U nga khala kharini pari nya lisine?

U DI nga dzipwa nga khatshi wa gu emisana ni sigaradzo sago wenga? Ethu ha gu vbanya “dzitepo nyo garadze gu emisana nadzo,” dzi nga hi girago hi vbeya tshivba ni gu dzipwa honga. (2 Thim. 3:1) Ganiolu, ethu kha hi yeli gu emisana ni sigaradzo sathu honga. Bhibhiliya yi ngu tshingisa lisima nya gu manege ni dzipari ‘dziteponi nya sigaradzo.’ — Mav. 17:17.

DZIPARI NYA LISINE DZI NGA PHASA KHU NDZIYA MUNI?

Mupostoli Pawulo a di gu endra ni dzipari dzaye nyo khaguri avba nya maendro yaye nya wumisionaryu nigu idzo dzi mu phaside khu dzindziya nya dzingi. (Kol. 4:7-11) Tepo Pawulo a nga ba a khothedwe Roma, dzipari dzaye dzi mu phaside gu gira mithumo a nga ba a si yi kodzi gu yi gira. Khu giyeyedzo, Epafrodhito a di dzega esi si nga ba si vbwetega a nga ningwa khu vandriyawe va Filipi gasi guya ninga Pawulo. (Filp. 4:18) Tikiko a di ningeya malangaliya ya Pawulo mabandla nyo hambane-hambane. (Kol. 4:7) Khu gu phaswa khu dzipari dzaye, Pawulo a khathalede thumo waye nyo tshumayele ambari a nga ba a si yeli gu duga khu ndrangani ni tepo a nga ba a khothedwe. U nga khala kharini pari nya lisine muhuno?

Matshigoni yaya, vandriyathu va ngu yeyedza gu khavo dzipari dzi nga phasa vambe. Elisabet a thumago kha nga piyonera Espanha, a gu tshamuseya edzi ndriyathu moyo nya nyamayi a mu phasidego khidzo dziteponi nya sigaradzo. Tepo mamayi waye a nga popodwa madwali nya câncer, ndriyathu wule nya nyamayi a di rumeleya Elisabet dzimensaji nyo tiyise dzi nga ba dzi seketedwa khu mavhesi nya Bhibhiliya. Elisabet wari, khuye: “Tepo nyi nga wona dzimensaji dzaye, nyi di dzipwa na nyi tsakide khu gu dziti gu kheni womo muthu a khathalago kheni, nigu nyi dzipwide na nyi tiyide gasi gu gira esi nyi nga ba nyi si vbweta.” — Mav. 18:24.

Hi nga tiyisa vandriyathu tepo hi hongolago navo thumoni nyo tshumayele mwendro mitshanganoni. Khu giyeyedzo, u nga dzi ningedzeya gasi gu dzega ndriyathu a dandridego khu tanga gasi gu hongola mitshanganoni mwendro thumoni nyo tshumayele. Wa gu va phasa khu dzindziya dzedzi, u nga va tiyisa nigu anuwe u nga tiyiswa. (Rom. 1:12) Ganiolu, mambe Makristo kha ma si kodzi gu duga khu ndrangani. U nga va phasa kharini?

KHALA PARI NYA LISINE GA VALE VA GU MBA SI KODZA GU DUGA KHU NDRANGANI

Vambe vandriyathu va na ni sigaradzo nya madwali mwendro simbe siemo si va himbedzeyago gu wona mitshangano khu khovbe ni khovbe. Wona giyeyedzo gya David, a nga popodwa madwali nya câncer. Uye thumidwe madwali yaye guvbindra 6 migima. Ndrani nya tepo yeyi, David ni mwangadzi waye va di gu wona mitshangano khu gaya.

Va phasidwe kharini khu dzipari dzawe dza libandlani? Hwane nya mitshangano, vandriyathu nyo khaguri va nga ba va romo Salawuni nya Mufumo va di gu dzi garadzeya gasi gu bhula ni David ni Lidia khu gu thumisa videoconferência. Gu diga isoso, tepo khiyo va nga ba va ninga mihlamulo, va di gu hakha dzimensaji nyo tiyise va nga ba va lovedwa khu vandriyawe. Khu wevbini handro wakone? David ni Lidia kha va dzipwa ngudzu vonga.

Ina hi nga patega thumoni nyo tshumayele ni vandriyathu va gu mba si kodza gu duga khu ndrangani? Ha gu gira guvbindrugedza nyo khaguri, hi na yeyedza gu khethu kha hi divali vandriyathu va gu na ni gu hegedwa nyo khaguri. (Mav. 3:27) Adzina saye, u nga tshumayela navo khu gu lova malangaliya ni gu thumisa telefoni. Madhota ma nga gira malulamiselo gasi ava va gu mba si kodza gu duga khu ndrangani va wona tshangano nya thumo nyo tshumayele khu videoconferência. David ni Lidia va ngu bonga ngudzu khu gu ba libandla li giride malulamiselo yaya. David a gu tshamuseya gu khuye: “Gu manega gumogo ni tsawa wathu nya thumo nyo tshumayele gasi gu engiseya tshangano nya wudugwana ni gu engiseya nombelo si hi tiyiside ngudzu.” Gu diga isoso, giemo gya gu gu dzumeleya nigu na siri mwalo mhango gu gira isoso, dzimbe dzitepo u nga gira malulamiselo nya guya dzege gihevbuli nyo khaguri nya Bhibhiliya gasi guya hevbula nagyo gaya ga ndriyathu a gu mba si kodza gu duga khu ndrangani.

Ha gu vbedza tepo ni vandriyathu va gu mba si kodza gu duga khu ndrangani, hi na si kodza gu wona makhalelo yawe nyo mbure, nigu hi na khala dzipari dzawe. Khu giyeyedzo, tepo u va engiseyago na va gu hevbudza muthu nyo khaguri Lito la Nungungulu ni gu mu phasa gu hidzimeya ga Jehovha, uwe u na va ninga ngudzu githawo vandriyathu vovo. Nigu tepo u seketeyago vandriyathu vovo omu nya mithumo ya liphuvboni, u na engedzeya dzipari. — 2 Kor. 6:13.

Tepo Pawulo a nga ba a tshangana ni sigaradzo, pari yaye Tito yi di gu hongola ya mu wuseya nigu isoso si mu phaside gu dzipwa gwadi. (2 Kor. 7:5-7) Khyadi gu embeya malito ma tiyisago vandriyathu, ganiolu giyeyedzo gya Tito gya gu hi hevbudza gu khigyo hi nga va thaveleya gambe khu gu vbedza tepo navo ni gu gira silo si na va phasago. — 1 Joh. 3:18.

KHALA PARI NYA LISINE TEPO DZIPARI DZAGO DZI WUGEDWAGO

Vandriyathu va Rússia va ningide giyeyedzo nyo mbure ngudzu khu gu yeyedza gu khavo va ngu phasana. Wona esi si dugeledego Sergey ni mwangadzi waye Tatyana. Hwane nya gu ba maphoyisa ma hangalasede ndranga yawe, avo va di dzegwa gasi guya girwa siwudziso. Tatyana a di phedwa khuye gu tshudwa, a hongola gaya. Sergey wari, khuye: “Tepo [Tatyana] a nga dzegeya gu vboha gaya, a di vboha ndriyathu nya nyamayi a tiyidego-hwambo. Nigu dzimbe dzipari dzathu dzi dita hi phasa gu vegedzeya gwadi silo ndrangani gwathu.”

Sergey a gu engedza gu khuye: “Gukhugeya gale nyi ngu gola libhuku la Mavingu 17:17, li gu khilo: ‘Pari nya lisine yi ngu yeyedza lihaladzo gikhati gyatshavbo, nigu gikhatini nya wuvi, ya gu khala ndriyago.’ Ndrani nya tepo yeyi nya gu wugedwe, nyi di gu vbweta ngudzu giphaso gya dzipari dzangu, nigu nyi wonide gu kheni malito ma gu romo omu ga Mavingu 17:17 lisine. Jehovha a nyi ningide dzipari dzi nga nyi tiyisa ni gu nyi phasa.”

Ethu hi ngu vbweta giphaso gya dzipari dzathu dziteponi nyo garadze. Nigu hi na vbweta ngudzu giphaso gyawe ndrani nya tshanisa nya yikhongolo. Khu kharato, hongoleni hi dzi garadza gasi gu khala dzipari nya lisine olu! — 1 Ped. 4:7, 8.