Baami Wakusaanguna
10 Mwaami wachanakazi wakuShebba wakamvwa mpuwo yaSolomoni atala azina lyaJehova, nkinkaako, wakasika kuti azoomusunke aamibuzyo miyumu loko.* 2 Wakasika muJerusalema kali aabasikumusindikila biingi, ankamela zyakanyampwide mafuta aabbalisamu, angolida nyingi loko, amabwe aayandikana. Wakanjila mwakali Solomoni mpawo wakamubuzya zyoonse zyakali aansi aamoyo wakwe. 3 Mpawo Solomoni wakayisandula mibuzyo yakwe yoonse. Taakwe chakamuyumina pe mwaami* kuti amupandulwide.
4 Mwaami wachanakazi wakuShebba naakabona busongo bwaSolomoni boonse, ng’anda njaakayaka, 5 chakulya chaatebbulu lyakwe, mbubakali kukkala babelesi bakwe, milimu yakali kuchitwa aabasikumweetela chakulya aatebbulu azigogo nzibakazweete, basikumweetela zyakunywa, azipo zitentwa nzyaakali kukkala kapa kung’anda yaJehova, wakasyaala katakwe lyakwaamba pe. 6 Mpawo wakabuzya mwaami kuti: “Mpuwo njindakamvwa kandili kunyika yangu atala amilimu njwaakachita* abusongo bwako njachoonzyo. 7 Pesi teendakazisyoma pe nzindakamvwa kusikila ndalizida biya akulibonena ameso aangu. Lino bona! Nzindakabuzigwa tazisiki biya pe kuhafu. Busongo bwako abunoti bwako bwiiyinda kule loko mpuwo njindakamvwa. 8 Balabotelwa bantu bako, alubo balabotelwa babelesi bako bayimikila kunembo lyako chiindi choonse, kabaswiilila busongo bwako! 9 Atembawulwe Jehova Leza wako, ooyo wakakuyanda kwiinda mukukubikka aachuuno chabwaami cha-Israyeli. Akaambo kaluyando lutamani Jehova ndwalaalo kuli Israyeli, wakakusala kuti ube mwaami, kuchitila kuti ubeteke kabotu akweendelezya mubululami.”
10 Mpawo mwanakazi ooyo wakapa mwaami matalenta* aangolida aali 120, amafuta aabbalisamu miingi loko, amabwe aayandikana. Taakwe nikwakazooyetwa mafuta aabbalisamu miingi oobu pe mbuli aayo mwaami wachanakazi wakuShebba ngaakapa Mwaami Solomoni.
11 Maato aaHiramu aayo aakali kunyampula ngolida ku-Ofiri, akali kweeta masamu aamu-alugamu kaali miingi loko amabwe aayandikana kuzwa ku-Ofiri. 12 Mwaami wakabelesya masamu aamu-alugamu kupanga zyakutaba ng’anda yaJehova azyang’anda yamwaami,* tuntimbwa, azibelesyo zyantambo zyakwiimbya zyabayimbi. Masamu aamu-alugamu aali boobu taakwe naakeetwa lubo pe nikuba kuboneka kusika sunu.
13 Mwaami Solomoni anguwe wakapa mwaami wachanakazi wakuShebba zyoonse nzyaakali kuyanda anzyaakakumbila, kuyungizya kuli zeezyo nzyaakamupa akaambo kakuti wakali muntu uupa. Kuzwa waawo, wakabweeda kunyika yakwe ababelesi bakwe.
14 Ngolida yakali kweetwa kuli Solomoni munyaka amunyaka, yakali kulema matalenta aali 666, 15 kutaswaanizya ayeeyo yakali kuzwa kuli basikuuzya, akumpindu yakali kuzwa kuli basikuuzya, ayakali kuzwa kubaami boonse bama-Arabbu akubeendelezi bamunyika.
16 Mwaami Solomoni wakapanga ntobo mpati zili 200 zyangolida iiswaanizidwe aayimwi nsimbi (ntobo imwi ayimwi yakali aangolida iilema mashekeli* aali 600) 17 antobo niini* zili 300 zyangolida iiswaanizidwe aayimwi nsimbi (ntobo niini imwi ayimwi yakali aangolida iilema mamayina* aatatu). Mpawo mwaami wakazibikka muNg’anda yaLusaka lwakuLebbanoni.
18 Alubo mwaami wakapanga chuuno chabwaami chipati chameja aanzovu mpawo wakachizilulula aangolida yakasalazigwa. 19 Kwakali matantilo aali musanu alimwi kusika aachuuno chabwaami. Kusule lyacho kwakali kaluli kalawundi, azyakubikka maboko nakkede mumabazu aabili aachuuno, alubo balavu babili bakaliimvwi mumbali aazyakubikka maboko eezyo. 20 Alubo kwakali balavu bali 12 bakayimvwi aamatantilo aali musanu alimwi, tantilo limwi alimwi lyakali aabalavu babili mumbali. Taakwe bumbi pe bwaami bwakapangide chuuno chili mbuli eechi.
21 Zyakunywida zyoonse zyaMwaami Solomoni zyakali zyangolida, azibelesyo zyoonse zyamuNg’anda yaLusaka lwakuLebbanoni zyakali zyangolida iisalala. Taakwe chintu chakapangidwe aansiliva pe, nkaambo nsiliva teeyakali kubonwa mbuli chintu biya pe mumazuba aaSolomoni. 22 Nkaambo mwaami wakali aamaato aakuTashishi mulwizi, aayo aakalaamwi amaato aaHiramu. Kamwi muminyaka iitatu, maato aakuTashishi akali kuza kaazwide ngolida ansiliva, meja aanzovu, bacheta, amapikkokku.
23 Nkinkaako, Mwaami Solomoni wakali aabunoti abusongo bwiingi loko kwiinda baami boonse baanyika. 24 Bantu bamunyika yoonse bakali kuyanda kubona Solomoni,* kuchitila kuti bamvwe busongo bwakwe oobo Leza mbwaakabikka mumoyo wakwe. 25 Umwi awumwi wakali kweeta chipo—zibelesyo zyansiliva, zibelesyo zyangolida, zigogo, zilwanisyo, mafuta aabbalisamu, mabbiza, amyuulu*—eezi zyakali kuchitika munyaka amunyaka.
26 Alubo Solomoni wakaliswini kubunganizya ngolo amabbiza.* Wakali aangolo zili 1 400 amabbiza aali* 12 000, alubo wakazibikka mumyuunzi yakali kubambilwa ngolo aafwiifwi amwaami muJerusalema.
27 Mwaami wakapa kuti nsiliva ivule mbuli mabwe muJerusalema, amasamu aamukkedari avule mbuli mikuyu muShefela.
28 Mabbiza aaSolomoni akali kuulwa ku-Ijipita, alubo nkamu yabasikuuzya bamwaami bakali kuula mabbiza* amuulo uumwi kaali mumatanga. 29 Ngolo imwi ayimwi yaku-Ijipita yakali kuulwa aansiliva zili 600, mpawo bbiza limwi lyakali kuulwa aansiliva zili 150, ambabo bakali kuzyuuzizya baami boonse bamaHeti abaami bakuSiriya.