Baami Wakusaanguna
21 Nizyakayinda zintu eezi, kuli zyakachitika atala amuunda wamisaansa waNabboti wakuJezriyeli. Muunda ooyo wakali kuJezriyeli aafwiifwi amuunzi wa-Ahabbu mwaami waSamariya. 2 Ahabbu wakati kuli Nabboti: “Ndipe muunda wako wamisaansa kuchitila kuti kandilima zisyu, nkaambo uli aafwiifwi ang’anda yangu. Mpawo ndilakupa umwi muunda wamisaansa uulikabotu kwiinda ooyu. Naakuti, kuti kuyanda ndilakupa mali yeendelana aamuulo wawo.” 3 Pesi Nabboti wakati kuli Ahabbu: “Tazili kabotu pe mumeso aaJehova kuti ndikupe lukono lwamasianene.” 4 Nkinkaako, Ahabbu wakanjila mung’anda yakwe kanyemede akuusa akaambo kansandulo njaakapegwa aaNabboti wakuJezriyeli naakamubuzya kuti: “Tandikookupa pe lukono lwamasianene.” Mpawo wakalandabala aabulo bwakwe kalangide kumbali, alubo wakakaka kulya.
5 Mwanakazi wakwe Jezebbeli wakanjila mwaakabede mpawo wakamubuzya kuti: “Nkamboonzi nuuside oobu zyakuti wakaka kulya?” 6 Wakamusandula kuti: “Nkaambo ndabuzya Nabboti wakuJezriyeli kuti, ‘Nduuzizye muunda wako wamisaansa amali. Naakuti, kuti kuyanda, ndilakupa umwi muunda wamisaansa mundawu yawo.’ Pesi wandibuzya kuti, ‘Tandikookupa pe muunda wangu wamisaansa.’” 7 Mwanakazi wakwe Jezebbeli wakati kulinguwe: “Teenduwe na nulikweendelezya kuli mwaami wa-Israyeli? Buka ulye alubo moyo wako awubotelwe. Ime ndilakupa muunda wamisaansa waNabboti wakuJezriyeli.” 8 Nkinkaako, Jezebbeli wakalemba magwalo muzina lya-Ahabbu, waadinda aachidindo chamwaami mpawo wakaatumizya kubaalu akubaalumi balemekwa bakali kukkala mumuunzi mwakali kukkala Nabboti. 9 Mumagwalo aayo wakalemba kuti: “Amwaambilizye kuti bantu balyiimye kulya mpawo mukkazike Nabboti kunembo lyabantu. 10 Alubo mukkazike baalumi babili batagwasyi kunembo lyakwe mpawo bamubejelezye kabati, ‘Iwe watukila Leza amwaami!’ Kuzwa waawo, mumutole aanze aamuunzi, mumupwaye mabwe kusikila afwe.”
11 Nkinkaako, baalumi bakali kukkala mumuunzi mwaakali kukkala, nkukwaamba baalu abaalumi balemekwa bakali kukkala mumuunzi ooyo, bakachita kweendelana azyakalembedwe mumagwalo ngaakabatumizya Jezebbeli. 12 Bakaambilizya kuti bantu balyiimye kulya mpawo bakakkazika Nabboti kunembo lyabantu. 13 Baalumi babili batagwasyi bakasika bakkala kunembo lyakwe mpawo bakasaanguna kubejelezya Nabboti kunembo lyabantu kabati: “Nabboti watukila Leza amwaami!” Kuzwa waawo, bakamugwisya aanze aamuunzi baakumupwaya mabwe kusikila wafwa. 14 Bakatumizya mulayizyo kuli Jezebbeli kabati: “Nabboti wapwayigwa mabwe kusikila wafwa.”
15 Jezebbeli mbaakamvwa biyo kuti Nabboti wapwayigwa mabwe kusikila wafwa, wakati kuli Ahabbu: “Nyampuka, ubweze muunda wamisaansa waNabboti wakuJezriyeli, uulya ngwaakakaka kukuuzizya aamali, nkaambo Nabboti tachiwo pe. Wafwa.” 16 Ahabbu mbaakamvwa biyo kuti Nabboti wafwa, wakanyampuka wayinka kumuunda wamisaansa waNabboti wakuJezriyeli kuti akawubweze.
17 Pesi jwi lyaJehova lyakasikila Elija muTishibbi kaliti: 18 “Nyampuka, yinka kuSamariya ukaakuswaanane aa-Ahabbu mwaami wa-Israyeli. Uli mumuunda wamisaansa waNabboti, ooko nkwaayinka kuti akawubweze. 19 Ukamubuzye kuti, ‘Nzezi nzyaamba Jehova: “Wajaya muntu na mpawo wabweza zintu zyakwe?”’ Umubuzye kuti, ‘Nzezi nzyaamba Jehova: “Kundawu bankala nkubakanyankuta ganzi lyaNabboti, nkunkuko bankala nkubatazoonyankute ganzi lyako.”’”
20 Ahabbu wakati kuli Elija: “Wandijana, iwe sinkondoma!” Elija wakamusandula kuti: “Iiyi ndakujana. ‘Nkaambo iwe uyandisya* kuchita zibi mumeso aaJehova, 21 lino ndilikukweetela mapenzi, ndizookuyayila alubo ndizoonyonyoona baalumi* boonse bamung’anda ya-Ahabbu, kuswaanizya abatagwasyi abatakwe manguzu mu-Israyeli. 22 Ndizoopa kuti ng’anda yako ibe mbuli ng’anda yaJerobbowamu mwana waNebbati akuti ibe mbuli ng’anda yaBbaasha mwana wa-Ahija, nkaambo wandinyemya akupa kuti Israyeli abisye.’ 23 Alubo Jehova waamba kuti atala aJezebbeli: ‘Bankala bazoomulya Jezebbeli mumuunda wakuJezriyeli. 24 Kufumbwa wamung’anda ya-Ahabbu uutazoofwide mumuunzi, uzooligwa aabankala. Kufumbwa uutazoofwide musokwe, uzooligwa aabayuni bamujulu. 25 Kwaamba choonzyo, taakwe nikwakali kwaba umwi muntu uuli mbuli Ahabbu pe, ooyo wakayandisya* kuchita zibi mumeso aaJehova, kayungwa aamwanakazi wakwe Jezebbeli. 26 Wakachita zibi zisesemya loko kwiinda mukutobela zibumbwa zisesemya,* mbuli mbubakachita ma-Amori boonse, aabo Jehova mbaakatanda kunembo lyama-Israyeli.’”
27 Ahabbu mbaakaamvwa biyo majwi aaya, wakadelula zigogo zyakwe wazwaata zigogo zyamasaka. Wakali kulyiimya kulya, wakali koona aansi kazweete zigogo zyamasaka, alubo wakali kweenda kawuside. 28 Ijwi lyaJehova lyakasikila Elija muTishibbi kaliti: 29 “Wamubona na Ahabbu mbaalibombya akaambo kamakani ngindamubuzya? Mbukunga walibombya kunembo lyangu, tandizooyeti penzi eelyo kali muumi. Ndizooyeta penzi eelyo kuli bamung’anda yakwe mumazuba aamwanaakwe.”