Litaru la Nowa

Khu gu gimbiya nya tepo, mafu ma di tala khu vathu. Nya vangi vakona va diri ni mavbanyelo nyo vivbe. Dzingilozi nyo khaguri ndzadzini dzi di manega ni mavbanyelo nyo vivbe. Dzi di khuga khu gaya gwadzo ndzadzini dzita mafuni. U ngu dziti gu khuwe khu ginani dzi nga gira isoso? Dzi di gu vbweta gu dzi gireya sivili nya vama gasi dzi ta dzegana ni vanyamayi.

Dzingilozi dzodzo ni vanyamayi vovo va di velega sanana. Sanana soso si di dandra si manega ni tshivba si dzi garadzisa. Si di gu bayiseya vathu. Jehovha na sa dzumeleya silo soso si simama gu girega. Khu kharato, a di si wona nari tshukwana gu fuvisa vathu vovo khu talo nya mati.

Ganiolu, gu diri ni mwama moyo a nga ba a hambanide ni vambe. Mwama yoyo a di gu haladza Jehovha. Lina laye khu Nowa. A diri ni nyamayi ni sanana siraru nya sikhwathana. Malina yaso gu diri Semi, Kami ni Jafeti. Moyo ni moyo a diri ni mwangadzi waye. Jehovha a di ruma Nowa gu vbaha litaro gasi gu uye ni ndranga yaye va si songwi khu talo nya mati. Jehovha a di ruma Nowa gambe gu bedza sirengo nya singi omu nya litaro gasi si vbuluga niso.

Nowa a di dzegeya gu pheya gu vbaha Litaru. Nowa ni ndranga yaye va vbedzide gipimo nya 50 myaga na va gu vbaha litaro. Va di li vbaha edzi kamo Jehovha a nga ba a va leletede khidzo. Khu tepo yayimweyo, Nowa a gengedza vathu gu khuye va dzi woneya ga talo nya mati wu nga ba wuta. Ganiolu mwalo a nga mu engisa.

Khu guhegisa, yi di vboha tepo nya gu va beya omu nya litaro. Hongoleni hi wonani esi si nga girega khu gulandreya.