Baami Wakusaanguna
18 Nikwakayinda chiindi, mumunyaka wachitatu, ijwi lyaJehova lyakasikila Elija kaliti: “Yinka ukalitondeezye kuli Ahabbu, mpawo ndilawisya mvula aanyika.” 2 Nkinkaako, Elija wakayinka kuti akalitondeezye kuli Ahabbu chiindi nikwakali nzala mpati loko muSamariya.
3 Aachiindi eecho, Ahabbu wakayita Obbadiya, ooyo wakali mulangizi wabamung’anda yakwe. (Obbadiya wakali kumuyoowa loko Jehova, 4 alubo chiindi Jezebbeli naakali kujaya* bapolofita baJehova, Obbadiya wakabweza bapolofita bali 100 wabasisa kabali 50 mumpako yabbwe imwi ayimwi, alubo wakali kubapa chinkwa amaanzi.) 5 Mpawo Ahabbu wakati kuli Obbadiya: “Yinka kutusawu twamaanzi toonse akutulonga toonse. Amwi tulakonzya kujana masokwe miingi aamabbiza amyuulu,* kuchitila kuti banyama besu boonse batafwi.” 6 Nkinkaako, bakaabana ndawu umwi awumwi nkwaakali kuzootozya. Ahabbu wakayinka aalikke kabelesya imwi nzila, anguwe Obbadiya wakayinka aalikke kabelesya iimbi nzila.
7 Obbadiya naakali kweenda, Elija wakayinka kuti akaswaananaawe. Wakamuziba mpawaawo mpawo wakavuntama aansi wati: “Simalelaangu Elija, nduwe na choonzyo?” 8 Wakamusandula kuti: “Iiyi ndime. Yinka ukabuzye simalelaako kuti: ‘Elija uli ookuno.’” 9 Pesi wakati: “Ndabisyaanzi ime ndimubelesi wako zyakuti nga ulandibikka mukuboko kwa-Ahabbu kuti andijaye? 10 AJehova Leza wako muumi, taakwe chisi naakuti bwaami, ooko simalelaangu nkwaakatatuma bantu kuti bakakuyanduule. Nibakaamba kuti, ‘Tawope ookuno,’ wakapa kuti bwaami achisi zikonke kuti teezyakakujana pe. 11 Lino iwe ulikwaamba kuti, ‘Yinka ukabuzye simalelaako kuti: “Elija uli ookuno.”’ 12 Nindazwa biyo aalinduwe, muuya waJehova ulakutola kundawu njinditazi pe alubo nindabuzya Ahabbu mpawo aleke kukujana, kwaamba choonzyo ulandijaya. Pesi ime ndimubelesi wako ndalikuyoowa Jehova kuzwa kandichili muniini. 13 Simalelaangu taakabuzigwa na nzindakachita chiindi Jezebbeli naakali kujaya bapolofita baJehova, mbundakasisa bapolofita baJehova bali 100, kabali 50 mumpako yabbwe imwi ayimwi, kandibapa chinkwa amaanzi? 14 Pesi lino ulikwaamba kuti, ‘Yinka ukabuzye simalelaako kuti: “Elija uli ookuno.”’ Kwaamba choonzyo, ulandijaya.” 15 Nikuba oobo, Elija wakati: “AJehova wamakamu muumi, ooyo ngundibelekela, sunu ndilalitondeezya kulinguwe.”
16 Nkinkaako, Obbadiya wakayinka kuti akaakuswaanane aa-Ahabbu alubo wakamubuzya makani aaya, mpawo Ahabbu wakayinka kuti akaswaanane aa-Elija.
17 Ahabbu mbaakamubona biyo Elija, wakati kulinguwe: “Iwe nduwe biya we, nduwe nuulikweetela Israyeli mapenzi mapati.”
18 Wakamusandula kuti: “Teendime pe ndilikweetela Israyeli mapenzi, pesi nduwe ang’anda yawuso, nkaambo mwaleka kutobela milawu yaJehova, mwatobela baBbaala. 19 Lino yita ma-Israyeli boonse baze kulindime kuChilundu chaKkameli kuswaanizya abapolofita baBbaala bali 450 abapolofita bachisamu chisalala* bali 400, aabo balida aatebbulu lyaJezebbeli.” 20 Nkinkaako, Ahabbu wakatumizya mulayizyo aakati kama-Israyeli boonse alubo wakabunganizya bapolofita kuChilundu chaKkameli.
21 Kuzwa waawo, Elija wakaswena aafwiifwi abantu boonse mpawo wakati: “Muyoosika kuli kamuli aamyoyo iibili? Kuti Jehova kali Leza wakasimpe, amutobele nguwe, pesi kuti kali Bbaala, amutobele nguwe!” Pesi bantu taakwe nibakamusandula niliba jwi limwi. 22 Mpawo Elija wakabuzya bantu kuti: “Ndime andikke ndasyaala mupolofita waJehova, kakuli bapolofita baBbaala bali 450. 23 Abatupe bapule bang’ombe babili bachili baniini, mpawo basale pule wang’ombe uumwi uuchili muniini, bamunenge muzipanzi mpawo bamubikke aajulu aankuni, pesi batabikki mulilo pe. Andime ndilachita oobo kuli umwi pule wang’ombe uuchili muniini mpawo ndilamubikka aajulu aankuni, pesi tandikoobikka mulilo pe. 24 Mpawo mweelede kwiita zina lyaleza wanu, andime ndilayita zina lyaJehova. Leza uutasandule kwiinda mukweeta mulilo nguwe uutatondeezye kuti nguuLeza wakasimpe.” Bantu boonse bakasandula kuti: “Nzwaamba zilikabotu.”
25 Elija wakati kubapolofita baBbaala: “Amusale pule wang’ombe uuchili muniini, musaangune inywe kumunenga-nenga, nkaambo inywe muli biingi. Nimwamana mwiite zina lyaleza wanu, pesi mutabikki mulilo pe.” 26 Nkinkaako, bakabweza pule wang’ombe uuchili muniini ngubakapegwa, bamunenga-nenga alubo bakaliswini kwiita zina lyaBbaala kuzwa kuseeni kusika sikati, kabati: “O Bbaala tusandule!” Pesi teekwakalikwe jwi alubo taakwe wakali kusandula pe. Bakaliswini kusotooka kabazyunguluka chipayililo nchibakali bayaka. 27 Nilyakaba sikati, Elija wakasaanguna kubaseka kati: “Amoompololesye! Kabi nguleza! Amwi mizeezo yakwe ilikule naakuti waya kukuligwasya.* Amwi ulikoona, uyanda kubusigwa!” 28 Bakoompololesya alubo bakali kulinenguula aatufulo* amasumu kweendelana achiyanza chabo, kusikila ganzi lyasaanguna kweenda aamibili yabo. 29 Sikati lyakayinda alubo bakaliswini kuchita mbuli bantu bapengede* kusika goko aachiindi nikupegwa chipo chazilyo, pesi teekwakalikwe jwi pe alubo taakwe wakali kusandula pe, taakwe wakali kuswiilila pe.
30 Nikwakayinda chiindi, Elija wakabuzya bantu boonse kuti: “Amuswene aafwiifwi andime.” Nkinkaako, bantu boonse bakaswena aafwiifwi anguwe. Mpawo wakabambulula chipayililo chaJehova chakali chadilisigwa. 31 Elija wakabweza mabwe aali 12, kweendelana anamba yamisyobo yabana baJakkobo, ooyo Jehova ngwaakabuzya kuti: “Israyeli ndilyo litabe zina lyako.” 32 Wakayaka chipayililo amabwe aayo muzina lyaJehova. Mpawo wakasya mugelo uuzyunguluka chipayililo choonse, ndawu mpati iibyalwa mbuto iikkwana masiya* aabili. 33 Mpawo wakazibamba kabotu-kabotu nkuni, akunenga pule wang’ombe uuchili muniini waba muzipanzi mpawo wakamubikka aajulu aankuni. Mpawo wakati: “Amuzuzye maanzi munongo mpati zine, mwaatile aajulu aachipayizyo chitentwa alubo aajulu aankuni.” 34 Mpawo wakati: “Amuzyiindulule lubo nzimwachita.” Nkinkaako, bakachita mbuboobo lubo. Wakababuzya lubo kuti: “Amwiindulule lubo kachitatu.” Nkinkaako, bakachita mbuboobo kachitatu. 35 Maanzi akeenda azyunguluka chipayililo, alubo anguwe wakazuzya mugelo amaanzi.
36 Goko aachiindi nikupegwa chipo chazilyo, mupolofita Elija wakaza kunembo mpawo wakati: “O Jehova, Leza wa-Abbrahamu, Izakka, a-Israyeli, sunu akuzibikane kuti nduwe Leza mu-Israyeli akuti ime ndili mubelesi wako akuti ime ndachita zintu zyoonse eezi kweendelana ajwi lyako. 37 Ndisandule, O Jehova! Ndisandule kuchitila kuti bantu aaba bazibe kuti iwe, Jehova, nduwe Leza wakasimpe akuti ulikuboozya myoyo yabo kulinduwe.”
38 Aachiindi eecho, mulilo waJehova wakaloka kuzwa kujulu mpawo wakalya chipayizyo chitentwa, nkuni, mabwe abulongo alubo wakanyankuta maanzi aakali mumugelo. 39 Bantu boonse nibakabona eezi, bakavuntama aansi mpawaawo mpawo bakati: “Jehova nguuLeza wakasimpe! Jehova nguuLeza wakasimpe!” 40 Mpawo Elija wakati kulimbabo: “Amubajate bapolofita baBbaala! Mutalekeli naba uumwi wabo kuti achije!” Kuzwa waawo, bakabajata mpawo Elija wakayinkaabo kukalonga kaKkishoni, waakubajaya nkukooko.
41 Elija wakati kuli Ahabbu: “Yinka ukalye akunywa, nkaambo kuli kumvwika kuvuuma kwamvula mpati.” 42 Nkinkaako, Ahabbu wakayinka kuti akalye akunywa, pesi Elija wakatanta aajulu aaChilundu chaKkameli mpawo wakavuntama aansi kabikkide busyu aakati kamazwi aakwe. 43 Mpawo wakabuzya mubelesi wakwe kuti: “Yinka ukalange kubbazu lyakulwizi.” Nkinkaako, wakayinka waakulanga mpawo wakati: “Taakwe chiliwo pe.” Elija wakamubuzya kwaziindi zili musanu azibili kuti, “Bweeda lubo.” 44 Aachiindi chamusanu azibili, mubelesi wakwe wakati: “Kuli kayoba kaniini kali mbuli kuboko kwamuntu kali kuzwa mulwizi.” Mpawo wakati: “Yinka ukabuzye Ahabbu kuti, ‘Sunga ngolo! Kunuka kuchitila kuti mvula itakusinkili!’” 45 Aachiindi eecho, julu lyakasiya mbi akaambo kamayoba, guwo lyakawunga mpawo mvula mpati yakawa. Ahabbu wakaliswini kweenzya ngolo kaya kuJezriyeli. 46 Pesi kuboko kwaJehova kwakasika aali Elija, mpawo wakalyaanga chigogo chakwe muchibuno wachijaana kali kunembo lya-Ahabbu kusika naakasika kuJezriyeli.