U ngu wuti sihalo nya gu eneledwe khesi u gu naso?

1. Sa gu thula ginani gu tsaka khesi hi gu naso, nigu kha si thuli ginani?

INA u ngu dzipwa na wu eneledwa khesi u gu naso? Vale va tsakago khesi va gu naso, va gu dzipwa kharato kholu va ningago lisima silo nya sadi Jehovha a va ningidego. Nigu kha nga handro wakone, va na ni litsako ni gurula. Avo kha va zangari mwendro gu swihala khu kotani nya esi va gu mwalo naso. Ganiolu, ambari na hi gu tsaka khu giemo nya womi wathu, kha si thuli gu khiso kha hi yeli gu garadzega khedzi hi vbanyago khidzo womi wathu. Khu giyeyedzo, Mukristo a gu vbwetedzeya mathomo gasi gu andrisa thumo waye. (Rom. 12:1; 1 Thim. 3:1) Ganiolu, kha luzi litsako tepo a hweyago gu hakha mithumo a nga ba yi vbweta.

2. Khu ginani si gu mhango gu mba eneledwa khesi hi gu naso?

² Ha gu mba eneledwa khesi hi gu naso, hi na pheya gu hunga makungo nya mba yadi. Vale nya gu gima kha va eneledwi khesi va gu naso, va nga thuma dziora nya dzingi ngudzu gasi gu renga silo si ngu mba vbwetega ngudzu. Nya mba tsakisa khu gu, Makristo nyo khaguri ma bide dzitsapawu ni simbe silo ma nga ba ma si dogoreya. Ayo adzina ma pimiside gu khayo: ‘Esi si yede gu nyi lumba’ mwendro ‘Nyi nga dzega dzitsapawu olu, ganiolu khu gu gimbiya nya tepo nyi na bweledza.’ Ambari ulolo, dzatshavbo dzindziya nya gube kha dzi ningi wuzundzo Jehovha. (Mav. 30:9) Vambe va di khunguvanyega kholu va nga mba hakha thumo va nga ba va wu vbweta nyo bwe va ema gu thumeya Jehovha. (Gal. 6:9) Khu ginani githumi gya Jehovha gi nga pimisago gu gira isoso? Kholu vbagudwana-vbadugwana gi di ema gu haguleya gu eneledwa khesi gi gu naso.

3. Lisine muni li hi tiyisago hi nga li hevbulago omu ga Vafilipi 4:11, 12?

³ Hatshavbo hi nga haguleya gu eneledwa khesi hi gu naso. Mupostoli Pawulo lovide gu khuye a di gu “hevbude gu eneledwa ni ga gevbini giemo [gyaye.]” (Leri Vafilipi 4:11, 12.) Uye a di lova malito yaya na khothedwe pasoni. Ambari ulolo, kha luza litsako laye. Uye a di gu ‘hevbude sihalo’ nya gu eneledwe khesi a gu naso. Ha gu dzi garadzeya gu tsaka khesi hi gu naso, malito ya Pawulo ni giyeyedzo gyaye gi nga hi tiyisegisa gu khethu anethu hi nga eneledwa khesi hi gu naso ambari na hi gu romo ni ga gevbini giemo. Kha hi yeli gu vireya gu khethu hi dzipwa na hi gu eneledwa khesi hi gu naso nya mba gira gilo. Ganiolu, hi yede gu hevbula gu eneledwa khesi hi gu naso. Khu ndziya muni? Avba nya ndrima yeyi, hi na bhula khesi si nga hi phasago gu eneledwa khesi hi gu naso.

BONGA KHESI U GU NASO

4. Khu ginani gu yeyedza gubonga gu hi phasago gu tsaka khesi hi gu naso? (1 Vatesalonika 5:18)

⁴ Muthu a yeyedzago gubonga gu tala nya dzitepo a ngu tsaka khesi a gu naso. (Leri 1 Vatesalonika 5:18.) Khu giyeyedzo, ha gu bonga khesi hi gu naso, kha hi na nga khaleya gu pimisa ngudzu khesi hi si vbwetago ganiolu hi gu mwalo naso. Ha gu dundrugeya ni gu bonga khu mithumo hi girago olu, hi na vega gupima avba nya gu gire esi hi si kodzago ga mithumo hi gu nayo, wulangani nya gu vege gupima avba nya gu hakhe thumo nya wuphya. Jehovha a ngu dziti gu khuye si na ni lisima gubonga, nigu egi gimwegyo nya gighelo gi girago Jehovha a hi embeya khu gu thumisa Bhibhiliya gu khuye hi yede gu mu bonga tepo hi gombeyago. Tepo hi bongago hi na mana “gurula ga Nungungulu, gu vbindrago gupwisisa gwatshavbo.” — Filp. 4:6, 7.

5. Vaisrayeli va di yede gu yeyedza gubonga khu sighelo muni? (Wona fotu.)

⁵ Wona esi si dugeledego Vaisrayeli. Avo dzitepo nya dzingi va di ngurangureya Jehovha gu khavo va diri mwalo guhodza va nga ba va hodza Egipto. (Mite. 11:4-6) Lisine gu womi giwulani kha wa nga ba wu vbevbuga. Ganiolu, ginani gi nga hadzi gu va phasa gu eneledwa khesi va nga ba vari naso? Avo va di yede gu dundrugeya khesi Jehovha a nga ba a va girede. Tepo khiyo va nga ba vari dzigumbi va bwe va tshaniswa Egipto, Jehovha a di resa 10 mitungo Egipto a bwe a va vbulugisa. Tepo Vaisrayeli va nga duga khu Egipto, Jehovha a va phaside gu dzega prata nya yingi, oru ni sombo sa Vaegipto. (Ekiso. 12:35, 36) Tepo Vaisrayeli va nga landrwa kala funguni nya yiphwa nyo Fuviye, Jehovha a di kabanisa mati khu vbakari gasi Vaisrayeli va tshatuga. Nigu tepo khiyo va nga ba va endra giwulani, Jehovha ava ningide manaha. Ganiolu, khu ginani Vaisrayeli va nga ba va ngurangura khu gu vbweta guhodza? Ambari olu Jehovha a nga ba a va ningide guhodza nyo eneye, avo kha va nga ba va bonga khesi a va ningidego.

6. Ginani gi nga hi phasago gu yeyedza gubonga?

⁶ Hi nga haguleya kharini gubonga? Gupheya, dusa tepo tshigu ni tshigu gasi gu dundrugeya khu silo nya sadi si gu girago u tsaka. U nga lova silo sivili mwendro siraru u bongago khiso. (Gil. 3:22, 23) Nya wuvili, yeyedza gubonga. Pheya khuwe gu bonga vambe khesi va gu gireyago. Gu vbindra satshavbo, bonga Jehovha tshigu ni tshigu. (Ndzi. 75:1) Nya wuraru, hatha dzipari dza vbafuvbi dzi yeyedzago gubonga. Dzipari dzathu dza gu ba dzi si yeyedzi gubonga mwendro dza gu khaleya gu ngurangura, anethu hi na pheya gu gira sasimweso. Ganiolu dza gu ba dzi yeyedza gubonga, giyeyedzo gyawe nya gyadi gi na hi kutsa gu yeyedza nethu gubonga. (Dhet. 1:26-28; 2 Thim. 3:1, 2, 5) Tepo hi vbwetedzeyago mathomo nya gu bonge, kha hi garadzegi ngudzu khu sigaradzo sathu ni silo hi si vbwetago ganiolu hi gu mwalo naso.

7. Ginani gi phasidego ndriyathu Aci gu tsaka khu lisine?

⁷ Wona esi si dugeledego ndriyathu Aci, a vbanyago Indonésia. Uye wari khuye: “Ndrani nya tungo nya COVID-19, nyi di pheya gu fananisa giemo gyangu ni egi gya vambe vandriyangu. Kha nga handro wakone, nyi di pheya gu mba tsaka khesi nyi nga ba nyiri naso.” (Gal. 6:4) Ginani gi mu phasidego gu vbindrugedza mapimiselo yaye? Aci a gu engedza gu khuye: “Nyi di pheya gu kotari makategwa nyi nga ba nyi manega nawo tshigu ni tshigu ni gu dundrugeya khu silo nya sadi nyi si manago khu gu gira gipandre nya hengeledzano ya Nungungulu. Khu gu landreya, nyi bonga Jehovha khu satshavbo. Isoso si nyi phaside gu tsaka khu lisine.” Wa gu ba u si tsaki khu giemo gyago, ina u nga gira esi ndriyathu Aci a giridego gasi a yeyedza gubonga?

DZI NOGISE

8. Ginani gi dugeledego Bharuki?

⁸ Mulovi wa muprofeti Jeremiya, Bharuki, ga tepo nyo khaguri kha eneledwa khu giemo gyaye. Bharuki a diri ni thumo nyo garadze. Uye a di yede gu phasa Jeremiya gu embeya Vaisrayeli va nga ba va si yeyedzi gubonga esi si nga hadzi gu va giregeya kholu va nga mba engisa Jehovha. Ganiolu, wulangani nya gu vege gupima ga esi Jehovha a nga ba a vbweta gu khuye a gira, Bharuki a di pheya gu pimisa ngudzu khesi a nga ba a vbweta gu gira. Khu gu thumisa Jeremiya, Jehovha a di embeya Bharuki gu khuye: “Wa gu dogorela gu mana silo nya sikhongolo, gani? Diga gu dogorela gogo.” (Jer. 45:3-5) Khu mambe malito, Jehovha a di gu embeya Bharuki gu khuye: “Eneledwa khesi u gu naso olu.” Bharuki a di dzumeya gu kawukwa a bwe a simama gu tsakedwa khu Jehovha.

9. Ginani hi gi hevbulago omu ga 1 Vakorinto 4:6, 7? (Wona dzifotu.)

⁹ Dzimbe dzitepo, Mukristo a nga pimisa gu khuye a yede gu gira thumo nyo khaguri. Adzina saye kholu a gu na ni makodzelo nya mangi, a thumago khu gu dzigaradza mwendro olu a thumeyago Jehovha khu myaga nya yingi. Ganiolu, vambe va nga hakha thumo va wu vbwetago. Ginani gi na mu phasago gu mba goroga? Uye a nga dundrugeya khu malito ya Pawulo ma gu romo omu ga 1 Vakorinto 4:6, 7. (Leri.) Yatshavbo mithumo hi hakhago ni makodzelo hi gu nawo, ma guta khiyo ga Jehovha. Jehovha kha hi ningi silo soso kholu hi di hathega ngudzu guvbindra vambe. Wulangani nya isoso, Jehovha a gu hi ninga silo soso kholu a hi haladzago ni olu a gu na ni wuwadi nya wukhongolo. — Rom. 12:3, 6; Efes. 2:8, 9.

10. Hi nga haguleya kharini gudzinogisa?

¹⁰ Hi nga haguleya gudzinogisa khu gu dundrugeya giyeyedzo Jesu a hi vegedego. Wona esi si dugeledego ga wutshigu Jesu a nga handza migondro ya vapostoli vaye. Mupostoli Johane a di lova gu khuye: “Jesu a di gu dziti gu khuye [1] Papayi a di mu ningide satshavbo, nigu [2] a di guta khiyo ga Nungungulu ni gu [3] a di gu hongola ga Nungungulu . . . a di pheya gu handza migondro ya vapizane.” (Joh. 13:3-5) Jesu na dzipwide gu khuye a diri ni fanelo nya gu handzwi migondro khu vapostoli vaye. Ganiolu, Jesu gima kha pimisa gu khuye kha nga olu a gu Gyanana gya Nungungulu a yede gu manega ni nyumba nya yadi, dzitsapawu nya dzingi mwendro womi nyo khadzisege. (Luka 9:58) Jesu a di gu dzi nogisa ni gu eneledwa khesi a nga ba ari naso. Uye a hi vegede giyeyedzo nya gyadi. — Joh. 13:15.

11. Ginani gi phasidego ndriyathu Dennis gu eneledwa khesi a gu naso?

¹¹ Dennis, a vbanyago Holanda, a di zama gu dzi nogisa gu fana ni Jesu, ganiolu kha sa mu vbevbugeya. Uye wari khuye: “Tepo muthu nyo khaguri a hakhago thumo nyi nga ba nyi wu vbweta, dzimbe dzitepo nya gu goroga kholu nyo pimisa gu kheni nyi di yede gu hakha eni thumo wowu. Tepo nyi dzipwago kharato, nya gu hevbula maningano khu gu dzi nogisa. Omu nya JW Library^®, nyi markaride milowo yi ganeyago khu gu dzi nogisa gasi nyi si kodza gu yi mana khu gu vbiredza nyi bwe nyi pheledza gu leri. Nigu nyi tshiside dziganelo nyo khaguri dzi ganeyago khu gudzinogisa, nigu nyi ngu dzi engiseya tepo yatshavbo.a Nyi hevbude gu kheni ha gu gira mithumo yatshavbo gasi gu dhumisa Jehovha nasiri gu dzi dhumisa ethu vabune. Khu wuwadi, Jehovha a gu dzumeleya gu khuye moyo ni moyo wathu a manega ni gilo nyo gire, ganiolu khuye a girago gu thumo wu dugeleya.” Litshigu limwedo wa gu mba tsaka khu gu mba hakha thumo u wu vbwetago, dzi garadzeye gu dzi nogisa. Isoso si na tiyisa wupari wago ni Jehovha ni gu gu phasa gu eneledwa khesi u gu naso. — Jak. 4:6, 8.

DUNDRUGEYA KHU SITUMBISO SA JEHOVHA

12. Gutumba muni hi gu nago khu wumindru gu hi phasago gu tsaka khesi hi gu naso? (Isaya 65:21-25)

¹² Hi ngu tsaka khesi hi gu naso tepo hi dundrugeyago khu situmbiso Jehovha a hi tumbisago. Omu nya libhuku la Isaya, Jehovha a gu hi embeya gu khuye a ngu pwisisa gu khuye hi na ni sigaradzo nya singi. Ganiolu, a ngu hi tumbisa gu khuye a na fuvisa satshavbo sigaradzo. (Leri Isaya 65:21-25.) Hi na manega ni dzinyumba nyo mbure nigu nyo khadzisege. Hi na manega ni thumo wu na hi ningago litsako, nigu hi na hodza guhodza nya gwadi nigu wu tshambago. Gima kha hi na nga garadzega gu khethu hi na giregedwa khu silo nya mba sadi gumogo ni sanana sathu. (Isa. 32:17, 18; Ezek. 34:25) Hi nga tiyisega khu gu vbeleya gu khethu satshavbo silo sesi si na tadzisega khu lisine.

13. Sigaradzo muni hi emisanago naso, nigu gu dundrugeya khu gutumba gwathu nya wumindru si na hi phasa kharini?

¹³ Khu ginani si gu na ni lisima ngudzu gu dundrugeya tepo yatshavbo khu gutumba gwathu? Kholu ha gu vbanya “matshigoni nya guhegise,” nigu hatshavbo hi na ni sigaradzo si ‘garadzago gu emisana naso.’ (2 Thim. 3:1) Tshigu ni tshigu, Jehovha a ngu hi phasa gu timiseya khu gu hi ninga wusingalagadzi, tshivba ni giphaso hi gi vbwetago. (Ndzi. 145:14) Gu diga isoso, gutumba hi gu nago gu ngu hi phasa dziteponi nya sigaradzo. Adzina wa gu thuma ngudzu, gasi gu renga basi guhodza, sombo nyo ambale ni wulanga gasi khala ni ndranga yago. Ina so thula gu khiso tepo yatshavbo u na vbanya kamo kharato? Ahihi! Jehovha a tumbiside gu gu ninga esi u si vbwetago, silo nya singi ngudzu, ngudzu kamo, paradhesini. (Ndzi. 9:18; 72:12-14) Adzina saye wa gu emisana ni madwali nya makhongolo, dhepresawu mwendro guvbisa givilini. Ina u na tshaniseka khu ndziya yoyo kala gupindruga? Ne vbadugwana! Madwali ni gufa si na fuva mafuni nya maphya ya Nungungulu. (Gutu. 21:3, 4) Gutumba gogu gu ngu hi phasa gu tsaka, hi si gorogi khesi si hi dugeleyago olu. Hi nga simama gu tsaka ni gurula ambari muthu a gu hi phara khu ndziya nya mba yadi, hi fedwa khu muthu hi mu golago mwendro gya gu girega gilo nya mba gyadi womini gwathu. Khu ginani? Kholu ambari ha gu tshangana ni gevbini gigaradzo, hi ngu dziti gu khethu kha “gitepwana” nigu mafuni nya maphya kha hi na nga tshaniseka gambe. — 2 Kor. 4:17, 18.

14. Hi nga tiyisa kharini gutumba gwathu?

¹⁴ Kha nga olu gutumba gwathu khu wumindru gu hi phasago gu tsaka khesi hi gu naso, ginani gi nga hi phasago gu tiyisega gu khethu situmbiso sa Jehovha si na tadzisega khu lisine? Gufana ni muthu a yedego gu ambala dziokulu gasi gu wona gwadi silo si gomogo hwindzo, hi yede gu gira gilogyo gasi hi tiyisa gutumba gwathu, kholu isoso si na hi phasa gu wona paradhesi yitago. Khu giyeyedzo, tepo hi garadzegago khu gu mba mana dzitsapawu nyo eneyi gasi hi dzi sayisa, hi nga dundrugeya edzi wu na khalago khidzo womi wathu tepo dzitsapawu dzi na ba dzi si vbwetegi gambe ni gu mba manega gambe wusiwana. Ha gu dzipwa na hi vbede tshivba khu gu mba manega ni malungelo nyo khaguri hi ma vbwetago, hi nga dundrugeya edzi silo soso si gu mwalo ngudzu lisima ha gu si fananisa ni womi nya gu tsakise hi na manegago nawo tepo hi na khalago vathu nyo vbeleye. (1 Thim. 6:19) Ha gu garadzega ngudzu khu silo sa muhuno, si nga hi garadzeya gu dundrugeya khu gutumba gwathu khu wumindru. Ganiolu, ha gu khaleya khu gu dundrugeya khu wumindru nyo tsakise Jehovha a hi tumbisidego, si na hi vbevbugeya gu mba dundrugeya khu sigaradzo sathu.

15. Ginani u gi hevbudego khu malito ya ndriyathu Christa?

¹⁵ Wona edzi gutumba gu nga phasa khidzo ndriyathu Christa, mwangadzi wa Dennis, hi nga ganeya khuye gupheyani. Uye a di khuye: “Nyi na ni madwali ma vbedzago tshivba givili gyangu ni gu kha nyi kodzi gu gimbiya, nyi yede gu thumisa kadera nya marodha nigu nyi ngu vbedza tepo nya yingi kamani. Nyi ngupwa guvbisa litshigu latshavbo. Dhogodheya wangu a nyi embede ga matshigu hwane gu khuye kha nyi na nga hawuluga. Ganiolu, nyi di dzegeya gu ganeya khu mapimoni kheni, ‘uye o wona wumindru khu ndziya nyo hambane ni eni.’ Eni nyo vega gupima ga gutumba gwangu nigu isoso si ngu nyi ninga gurula mapimoni. Muhuno, adzina nyi yede gu timiseya gigaradzo gyangu, ganiolu nyi na dzi buza khu womi nya gupindruge mafuni nya maphya!”

“GIMWALO GI NA KENELELAGO GA AVO VA MU NINGAGO GITHAWO”

16. Khu ginani Pfhumu Dhavhidhe a nga lova gu khuye “gimwalo gi na kenelelago” vale va ningago githawo Jehovha?

¹⁶ Ambari githumi gya Jehovha gi tsakago khesi gi gu naso, gi nga emisana ni sigaradzo. Pfhumu Dhavhidhe emisanide ni gigaradzo nya gu fedwe khu sanana saye nya siraru. Vambe va mu singedzide malipha, dzipari dzaye nyo khaguri kha dza tumbega gwaye nigu zamidwe gu songwa khu myaga nya yingi khu pfhumu Sawule. Ganiolu, ambari tepo a nga ba a emisana ni gigaradzo nya gikhongolo, uye a di gu ganeya khu Jehovha gu khuye: “Gimwalo gi na kenelelago ga avo va mu ningago githawo.” (Ndzi. 34:9, 10) Khu ginani a nga ganeya isoso? Kholu a di gu dziti gu khuye ambari Jehovha a gu mba himbedzeya sigaradzo si dugeleya womini gwaye, uye tepo yatshavbo a di hadzi gu mu ninga esi a nga ba a si vbweta. (Ndzi. 145:16) Anethu hi nga tumba Jehovha gasi a hi phasa ga silingo sathu satshavbo. Hi nga manega ni gurula ni litsako ambari ha gu emisana ni gevbini giemo.

17. Khu ginani u vbwetago gu tsaka khesi u gu naso?

¹⁷ Jehovha o vbweta gu khuye u tsaka. (Ndzi. 131:1, 2) Khu kharato, gira satshavbo u si kodzago gasi u tsaka khesi u gu naso. Wa gu dzi garadzeya ngudzu gasi u haguleya liphuvbo nya gu bonge, u simama na wu vega gupima, gu dzi nogisa gumogo ni gu tiyisa gutumba gwago, u na ganeya gu khuwe: ‘Ina, nyi tsakide.’ — Ndzi. 16:5, 6.