Baami Wakusaanguna
12 Rehobbowamu wakaya kuShekkemu nkaambo ma-Israyeli boonse bakali baya kuShekkemu kuti bakamubikke kuba mwaami. 2 Jerobbowamu mwana waNebbati mbaakamvwa biyo makani aaya (wakachili mu-Ijipita, nkaambo wakali wachija Mwaami Solomoni alubo wakali kukkala mu-Ijipita), 3 bakamutumina bantu kuti bakamwiite. Kuzwa waawo, Jerobbowamu ambungano yoonse yama-Israyeli bakasika kuli Rehobbowamu bamubuzya kuti: 4 “Wuso wakapa kuti jokwe lyesu litulemene. Pesi kuti iwe watuubisizya milimu miyumu wuso njaakatupa, alubo kuti utuubisizye jokwe demu* wuso ndyaakatubikka, tulakubelekela.”
5 Mpawo wakati kulimbabo: “Amwiinke muzooboole nikwayinda mazuba aatatu.” Nkinkaako, bantu bakeenda. 6 Mwaami Rehobbowamu wakabuzya kubaalumi bachipati* bakali babelekela Solomoni wisi kachipona kuti: “Ngaali malayilile ngimukonzya kundipa kuti ndisandule bantu aaba?” 7 Bakamusandula kuti: “Kuti sunu waba mubelesi wabantu aaba, waswiilila nzibalikukumbila akubasandula kabotu, balaba babelesi bako chiindi choonse.”
8 Nikuba oobo, wakaakaka malayilile ngibakamupa baalumi bachipati,* mpawo wakabuzya kubaalumi bachiniini mbaakakomenaabo, aabo bakali baba babelesi bakwe aachiindi eecho. 9 Wakababuzya kuti: “Ngaali malayilile ngimukonzya kwaamba kuti tusandule bantu aaba bakandibuzya kuti, ‘Tuubisizye jokwe wuso ndyaakatubikka’?” 10 Baalumi bachiniini mbaakakomenaabo bakamubuzya kuti: “Nzezi nzweelede kubuzya bantu aabo bakakubuzya kuti, ‘Wuso wakapa kuti jokwe lyesu litulemene, pesi iwe weelede kutuubisizya,’ babuzye kuti, ‘Ime ndizoomupenzya loko kwiinda ndeende.* 11 Ndeende wakamubikka jokwe demu, pesi ime ndizooyungizya aajokwe eelyo. Ndeende wakamusubula aazimboko, pesi ime ndizoomusubula aazimboko zili aamaamvwa.’”
12 Jerobbowamu abantu boonse bakaboola kuli Rehobbowamu mubuzuba bwachitatu mbuli mbaakali waamba mwaami kuti: “Muzooboole mubuzuba bwachitatu.” 13 Pesi mwaami wakasandula bantu kali aabukali, wakakaka malayilile ngibakamupa baalumi bachipati.* 14 Wakaambuulaabo kweendelana amakani ngaakabuzigwa aabaalumi bachiniini, wakati: “Ndeende wakapa kuti jokwe lyanu limulemene, pesi ime ndizooyungizya aajokwe lyanu. Ndeende wakamusubula aazimboko, pesi ime ndizoomusubula aazimboko zili aamaamvwa.” 15 Nkinkaako, mwaami taakabaswiilila pe bantu, nkaambo Jehova nguwe wakapa kuti eezi zichitike, kuchitila kuti lizuzikizigwe jwi Jehova ndyaakali waamba kwiinda muli Ahija wakuShilo kuli Jerobbowamu mwana waNebbati.
16 Ma-Israyeli boonse nibakabona kuti mwaami wakaka kubaswiilila, bantu bakasandula kuti: “Tuli aachaabiloonzi biya muli Davida? Tatukwe lukono pe kumwana waJese. Yinka kuli baleza bako, O Israyeli. Lilangile ng’anda yako awulikke iwe Davida!” Kuzwa waawo, ma-Israyeli bakabweeda kumyuunzi yabo.* 17 Pesi Rehobbowamu wakayinkilila kunembo kweendelezya ma-Israyeli bakali kukkala mumyuunzi yaJuda.
18 Mpawo mwaami Rehobbowamu wakatuma Adoramu, ooyo wakali kulanga aabo bakayitwa kuti babeleke milimu iimizya, pesi ma-Israyeli boonse bakamuuma aamabwe kusikila wafwa. Mwaami Rehobbowamu wakakonzya kutanta ngolo yakwe kuti achijile kuJerusalema. 19 Alubo ma-Israyeli bakabukila ng’anda yaDavida kusika sunu.
20 Ma-Israyeli boonse mbubakamvwa biyo kuti Jerobbowamu waboola, bakamwiita kuti aze kumbungano mpawo bakamubikka kuti abe mwaami wama-Israyeli. Taakwe muntu wakatobela bamung’anda yaDavida kunze kwamusyobo waJuda awulikke.
21 Rehobbowamu mbaakasika biyo muJerusalema, wakabunganizya bamung’anda yaJuda boonse abamusyobo waBbenjamini, basilumamba bayiisidwe* kulwana nkondo bali 180 000 kuti balwane bamung’anda ya-Israyeli, kuchitila kuti baboozye bwaami kuli Rehobbowamu mwana waSolomoni. 22 Mpawo jwi lyaLeza wakasimpe lyakasikila Shemaya muntu waLeza wakasimpe kaliti: 23 “Buzya Rehobbowamu mwana waSolomoni mwaami waJuda abamung’anda yaJuda boonse ayaBbenjamini abantu boonse kuti, 24 ‘Nzezi nzyaamba Jehova: “Mutayinki pe kukulwana bananyokwe ma-Israyeli. Umwi awumwi wanu abweede kung’anda yakwe, nkaambo ndime ndapa kuti eezi zichitike.”’” Bakaswiilila jwi lyaJehova mpawo bakabweeda kumyuunzi yabo mbuli Jehova mbaakababuzya.
25 Jerobbowamu wakayaka* Shekkemu muzilundu zya-Efremu wakkala nkukooko. Wakazwa ooko waakuyaka* Penuweli. 26 Jerobbowamu wakalibuzya kuti mumoyo wakwe: “Lino bwaami bulabweeda kung’anda yaDavida. 27 Kuti bantu aaba bayinkilile kunembo kwiinka kung’anda yaJehova muJerusalema kuti bakape zipayizyo, myoyo yabantu aaba anjiyo ilabweeda kuli simalelaabo Mwaami Rehobbowamu waJuda. Kwaamba choonzyo, bazoondijaya babweede kuMwaami Rehobbowamu waJuda.” 28 Mwaami naakabuzya kuli basikumupa lulayo, wakapanga bana bang’ombe bangolida babili mpawo wakabuzya bantu kuti: “Kwiinka kuJerusalema kwamumizya loko. Ngoyu Leza wako, O Israyeli, ooyo wakakugwisya munyika ya-Ijipita.” 29 Umwi wakamubikka kuBbeteli mpawo umwi wakamubikka kuDani. 30 Eezi zyakapa kuti bantu babisye, alubo bantu bakali kweenda kuyoosika kuDani kuti bakakombe umwi wakali nkukooko.
31 Alubo wakayaka maanda aakukombela mundawu zyakukombela alubo wakasala bantu biyo bakatali maLevi pe kuti babe bapayizi. 32 Alubo Jerobbowamu wakatalisya pobwe mumweezi wamusanu ayitatu mubuzuba bwachi 15 mumweezi ooyo, mbuli pobwe lyakali kuchitwa muJuda. Wakapa zipayizyo kubana bang’ombe aachipayililo nchaakapanga kuBbeteli, alubo kuBbeteli wakabikka bapayizi kuti babeleke mundawu zyakukombela nzyaakapanga. 33 Wakasaanguna kupa zipo zitentwa aachipayililo nchaakapanga kuBbeteli mubuzuba bwachi 15 mumweezi wamusanu ayitatu, mweezi ngwaakaliyeeyela alikke. Wakatalisya pobwe lyakali kuchitwa aama-Israyeli, alubo wakatanta aachipayililo eecho kuti ape zipayizyo akuuntumuna busi bwazipayizyo.