Nya wu 1: Gu hunga makungo

SO THULA GINANI:

Mwama ni nyamayi va hungidego gu vbanya vatshavbo va gu wona mutshadho wawe nga gilo nya gu pindruge, nigu isoso sa gu gira gu va vbanyisana pangoni gwawe. Moyo ni moyo wawe a gu tiyisega gu khuye mwama mwendro mwangadzi waye, a na vbanya naye ambari ga gu dugeleya sigaradzo.

Mipatwa nyo khaguri ya gu gurumedzega gu vbanya yatshavbo, kholu dzipari dzawe mwendro valongo va va embeyago gu khavo kha va yeli gu tshula mutshadho. Ambari ulolo, mutshadho makungo ma seketedwago khu lihaladzo ni githawo.

LITSHINA NYA NAYO NYA BHIBHILIYA: “Mwama kha yeli gu diga mwangadzi waye.” — 1 Vakorinto 7:11.

“Wa gu ba u dzi emisede avba nya mutshadho wago, kha wu vbiredzeyi gu goroga, ganiolu u na lomba divalelo ni gu divaleya khu gu vbiredza. Kha wu na nga wona sigaradzo u tshanganago naso kha nga gighelo nya gu tshule mutshadho.” — Micah.

KHU GINANI SI GU NA NI LISIMA

Patwa wu nga mba dzi emiseya avba nya mutshadho wawo, wa gu tshangana ni sigaradzo wu nga vboheya mahegiso yaya: ‘ethu kha ha girwa gasi hi vbanya hatshavbo’ va bwe va vbwetedzeya sighelo nya gu tshule mutshadho.

“Vathu nya vangi va gu tshadha na va gu pimisa gu khavo, sa gu mba gimbiya gwadi va nga tshula mutshadho. Patwa wa gu tshadha na wu ri ni mapimiselo yoyo, wugadzi wawe kha wu na nga tiya.” — Jean

GINANI U NGA GIRAGO:

DZI GEVESISE

Mwa gu ba mu ganedzisana . . . 

• Ina u ngu dzi laya khu gu ba u tshadhide ni mwama mwedro mwangadzi wago?

• Ina u di nga pimisa gu vbweta mumbe mwama mwendro mwangadzi?

• Ina u ngu tshuka u ganeya gu khuwe: “Nyi na gu diga” mwendro “Nyi na vbweta mumbe a na nyi ningago lisima?”

Abari gu hlamulo wago i ina ga gimwegyo nya siwudziso sesi, tiyisa wugadzi wago.

BHUDZISANANI

• Ina mutshadho wathu wu nga tiyide? Abari gu ahihi, khu ginani?

• Ginani hi nga girago olu gasi gu tiyisa mutshadho wathu?

MAWONELO

• Embeya mwama mwedro mwagadzi wago gu khuwe u ngu mu haladza

• Yeyedza gu hungana gwago ni mwama mwedro mwangadzi wago, khu gu khala ni fotu waye avba u thumago avbo

• Ligareya mwama mwedro mwangadzi wago wa gu ba u romo thumotunu mwedro ga wumbe wulanga

LITSHINA NYA NAYO NYA BHIBHILIYA: “Esi Nungungulu a si hungidedo, si nga tshudwi khu muthu.” — Matewu 19:6.