Wa gu ba u emisana ni madwali nya makhongolo

“Tepo vadhogodheya va nga nyi embeya gu khavo nyi na ni kankru nya mahahu ni omu nya sirambo, nyi di dzegeya kheni khugo gufa gwangu ogu. Ganiolu, hwane nyo wuye khiyo ga dhogodheya, nyi di dzi embeya kheni: ‘Lisine gu khandriso nyi nga ba nyi si virede, ganiolu gu vbwetega nyi emisana naso.’” — Linda, a gu na ni 71 myaga.

“Nyi na ni madwali nyo vbise ngudzu ma gimbileyanago ni dzinervhu dza nyambadi nya khovbe yangu. Litshigu limwedo, nyi dipwa guvbisa nya gukhongolo gu nga nyi vbedza ni tshivba. Matshigu nya mangi, nyi ngupwa wutundzu nyi dogoreya ni gu dzi songa.” — Elise, a gu na ni 49 myaga.

Mwama a dwalago a gimbiyago khu gikarinyana na randredwe khu vathu va mu golago

ABARI gu uwe mwendro muthu u mu golago a modwe madwali nya ahatiahati, u ngu dziti gwadi edzi si vbisago khidzo isoso. Vbavbandze nya madwali yakona basi, gu vbwetega u emisana ni giemo gyakona gambe. Adzina u nga engedzeya gu thava mwendro gu garadzega khu kotani nya dzikonsulta dzakona, sa gu garadza gu mana mwendro gu renga mirendre yakona, mwendro ya gu mba thuma gwadi. Gugaradzega gu vangwago khu madwali nya makhongolo gu nga vbedzana ngudzu tshivba.

Hi nga gi mana hayi giphaso? Vathu nya vangi va phasegide ngudzu khu gu tutumeya ga Nungungulu khu nombelo gasi gu va thaveleya ni gu leri sipandre si na va tiyisago si gomogo omu nya Bhibhiliya. Hi nga phaswa gambe khu valongo ni dzipari dzathu.

ESI SI PHASIDEGO VAMBE

Robert a gu na ni 58 myaga wari khuye: “Khodwa ga Nungungulu, a na gu phasa gu timiseya madwali yago. Gombeya ga Jehovha. Mu embeye edzi u dzipwago khidzo. U mu lomba liphuvbo laye nya guage. U mu lomba gasi a gu phasa gu manega ni mawonelo nya yadi, gu tiyisa ndranga yago, ni gu timiseya madwali yago khu gurula.”

Robert wari khuye: “Si ngu phasa ngudzu valongo vago va gu ba va gu ninga wusingalagadzi nya wadi, va gu ba va dzi emisede gu gu phasa ni yevbini tepo. Tshigu ni tshigu nyi ngu fonedwa khu vathu va nyi wudzisa gu khavo: ‘Wo waniwani muhuno?’ Nyi ngu tiyiswa khu dzipari dzi gomogo malangani nyo hambanehambane. Idzo dzi ngu nyi tiyisa ngudzu kamo, ni gu nyi phasa gu simama gu timiseya.”

Wa gu ba u wuseya muthu a dwalago, nga wona esi si ganedwego khu Linda: “Khu lisine, mudwali adzina a ngu dzina ngudzu gu manega ni womi nyo fane ni owu wa vambe, nigu adzina kha vbweti gu khaleya gu bhula khu madwali. Khu kharato, tshukwana gu bhula khu silo sa tshigu ni tshigu.”

Khu kotani nya tshivba ya Nungungulu ni gu thaveledwa khu Bhibhiliya, gumogo ni giphaso nya dzipari ni valongo va hi golago, hi nga tiyisega gu khethu somo sighelo nya gu hi simama gu vbanya, ambari ho ba hiri ni madwali nyo thise.

Mavhesi nya Bhibhiliya ma nga phasago

Tumba Nungungulu.

“Nyi vbwetide PFHUMU Nungungulu, uye a nyi hathide; a nyi tshula guthavani gwangu gatshavbo. Gisiwana gi di lila, PFHUMU Nungungulu a gi yingisa.” — Ndzimo 34:4, 6.

Linda, a khumbugidwego gupheyani, wari khuye: “Nyi di si lombi gu kheni a nyi hawulugisa. Ganiolu nyi di gu vbweta gu kheni a nyi tiyisa, ni gu nyi phasa gu timiseya madwali yangu.”

Leri Lito la Nungungulu gasi li gu phasa gu tiya.

“Mwalo ni moyo muvbanyi . . . a na gukhuye: ‘Eni nyi ngu dwala.’” — Isaya 33:24.

Dundrugeya khu situmbiso sa Nungungulu khu wumindru. Isoso si na gu ninga gutumba, ugo gu na gu phasago gu timiseya.

Lomba dzipari ni valongo gasi va gu thaveleya.

“Iyo yi gu pari yi ngu gu gola gikhati gyatshavbo, nuri gikhatini nya wuvi, ya gu khala ndriyago.” — Mavingu 17:17.

Elise, a khumbugidwego gupheyani, wari khuye: “U nga dzi hambanisi ni vambe. Diga dzipari dzago dzi gu phasa. Dzimbe dzitepo, si nga gira u dzipwa wenga, u pimisa gu khuwe ambari Nungungulu kha gu engisi, ganiolu u nga dzi hambanisi ni vambe.”