Nya wu 11: Gu thuma khu sighinghi

SO THULA GINANI

Vathu va golago gu thuma kha va tutumi thumo. Ganiolu, avo va gu thuma khu tshivba yawe yatshavbo gasi gu dzi khathaleya ni gu phasa vambe, ambari na va gu gira thumo wa vbavbatshi.

KHU GINANI SI GU NA NI LISIMA

Muthu a yede gu thuma, gu mwalo gu si vhika. Nya vangi kha va dzini gu thuma khu sighingi, ambari ulolo gu thuma khu sighinghi si ngu resa mihandro nya yadi. — Muhevbudzi 3:13.

“Nyi tugude gu kheni wa gu thuma khu sighinghi, u na dzipwa gwadi u bwe u tsaka. Litsako nyi li manidego khu gu thuma khu sighinghi li nyi giride nyi gola ngudzu gu thuma. Gu gola gu thuma si na gu gira u mana ndruma nya yadi.” — Reyon.

Litshina nya nayo nya Bhibhiliya: “Thumo watshavbo wu na ni tshatshazelo waye.” — Mavingu 14:23.

GINANI U NGA GIRAGO

Dzi garadzeye gu manega ni mawonelo nya yadi khu thumo khu gu landrisa dzindziya dzedzi.

Gudzikhusedza khu gu hevbuleya gu gira gwadi silo. Gani wa gu gira mithumo ya ndrangani mwendro TPC ambari kamu thumuthuno, vega gupima gwago gwatshavbo ga esi u girago. Tepo u si kodzago gu gira gwadi thumo nyo khaguri, vbwetedzeya dzindziya nya gu wu tshukwadzise u bwe u wu gira khu gu vbiredza. Tepo u yago u gira gwadi thumo wago u na wu tsakeya ngudzu.

Litshina nya nayo nya Bhibhiliya: “Ina uwe khu mu womi muthu a thumago khu wugengeli thumo waye, gani? Uye a na vegwa a thumela vafumeli, nasiri gu thumela vanyalidede.” — Mavingu 22:29.

Dundrugeya khava va phasegago khu thumo wago. Gu tala nya dzitepo, wa gu gira gwadi thumo wago si ngu phasa vambe. Khu giyeyedzo, wa gu gira mithumo ya drangani khu sighinghi u na vbunguleya thumo vambe ndrangani.

Litshina nya nayo nya Bhibhiliya: “A ngu tsaka oyu a ningago guvbindra oyu a hakhago.” — Mithumo 20:35.

Gira nya singi gu vbindra esi vambe va si vireyago gwago. Vbavbandze nya gu gire silo nya si dugwana, zama gu gira nya singi gu vbindra esi si vbwetegago gu u gira. Khu ndziya yoyo, u na woneleya womi wago kholu wa gu gira silo nya singi khu gu dzina na siri khu gu gurumedzwa. — Matewu 5:41.

Litshina nya nayo nya Bhibhiliya: “U si giri wuwadi wago khu gu gurumedzwa, ganiolu u wu gira khu gugola gwago.” — Filemoni 14.

Ninganiseya. Vathu va golago gu thuma kha vari migara nigu kha va thumi guvbindra pimu. Va ngu tsaka khu gu thuma khu sighinghi ni gu dzi ninga tepo nya gu hefemule.

Litshina nya nayo nya Bhibhiliya: “Gyandza gimwegyo basi nya muthu nya gurule, guvbindra mandza mavili nya muthu nya wughimaghima khu gu dzi garadza ngudzu; ugogo nugo gututuma hwane nya phuvbo yi vbindrago.” — Muhevbudzi 4:6.