myonyo mivili kha si phasi. Nga dundrugeya khu tsawa nyo khaguri nya vahagani wu gu mba pwana. Vambe va gu vbweta gu zundzwa vonga, vambe kha va dzini gu landreya milayo nya hagano wowo nigu vambe kha va ningi githawo trenadhori wawe. Si ngu garadza gu tsawa nya nga wowo wu pala. Ganiolu, tsawa owu vahagani vakone va pwanago si ngu vbevbuga gu dugeleya. Si nga kodzega gu monyo wago wu fana ni tsawa owu vahagani vakone va pwanago abari gu esi u si pimisago, esi u si vbwetago ni edzi u dzipwago khidzo si ngu pwanana ni gu thumeya Jehovha. Dundruga gu khuwe Sathane a ngu vbweta ngudzu gu kabanisa monyo wago. O vbweta gu khuye mapimo yago, gudogoreya gwago ni edzi u dzipwago khidzo si dwanisana ni milayo ya Jehovha. Ganiolu uwe wo vbweta gu khuwe monyo wago wu khala moyo gasi u si kodza gu thumeya Jehovha. (Mat. 22:36-38) Gima u nga dzumeleyi gu khuwe Sathane a kabanisa monyo wago!
18 Gombeya u lomba esi ga Jehovha nga Dhavhidhe: Nyi ninge monyo moyo gasi nyi kodza gu ninga githawo lina lago. Dzi garadzeye gu vbanya guya khesi u si gombeyago. Tshigu ni tshigu, ga satshavbo u girago gani sikhongolo gani sidugwana si yede gu yeyedza gu khiso u ngu ninga githawo nya gikhongolo lina li agidego la Jehovha. Wo gira isoso, u na ninga wuzundzo lina leli kha nga Fakazi ya Jehovha. (Mav. 27:11) Nigu hatshavbo hi na si kodza gu ganeya esi si ganedwego khu muprofeti Mikeya, a nga khuye: “Ethu hi na landra lina la [Jehovha], khavbo gu si vbeligo.” — Mik. 4:5.
23-29 NYA SETEMBRO
DZITHOMBA NYA LITO LA NUNGUNGULU NDZIMO 88–89
Mufumu wa Jehovha khwadi
Mukhedziseyi 06.17 paj. 28, par. 5
Simama gu seketeya Mufumo wa Jehovha!
5 Wona gimbe gighelo gi girago gu Jehovha a ninganedwa khu gu fuma mafu yatshavbo. Uye a gu thumisa wuthangeyi a gu nawo khu ndziya nyo lulame. Uye a di khuye: “Eni kheni [Jehovha] nyi girago wuhindzi, ni gu lamula khu gululama omu mafuni; kholu khiso si nyi nengedzisago.” (Jer. 9:24) Jehovha kha thumisi milayo yi giridwego khu vathu nya mba vbeleya gasi gu hunga esi nya sadi mwendro esi si lulamidego. Jehovha muthu nyo lulame ga vatshavbo, nigu khu kotani nya isoso a vegide milayo gasi yi landriswa khu vathu. “Wufumu [waye] wu tiyisidwe khu gululama ni lisine,” khu kharato hi nga tumba gu khethu milayo, makungo yaye ni matshina yaye nya milayo yi lulamide. (Ndzi. 89:14; 119:128) Ambari olu a nga wugeya Mufumo wa Jehovha, Sathane kha si kodzi gu gira litigo li lulamidego.
Mukhedziseyi 06.17 paj. 29, dzipar. 10-11
Simama gu seketeya Mufumo wa Jehovha!
10 Ndziya a fumago khiyo Jehovha kha yi garadzisani. Uye a ngu hi ninga gutshulega nigu a gu vbweta gu khuye hi tsaka. (2 Kor. 3:17) Dhavhidhe a ganede gu khuye: “Wudhumo ni wugulu [wa Nungungulu], somo mbeli tshivba ni gunengela, si tade wulanga waye nya miphaso.” (1 Dzik. 16:7, 27) Muembi nya dzindzimo Etani, ganede gu khuye: “Va kategide vathu va gu khozelago khu lisine gu wombela mikulungwane, va vbanyago mbeli ga Pfhumu Nungungulu, gungangamelani nya khovbe yaye. Matshigu yatshavbo va gu nengela khu kotani yago, va nengela khu gululama gwago.” — Ndzi. 89:15, 16.
11 Ha gu dundrugeya tepo yatshavbo khu wuwadi wa Jehovha, hi na engedzeya gu tiyisega gu khethu Mufumo waye khwadi. Hi na dzipwa nga edzi muembi nya dzindzimo a dzipwidego khidzo tepo a nga khuye: “Gu khala litshigu limwedo basi nyumbani gwago, gwadi guvbindra gu khala likhumi mazana matshigu vbavbandze.” (Ndzi. 84:10) Isoso si ngu pwala, kholu ga muembi nya dzindzimo gi diri mwalo gilo nya lisima guvbindra gu thumeya Jehovha. Kha nga olu Jehovha a gu Muvangi a gu na ni lihaladzo, a ngu siti esi hi si vbwetago gasi hi tsaka khu lisine, nigu a ngu hi ninga silo nya singi ngudzu guvbindra esi hi si vbwetago. Satshavbo esi Jehovha a hi lombago gu gira khyadi gwathu, nigu kha nga handro wakone hi ngu tsaka, ambari sa gu ba si lomba gu hi dzi hiya silo nyo khaguri mwendro gu dzi garadza. — Leri Isaya 48:17.
Mukhedziseyi 15/10/14 paj. 10, par. 14
Manega ni gukhodwa nyo tiye khu Mufumo
14 Wona esi Jehovha a tumbisidego Dhavhidhe, Pfhumu ya Israyeli wa gale khu gu thumisa gidzumeledzwano a giridego ni Dhavhidhe. (Leri 2 Samuweli 7:12, 16.) Jehovha a di gira gidzumeledzwano ni Dhavhidhe tepo khiyo a nga ba ari Pfhumu Jerusalema, avbo a nga mu tumbisa gu khuye Mesiya a di hadzi gu khala gitugulwana gyaye. (Luka 1:30-33) Khu kharato, Jehovha a di vega vbingano nya ava va nga hadzi gu khala situgulwana sa Dhavhidhe a bwe a ganeya gu khuye gihodza thomba gya Dhavhidhe, gi di hadzi gu ‘lumbwa’ khu gu khala Pfhumu nya Mufumo wa Mesiya. (Ezek. 21:25-27) Khu gu thumisa Jesu, mufumo wa Dhavhidhe wu na simama “kala gupindruga.” Khu lisine, gitugulwana gya Dhavhidhe gi na “vbanya kala gupindruga, gikhalo nya wufumu wa[gyo] gi na simama . . . kha nga lidambo.” (Ndzi. 89:34-37) Ina, mufumo wa Mesiya kha wu na nga rengeledwa nigu sigiro sawo si na simama kala gupindruga!
Kemba dzithomba nya liphuvbo
Achegue-se a Jeová paj. 281, par. 4
“Khuwe wenga u tumbegidego”
4 “Gutumbega”, kha nga gu khumbugidwego omu nya Milowo nya Gihebheru, wuwadi wu yeyedzwago gilo nyo khaguri kala gutadzisega makungo nya gilo gyogyo. Gutumbega gogo ga gu pata silo nya singi. Khu giyeyedzo, muthu nyo khaguri a nga tumbega khu gu ba a dziti gu khuye a yede gu gira isoso. Ganiolu, gutumbega gu khumbugwago avba, gwa gu kutswa khu lihaladzo. Nigu gambe lito “gutumbega,” li nga thumiswa ga silo si gu mba vbanya. Khu giyeyedzo, muembi nya dzindzimo a di rana ngima gu khuye i “fakazi nya gutumbege vbatshani damboni!” kholu wu dugago tepo yatshavbo nigu khu tepo yakone. (Ndzimo 89:37) Ganiolu, ngima kha wu si kodzi gu yeyedza gutumbega gu tshamusedwago avba. Khu ginani? Kholu gutumbega gu thudwago avba, gwa gu gimbeleyana ni lihaladzo ni mambe makhalelo ma gu mba yeyedzwa khu silo si gu mba vbanya.
30 NYA SETEMBRO–6 NYA OUTUBRO
DZITHOMBA NYA LITO LA NUNGUNGULU NDZIMO 90–91
Gasi gu vbanya matshigu nyo laphe, tumba Jehovha
Mukhedziseyi nya vathu vatshavbo 19 N.° 3 paj. 5, dzipar. 3-5
Gu vbwetedzeya womi nyo laphe
Vasiyentista nya vangi va gu ganeya gu khavo mirendre yi phasago gu mba gumba, kha yi si kodzi gu gira muthu a vbanya myaga nya yingi guvbindra eyi a vbanyago olu. Lisine gu, guvbanya gu engedzede vbadugwana gukhugeya khu século 19. Ganiolu, isoso si kodzegide khu kotani nya gu dzi agise nya gwadi, gu gira silo gasi gu potsa gu thapedwa khu madwali, dzikininu ni dzivhasina. Vadhokodheya nyo khaguri va gu khodwa gu khavo myaga nya womi nya vathu wu vbohide mahegiso gwayo.
3 500 myaga hwane, Mosi lovide omu nya Bhibhiliya gu khuye: “Matshigu nya guvbanye gwathu ma gu dingana livbandre na mavili magumi (70), avo va gu ni tshivba va gu vbohisa livbandre na mararu magumi (80), aholu myaga yoyo yi tade khu sigaradzo ni gu tshaniseka, ya gu vbindra khu guvbiredza, ethu hi mwalalega.” (Ndzimo 90:10) Ambari olu vathu va simamago gu gira silo nya singi gasi gu simama gu vbanya, womi wu nga gu simama wa wumowo ni owu wa matshigoni ya Mosi.
Ganiolu, sirengo nyo khaguri nya nga ouriço-do-mar vermelho ni marisco da espécie Arctica islandica si nga vbanya 200 myaga ni gu vbindra. Nigu misimbo nyo khaguri nya nga sequoia-gigante yi nga vbanya dzimiliyoni nya myaga. Tepo hi fananisago womi wathu ni womi nya sivangwa sesi, hi nga dzi wudzisa gu khethu: ‘Ina womi wathu wa gu hegisa khu 70 mwendro 80 myaga basi?’
Mukhedziseyi nya vathu vatshavbo 19 N.° 1 paj. 5 ni kwadru
Khu mani Nungungulu?
Egi giwudziso gi girwago khu vathu nya vangi. Adzina saye u dzi giride giwudziso gegi. Nigu khu lisine, hi ngu dzina guti gu khethu: Abari gu Nungungulu khuye a nga vanga satshavbo mafuni, uye ke a di vandwa khu mani?
Vasiyentista va ngu dzumeya gu khavo satshavbo si gu romo mafuni si na ni maphelo. Guya khu mawonelo yoyo, livhesi nyo pheye nya Bhibhiliya yari khiyo: “Guhegulani Nungungulu a di vanga ndzadzi ni mafu.”— Genesi 1:1.
Mafu ni ndzadzi kha sa dzi vanga sabude; kha sa dzegeya gu manega basi. Omu gi gu mwalo gilo kha si kodzegi gu gi manega gilo. Gasi gu manega ndzadzi ni mafu, gu di yede gu manega muthu nyo khaguri a gu mba gira gipandre nya mafu ni ndzadzi gasi gu si vanga. Jehovha khuye muthu yoyo. Uye a na ni givili nya liphuvbo nigu kha vbanyi mafuni ni ndzadzini hi kodzago gu gu wona. Khu Jehovha Nungungulu, a nga vanga mafu ni ndzadzi khu tshivba ni wuti waye nya mba hegedwa. — Johane 4:24.
Bhibhiliya ya gu ganeya esi khu Nungungulu: “Khu gale, sigomo na si ngari mwalo, na wu si gu vangi litigo ni mafu, uwe u Nungungulu kala gupindruga!” (Ndzimo 90:2) Khu kharato, gukhugeya gale Nungungulu a di gu romo. Somo guagani gu khiso ‘gupheyani’ Nungungulu a di vanga satshavbo hi si wonago. — Gutuledwa 4:11.
Mukhedziseyi 06.22 paj. 18, dzipar. 16-17
Lihaladzo li nga hi phasa kharini gu pala hwanga?
16 Sathane a ngu dziti gu khuye hi ngu ninga lisima womi. Uye wari khuye ethu hi na gira ni gevbini ambari sa gu lomba gu diga wupari wathu ni Jehovha khu gu vbweta gu sayisa womi wathu. (Joba 2:4, 5) Sathane vivbedwe khu monyo, nigu kha nga olu a gu na ni “tshivba nya gu songe,” a gu zama gu londrola gu thava nya gufa hi gu nago gasi gu hi gira hi diga Jehovha. (Hebh. 2:14, 15) Ga siemo nyo khaguri, dzimbe dzitepo vathu va thangedwago khu Sathane vo ganeya gu khavo va na hi songa ha gu mba tsukula esi hi si khodwago. Ga simbe siemo ha gu ba hi dwala, Sathane a nga londrola lithomo lolo gasi gu hi gira hi ndraga milayo ya Nungungulu. Gimbe gambe khu gu vadhogodheya mwendro vambe ndrangani gwathu va sirigo Dzifakazi va nga hi kutsedzeya gu thedwa novba a gu silo si fanyago nayo wa Nungungulu. Mwendro muthu nyo khaguri a nga zama gu hi kutsedzeya gu dzumeya mambe mathumelo nya madwali ma gu mba gimbileyana ni matshina nya milayo nya Bhibhiliya.
17 Ambari hi si dzinigo gufa, ethu hi ngu dziti gu khethu Jehovha kha na nga diga gu hi haladza khu gu ba hi fude. (Leri Varoma 8:37-39.) Tepo dzipari dza Jehovha dzi fago, uye a ngo simama gu dzi dundruga nga khatshi dzi ngo vbanya. (Luka 20:37, 38) Uye a ngu dzina gu dzi wusa dzi vbanya gambe. (Joba 14:15) Jehovha livbide tengo nyo dhure khethu “gas . . . hi mane guvbanya nya gupindruge.” (Joh. 3:16) Ethu hi ngu dziti gu khethu Jehovha a ngu hi haladza ni gu hi khathaleya, khu kharato vbavbandze nya gu hi diga Jehovha tepo hi dwalago ni tepo hi vbwetago gufa ethu ha gu hongola gwaye hi ya lomba guthaveledwa, guti ni tshivba. Isoso khiso Valérie ni mwama waye va giridego.— Ndzi. 41:3.
Kemba dzithomba nya liphuvbo
Mukhedziseyi nya vathu vatshavbo 17 N.° 5, paj. 5
Ina u na ni ngilozi yi gu vhikeyago?
Bhibhiliya kha hi hevbudzi gu khiyo muthu ni muthu a na ni ngilozi yi mu vhikeyago. Na ngo romo mafuni, Jesu a di khuye: “Mu nga tshuki mu kanyisa moyo nya ava nya vadugwana, kholu nyi ngu mi embeyani, kheni: Dzingilozi dzawe dzi gomogo ndzadzini, tepo yatshavbo dzi ngu wonana ni Papayi wangu a gomogo ndzadzini.” (Matewu 18:10) Ginani egi Jesu a nga ba a vbweta gu ganeya? Uye a di gu vbweta gu ganeya gu khuye dzingilozi dzi ngu dzi garadza gasi gu phasa vathu, ganiolu khasi thuli gu khiso moyo ni moyo a na ni ngilozi yi mu vhikeyago. Khu kharato, Makristo nya lisine kha ma vegi womi wawe mhangoni, na ma gu pimisa gu khayo dzingilozi dza Nungungulu dzi na ma vhikeya.
Ina so thula gu khiso dzingilozi kha dzi phasi vathu? Ahihi. (Ndzimo 91:11) Vathu nyo khaguri va ngu tiyisega gu khavo Nungungulu thumiside dzingilozi gasi gu va phasa ni gu va ninga sileletelo. Kenneth, a khumbugidwego gupheyani nya ndrima yeyi a dzipwide khu ndziya yayimweyo. Si nga gira nari gu a gu ganeya lisine. Dzifakazi dza Jehovha dzitepo nya dzingi, dzi ngu tugula tepo dzi phaswago khu dzingilozi thumoni gwaye nyo tshumayele. Ganiolu, kha nga olu hi gu mba dzi kodza gu dzi wona, kha hi dziti gu khethu dza gu thumiswa kharini khu Jehovha gasi gu phasa vathu. Khu kharato, kha sa vivba gu bonga Jehovha khu gevbini giphaso a hi ningago.— Vakolosi 3:15; Jakobe 1:17, 18.
7-13 NYA OUTUBRO
DZITHOMBA NYA LITO LA NUNGUNGULU NDZIMO 92–95
Gu thumeya Jehovha, ndziya nya yadi gasi gu vbanya khiyo!
Mukhedziseyi 04.18 paj. 26, par. 5
Vaphya, ina mu ngu vega gupima gwanu avba nya misuwo nya liphuvbo?
5 Gighelo nya lisima ga satshavbo nyo dzi vegeye misuwo nya liphuvbo gu bonga Jehovha khu lihaladzo laye ni satshavbo esi a hi gireyago. Mulovi moyo nya Dzindzimo a di khuye: “Gwadi gu gu bongwa [‘Jehovha’, NM] . . . Kholu, sigiro sago [‘Jehovha’, NM] si ngu tsakisa; Nyi na womba kulungwane nyi tsakela thumo nya mandza yago.” (Ndzimo 92:1, 4) Nga dundrugeya khu satshavbo esi Jehovha a gu ningidego: womi wago, gukhodwa gwago, Bhibhiliya, libandla, ni gutumba nya gu vbanye kala gupindruga Paradhesini. Wo dzi vegeya misuwo nya liphuvbo, wo yeyedza Jehovha gu khuwe u ngu mu bonga khu satshavbo silo soso nigu isoso si na engedzeya wupari wago naye.
Mukhedziseyi 11.18 paj. 23, par. 8
Khu mani a vbahago mapimo yago?
8 Kha nga muvelegi nya wadi, Jehovha o vbweta gu khuye sanana saye si manega ni womi nyo tsakise ngudzu khavba si kodzegago khavbo. (Isaya 48:17, 18) Khu kharato a gu hi hevbudza matshina nya milayo maningano ni mavbanyelo ni edzi hi yedego gu phara khidzo vambe. A gu hi kutsa gu hevbula gu wona silo khu ndziya a si wonago khiyo hi bwe hi vbanya khu guya khu milayo yaye. Isoso kha si thuli gu khiso a gu hi himbedzeya gu manega ni mawonelo yathu. Wulangani nya isoso, so hi ninga guti si bwe si hi phasa gu hunga silo khu wugengeyi. (Ndzimo 92:5; Mavingu 2:1-5; Isaya 55:9) Hi na simama gu manega ni mawonelo yathu ganiolu hi na dzi hatheya silo, si na hi reseyago gutsaka. (Ndzimo 1:2, 3) Hi na phasega khu dzindziya nya dzingi ha gu pimisa nga Jehovha!
Mukhedziseyi 01.20 paj. 19, par. 18
Jehovha a ngu gu ninga lisima
18 Tepo hi yago hi gumba, hi nga tiyisega gu khethu Jehovha a ngari ni thumo nya gu hi ninge. (Ndzi. 92:12-15) Jesu hevbudzide gu khuye ambari abari gu silo hi si kodzago gu gira sa gu wonega khatshi khandri sa lisima ngudzu gwathu, Jehovha a ngu ninga lisima ni gevbini hi girago thumoni waye. (Luka 21:2-4) Khu kharato, vega gupima avba nya esi u si kodzago gu gira. Khu giyeyedzo, u nga ganeya khu Jehovha ni vambe, u gombeleya vandriyathu u bwe u kutsa vambe gasi va simama na va tumbegide. Jehovha a gu gu wona na wu thuma naye nasiri khesi u si kodzago gu gira ganiolu khu kotani nya gudziemiseya gwago gu mu engisa. — 1 Kor. 3:5-9.
Kemba dzithomba nya liphuvbo
Achegue-se a Jeová paj. 176, par. 18
‘Nga wona edzi wu gu wungi khidzo wuti ni wugengeyi wa Nungungulu’
18 Wona edzi mupostoli Pawulo a tshamusedego khidzo wuti wa Jehovha, uye a di khuye: “Nga wona edzi dzi gu dzingi khidzo dzithomba, guti ni wugengeyi wa Nungungulu. Gulamula ga Nungungulu ni dzindziya dzaye mwalo a kodzago gu si tshamuseya.” (Varoma 11:33) Tepo Pawulo a nga pheya livhesi khu gu ganeya gu khuye “nga wona” si di gu tshamuseya edzi a nga ba a dzipwa khidzo. Lito nya Gigreki li gu khilo “dzingi” mwendro gueta la gu gimbileyana ni lito li gu khilo “abismo” (liphala nya likhongolo ngudzu.) Khu kharato, malito yaye ma ngu hi phasa gu dundrugeya khesi a nga ba a vbweta gu ganeya. Tepo hi dundrugeyago khu wuti wa Jehovha, so gira gu khatshi ha gu khedza liphala nyo khaguri nya likhongolo hi gu mba dziti avbo li vbeleyago avbo. (Ndzimo 92:5) Ina kha hi dzi nogise khu gu dundrugeya khu isoso?
14-20 NYA OUTUBRO
DZITHOMBA NYA LITO LA NUNGUNGULU NDZIMO 96–99
“Huweleya mahungu nya yadi”
Mukhedziseyi 1/3/11 paj. 6, dzipar. 1-2
Ginani mahungu nya yadi?
MAKRISTO ma yede gu tshumayela “mahungu nya yadi nya Mufumo” khu gu ma bhuleya vambe, ma va tshamuseya gu khayo womo Mufumo wu na fumago mafu yatshavbo khu gululama mindru wa tshigu. Ganiolu, lito li gu khilo “mahungu nya yadi” li ngu thumiswa khu dzindziya nyo hambane omu nya Bhibhiliya. Khu giyeyedzo, iyo yi ngu ganeya gu khiyo “mahungu nya yadi nya gu vbanyiswe” (Ndzimo 96:2, Tradução do Novo Mundo); “mahungu nya yadi ya Nungungulu,” (Varoma 15:16); ni “mahungu nya yadi guya khu Jesu Kristo.” — Marko 1:1.
Khu gu piya, mahungu nya yadi ma gu pata satshavbo esi Jesu a ganedego nigu si lovidwego khu vapizane vaye. Na si hongoli ndzadzini, Jesu a embede valandreyi vaye gu khuye: “Gimbiyani mu ya gira vapizane vathu nya mayigo yatshavbo, mu va bhabhatisa khu lina la Papayi, ni la Gyanana, ni la liphuvbo nya guage, mu va hevbudza gu landrisa satshavbo nyi mi hevbudzidego.” (Matewu 28:19, 20) Khu kharato, thumo ma gu nawo Makristo nya lisine kha wu pati basi gu bhuleya vambe khu Mufumo, ganiolu ma yede gu dzi garadza gasi gu gira vapizane.
Mukhedziseyi 1/9/12 paj. 16, par. 1
Ginani gi na giregago ga Litshigu nyo lamule?
Kha nga yi yeyedzago fotu khu nyamudye, vathu nya vangi va gu pimisa gu khavo Litshigu nya gulamule, maphuvbo nya mangi ma na yiswa ga Nungungulu ma ya lamudwa guya khu mithumo yawe; vambe va na hakha tshatshazelo nyo ya vbanye ndzadzini ni gu vambe va naya tshaniswa omu nya liphala nya nilo. Ganiolu, Bhibhiliya ya gu yeyedza gu khiyo makungo nya Litshigu nyo lamule, gu tshudzisa vathu ga ndziya nya mba lulama. (Ndzimo 96:13) Nungungulu hathide Jesu gasi gu khala Mulamuli a na wusedzago gululama mafuni. — Leri Isaya 11:1-5; Mithumo 17:31.
Mukhedziseyi 15/9/12 paj. 12, dzipar. 18-19
Gurula ndrani nya 1000 myaga — Ni kala gupindruga!
18 Wupari nya wadi, wu tsolopetedwe tepo khiyo vathu va nga kutsedzedwa khu Sathane gu wugeya Mufumo wa Jehovha. Gukhugeya khu 1914, Mufumo wa Mesiya wu phede gu gira gilogyo gasi gu wusedza gupwanana ni wupari wowo. (Efes. 1:9, 10) Ndrani nya Mufumo nya 1000 myaga, gu na girega silo nyo hlamadzise “si gu mba wonega.” Ganiolu, Mufumo wowu wu na ‘vbeya.’ Ginani gi na giregago khu gu landreya? Ambari olu a nga ningwa “wufumu watshavbo ndzadzini ni mafuni,” Jesu khandri magundrele. Uye kha na nga zama gu dzega wulanga wa Jehovha. Khu gu dzi nogisa, ‘a na ningeya mufumo mandzani ga Papayi waye.’ Uye a na thumisa wuthangeyi a gu nawo “gasi gu dhumisa Nungungulu.”— Mat. 28:18; Filp. 2:9-11.
19 Ga tepo yoyo, vatshavbo va seketeyago Mufumo wowo va na ba va vbelede. Avo va na landra giyeyedzo gya Jesu, nigu khu gu dzi nogisa ni gu dzi emiseya, va na ninga githawo Wufumu wa Jehovha. Avo va na mana lithomo nya gu yeyedze gudogoreya va gu nago nyo gire isoso khu gu si kodza gu vbindra avba nya gulingwe nyo hegise. (Gutu. 20:7-10) Hwane nya isoso, vathu vatshavbo nyo vivbe ni dzingilozi dzi wugeyago Nungungulu, dzi na fuviswa kala gupindruga. Khu lisine, yi na ba yiri tepo nyo tsakise. Ndranga ya mafuni gwatshavbo, hi na tsaka khu gu dhumisa Jehovha, oyu a na khalago “silo satshavbo ga vatshavbo.” — Leri Ndzimo 99:1-3.
Kemba dzithomba nya liphuvbo
Perspicaz-1 paj. 427
Ndzimo
Lito li gu khilo “ndzimo nya yiphya” kha li manegi basi omu nya libhuku la dzindzimo, ganiolu li ngu manega omu nya libhuku la Isaya ni Johane. (Ndz 33:3; 40:3; 96:1; 98:1; 144:9; 149:1; Isa 42:10; Gut 5:9; 14:3) Wugevesisi nya mongo nya lito li gu khilo “ndzimo nya yiphya” wa gu yeyedza gu khuwo ndzimo yeyi ya gu embwa khu kotani nya gu dandre nya guphya gu giregago omu nya Mufumo wa Jehovha. Kha nga si ganedwego omu ga Ndzimo 96:10: “Pfhumu Nungungulu a ngu fuma.” Gu dandra nya guphya gu giregago omu nya Mufumo wa Jehovha, ndzadzini ni mafuni, so wonega gu khatshi gwa gu ganedwa khu “ndzimo nya yiphya.” — Ndz 96:11-13; 98:9; Isa 42:10, 13.
21-27 NYA OUTUBRO
DZITHOMBA NYA LITO LA NUNGUNGULU NDZIMO 100–102
Yeyedza gubonga khu lihaladzo nyo tumbege la Jehovha
Mukhedziseyi 03.23 paj. 12, dzipar. 18-19
U nga dzi dongiseya kharini gasi u bhabhatiswa?
18 Lihaladzo lago khu Jehovha likhalelo nya lisima u gu nalo. (Leri Mavingu 3:3-6.) Lihaladzo nyo tiye khu Nungungulu khilo li na gu phasago gu emisana ni sigaradzo u na tshanganago naso. Bhibhiliya tepo yatshavbo yi ngu ganeya khu lihaladzo eli Jehovha a gu nalo khu sithumi saye. Lihaladzo lolo la gu hi tiyisegisa gu khilo, uye gima kha na nga diga sithumi saye nya gutumbege mwendro gu ema gu si haladza. (Ndzi. 100:5) Uwe u giridwe khu mufananiso wa Nungungulu. (Gen. 1:26) Ahati uwe, u nga yeyedza kharini lihaladzo?
19 Yeyedza gubonga. (1 Tes. 5:18) Tshigu ni tshigu dzi wudzise khuwe: ‘Jehovha a nyi yeyedzide kharini lihaladzo muhuno?’ Khu kharato, bonga Jehovha umo nya milombelo yago khesi a gu giredego. Esi Jehovha a gu gireyago a gu gu gireya kholu a gu haladzago gufana ni esi mupostoli Pawulo a si tugudego. (Leri Vagalatiya 2:20.) Dzi wudzise khuwe: ‘Ina nyi ngu dzina gu mu yeyedza kheni nyi ngu mu haladza?’ Lihaladzo lago khu Jehovha li na gu phasa gu pala silingo ni gu timiseya sigaradzo. Ilo li na gu kutsa gu thumeya Jehovha tshigu ni tshigu u bwe u yeyedza khuwe u ngu mu haladza ngudzu.
Mukhedziseyi 02.23 paj. 17, par. 10
Dzi wonele ga sigiro sa mafuni momu!
10 Dzomo dzimhango nyo khaguri hi yedego gu dzi potsa, nya nga gu hagana khu gu namorari nya mba na gighelo nyo pwale, gu seya ngudzu, limidzu, gu ganeya silo si khunguvanyisago vambe, gu sixitiri dzifilimi dzi yeyedzago maghilivindra, dzipornografia si simbi nya nga esi. (Ndzi. 101:3) Nala wathu Dhiyabhulosi, tepo yatshavbo a gu vbwetedzeya dzindziya nya gu vege wupari wathu ni Jehovha mhangoni. (1 Ped. 5:8) Ha gu mba dzi woneya, Sathane a nga yala mapimoni ni monyoni gwathu dzi nyingi nya lidiwo, gu mba tumbega, wugundreli, gu dzikhusedza ni giviti. (Gal. 5:19-21) Gupheyani, ethu adzina hi nga pimisa gu khethu gu dzipwa khu ndziya yeyi khandri mhango. Ganiolu, ha gu mba gira gilogyo gasi gu potsa makhalelo yaya, ayo ma na dandra vbadugwana–vbadugwana monyoni gwathu gu fana ni madwali ma gu mba khataledwa ni gu isoso si di hadzi gu hi reseya sigaradzo nya singi. — Jak. 1:14, 15.
Mukhedziseyi 15/7/11 paj. 16, dzipar. 7-8
Ina u na vegedza sigengedzo sa Jehovha?
7 Ginani gi pategago avbo nya gu potse vahevbudzi nya malipha? Ethu kha hi va hakhi magaya gwathu ambari gu va losa. Kha hi leri mabhuku yawe, kha hi sixitiri mahungu va ganeyago omu nya televhisori, kha hi beyi omu nya dzisayiti dzawe omu nya interneti ambari kamo gu va loveya gilogyo. Khu ginani hi hungidego gu gira silo kharato? Khu kotani nya lihaladzo. Ethu hi ngu haladza “Nungungulu nya lisine,” nigu isoso si ngu hi gira hi si ningi lisima sihevbudzo nya malipha si hambanidego ni lisine nya Lito la Nungungulu. (Ndzi. 31:5; Joh. 17:17) Gu diga isoso, hi ngu haladza hengeledzano ya Jehovha, a gu iyo yi hi hevbudzago silo nyo hlamadzise — nya nga lina la Nungungulu, tshamuselo nya lina laye, makungo yaye khu mafu, avbo va hongolago ava va fudego ni gutumba nya guwuswe ga ava va fudego. Ina u ngu dundruga edzi u nga dzipwa khidzo tepo u nga hevbula silo sesi mwendro limbe lisine nya Bhibhiliya? Ganiolu, khu ginani u na dzumeleyago gu kutsedzedwa khu muthu a zamago gu tshundzisa hengeledzano, a gu iyo yi nga gu phasa gu hevbula lisine nya Bhibhiliya?— Johane 6:66-69.
8 Vahevbudzi nya malipha ambari va gu hi embeya ginani, ethu gima kha hi na nga va landra! Kholu ha gu va landra, va na hi ndreyisa hi bwe hi khunguvanyega. Wulangani nya isoso, hi yede gu dzi emiseya gu simama gutumbega ga Jehovha ni hengeledzano yaye yi hi phasago gukhugeya gale gu songa lidora lathu khu mati nyo dzidziye, a gu lisine li gomogo omu nya Lito la Nungungulu.— Isa. 55:1-3; Mat. 24:45-47.
Kemba dzithomba nya liphuvbo
Mukhedziseyi 15/3/14 paj. 16, par. 20
U nga manega kharini ni mawonelo nya yadi?
20 Muembi nya dzindzimo a di ngari ni lithomo nya gu dhumise Jehovha. (Leri Ndzimo 102:19-21.) Guya khu Ndzimo 102, ambari vale va gomogo lisineni adzina va ngu dzi garadza gasi va si vegi gupima avba nya sigaradzo sawe. Muembi nya dzindzimo a di gu dzipwa nga “ginyoni nyi tshidwego ni wutundzu, vbatshani nya nyumba,” si gira gu khatshi a di gu bangaladzwa basi khu sigaradzo saye. (Ndzi. 102:7) Dzimbe dzitepo wa gu dzipwa kharato, tuleya monyo wago Jehovha kha nga edzi a giridego khidzo muembi nya dzindzimo. Milombelo u girago, yi nga gu phasa tepo khiyo u dwanago ni mapimo nya mba yadi. Jehovha a gu tumbisa gu engisa “nombelo nya khulungu [nigu] kha na nga nyenya nombelo waye.” (Ndzi. 102:17) Tumba gitumbiso gyogyo.
28 NYA OUTUBRO–3 NYA NOVEMBRO
DZITHOMBA NYA LITO LA NUNGUNGULU NDZIMO 103–104
Uye a ngu dundruga gu khuye ‘hi kudzudzwani’
Mukhedziseyi 07.23 paj. 21, par. 5
Khala muthu nya gu dinganiseye nga Jehovha
5 Gudzinogisa ni pweya-wusiwana wa Jehovha wu ngu mu kutsa gu dinganiseya. Khu giyeyedzo, Jehovha yeyedzide khuye a di gu dzi nogisa tepo a nga vbweta gu fuvisa vathu nya gu vivbedwe khu monyo Sodhoma. Khu gu thumisa dzingilozi, Jehovha a di embeya Loti gasi a ya sihala sigomoni, ganiolu Loti a di bomba gu hongola eyi. Khu kharato, a di lomba gu thaveya Zowari gumogo ni ndranga yaye. Zowari gu diri gidhoropana egi Jehovha a nga vbweta gu gi tshungunula. Jehovha na gurumedzide Loti gu gira esi a nga mu embeya, ganiolu wulangani nya isoso Jehovha a di dzumeleya Loti gu hongola Zowari a bwe a si tshungunuli gidhoropana gile. (Gen. 19:18-22) Hwane nya myaga nyo khaguri, Jehovha yeyedzide pweya-wusiwana vathu va Ninivha. Uye a di rumeya muprofeti Jona gasi gu ya embeya vathu va Ninivha khuye va na fuviswa gumogo ni lidhoropa lawe. Ganiolu, tepo Vaninivha va nga dzi laya, Jehovha a di va pweya gisiro a bwe a si tshungunuli lidhoropa lile. — Jona 3:1, 10; 4:10, 11.
Mukhedziseyi 09.23 dzipaj. 6-7, dzipar. 16-18
Tumba Jehovha nga Samisoni
16 Lisine gu Samisoni a di yede gu emisana ni mihandro nya mba yadi a nga yi mana khu kotani nya sihoso saye. Ganiolu, kha diga gu zama gu gira gugola ga Jehovha. Anethu hi nga tshangana ni giemo gya gimwegyo. Ha gu gira gihoso, hi yede gu dzumeya gu laywa mwendro gu luza malungelo nyo khaguri libandlani. Ganiolu, kha hi yeli gu ema gu thumeya Jehovha. Dundruga gu khuwe Jehovha gima kha hi digi. (Ndzi. 103:8-10) Ambari olu hi girago sihoso, hi nga simama gu thumiswa khu Jehovha gufana ni Samisoni.
17 Wona giyeyedzo gya ndriyathu moyo nya muphya nyo pwani khu Michael. Uye a di pharegide thumoni wa Jehovha khu gu thuma kha nga muphasedzeyi nya libandla ni piyoneiro nya tepo yatshavbo. Nya mba tsakisa khu gu a di gira gihoso nyo khaguri a luza malungelo libandlani. Uye a di khuye: “Silo si di gu gimbiya gwadi nigu nyi di gu pharegide ngudzu thumoni wa Jehovha. Khu kharato, nyi di gu dzipwa gu khatshi gi mwalo gilo nyi nga girago thumoni wa Jehovha. Nyi di gu dziti gu kheni Jehovha kha na nga nyi diga. Ambari ulolo, nyi di gu khaleya gu dzi wudzisa gu kheni, ina nyi na si kodza gu manega ni wupari ni Jehovha ni gu gira nya singi libandlani nga gale?”
18 Esi si tsakisago khu gu Michael kha vbeya tshivba. Khu gu gimbiya nya tepo uye a di bweledzedwa malungelo yaye libandlani. Muhuno, a gu thuma kha nga piyoneiro nya tepo yatshavbo nigu lidhota. Uye a gu tshamuseya gu khuye: “Eni nyi di vega gupima avbo nya wupari wangu ni Jehovha. Tepo yatshavbo nyi di gu mu embeya esi si nga ba si romo monyoni gwangu, nyi hevbula ni gu dundrugeya. Nyi tiyisidwe ngudzu nigu giphaso nyi gi hakhidego, ngudzu-ngudzu gya madhota, gi nyi phaside gu tugula gu kheni Jehovha a ngu nyi haladza. Olu nyi nga thuma libandlani na nyiri ni livhalo li agidego. Isoso si nyi hevbudzide gu kheni Jehovha tepo yatshavbo a na divaleya ni wevbini muthu a dzi layago khu lisine.” Ethu hi nga tiyisega gu khethu Jehovha a na hi thumisa ni gu hi kategisa ambari ho ba hi giride sihoso, ganiolu ha gu dzi garadza gu lulamisa sihoso sathu hi bwe hi simama gu mu tumba. — Ndzi. 86:5; Mav. 28:13.
Mukhedziseyi 05.23 paj. 26, par. 2
U nga vboheya misuwo yago ya liphuvboni
2 Abari gu u na ni misuwo u gu mba yi kodza gu yi vboheya, u nga vbeyi tshivba. Ambari gu vboheya misuwo nya yidugwana, yi nga vbwetega tepo ni gu dzi garadza. Khu lisine, tepo u dzi garadzeyago gu vboheya misuwo yago, wa gu yeyedza gu khuwe wupari wago ni Jehovha wu na ni lisima gwago nigu wa gu vbweta gu gira satshavbo gasi gu mu thumeya. Jehovha a ngu ninga lisima gu dzigaradza gwago. Khu lisine, uye kha vireyi gu khuye u gira silo u gu mba si kodza. (Ndzi. 103:14; Mik. 6:8) Khu kharato, tepo u hathago misuwo tiyisega gu khuwe u na yi vboheya. Ganiolu, ginani gi na gu phasago gu yi vboheya? Hongoleni hi bhula khu mawonelo nyo khaguri.
Kemba dzithomba nya liphuvbo
Achegue-se a Jeová paj. 55, par. 18
Tshivba nya gu vangi silo — ‘Oyu a nga gira ndzadzi ni mafu’
18 Ginani hi gi hevbulago khu tshivba eyi Jehovha a yi thumisago gasi gu vanga silo? Sivangwa nya singi si hi randrede. Muembi moyo nya dzindzimo ganede gu khuye: “Uwe Pfhumu Nungungulu sigiro sago si tade! . . . litigo li tade khu sigiro sago.” (Ndzimo 104:24) Lisine! Vabhiologo va tugude dzimiliyoni nya sivangwa si vbanyago omu mafuni, ganiolu mawonelo yawe ma gu yeyedza gu khayo si ngu kodzega na si romo sivangwa nya singi ngudzu nya gu vbanye mafuni. Muthu nyo khaguri a gu na ni makodzelo nyo gire gilo, a nga hegedwa khu mawonelo yaye gasi gu gira gilo gyogyo. Gu hambana ni muthu yoyo, mawonelo a gu nawo Jehovha ni tshivba nya gu vangi silo nyo hambane-hambane kha si hegedwi.