Baami Wachibili
15 Mumunyaka wachi 27 wabweendelezi bwaMwaami Jerobbowamu* wa-Israyeli, Azariya* mwana waMwaami Amaziya waJuda wakaba mwaami. 2 Wakali aaminyaka iili 16 naakaba mwaami, alubo wakeendelezya kwaminyaka iili 52 muJerusalema. Banyina bakali bakuJerusalema alubo bakali kutegwa Jekkoliya. 3 Wakali kuchita ziluleme mumeso aaJehova, mbuli mbaakachita Amaziya wisi. 4 Nikuba oobo, ndawu zyakukombela teezyakagwisigwa pe, alubo bantu bakachili kupa zipayizyo akuuntumuna busi bwazipayizyo mundawu zyakukombela. 5 Jehova wakapa kuti mwaami achiswe, wakaba sichipele kusikila mubuzuba naakafwa. Wakali kukkala muliimwi ng’anda alikke, mpawo Jotamu mwana wamwaami nguwe wakali kweendelezya ng’anda yamwaami* akubeteka bantu munyika eeyo. 6 Makani aachiindi woonse aali atala a-Azariya, azintu zyoonse nzyaakachita, taalembedwe na mubbuku lyamakani aachiindi aaziindi zyabaami baJuda? 7 Mpawo Azariya wakalazikwaamwi amasianyinakulu alubo bakamuzikkaamwi amasianyinakulu muMuunzi waDavida. Mwanaakwe Jotamu wakaba mwaami mundawu yakwe.
8 Mumunyaka wachi 38 wabweendelezi bwaMwaami Azariya waJuda, Zakkariya mwana waJerobbowamu wakaba mwaami wa-Israyeli muSamariya, alubo wakeendelezya kwamyeezi iili musanu awumwi. 9 Wakachita zibi mumeso aaJehova mbuli masianyinakulu mbubakachita. Taakazisiya pe zibi Jerobbowamu mwana waNebbati nzyaakali wapa kuti Israyeli achite. 10 Mpawo Shalumu mwana waJabbeshi wakamubukila wamujaya ku-Ibbiliyamu. Mbaakamujaya biyo, wakaba mwaami mundawu yakwe. 11 Makani aachiindi woonse aali atala aZakkariya, alilembedwe mubbuku lyamakani aachiindi aaziindi zyabaami ba-Israyeli. 12 Eezi zyakazuzikizya jwi lyaJehova ndyaakaamba kuli Jehu naakati: “Mazyalani aane aabana bako balombe azookkala aachuuno chabwaami cha-Israyeli.” Eezi nzizyo zyakachitika.
13 Shalumu mwana waJabbeshi wakaba mwaami mumunyaka wachi 39 wabweendelezi bwaMwaami Uziya waJuda, alubo wakeendelezya kwamweezi uumwi uukkwene muSamariya. 14 Mpawo Menahemu mwana waGadi wakazwa kuTiriza waya kuSamariya waakujaya Shalumu mwana waJabbeshi muSamariya. Mbaakamujaya biyo, wakaba mwaami mundawu yakwe. 15 Makani aachiindi woonse aali atala aShalumu akubukila nkwaakachita, alilembedwe mubbuku lyamakani aachiindi aaziindi zyabaami ba-Israyeli. 16 Aawa mpimpawo Menahemu mpaakazwa kuTiriza waakunyonyoona Tifisa abantu boonse bamumuunzi ooyo azilawu zyakawuzyungulukide, nkaambo teebakamujulila pe mageedi aamuunzi. Wakawunyonyoona alubo wakayawula banakazi bamumo bakali aamala.
17 Mumunyaka wachi 39 wabweendelezi bwaMwaami Azariya waJuda, Menahemu mwana waGadi wakaba mwaami wa-Israyeli, alubo wakeendelezya kwaminyaka iili kkumi muSamariya. 18 Wakaliswini kuchita zibi mumeso aaJehova. Taakazisiya pe zibi zyoonse Jerobbowamu mwana waNebbati nzyaakali wapa kuti Israyeli achite, mumazuba aakwe woonse. 19 Mwaami Puli wa-Asiriya wakasika munyika ya-Israyeli, mpawo Menahemu wakapa Puli matalenta* aansiliva aali 1 000 kuti amugwasye kusimya bwaami bwakwe. 20 Nkinkaako, Menahemu wakajana nsiliva kuzwa kuma-Israyeli kwiinda mukubbadalisya baalumi bali aampuwo abanotede. Mwaalumi umwi awumwi wakabbadala mashekeli* aansiliva aali 50 mpawo Menahemu wakaapa mwaami wa-Asiriya. Kuzwa waawo, mwaami wa-Asiriya wakabweeda, taakakkala pe munyika eeyo. 21 Makani aachiindi woonse aali atala aMenahemu, azintu zyoonse nzyaakachita, taalembedwe na mubbuku lyamakani aachiindi aaziindi zyabaami ba-Israyeli? 22 Kuzwa waawo, Menahemu wakalazikwaamwi amasianyinakulu. Mwanaakwe Pekkahiya wakaba mwaami mundawu yakwe.
23 Mumunyaka wachi 50 wabweendelezi bwaMwaami Azariya waJuda, Pekkahiya mwana waMenahemu wakaba mwaami wa-Israyeli muSamariya, alubo wakeendelezya kwaminyaka iibili. 24 Wakaliswini kuchita zibi mumeso aaJehova. Taakazisiya pe zibi Jerobbowamu mwana waNebbati nzyaakali wapa kuti Israyeli achite. 25 Mpawo Pekka mugwasilizi wamupati wamasooja mwana waRemaliya wakamubukila akumujaya muSamariya mungazi iikwabilidwe yang’anda yamwaami kalaamwi a-Agobbi a-Ariye. Wakalaamwi abaalumi bali 50 bakuGiliyadi. Mbaakamujaya biyo, wakaba mwaami mundawu yakwe. 26 Makani aachiindi woonse aali atala aPekkahiya, azintu zyoonse nzyaakachita, alilembedwe mubbuku lyamakani aachiindi aaziindi zyabaami ba-Israyeli.
27 Mumunyaka wachi 52 wabweendelezi bwaMwaami Azariya waJuda, Pekka mwana waRemaliya wakaba mwaami wa-Israyeli muSamariya, alubo wakeendelezya kwaminyaka iili 20. 28 Wakaliswini kuchita zibi mumeso aaJehova. Taakazisiya pe zibi Jerobbowamu mwana waNebbati nzyaakali wapa kuti Israyeli achite. 29 Mumazuba aaMwaami Pekka wa-Israyeli, Mwaami Tigilati-pileseri wa-Asiriya wakasika wabweza Ijoni, Abbeli-bbeti-maakka, Janowa, Kkedeshi, Hazori, Giliyadi, aGalili, nyika yoonse yaNafutali, mpawo wakabweza bantu bakali kukkala mundawu eezi wabatola mubuzike ku-Asiriya. 30 Mpawo Hosheya mwana wa-Ela wakabukila Pekka mwana waRemaliya wamuyasa akumujaya. Kuzwa waawo, wakaba mwaami mundawu yakwe mumunyaka wachi 20 wabweendelezi bwaJotamu mwana wa-Uziya. 31 Makani aachiindi woonse aali atala aPekka, azintu zyoonse nzyaakachita, alilembedwe mubbuku lyamakani aachiindi aaziindi zyabaami ba-Israyeli.
32 Mumunyaka wachibili wabweendelezi bwaPekka mwana waRemaliya mwaami wa-Israyeli, Jotamu mwana waMwaami Uziya waJuda wakaba mwaami. 33 Wakali aaminyaka iili 25 naakaba mwaami, alubo wakeendelezya kwaminyaka iili 16 muJerusalema. Banyina bakali kutegwa Jerusha mwana waZadokki. 34 Wakali kuchita ziluleme mumeso aaJehova, mbuli Uziya wisi mbaakachita. 35 Nikuba oobo, ndawu zyakukombela teezyakagwisigwa pe, alubo bantu bakachili kupa zipayizyo akuuntumuna busi bwazipayizyo mundawu zyakukombela. Nguwe wakayaka geedi lyaajulu lyang’anda yaJehova. 36 Makani aachiindi woonse aali atala aJotamu, azintu zyoonse nzyaakachita, taalembedwe na mubbuku lyamakani aachiindi aaziindi zyabaami baJuda? 37 Mumazuba aayo, Jehova wakasaanguna kutuma Rezini mwaami waSiriya aPekka mwana waRemaliya kuti bakalwane Juda. 38 Mpawo Jotamu wakalazikwaamwi amasianyinakulu alubo wakazikkwaamwi amasianyinakulu muMuunzi waDavida sianyinakulu. Mwanaakwe Ahazi wakaba mwaami mundawu yakwe.