Wa gu ba uti edzi u gu idzo khu lisine, u na dzi vhikeya ga sigaradzo nya singhi
GA VAPHYA
Nya wu 9: Wuthu wago
SO THULA GINANI
Wuthu wago, kha wu hegedwi avba nya lina lago mwendro edzi u khadego khidzo. Wa gu pata mavbanyelo yago, esi u si khodwago ni makhalelo yago. Khu lisine, wuthu wago go thudwa edzi u khadego khidzo khu ndrani ni vbavbandze.
KHU GINANI SI GU NA NI LISIMA
Tepo u tigo edzi u gu idzo khu lisine, u na si kodza gu emeya esi u si khodwago vbavbandze nya gu dzumeye gu kutsedzedwa khu dzipari dzago.
“Vathu nya vangi va gu fana ni dzi manequins dzi vbayegwago sombo ma dzilojani. Idzo kha dzi hathi sombo dzi ambagiswago, dzo ambagiswa basi.” — Adrian.
“Nyi hevbulede gu emeya silo nya sadi ambari na si gu garadza. Nyi ngu kodza guti edzi dzipari dzangu dzi khadego khidzo khesi dzi girago ni esi nyi girago nya gu ba nyiri nadzo.” — Courtney.
Litshina nya nayo nya Bhibhiliya: “Mu nga pimedzeyi mavbanyelo nya litigo leli, wulangani nya isoso dzumeyani gu khenu Nungungulu a vbindrugedza mapimiselo yanu.” — Varoma 12:2.
GINANI U NGA GIRAGO
Dzi garadzeye guti edzi u gu idzo olu ni edzi u na khalago khidzo mindru wa tshigu, khu gu gevesisa esi u si kodzago gu gira, esi u si tandregago ni esi u si khodwago. Gasi uti isoso, hlamula siwudziso si landreyago.
Esi u si kodzago gu gira: Wugengeyi muni u gu nawo? Silo muni nyi si kodzago gu gira gwadi? (Khu giyeyedzo, nyi ngu sayisa gwadi tepo? Nyi ngu dzi phara? Nyi ngu thuma khu gu dzigaradza? Nyi mwalo ligungo?) Silo muni nya sadi nyi girago?
Mawonelo: Ina si ngu gu garadzeya gu tugula silo nya sadi u nga gira mwendro gu ganeya? Wudzisa vavelegi vago mwendro pari yago nya gu tumbege gu khuwe, silo muni u si kodzago gu gira nigu khu ginani?
Litshina nya nayo nya Bhibhiliya: “Muthu ni muthu a na khedzise gwadi mithumo yaye, khavbovbo a na mana gighelo nya gu tsake khuye mune kamo nasiri khu gu dzi fananisa ni vambe.”—Vagalatiya 6:4.
Esi u si tandregago gu gira: Makhalelo muni nyi yedego gu ma tshukwadzisa? Khu gwevbini gu wegeleya gwangu ya gu vbwete gu thegeya avba nya gilingo? Ga siemo muni si vbwetago gu nyi dziphara?
Litshina nya nayo nya Bhibhiliya: “Ha gu khethu: “Hi mwalo gighoho,” ha gu dzi kanganyisa habune.” — 1 Johane 1:8.
Esi u si khodwago: Khu yavbini mavbanyelo yangu nigu khu ginani hi vbanyago khayo? Ina nyi ngu khodwa ga Nungungulu? Ginani gi nyi girago nyi khodwa gu kheni Nungungulu womo? Silo muni nyi si wonago na si vivbide nigu khu ginani? Ginani nyi khodwago gu kheni gi na girega mindru watshigu?
Litshina nya nayo nya Bhibhiliya: “Maalakanyo nya yadi ma na gu vhikela, gupimisa, gu na gu sayisa.” — Mavingu 2:11.