Esita
2 Nizyakayinda zintu eezi, chiindi nibwakaselela bukali bwamwaami Ahasuwera, mwaami wakayeeya zintu nzyaakali wachita Vashiti achisubulo chakali chasalwa kuti achipegwe. 2 Mpawo babelesi bamwaami bakati: “Mwaami weelede kuyandwiidwa banakalindu* babotu. 3 Mwaami asale bayiminini muzilikiti zyoonse zyabweendelezi bwakwe kuti beete banakalindu* boonse babotu muShushani,* muunzi uukwabilidwe,* kung’anda yabanakazi.* Mpawo babikkwe mumaboko aaHegayi mubelesi uuzibidwe wamwaami, uulangania banakazi alubo bapegwe misamu yakulinonoola.* 4 Mpawo musimbi uutayandwe aamwaami ulaba namalelo mundawu yaVashiti.” Muzeezo ooyu wakawuyanda mwaami, alubo eezi nzizyo nzyaakachita.
5 Kwakali umwi mwaalumi muJuda muShushani,* muunzi uukwabilidwe,* wakali kutegwa Modekkayi mwana waJayiri mwana waShimeyi mwana waKkishi, wamusyobo waBbenjamini, 6 ooyo wakali watolwa mubuzike kuzwa kuJerusalema abantu bakali balonzegwa aamwi amwaami Jekkoniya* waJuda, ooyo wakatolwa mubuzike amwaami Nebbukkadineza waBbabbiloni. 7 Modekkayi wakali sikulela* Hadasa nkukwaamba Esita, mwana wawisi mupati,* nkaambo taakachilikwe wisi abanyina. Musimbi ooyu wakali aamubili uubumbidwe kabotu kali mubotu loko. Nibakafwa bazyali bakwe, Modekkayi wakamubweza wamulela mbuli mwanaakwe. 8 Chiindi jwi lyamwaami amulawu wakwe nizyakaambilizigwa alubo chiindi basimbi biingi nibakeetwa aamwi kuShushani,* muunzi uukwabilidwe,* kuti babambwe aaHegayi, Esita anguwe wakatolwa kung’anda yamwaami kuti akabambwe aaHegayi sikulangania banakazi.
9 Hegayi wakamuyanda musimbi ooyu alubo wakamubotela,* nkinkaako, chakufwambaana wakabamba kuti apegwe misamu yakulinonoola* achakulya chilikabotu alubo wakamupa basimbi bali musanu ababili bakasalidwe kuzwa kung’anda yamwaami. Hegayi wakalonzya Esita abasimbi bakali kumugwasya mpawo wakabatola kundawu mbotu mung’anda yabanakazi.* 10 Esita taakwe nzyaakaamba pe atala abantu bakulimbabo naakuti babbululu bakwe, nkaambo Modekkayi wakali wamubuzya kuti atabuzyi muntu pe. 11 Buzuba abuzuba Modekkayi wakali kweenda kunembo aalubuwa lwang’anda yabanakazi* kuti azibe mbaakali kupona Esita akuti niinzi chakali kuchitika kulinguwe.
12 Musimbi umwi awumwi naakali kukkwanisya myeezi iili 12 kalinonoola amisamu njibakapedwe basimbi, wakali kujana mweenya wakuya kumwaami Ahasuwera. Oobu mbumbubo mbubakali kuchita: Mumyeezi iili musanu awumwi yakusaanguna, bakali kubelesya mure mpawo mumyeezi iili musanu awumwi yakali kutobela, bakali kubelesya mafuta aabbalisamu ayimwi misamu iisiyene-siyene yakulinonoola.* 13 Kuzwa waawo, musimbi wakali kunoonga weelela kuya kumwaami, alubo kufumbwa nchaakali kukumbila wakali kupegwa chiindi naakali kuzwa kung’anda yabanakazi* kaya kung’anda yamwaami. 14 Musimbi wakali kunjila goko mpawo kuseeni wakali kubweeda kung’anda yachibili yabanakazi,* eeyo njaakali kulangania Shaashigazi mubelesi uuzibidwe wamwaami sikulangania banakazi bakumbali. Musimbi taakali kubweeda pe kumwaami kunze kwakuti mwaami wamuyanda akumwiita aazina kuti asike.
15 Nichakasika chiindi chakuti Esita mwana wa-Abbihayili, bbululu waModekkayi, ooyo Modekkayi ngwaakali wabweza akumulela, kuti aye kumwaami, taakwe nchaakakumbila pe kunze kwazintu nzyaakabuzigwa aaHegayi mubelesi uuzibidwe wamwaami, wakali kulanga banakazi. (Muntu woonse wakali kumubona Esita wakali kumuyanda.) 16 Esita wakatolwa kung’anda yamwaami Ahasuwera mumweezi wakkumi, nkukwaamba mweezi waTebbeti,* mumunyaka wamusanu ayibili wabweendelezi bwakwe. 17 Mwaami wakamuyanda Esita kwiinda bamwi banakazi boonse alubo wakamufwida luzyalo akumutondeezya luyando lutamani kwiinda bamwi banakalindu.* Nkinkaako, wakamuzwaatika ngwaani yabwaami akumubikka kuba namalelo mundawu yaVashiti. 18 Mpawo mwaami wakachitila beendelezi bakwe boonse ababelesi bakwe pobwe pati, pobwe lya-Esita. Alubo wakaambilizya kwaangununwa kwabasungwa muzilikiti, alubo wakali kutumizya zipo kweendelana abunoti bwakwe.
19 Chiindi banakalindu* nibakabunganizigwa kachibili, Modekkayi wakalikkede aageedi lyamwaami. 20 Esita taakwe nchaakaamba pe atala ababbululu bakwe abantu bakulimbabo, mbuli mbaakali wamulayilila Modekkayi; Esita wakali kuchita zyakali kwaambwa aaModekkayi mbuli mbaakali kuchita chiindi naakaleledwe aanguwe.
21 Mumazuba aayo, Modekkayi naakakkede aageedi lyamwaami, Bbigitani aTereshi, balupati-pati babili bamwaami, basikubamba milyango, bakanyema akukanza kujaya mwaami Ahasuwera. 22 Pesi Modekkayi wakaziziba, mpawo chakufwambaana wakabuzya Namalelo Esita, mpawo Esita wakaambuula aamwaami muzina lyaModekkayi.* 23 Nkinkaako, nkani eeyi yakalangwa-langwa mpawo kwakajanika kuti njachoonzyo, mpawo baalumi aabo babili bakaanzikwa aachisamu; alubo makani aaya woonse akalembwa mubbuku lyamakani aachiindi aamuchiindi eecho, kunembo lyamwaami.