Potsa gu dzi gola uwe mune basi nga vathu nya vangi muhuno

INA u tugude gu khuwe vathu nya vangi muhuno va gu vbweta gu pharwa khu ndziya nyo hathege guvbindra vambe ni gu mana malungelo nyo khaguri nyo hathege? Ambari tepo va pharwago khu ndziya nyo hathege, avo va gu pimisa gu khavo va yede gu mana malungelo nya makhongolo ngudzu. Vathu va pimisago khu ndziya yeyi va gu dzi gola ngudzu avo vamune nigu kha va bongi khesi va gu naso. Khiso Bhibhiliya yi ganeyago gu khiyo si di hadzi girega matshigoni nyo hegise. — 2 Thim. 3:2.

Khandri siphya gwathu gupwa gu khethu vomo vathu va dzi golago ngudzu avo vamune. Adhamu ni Evha va di hunga gu dzi hatheya esi si gu sadi ni esi nyo vivbe, nigu isoso si reside sigaradzo nya sikhongolo. Hwane nya lizana myaga, Pfhumu Uziya a di pimisa gu khuye a na ni fanelo nya gu vbisi libani tempeleni, ganiolu uye a di gu dzi senga. (2 Dzik. 26:18, 19) Khu ndziya nyo fane, Vafarisi ni Vasadhusi va di gu khodwa gu khavo Nungungulu a di hadzi gu va phara gwadi guvbindra vambe kholu va nga ba vari situgulwana sa Abrahama. — Mat. 3:9.

Ethu hi randredwe khu vathu va dzi golago ngudzu avo vamune, nigu mavbanyelo yawe ma nga hi kutsedzeya. (Gal. 5:26) Adzina hi nga pheya gu pimisa gu khethu hi yede gu hakha malungelo nyo khaguri mwendro gu pharwa khu ndziya nyo hathege. Hi nga potsa kharini gu pimisa khu ndziya yeyi? Hi yede gu pwisisa esi Jehovha a pimisago khu mahungu yoyo. Hi na phaswa khu matshina mavili nya Bhibhiliya.

Jehovha khuye a sitigo esi hi yedego gu hakha. Wona siyeyedzo nyo khaguri.

• Ndrangani, mwama a yede gu dzipwa na ningwa githawo khu mwangadzi waye, nigu nyamayi a yede gu dzipwa na haladzwa khu mwama waye. (Efes. 5:33) Jehovha a gu ganeya gu khuye ava va tshadhidego va yede gu yeyedzana lihaladzo khu gyawe nasiri ga mumbe muthu. (1 Kor. 7:3) Vavelegi va nga vireya gu engiswa khu sanana sawe, nigu sanana si nga vireya gu yeyedzwa lihaladzo ni gu seketedwa khu vavelegi vaso. — 2 Kor. 12:14; Efes. 6:2.

• Jehovha a gu ganeya gu khuye madhota libandlani ma yede gu ningwa githawo khu thumo nyo garadze ma girago. (1 Tes. 5:12) Ganiolu, ayo kha ma yeli gu fuma vandriyawe. — 1 Ped. 5:2, 3.

• Nungungulu dzumelede vafumeli nya vathu gu hengiseya mikhupo ni gu ningwa wuzundzo va wu vbwetago. — Rom. 13:1, 6, 7.

Jehovha a ngu hi ninga nya singi guvbindra esi si hi faneyago. Khu kotani nya olu hi gu sighohi, wuyelo wathu khu gufa basi. (Rom. 6:23) Ganiolu, Jehovha a ngu hi ninga makategwa nya mangi ngudzu khu kotani nya lihaladzo laye nyo tumbege a gu nalo khethu. (Ndzi. 103:10, 11) Ha gu hakha makategwa ni malungelo khavbo gwaye khu kotani nya wuwadi waye nya wukhongolo. — Rom. 12:6-8; Efes. 2:8.

HI NGA POTSA KHARINI GU DZI GOLA NGUDZU ETHU VAMUNE?

Dzi woneye ni mavbanyelo nya litigo leli. Nya mba si tugula hi nga pheya gu pimisa gu khethu hi ngu yedwa khu silo nya singi guvbindra vambe. Jesu yeyedzide edzi si vbevbugago khidzo gu pimisa khu ndziya yoyo khu gu thumisa gipimaniso nya sithumi si nga ba si hakhiswa dhenaryo mweyo. Simbe sithumi si di pheya gu thuma dzimindrudzile kala li pfola, vbavbatshi nya lihani nya dahu-dahu; vambe va thuma ora mweyo. Ava nyo pheye va di pimisa gu khavo va di yede gu hakha dzitsapawu nya dzingi kholu va nga thuma tepo nya yingi. (Mat. 20:1-16) Khu gu thumisa gipimaniso gegi, Jesu a di gu vbweta gu hevbudza valandreyi vaye gu khuye va yede gu eneledwa khesi Nungungulu a tsakago khu gu va ninga.

Bonga, nigu u nga vireyi gu ningwa silo khu vambe. (1 Tes. 5:18) Pimedzeya mupostoli Pawulo a nga mba lomba giphaso nya dzitsapawu vandriyathu va Korinto ambari a nga ba ari ni fanelo nyo gire isoso. (1 Kor. 9:11-14) Hi yede gu bonga khu makategwa yatshavbo hi ningwago nasiri gu vireya nya singi ga vambe.

Haguleya likhalelo nya gu dzi nogise. Tepo muthu a pheyago gu pimisa ngudzu khuye mune, nya mba kanakana a na pheya gu dzi wona nari ni fanelo nya yikhongolo ngudzu guvbindra eyi a gu nayo. Gudzinogisa rendre nya wadi gasi gu thuma mapimo yoyo nya mba yadi.

Muprofeti Dhaniyeli ningide giyeyedzo nya gyadi avba nya gu yeyedze gudzinogisa. Khu kotani nya ndraga a nga dugeya avbo, gu mbura, guti ni makodzelo a nga ba ari nawo, na pimiside gu khuye a di yedwe gu pharwa khu ndziya nyo hathege nigu a di gu fanedwa khu malungelo a ma hakhidego. (Dhan. 1:3, 4, 19, 20) Ambari ulolo, Dhaniyeli a di simama gu dzi nogisa, nigu likhalelo leli li mu giride a manega ni lisima ga Jehovha. — Dhan. 2:30; 10:11, 12.

Hongoleni hi potsa gu dzi gola ngudzu habune, a gu likhalelo li gu romo tigoni momu muhuno. Wulangani nya isoso, hongoleni hi simama gu tsaka khu makategwa yatshavbo Jehovha a hi ningago khu gu thumisa wuwadi waye nya wukhongolo.