Baami Wachibili
17 Mumunyaka wachi 12 wabweendelezi bwaMwaami Ahazi waJuda, Hosheya mwana wa-Ela wakaba mwaami muSamariya. Wakeendelezya kwaminyaka iili musanu ayine. 2 Wakaliswini kuchita zibi mumeso aaJehova, pesi taakachita mbuli baami ba-Israyeli bakamusaangunina. 3 Mwaami Shalumanesa wa-Asiriya wakasika kuti azoomulwane, mpawo Hosheya wakaba mubelesi wakwe alubo wakasaanguna kubbadala mutelo kulinguwe. 4 Nikuba oobo, mwaami wa-Asiriya wakaziba kuti Hosheya wakali kuyanda kumubukila, nkaambo wakali watuma batumwa kuMwaami So wa-Ijipita, alubo taakabbadala pe mutelo kumwaami wa-Asiriya mbuli mbaakali kuchita minyaka yakali yayinda. Nkinkaako, mwaami wa-Asiriya wakamusunga wamujalila mujele.
5 Mwaami wa-Asiriya wakayinka kuti akalwane nyika eeyo yoonse, mpawo wakasika kuSamariya wayisinkila kwaminyaka iitatu. 6 Mumunyaka wamusanu ayine wabweendelezi bwaHosheya, mwaami wa-Asiriya wakazunda Samariya. Wakabweza ma-Israyeli wabatola mubuzike ku-Asiriya, mpawo wakababikka muHala amuHabbori kumulonga waGozani amumyuunzi yamaMedi.
7 Eezi zyakachitika nkaambo ma-Israyeli bakali babisizya Jehova Leza wabo, ooyo wakabagwisya munyika ya-Ijipita mubweendelezi bwaFaro mwaami wa-Ijipita. Bakali kukomba* bamwi baleza, 8 bakatobela ziyanza zyazisi Jehova nzyaakatanda kunembo lyama-Israyeli, alubo bakatobela ziyanza eezyo baami ba-Israyeli nzibakalipangila.
9 Ma-Israyeli bakali kuchita zintu zitaluleme mumeso aaJehova Leza wabo. Bakaliswini kuyaka ndawu zyakukombela mumyuunzi yabo yoonse, kuzwa kungaziyakulinda kusika kumuunzi uukwabilidwe.* 10 Bakaliswini kulyiimikizizya mapila aasalala azisamu zisalala* aajulu aatulundu tulamfu toonse amunsi aaminsamu yoonse iifwefwema. 11 Alubo bakali kuuntumuna busi bwazipayizyo mundawu zyoonse zyakukombela mbuli mbuzyakali kuchita zisi eezyo Jehova nzyaakatanda kunembo lyabo kuti ziye mubuzike. Bakaliswini kuchita zibi kuti banyemye Jehova.
12 Bakaliswini kukomba zibumbwa zisesemya,* eezyo Jehova nzyaakababuzya atala anzizyo kuti: “Mutachiti oobo pe!” 13 Jehova wakaliswini kuchenjezya Israyeli aJuda kabelesya bapolofita bakwe boonse abasikubona zilengaano boonse kati: “Amusiye nzila zyanu zibi! Amubambe milawu yangu amalayilile aangu kweendelana amulawu woonse ngundakalayilila masianyookulu alubo ngundakamutumizya kwiinda mubabelesi bangu bapolofita.” 14 Pesi teebakaswiilila pe, alubo bakali kuyumya mitwe mbuli masianyinakulu, aabo bakataba aalusyomo muli Jehova Leza wabo. 15 Bakaliswini kukaka malayilile aakwe achizuminano chakwe nchaakapangana aamasianyinakulu aziyeezyo zyakwe nzyaakali wabapa kuti abachenjezye, alubo bakaliswini kutobela zibumbwa zitagwasyi mpawo ambabo bakaba bantu batagwasyi, kabatobelezya zisi zyoonse zyakabazyungulukide, eezyo Jehova nzyaakabalayilila kuti batazitobelezyi.
16 Bakasiya milawu yoonse yaJehova Leza wabo alubo bakalipangila zikozyano zyansimbi* zyabana bang’ombe babili achisamu chisalala,* alubo bakakotamina makamu woonse aakujulu akubelekela Bbaala. 17 Bakali kutenta* bana babo balombe abasimbi mumulilo, bakali kusonda akuchita masalamusi, alubo bakalipeda kuchita zibi mumeso aaJehova kuti bamunyemye.
18 Nkinkaako, Jehova wakabanyemena loko ma-Israyeli zyakuti wakabatanda kunembo lyakwe. Taakwe ngwaakasiya pe kunze kwamusyobo waJuda awukke.
19 Ambabo bamusyobo waJuda teebakayibamba pe milawu yaJehova Leza wabo, ambabo bakeenda muziyanza eezyo ma-Israyeli nzibakatobela. 20 Jehova wakabakaka bana ba-Israyeli boonse, alubo wakabafwisya bweeme akubabikka mukuboko kwabasikunyanga bantu zintu, kusikila naakabatanda kunembo lyakwe. 21 Wakagwisya ma-Israyeli kuzwa kung’anda yaDavida mpawo bakabikka Jerobbowamu mwana waNebbati kuti abe mwaami. Pesi Jerobbowamu wakapa kuti ma-Israyeli baleke kutobela Jehova alubo wakapa kuti bachite chibi chipati. 22 Ma-Israyeli bakaliswini kweenda muzibi zyoonse Jerobbowamu nzyaakachita. Teebakazisiya pe 23 kusikila Jehova watanda ma-Israyeli kunembo lyakwe, mbuli mbaakali waambilizya kabelesya babelesi bakwe boonse bapolofita. Nkinkaako, ma-Israyeli bakagwisigwa munyika yabo batolwa mubuzike ku-Asiriya, ooko nkubachibede ambulisunu.
24 Mpawo mwaami wa-Asiriya wakeeta bantu bakuBbabbiloni, kuKkuta, ku-Ava, kuHamati, akuSefavayimu mpawo wakababikka mumyuunzi yaSamariya mundawu yama-Israyeli. Bakabweza Samariya bakkala mumyuunzi yayo. 25 Nibakasaanguna kukkala nkukooko, teebakali kumuyoowa* pe Jehova. Nkinkaako, Jehova wakatuma balavu aakati kabo, mpawo balavu aabo bakajaya bamwi bantu. 26 Mwaami wa-Asiriya wakabuzigwa kuti: “Bantu bazisi mbwaakeeta mubuzike alubo mbwaakabikka mumyuunzi yaSamariya tabazi pe mbakombwa Leza wamunyika eeyi. Nkinkaako, uliswini kutuma balavu aakati kabo, mpawo balikubajaya nkaambo taakwe naba uumwi aakati kabo uuzi mbakombwa Leza wamunyika eeyi.”
27 Mpawo mwaami wa-Asiriya wakalayilila kuti: “Amubweze umwi wabapayizi ngumwakatola mubuzike wankukooko, ayinke akakkale nkukooko kuti akabayiisye mbakombwa Leza wamunyika eeyo.” 28 Nkinkaako, umwi wabapayizi ngubakali batola mubuzike kuzwa muSamariya wakayinka waakukkala muBbeteli, mpawo wakasaanguna kubayiisya mbubakeelede kuyoowa* Jehova.
29 Nikuba oobo, bantu bamuchisi chimwi achimwi bakalipangila leza wabo, mpawo bakababikka mumaanda aakukombela aakali mundawu zyakukombela maSamariya nzibakapanga. Bantu bamuchisi chimwi achimwi bakachita oobo mumyuunzi yabo mubakali kukkala. 30 Bantu bakuBbabbiloni bakapanga Sukkoti-bbenoti, bantu bakuKkuti bakapanga Negali, bantu bakuHamati bakapanga Ashima, 31 bantu baku-Ava bakapanga Nibbazi aTaritakki. Bantu bakuSefavayimu bakali kutenta bana babo balombe mumulilo kabachitila Adilamelekki a-Anamelekki, baleza bakuSefavayimu. 32 Nikuba kuti bakali kuyoowa Jehova, bakasala bantu biyo kuti babe bapayizi kuchitila kuti babeleke mundawu zyakukombela, alubo bapayizi aaba bakali kubabelekela mumaanda aakukombela aakali mundawu zyakukombela. 33 Bakali kumuyoowa Jehova, pesi bakali kukomba baleza babo kweendelana abukombi bwakali kuchitwa kuzisi ooko nkubakabagwisya kababatola mubuzike.
34 Ambulisunu bachitobelezya bukombi bwabo bwachiindi. Taakwe naba uumwi aakati kabo uukomba* Jehova alubo taakwe uutobela malayilile aakwe, mbeta zyakwe, Mulawu, amilawu Jehova njaakapa bana baJakkobo, ooyo ngwaakachincha zina akumuuzika kuti Israyeli. 35 Chiindi Jehova naakapangana chizuminano ambabo, wakabalayilila kuti: “Mutayoowi bamwi baleza pe, alubo mutabakotamini pe nikuba kubabelekela naakuti kupa zipayizyo kulimbabo. 36 Pesi Jehova, ooyo wakamugwisya munyika ya-Ijipita anguzu zipati akuboko kutandabikidwe, nguwe ngumweelede kuyoowa alubo nguwe ngumweelede kukotamina alubo nguwe ngumweelede kupa zipayizyo. 37 Chiindi choonse mweelede kutobelesesya malayilile, mbeta, Mulawu, amilawu njaakamulembela, alubo tamweelede kuyoowa bamwi baleza pe. 38 Mutalubi chizuminano nchindakapangana aandinywe alubo tamweelede kuyoowa bamwi baleza pe. 39 Pesi nguJehova Leza wanu ngumweelede kuyoowa, mbukunga nguwe uutazoomuvune mukuboko kwabasinkondonyokwe boonse.”
40 Pesi teebakaswiilila pe, alubo bakatobela bukombi bwabo bwachiindi. 41 Nkinkaako, bantu bazisi eezi bakasaanguna kuyoowa Jehova, pesi bakali kubelekela zikozyano zyabo zibezedwe. Bana babo abazukulu babo balikuchita mbuli mbubakachita masianyinakulu kusika sunu.