Baami Wakusaanguna
8 Aachiindi eecho, Solomoni wakabunganizya baalu ba-Israyeli abasilutwe boonse bamisyobo, basilutwe bamaanda aama-Israyeli. Bakasika kuMwaami Solomoni kuJerusalema kabalikweeta bbokesi lyachizuminano chaJehova kuzwa muMuunzi waDavida, nkukwaamba Ziyoni. 2 Baalumi boonse ba-Israyeli bakabungana kunembo lyaMwaami Solomoni kupobwe* mumweezi wa-Etanimu,* nkukwaamba mweezi wamusanu ayibili. 3 Nkinkaako, baalu boonse ba-Israyeli bakasika, mpawo bapayizi bakanyampula Bbokesi. 4 Bakeeta Bbokesi lyaJehova, tente lyakuswaanganina, azibelesyo zyoonse zisalala zyakali mutente eelyo. Bapayizi amaLevi mbabo bakatantaazyo. 5 Mwaami Solomoni ambungano yoonse yama-Israyeli, aabo bakali bayitwa kuti bazooswaanane aanguwe, bakali kunembo aaBbokesi. Nkinkaako, mbelele ang’ombe zyiingi zyakapayizigwa zyakuti teezyakali kubalika pe.
6 Mpawo bapayizi bakeeta bbokesi lyachizuminano chaJehova balibikka aandawu yalyo, mukaanda kamukati kang’anda, muNdawu Iisalalisya munsi aamababa aamakkerubbi.
7 Mababa aamakkerubbi akalijulikide aajulu aandawu yaBbokesi zyakuti makkerubbi akavumba Bbokesi atusamu twalyo. 8 Tusamu twalyo twakali tulamfu loko zyakuti kumpela kwato kwakali kuboneka muNdawu Iisalala kunembo aakaanda kamukati, pesi teetwakali kuboneka pe aanze. Tuchili mpawaawo kusika sunu. 9 Taakwe chimwi chintu pe chakali muBbokesi kunze kwamabwe aabili aapapalete, aayo Mozesi ngaakabikka mukati kuHorebbu, chiindi Jehova naakapangana chizuminano ama-Israyeli nibakazwa munyika ya-Ijipita.
10 Bapayizi nibakazwa mundawu iisalala, joba lyakazuzya ng’anda yaJehova. 11 Bapayizi bakakachilwa kwiinkilila kunembo kubeleka milimu yabo akaambo kajoba, nkaambo bulemu bwaJehova bwakazuzya ng’anda yaJehova. 12 Aachiindi eecho Solomoni wakati: “Jehova wakaamba kuti uzookkala mumudima uusiya mbi. 13 Ndakonzya kukuyakila ng’anda iisumpukide, ndawu iitanooliwo chiindi choonse njutanookkale kukabe kutamani.”
14 Mpawo mwaami wakachengunuka alubo wakasaanguna kulongezya* mbungano yoonse ya-Israyeli chiindi mbungano yoonse ya-Israyeli niyakayimvwi. 15 Wakati: “Atembawulwe Jehova Leza wa-Israyeli ooyo wakaamba amulomo wakwe kasyomezya ndeende Davida alubo ooyo wakazuzikizya akuboko kwakwe, naakati, 16 ‘Kuzwa mubuzuba nindakagwisya bantu bangu ma-Israyeli mu-Ijipita, taakwe muunzi ngundakasala aakati kamisyobo yoonse ya-Israyeli kuti kuyakwe ng’anda kuti zina lyangu likkale mumo, pesi ndasala Davida kuti ayendelezye bantu bangu ma-Israyeli.’ 17 Alubo ndeende Davida wakali aachiyandisyo mumoyo wakwe chakuyaka ng’anda yiitwa aazina lyaJehova Leza wa-Israyeli. 18 Pesi Jehova wakabuzya ndeende Davida kuti, ‘Wakali aachiyandisyo mumoyo wako chakuyaka ng’anda yiitwa aazina lyangu alubo wakachita kabotu kuba aachiyandisyo eechi mumoyo wako. 19 Nikuba oobo, iwe tuzooyiyaki pe ng’anda, pesi mwanaako ngutazoozyale nguwe uutazooyake ng’anda yiitwa aazina lyangu.’ 20 Jehova wachizuzikizya chisyomezyo nchaakaamba, nkaambo ndanjila mundawu yandeende Davida alubo ndakkala aachuuno chabwaami cha-Israyeli, mbuli Jehova mbaakasyomezya. Alubo ndayaka ng’anda yiitwa aazina lyaJehova Leza wa-Israyeli, 21 akupanga ndawu mumoomo yaBbokesi lili aachizuminano chaJehova nchaakapangana aamasianene naakabagwisya munyika ya-Ijipita.”
22 Mpawo Solomoni wakayimikila kunembo aachipayililo chaJehova, kunembo aambungano yoonse ya-Israyeli alubo wakatambika maboko aakwe kujulu, 23 mpawo wakati: “O Jehova Leza wa-Israyeli, taakwe Leza uuli mbuli nduwe pe kujulu naaba aansi aano aanyika, uubamba chizuminano alubo uutondeezya luyando lutamani kubabelesi bakwe, aabo beenda aamoyo woonse kunembo lyako. 24 Wabamba chisyomezyo nchwaakaamba kumubelesi wako Davida ndeende. Wakaamba chisyomezyo eechi amulomo wako mpawo sunu wachizuzikizya akuboko kwako. 25 Lino O Jehova Leza wa-Israyeli, zuzikizya chisyomezyo nchwaakaamba kumubelesi wako Davida ndeende nwaakati: ‘Takuzoobuliki muntu pe uuzwa mubana bako uutazookkale aachuuno chabwaami cha-Israyeli kunembo lyangu, kufumbwa biyo kuti bana bako bakkala kabatobela nzila zyangu kwiinda mukweenda kunembo lyangu, mbuli nduwe mbwaakeenda kunembo lyangu.’ 26 Ikaka O Leza wa-Israyeli, zuzikizya chisyomezyo nchwaakaamba kumubelesi wako Davida ndeende.
27 “Pesi Leza nga ulakkala na aanyika choonzyo? Bona! Majulu, ijulu lyamajulu, tukkwani pe. Animpo nga ulakkwana na mung’anda eeyi njindayaka? 28 Lino swiilila nkombyo yangu ndimubelesi wako akukumbila kwangu kwakuti undifwide luzyalo, O Jehova Leza wangu, swiilila kulilila lugwasyo kwangu ankombyo yangu ndimubelesi wako njindili kukomba kunembo lyako sunu. 29 Meso aako akkale kaalangide aang’anda eeyi mansiku asikati, ndawu eeyi njwaakaamba nwaakati, ‘Zina lyangu lizooba mumoomo,’ kuchitila kuti uswiilile nkombyo yangu ndimubelesi wako njindikomba kandilangide aandawu eeyi. 30 Swiilila kukumbila kwangu ndimubelesi wako kwakufwidwa luzyalo akukumbila kwabantu bako ma-Israyeli nibakomba kabalangide aang’anda eeyi, alubo mvwa kuli kundawu yako njukkala kujulu, ikaka, bamvwe ubalekelele.
31 “Kuti muntu wabisizya mweenzinyina mpawo wabuzigwa kuti achite chikonke* chili aalutuko, mpawo kachili aansi aachikonke* eecho waza kunembo aachipayilio chako mung’anda eeyi, 32 ikaka mvwa kuli kujulu ubweze ntaamu akubeteka babelesi bako kwiinda mukwaamba mubi kuti ulaamulandu,* mpawo eezyo nzyaakachita uzilundike aamutwe wakwe, alubo waambe mululami kuti takwe mulandu* pe, mpawo umupe bulumbu kweendelana abululami bwakwe.
33 “Kuti bantu bako ma-Israyeli bazundwa aabasinkondonyina akaambo kakuti bakali kukubisizya mpawo baboola kulinduwe balemeka zina lyako, bakomba akukukombelezya kuti ubafwide luzyalo mung’anda eeyi, 34 ikaka bamvwe kuli kujulu, mpawo ulekelele chibi chabantu bako ma-Israyeli akubaboozya kunyika njwaakapa masianyinakulu.
35 “Kuti majulu ajalwa alubo mvula yaleka kuwa akaambo kakuti baliswini kukubisizya, mpawo bakomba kabalangide ndawu eeyi akulemeka zina lyako mpawo basiya chibi chabo akaambo kakuti wababombya,* 36 ikaka mvwa kuli kujulu alubo ulekelele chibi chababelesi bako, bantu bako ma-Israyeli, nkaambo uzoobayiisya atala anzila mbotu njibeelede kweenda mulinjiyo. Wisya mvula aanyika yako njwaakapa bantu bako kayili lukono.
37 “Kuti munyika mwaba nzala, naakuti bulwazi bubi loko, kupya kwiindilide, bulwazi bujaya zilyo, nsozi zyeenda kazili zyiingi, naakuti nsozi* zinyonyoona, naakuti sinkondonyina wabasinkila muliimwi yamyuuzi yamunyika eeyi naakuti kwaba chimwi chipenzyo naakuti kwabbuka bumwi bulwazi, 38 kufumbwa nkombyo, kufumbwa kukumbila kufwidwa luzyalo kuchitwa aawumwi muntu naakuti abantu bako boonse ma-Israyeli, (nkaambo umwi awumwi ulilizi penzi lili mumoyo wakwe) chiindi nibatambika maboko aabo kabalangide kung’anda eeyi, 39 ikaka mvwa kuli kujulu kundawu yako njukkala, balekelele ubweze ntaamu, alubo umwi awumwi umuchitile kweendelana anzila zyakwe zyoonse, nkaambo uluuzi moyo wakwe (nduwe awulikke nuuyizi kabotu myoyo yabantu boonse), 40 kuchitila kuti kabanookuyoowa mazuba woonse ngibanoopona aanyika njwaakapa masianene.
41 “Kuti mweenzu uutali umwi wabantu bako ma-Israyeli wasika kazwa kundawu iili kule akaambo kazina lyako* 42 (nkaambo bazoomvwa atala azina lyako lilemekwa ajaanza lyako lili aamanguzu akuboko kwako kutandabikidwe), mpawo waza wakomba kalangide ng’anda eeyi, 43 ikaka mvwa kuli kujulu kundawu yako njukkala alubo muchitile zyoonse nzyaakukumbila mweenzu ooyo, kuchitila kuti bantu bamisyobo yoonse baanyika bazibe zina lyako akuti bakuyoowe, mbuli mbubachita bantu bako ma-Israyeli, akuti bazibe kuti zina lyako lilayitwa aang’anda eeyi njindayaka.
44 “Kuti bantu bako bayinka kunkondo kuti bakalwane basinkondonyina kufumbwa nkwaabatuma, mpawo kuti bakomba kulinduwe Jehova kabalangide kumuunzi ngwaakasala akung’anda njindayakila zina lyako, 45 ikaka mvwa nkombyo yabo kuli kujulu akukumbila kwabo kwakufwidwa luzyalo, ubagwasye.
46 “Kuti bakubisizya (nkaambo taakwe muntu uutabisyi pe) mpawo wabanyemena akubabikka mukuboko kwabasinkondonyina, mpawo basinkondonyina bababweza babatola mubuzike munyika yabasinkondonyina, iili kule naakuti aafwiifwi, 47 mpawo kuti mizeezo yabo yaboolaamwi kabali kunyika njibakatolwa kabali bazike, kuti baboola kulinduwe bakombelezya kuti ubafwide luzyalo kabali kunyika yabasinkondonyina kabati, ‘Twabisya akupambanisya, twachita zibi,’ 48 alubo kuti baboola kulinduwe amoyo wabo woonse abuumi bwabo boonse kabali kunyika yabasinkondonyina, aabo bakabatola mubuzike mpawo bakomba kulinduwe kabalangide kunyika yabo njwaakapa masianyinakulu, akumuunzi ngwaakasala akung’anda njindayakila zina lyako, 49 mvwa nkombyo yabo akukumbila kwabo kwakufwidwa luzyalo, ubagwasye, kuli kujulu kundawu yako njukkala, 50 balekelele bantu bako bakakubisizya, ubalekelele kumilandu yoonse njibakakubisizya. Uzoopa kuti aabo bakabatola mubuzike babafwide nsoni mpawo bazoobafwida nsoni 51 (nkaambo mbantu bako alubo ndukono lwako, aabo mbwaakagwisya mu-Ijipita mubbibi lyakuyaazya nsimbi). 52 Meso aako aabone kukumbila kufwidwa luzyalo kwamubelesi wako akukumbila kufwidwa luzyalo kwabantu bako ma-Israyeli, kwiinda mukubaswiilila kufumbwa chiindi nibakwiita.* 53 Nkaambo wakabapambula kuti babe lukono lwako kuzwa aakati kabantu bamisyobo yoonse baanyika mbuli mbwaakaambilizya kwiinda muli Mozesi mubelesi wako chiindi nwaakagwisya masianene mu-Ijipita, O Mwaami Singuzuzyoonse Jehova.”
54 Solomoni mbaakamaninsya biyo kukomba nkombyo eeyi yoonse kuli Jehova akukumbila kufwidwa luzyalo, wakanyampuka kunembo aachipayililo chaJehova mpaakafugeme katambikide maboko kujulu. 55 Mpawo wakayimikila walongezya mbungano yoonse yama-Israyeli ajwi pati kati: 56 “Atembawulwe Jehova ooyo wabapa ndawu yakupumwida bantu bakwe ma-Israyeli mbuli mbaakasyomezya. Taakwe jwi niliba limwi lyakatazuzikizigwa aakati kazisyomezyo zyakwe zyoonse zibotu nzyaakaamba kwiinda muli Mozesi mubelesi wakwe. 57 Jehova Leza wesu abe aandiswe mbuli mbaakali aamasianene. Atatusiyi pe nikuba kutulekelezya. 58 Akwelele myoyo yesu kulinguwe kuti tweende munzila zyakwe zyoonse akuti tubambe milawu yakwe, malayilile aakwe, ambeta zyakwe eezyo nzyaakalayilila masianene kuti bazibambe. 59 Alubo majwi aangu aaya ngindakombelezya Jehova kuti atufwide luzyalo, ngaabe aafwiifwi aJehova Leza wesu sikati amansiku, kuchitila kuti abetekele mubelesi wakwe abantu bakwe ma-Israyeli kweendelana aziyandikana buzuba bumwi abumwi, 60 kuchitila kuti bantu bamisyobo yoonse baanyika bazibe kuti Jehova nguuLeza wakasimpe. Taakwe uumbi pe! 61 Myoyo yanu ayimaninine* kuli Jehova Leza wesu kwiinda mukweenda mumalayilile aakwe amukubamba milawu yakwe mbuli mbumuli kuchita sunu.”
62 Lino mwaami ama-Israyeli boonse mbaakali aabo bakapa zipayizyo zyiingi loko kunembo lyaJehova. 63 Solomoni wakapa zipayizyo zyalumvwanano kuli Jehova: Wakapa ng’ombe zili 22 000 ambelele zili 120 000. Nkinkaako, mwaami ama-Israyeli boonse bakapobweda ng’anda yaJehova. 64 Mubuzuba oobo, mwaami wakasalazya aakati kalubuwa luli kunembo aang’anda yaJehova, nkaambo wakali kuyanda kupa zipayizyo zitentwa, zipayizyo zyazilyo, amafuta aazipayizyo zyalumvwanano aandawu njiyeeyo, nkaambo chipayililo chakkopa* chakali kunembo lyaJehova chakali chiniini loko zyakuti zipayizyo zitentwa, zipayizyo zyazilyo, amafuta aazipayizyo zyalumvwanano teezyakali kukkwana pe aalinchicho. 65 Aachiindi eecho, Solomoni wakachita pobwe kunembo lyaJehova Leza wesu kalaamwi ama-Israyeli boonse kabali mbungano mpati kuzwa kuLebbo-hamati* kuyoosika kuKalonga ka-Ijipita. Pobwe eeli lyakali lyamazuba aali 7, amazuba aambi aali 7, woonse akali 14. 66 Mubuzuba bwakatobela,* wakabuzya bantu kuti beende, ambabo bantu bakalongezya* mwaami mpawo bakabweeda kumyuunzi yabo kabali kusekelela akukondwa mumyoyo yabo, akaambo kazintu zyoonse zibotu Jehova nzyaakali wachitila Davida mubelesi wakwe abantu bakwe ma-Israyeli.