Vathu nya vangi kha va ngo hongola gambe dzitshetsheni kholu va si manigo giphaso nya liphuvbo mwendro guthaveledwa. Ganiolu, khu ginani u yedego gu manega mitshanganoni nya wuKristo nya Dzifakazi dza Jehovha? Ginani u na ya gi manago iyoyo?

U na ya mana litsako nya gu dzipwe nuri vbakari nya vathu nya lihaladzo ni gukhathaleyana. Khu lizana myaga nya gupheye, maKristo ma di sasamedzidwe khu mabandla, nigu ma di gu gira mitshangano gasi gu khozeya Nungungulu, gu hevbula Milowo, ni gu tiyisana. (Vahebheru 10:24, 25) Olu va nga ba va tshangana khu lihaladzo, va di gu dzipwa na vari vbakari nya dzipari nya lisine — a gu vandriyawe nya wuKristo. (2 Vatesalonika 1:3; 3 Johane 14) Anethu ha gu landra magirelo yoyo ya mamowo, khu kharato hi ngu mana litsako la limwedo.

U na ya mana litsako nya gu hevbule ndziya nya gu thumise matshina nya milayo nya Bhibhiliya. Vama, vanyamayi ni sanana va gu tshangana gumogo, kha nga esi si nga ba si girwa teponi nya gulowe nya Bhibhiliya. Vahevbudzi va vidzidwego va gu thumisa Bhibhiliya gasi gu hi phasa gu pwisisa edzi hi yedego gu thumisa khidzo matshina nya milayo nya Bhibhiliya womini wathu wa tshigu ni tshigu. (Dhewuteronome 31:12; Nehemiya 8:8) Hatshavbo hi ngu kodza gu ninga mihlamulo ni gu emba dzindzimo, hi yeyedza gutumba gwathu nya wuKristo. — Vahebheru 10:23.

U na ya mana makategwa nya gu wone gukhodwa gwago ga Nungungulu na gu gu tiyiswa. Mupostoli Pawulo embede limwedo nya mabandla ya matshiguni yaye gu khuye: ‘Nyi ngu gola ngudzu guta mi wona, gasi hi ta tiyiselana hatshavbo: eni nyi tiyisedwa khu gukhodwa gwanu, ni enu mu tiyisedwa khu gwangu.’ (Varoma 1:11, 12) Gukhandzakanya gwathu gu manana ni makhodwa makhwathu mitshanganoni ga gu tiyisa gukhodwa gwathu ni gu dzi emiseya gwathu gu vbanya khu gu landreya matshina nya milayo nya Bhibhiliya.

Hi ngu gu rana gasi u manega tshanganoni wathu nya libandla wu landreyago gasi u ya si wona khu wabune silo sesi. U na ya hakhwa khu mandza mavili. Kha gu livbwi gilo nigu kha gu girwi mihengo.

• Mitshangano yathu nya libandla ya gu landreya giyeyedzo muni?

• Hi nga phasega kharini khu gu manega mitshanganoni nya wuKristo?

Ambari sa gu lomba gu hi tsemakanya likhabi nya guthise mwendro go ba gu veta gingulu, ethu tepo yatshavbo ha gu manega mitshanganoni yathu nya wuKristo. Khu ginani Dzifakazi dza Jehovha dzi dzi garadzeyago gu tshangana ni makhodwa makwawe, ambari na dzi gu emisana ni sigaradzo nya guvbanye mwendro na dzi garade khu gu ba dzi thumide ngudzu litshigu lolo?

Go hi phasa gu khadzisega ni gu tsaka. Pawulo lovide gu khuye “hongoleni hi tiyiselane khu gyathu.” Uye a di gu ganeya khava hi tshanganago navo mitshanganoni. (Vahebheru 10:24) Malito yaya mo tshamuseya gu khayo “gu dundrugeyana gwadi,” a gu gu tivana. Khu kharato, malito ya mupostoli yoyu ma gu hi kutsa gu khathaleya vambe. Khu guti maKristo makhwathu, hi ngu tugula gu khethu mambe ma pade sigaradzo sesi anethu hi gu naso, nigu ayo ma ngu kodza gu hi phasa gasi anethu hi dugeleya.

Go hi phasa gu gira wupari nya gutiye. Mitshanganoni yathu ha gu tshangana ni dzipari dza vbafuvbi, na gu siri vathu hi tivanago navo basi. Yimbe tepo hi ngu hengeya omu nya mihagano yi vbahago. Guhengeya gogo go hi phasa kharini? Ha gu hevbula gu khathaleyana ngudzu, nigu isoso si ngu tiyisa lihaladzo lathu. Khu kharato, vandriyathu va gu manana ni sigaradzo, ho dzegeya gu va phasa kholu wupari wathu wu tiyidego. (Mavingu 17:17) Khu gu hengeya ni sivbango satshavbo sa libandlani gwathu, ha gu yeyedza gu khethu hi ngu ‘theya kota khu vakhwathu.’ — 1 Vakorinto 12:25, 26.

Hi ngu gu kutsa gu hatha ava va girago gugola ga Nungungulu kha nga dzipari dzago. Dzipari dzodzo u na dzi mana vbakari nya Dzifakazi dza Jehovha. Gira wuhindzi u si dzumeyi simbe silo si gu himbedzeya gu hengeya ni ethu.

• Khu ginani hi phasegago ngudzu khu gu hengeya mitshanganoni?

• Lini u dogoreyago gu yati libandla lathu?

Mitshangano nya maKristo nya gupheye yi di gu wumbwa ngudzungudzu khu dzindzimo, milombelo, guhevbudwa ni gutshamusedwa nya Milowo. Gu diri mwalo sihena. (1 Vakorinto 14:26) Mitshangano yathu ya gu gimbidziswa khu ndziya yamweyo muhuno.

Sihevbudzo sakona so seketedwa khu Bhibhiliya nigu si ngu phasa. Khu guvbeyani nya semana, libandla ni libandla la gu tshangana gasi gu engiseya ganelo nya 30 dzimeneti yi seketedwago omu nya Bhibhiliya yi yeyedzago edzi Milowo yi yelanago khidzo ni guvbanya gwathu gumogo ni tepo hi vbanyago ga iyo. Hatshavbo ha gu kutswa gu landreya omu nya Bhibhiliya yathu tepo milowo yi lerwigo. Hwane nya ganelo yoyo, go landreya Gihevbulo nya “Murinzeli” nya ora mweyo, egi sivbango nya libandla si ranedwago gu hlamula tepo ndrima nya A Murinzeli yi hevbudwago. Gihevbulo gyogyo gya gu hi phasa gu thumisa sileletelo nya Bhibhiliya womini gwathu. Mahungu ya mamowo ma gu hevbudwa mabandlani yathu yatshavbo ma vbindrago 110 000 mafuni gwatshavbo.

Ha gu phaswa gu tshukwadzisa mahevbudzelo yathu. Ethu gambe hi ngu tshangana vbakari nya semana gasi gu gira longoloko nya sipandre siraru wu gu ni hungo nya mahungo Thumo ni mavbanyelo yathu nya wuKristo, wu seketedwago omu nya Gilivrwana nya mitshangano. Gipandre nya gupheye nya tshangano wowo, Dzithomba nya Lito la Nungungulu, gya gu hi phasa guti gwadi gipandre nya Bhibhiliya egi sivbango nya libandla si gi leridego magaya. Khavbovbo, gipandre Vega gupima gwago thumoni nya lithembwe gya gu thumisa siyeyedzo gasi gu hi phasa gu bhudzisana ni vathu khu Bhibhiliya. Gu na ni singalagadzi a ningago mawonelo gasi gu hi phasa gu tshukwadzisa malerelo ni maganelelo yathu. (1 Thimoti 4:13) Khu guhegisa, gipandre Mavbanyelo nya wuKristo, gya gu hi yeyedza mathumiselo nya matshina nya milayo nya Bhibhiliya womini wathu wa tshigu ni tshigu. Gipandre gegi gambe gi na ni gipandre gi hlamulago siwudziso si engedzeyago gupwisisa gwathu Bhibhiliya.

Gumwalo gukanakana nya gu khethu wa gu manega mitshanganoni yathu u na tsakiswa ngudzu khu sihevbudzo nya Bhibhiliya u na si hakhago. — Isaya 54:13.

• Ginani u lindreyago gu ya gipwa mitshanganoni ya Dzifakazi dza Jehovha?

• Khu wevbi tshangano wathu nya semana ni semana u dogoreyago gu manega ga uwo?

U ngu wona gu khuwe Dzifakazi dza Jehovha dzi gomogo omu nya dzifotu nya bruxura yeyi dza gu ambala gwadi dza gu hongola mitshanganoni yadzo? Khu ginani hi khathaleyago ngudzu maambalelo ni gudzimburisa gwathu?

Gasi gu yeyedza githawo khu Nungungulu wathu. Lisine gu Nungungulu kha khedzi basi edzi hi wonegago khidzo khu vbavbandze. (1 Samuweli 16:7) Ambari ulolo, ha gu tshangana gasi gu mu khozeya, myonyo yathu ya gu suva gu yeyedza githawo khu Nungungulu ni vakhozeli vakhwathu. Naripwani ha gu ranwa gasi gu ya ema mbeli ga mulamuli tribhunali, khu lisine na hi gu khathaleya ngudzu edzi hi vbwetago gu ya wonega khidzo mahoni gwaye khu kotani nya giemo gyaye. Khu ndziya yamweyo, edzi hi wonegago khidzo ha gu ba hi romo mitshanganoni sa gu yeyedza githawo gyathu khu “mulamuli nya litigo latshavbo,” Jehovha Nungungulu, ni wulanga wowu hi mu khozeyago avbo. —  Genesi 18:25.

Gasi gu yeyedza milayo hi vbanyago khiyo. Bhibhiliya ya gu kutsa maKristo gu ambala “khu githawo ni gu dzi phara.” (1 Thimoti 2:9, 10) Gu ambala “khu githawo” sa gu thula gu mba ambala myendra yeyi yi girago vambe va vega gupima gwawe ga ethu, yi wusago mapimo nya gu dogoreye gu hengeya malawu, mwendro yi wonegeyago. Gu diga isoso, “gu dzi phara” ga gu hi phasa gu hatha myendra nya gumbure, ganiolu yi si ndrindrigo ngudzu maho ya vambe mwendro yi si va khunguvanyisigo. Ambari ulolo, matshina yaya nya milayo ma ngu dzumeya gu muthu ni muthu a dzi hatheya. Na hi si ganeyi gilo, edzi hi dzi mburisago khidzo si ngu kodza gu mburisa “sihevbudzo hi hakhidego khu ga Nungungulu, Muvbanyisi wathu” si bwe si mu zundza. (Tito 2:10; 1 Pedro 2:12) Khu gu ambala gwadi tepo hi hongolago mitshanganoni, ha gu phasa vambe gu wu wona gwadi wukhozeli wa Jehovha.

U nga dzumeyi gu khuwe guambala gwago gu gu himbedzeya gu manega Salawuni nya Mufumo. Hi ngu kodza gu ambala myendra yi dzumelegago, nya guage ni gukhedzega ambari na yi siri myendra nya gudhure mwendro nya gusamadzise ngudzu.

• Khu ginani si gu sa lisima gu khathaleya maambalelo yathu ha gu ya khozeya Nungungulu?

• Khu yavbi matshina nya milayo ma thangeyago maambalelo ni gudzimburisa gwathu?

Wa gu ba u hevbula Bhibhiliya ni mweyo nya Dzifakazi dza Jehovha, adzina u ngu zama gu donga mahungu mu na hevbulago na li si gu vbohi litshigu nya gihevbulo. Gasi gu phasega ngudzu khu mitshangano nya libandla, gwadi gu dzi dongiseya na u si gu hongoli. Hi na phasega ngudzu khisoso ha gu dzi gireya longoloko hi bwe hi wu thumisa.

Dzi vegeye tepo ni wulanga nya gu hevbule. Khu yevbi tepo u kodzago gwadi gu vega gupima guhevbulani? Vbadzimindrutunu ngudzu na u si gu pheyi mithumo nya litshigu, mwendro vbawutshigutunu, sanana na si hongode si ya lala? Ambari wa gu mba kodza gu hevbula tepo nya gulaphe, dzi vegeye tepo u kodzago gu yi thumisa, u zama gu mba thindregiswa khu simbe silo. Dzi vbweteye wulanga nya mba na ligwaha, u bwe u ndreyisa satshavbo si kodzago gu gu hungateya khu gu tshima radhyu, televhizawu ni telefone. Gu gombeya na u si gu pheyi gu hevbula gu na gu phasa gu mba khathaleya sigaradzo nya litshigu gasi u kodza gu vega gupima Litoni la Nungungulu. — Vafilipi 4:6, 7.

Lova kwenga vbavbatshi nya mihlamulo, u bwe u dzi dongiseya gu ya hlamula. Pheya khu gu wona mahungu yatshavbo gasi guti gu khuwe ginani gi na hevbudwago. Dundrugeya hungo nya mahungu nya ndrima mwendro gipimo, u wona edzi gihungwana ni gihungwana nya mahungu gi pwananago khidzo ni mongo nya mahungu yoyo, khu guhegisa u khedza gwadi sithombe ni siwudziso nya guwusedze si tshingisago matshina nya gisekelo nya mahungu. Khavbovbo, hevbula ndrimana ni ndrimana, u bwe u vbweta mihlamulo nya siwudziso sakona. Tula u bwe u leri milowo yi yeyedzwago, u wona gu khuwe iyo ya gu seketeya kharini mahungu ma hevbudwago. (Mithumo 17:11) Wa gu mana hlamulo nya giwudziso, lova kwenga vbavbatshi nya malito madugwana nya lisima omu nya ndrimana yoyo aya ma na gu phasago gu dundruga hlamulo tshanganoni. Khavbovbo, wa gu ba u romo tshanganoni, u ngu kodza gu khusedza libogo, wa gu dzina, gasi gu hlamula khu malito yago, ganiolu u si laphisi.

Khu gu hevbula mahungu nya gu hambanehambane ma hevbudwago semana ni semana mitshanganoni, u na engedzeya mapimo nya maphya omu nya “thomba” yago nya guti Bhibhiliya. — Matewu 13:51, 52.

• Longoloko muni u yedego gu dzi vegeya gasi gu dongiseya mitshangano?

• U nga donga kharini gasi gu ya hlamula tshanganoni?

Gukhugeya gale, Jehovha o vbweta gu khuye sivbango nya ndranga ni ndranga si dzi ninga tepo nya gu khale satshavbo gasi si tiyisa wupari waso ni Nungungulu ni gu tiyisa gupwanana gwaso kha nga ndranga. (Dhewuteronome 6:6, 7) Khu kharato, Dzifakazi dza Jehovha dza gu dzi vegeya tepo semana ni semana gasi gu khozeya kha nga ndranga — dzi bhula na dzi rude khu silo nya liphuvbo si yelanago ni gutshukwadzisa makhalelo yadzo kha nga ndranga. Ambari wa gu ba u khala wenga, u ngu kodza gu londrola gwadi tepo yoyo ni Nungungulu khu gu hevbuleya mahungu nya Bhibhiliya u dzi hatheyago.

Tepo nya gu hidzimeye ga Jehovha. ‘Hidzimeyani vbafuvbi ga Nungungulu, uye nuye a na mi hidzimeleya.’ (Jakobe 4:8) Khu gu thumisa Lito la Nungungulu, a gu Bhibhiliya, ethu ha gu muti gwadi Jehovha khu gu hevbula silo si yelanago ni wuthu waye ni mithumo yaye. Ndziya nya guvbevbuge nya gu pheye wukhozeyi wanu nya ndranga khu gu dzi ninga tepo nya gu khale mwatshavbo mu leri Bhibhiliya khu malito nyo khugege, khu gu landra longoloko nya tshangano nya Thumo ni mavbanyelo nya wuKristo nya semana ni semana. Givbango ni givbango nya ndranga gi ngu kodza gu ningwa gipandre gasi gu leri, khu guhegisa mu bhula khesi mu si hevbudego omu nya Bhibhiliya.

Tepo nya gu tiyise gupwanana nya sivbango nya ndranga. Vama ni vagadzi, gumogo ni vavelegi ni sanana, va ngu tiyisa gupwanana gwawe va gu hevbula Bhibhiliya kha nga ndranga. Tepo yoyo yi yede gu khala tepo nya gutsake ni gurula yi viredwago khu vatshavbo semana ni semana. Maningano ni dzitanga nya sanana, vavelegi va ngu kodza gu hatha mahungu ma phasago gasi gu ma hevbula, adzina khu gu thumisa dzindrima nya A Murinzeli ni Khindlimuka! mwendro edzi dzi gomogo omu nya pajina yathu nya interneti, jw.org. Mu ngu kodza gu bhula khu sigaradzo sesi sanana si mananago naso xikwatunu ni dzindziya nya gu emisane naso. Khu ginani mu si sistirigo longoloko nya televhizawu omu JW Broadcasting (tv.jw.org) mu bwe mu bhula khuwo khu hwane? Yimbe tepo mu nga wusedza dzindzimo dzi na embwago mitshanganoni, khavbovbo, mu khala mu hodza gumogo kha nga ndranga.

Tepo yeyi nya guhathege yi thumiswago khu sivbango nya ndranga gasi si khala gumogo semana ni semana si khozeya Jehovha yi na phasa vatshavbo ndrangani gu tsakeya gu hevbula Lito la Nungungulu, nigu uye a na kategisa ngudzu gudzigaradza gwanu. — Ndzimo 1:1-3.

• Khu ginani hi dzi ningago tepo gasi gu khozeya kha nga ndranga?

• Ginani egi vavelegi va yedego gu gira gasi tepo yeyi yi tsakedwa khu vatshavbo ndrangani?

Khu ginani vathu vava va tsakidego ngudzu? Kholu va gomogo omu nya moyo nya mitshangano yathu nya yikhongolo. Kha nga olu sithumi sa Nungungulu sa gale yoyo si nga leletedwa gu tshangana guraru khu mwaga, anethu hi ngu tsakeya gu tshangana kha nga tsawa nya wukhongolo. (Dhewuteronome 16:16) Mwaga ni mwaga hi na ni mitshangano miraru nya yikhongolo: mitshangano mivili nya gipandre nya litshigu limwedo ni tshangano nya mughanga nya matshigu mararu. Ha gu phasega kharini khu mitshangano yeyi?

Ya gu tiyisa gupwanana gwathu kha nga vandruye nya wuKristo. Kha nga olu vaIsrayeli va nga ba va nengeya khu gu dhumisa Jehovha “vbakari nya tshangano,” anethu hi ngu tsaka khu gu mu khozeya mitshanganoni nya guhathege. (Ndzimo 26:12; 111:1) Mitshangano yoyo ya gu hi tuleya ndziya nya guti ni gu hengeya ni Dzifakazi dza mambe mabandla mwendro dzi tago khu mambe mayigo. Khu midiya ha gu hodza hatshavbo avba yi giredwago avbo mitshangano yoyo, si gu silo si yeyedzago wupari wathu. (Mithumo 2:42) Mitshanganoni yoyo nya yikhongolo hi ngu li wona khu habune lihaladzo li tshanganisago ‘vandriyathu’ mafuni. — 1 Pedro 2:17.

Ya gu hi phasa gu dandra liphuvboni. Vaisrayeli gambe va di gu phasega khu “tshamuselo nya magana” nya Milowo va nga ba va tshamusedwa. (Nehemiya 8:8, 12) Anethu hi ngu ninga lisima sihevbudzo hi si manago mitshanganoni yoyo. Tshangano ni tshangano wa gu seketedwa khu hungo nya mahungu wu duswago omu nya Bhibhiliya. Khu gu engiseya dziganelo, ni gu wona siyeyedzo, ha gu hevbula ndziya nya gu gire gugola ga Nungungulu womini wathu. Hi ngu tiyiswa khu gupwa edzi vambe va palago khidzo sigaradzo nya gu vbanye kha nga maKristo dziteponi dzedzi nya sigaradzo. Omu nya mitshangano nya mughanga, ha gu mana sihevbulo si phasago tepo hi wonago dzidrama dzi yeyedzago mahungu nya Bhibhiliya khu ndziya yi vbanyago. Mitshanganoni yoyo yatshavbo gu ngu bhapatiswa ava va vbwetago gu yeyedza gudziningedzeya gwawe ga Nungungulu.

• Khu ginani mitshangano nya yikhongolo yi gu sigiro nya gutsakise?

• U nga phasega kharini khu gu manega tshanganoni nya wukhongolo?

Nari vbafuvbi ni gufa, Jesu tiviside gu khuye: “Mahungu nya Yadi yaya nya Mufumo wa Nungungulu ma na huweledwa tigoni gwatshavbo gasi gu ninga wufakazi mayigoni gwatshavbo. Khu hwane nya ugo khavbo gu no tago guhegisa.” (Matewu 24:14) Ganiolu na si kodzegide kharini gu tshumayela mafuni gwatshavbo? Khu gu landreya giyeyedzo gi nga vegwa khu Jesu tepo a nga ba a romo mafuni. — Luka 8:1.

Ha gu zama gu endreya vathu dzindrangani dzawe. Jesu hevbudzide vapizane vaye gu tshumayela mahungu nya yadi khu ndranga ni ndranga. (Matewu 10:11-13; Mithumo 5:42; 20:20) Vavhangeli vovo va vbanyidego omu nya 2000 myaga yi vbindridego va di kabanisedwe sipandre nya gu tshumayele umo. (Matewu 10:5, 6) Muhuno nugo, thumo wathu nya gu tshumayele wu sasamedzidwe gwadi, nigu libandla ni libandla li na ni gipandre li yedego gu tshumayela umo. Isoso sa gu hi phasa gu landreya gileletelo gya Jesu nya gu gimbiye hi “tivisa Ivhangeli ga vathu” ni gu ninga wufakazi nya guvbeleye. — Mithumo 10:42.

Ha gu dzi garadzeya gu bhula ni vathu ni hayini va manegago umo. Jesu vegide giyeyedzo gambe khu gu tshumayela vathu gwatshavbo omu va nga ba va manega umo, kha nga bambe nya yiphwa ni vbanambotunu nya gitshungu. (Marko 4:1; Johane 4:5-15) Anethu hi ngu bhula ni vathu khu Bhibhiliya gwatshavbo omu si kodzegago — dziruwani, bazaritunu, parajitunu, ambari khu gu thumisa telefone. Ethu gambe hi ngu fakaza ga vavhizinyu vathu, sithumi sikhwathu, sihevbuli sikhwathu ni valongo, so kodzega. Gudzigaradza gogo gwatshavbo gu phaside dzimiliyoni nya vathu mafuni gwatshavbo gupwa mahungu nya yadi nya ‘guvbanyise.’ — Ndzimo 96:2.

U ngu dundrugeya muthu u dogoreyago gu bhula naye khu mahungu nya yadi nya Mufumo wa Nungungulu gasi u mu embeya makategwa a kodzago gu ma mana mindru wa tshigu? U nga digi gu bhula khu mahungu yaya ma vbanyisago. Dzegeya gu bhula khayo ni vambe!

• Khu yavbi “mahungu nya Yadi” ma yedego gu huweledwa?

• Dzifakazi dza Jehovha dza gu landreya kharini giyeyedzo gya Jesu nya gu tshumayele?

Lito nya gu khilo “piyonero” lo oloveya gu thula muthu a thangago a tula ndziya gasi vambe va kodza gu gimbiya khiyo. Jesu a di gu fanana ni piyonero kholu a nga rumedwa mafuni gu ta gira thumo wu vbanyisago a bwe a tula ndziya nya gu vathu va mana guvbanya. (Matewu 20:28) Muhuno valandreli vaye va gu mu pimedzeya khu gu thumisa tepo yawe, khavba si kodzegago khavbo, gasi gu hevbudza vathu va va gira vapizane. (Matewu 28:19, 20) Vambe va ngu kodza gu hengeya thumoni wowo hi wu ranago khethu i thumo nya wupiyonero.

Piyonero muthu a tshumayelago tepo yatshavbo. Dzatshavbo Dzifakazi dza Jehovha vahuweleyi nya mahungu nya yadi. Ambari ulolo, vambe va sasamedzide mavbanyelo yawe gasi va thuma kha nga vapiyonero nya tepo yatshavbo, va tshumayelago 70 nya dziora ngima ni ngima. Gasi gu gira isoso, nya vangi va gu dzi gireya sighwaza gasi gu dzi vbanyisa. Vambe va gu hathwa gasi gu thuma kha nga vapiyonero nya guhathege omu gu vbwetegago ngudzu vahuweleyi nya Mufumo, va tshumayela 130 dziora ambari guvbindra ngima ni ngima. Vapiyonero va ngu tsaka khu mavbanyelo nya guvbevbuge, na va gu tumba gu khavo Jehovha a na va ninga esi si vbwetegago guvbanyani. (Matewu 6:31-33; 1 Thimoti 6:6-8) Ava va si kodzigo gu thuma kha nga vapiyonero nya tepo yatshavbo va ngu kodza gu thuma kha nga vapiyonero nya guphasedzeye va gu si kodza, va engedzeya thumo wawe khu gu tshumayela 30 mwendro 50 dziora ngima ni ngima.

Piyonero a gu kutswa khu gu haladza Nungungulu ni vathu. Kha nga Jesu, ethu hi ngu wona gu khethu vathu nya vangi va ngu tshaniseka khu gu vbweta guti Nungungulu ni makungo yaye. (Marko 6:34) Ganiolu ethu hi na ni guti gu kodzago gu va phasa olu kamo gu bwe gu va ninga gitumbiso nya gutiye nya gu vbanye mindru wa tshigu. Guhaladza vathu vakwawe ga gu kutsa piyonero gu ningeya tepo ni tshivba yaye khu gugola gwaye gasi gu phasa vambe guti mahungu nya yadi. (Matewu 22:39; 1 Vatesalonika 2:8) Khu kharato, gukhodwa ga piyonero ga gu tiya, a hidzimeya ga Nungungulu, a bwe a tsaka ngudzu. — Mithumo 20:35.

• Ginani piyonero?

• Ginani gi kutsago vambe gu thuma tepo yatshavbo kha nga vapiyonero?

Gukhugeya gale, Dzifakazi dza Jehovha dzi ngu thangisa sihevbudzo nya Mufumo wa Nungungulu. Gu ngu dongisedwa dzixikola nya guhathege gasi gu hevbudza vale va thumisago tepo yawe yatshavbo thumoni nya gutshumayele mahungu nya Mufumo gasi va kodza gu gira ‘thumo wawe’ khu guvbeleya. — 2 Thimoti 4:5.

Xikola nya Thumo nya Wupiyonero. Muthu a gu vbedza mwaga rumba nya gupheye na gu thuma kha nga piyonero nya tepo yatshavbo a gu lovedziswa omu nya xikola nya livbandre na limwedo matshigu yi talago gu giredwa Salawuni nya Mufumo yi manegago vbafuvbi ni avba muthu yoyo a khalago avbo. Makungo nya xikola yoyo gu phasa piyonero gu hidzimeya ga Jehovha, gu dugeleya thumoni nya gu tshumayele khu dzindziya dzatshavbo ni gu simama a thuma khu gutumbega.

Xikola nya Vavhangeli nya Mufumo. Xikola yeyi nya migima mivili yo giredwa gu hevbudza vapiyonero vale va wu olovedego thumo, va dzumeyago gu khuga omu va khalago umo va ya tshumayela ni hayini gu vbwetegago. Khu lisine, avo vari khavo: “Nyi womo avba. Nyi rume.” Khu kharato avo va gu dzegeleya Jesu Kristo, a gu Muvhangeli nya khongolo guvbindra vatshavbo va thumidego mafuni. (Isaya 6:8; Johane 7:29) Gu khuga va ya khala hwindzo ni gaya gwawe si nga lomba gu khiso va vbevbugisa womi wawe. Yimbe tepo mavbanyelo, dzinango ni guhodza ga omu va ya thumeyago umo si nga hambana ngudzu ni esi va si olovedego. Gudzina saye si nga lomba gambe gu va hevbula lidimi nya liphya. Xikola yeyi ya gu phasa vandriyathu nya vama nya sikwendra, vandriyathu nya vanyamayi va si gu dzegwigo ni mipatwa, va gu na ni 23 kala 65 myaga, gu haguleya makhalelo nya liphuvbo va na ma vbwetago thumoni wawe ni mano ma na va girago va thumiswa khu guvbeleya khu Jehovha ni hengeledzano yaye.

Xikola nya Bhibhiliya ya Gileyadhi ya Torre de Vigia. Khu giHebheru, lito li gu khilo “Gileyadhi” la gu thula “Nyandra nya Wufakazi.” Gukhugeya yi nga tudwa xikola ya Gileyadhi khu 1943, gu hevbudzidwe vathu va vindrago 8000 va rumedwa kha nga vamisyonaryo gasi gu ya ninga wufakazi “kala mahegiso nya litigo.” Nigu va ngu dugeleya thumoni wowo. (Mithumo 13:47) Tepo vamisyonaryo va Gileyadhi va nga pheya gu vboha Peru, gu di ri mwalo libandla tigoni momo. Muhuno gu na ni mabandla ma vbindrago 1 000. Tepo vamisyonaryo vathu va nga pheya gu thuma Japawu, Dzifakazi iyoyo kha dza nga ba dzi vboha likhumi. Muhuno dzi ngu vbindra 200 000. Esi si hevbudwago Gileyadhi ndrani nya livbandre migima sa gu pata gu hevbula Lito la Nungungulu khu guvbeleya. Vapiyonero nya guhathege, vamisyonaryo va thumeyago thembweni, vale va thumago Bheteli ni vawoneleyi nya sipandre khavo va ranedwago xikola yeyi gasi gu ya mana sihevbulo nya gutshinge esi si va phasago gu tiyisa thumo mafuni gwatshavbo.

• Khu yavbi makungo nya Xikola nya Thumo nya Wupiyonero?

• Khu vamani va ninganedwago khu gu hevbula Xikola nya Vavhangeli nya Mufumo?