Esita
7 Mwaami aHamani bakasika kupobwe lyaNamalelo Esita. 2 Mwaami wakamubuzya lubo Esita mubuzuba bwachibili nikwakali pobwe lyawayini, wakati: “Uyandaanzi Namalelo Esita? Ulazipegwa nzuyanda. Uyanda kukumbilaanzi? Ndilakupa kufumbwa nchuyanda nikuba kusika kuhafu yabwaami bwangu.” 3 Namalelo Esita wakasandula kuti: “Kuti kuli wandifwida luzyalo O mwaami, kuti kazimubotezya mwaami, nchindiyanda mbuumi bwangu alubo chikumbizyo changu chili atala abantu bangu. 4 Nkaambo ime abantu bangu twawuzigwa kuti tulobe, tujayigwe akuti tunyonyoonwe. Kaansinga twawuzigwa biyo kuti tube bazike bachaalumi abachanakazi, nikuli ndawumuna. Pesi penzi eeli talili kabotu pe nkaambo lilamujatikizya mwaami.”
5 Mwaami Ahasuwera wakabuzya Namalelo Esita kuti: “Ani ngwani ooyo, ulikuli muntu uuyanda kuchita chintu chili boobu?” 6 Esita wakati: “Sikutulwana asinkondoma, ngooyu Hamani mubi.”
Hamani wakasaanguna kuyoowa mwaami anamalelo. 7 Mwaami wakazwa kanyemede aapobwe lyawayini mpawo wakaya mumuunda uuli aang’anda yamwaami, pesi Hamani wakanyampuka wakombelezya Namalelo Esita, nkaambo wakabona kuti mwaami wakali kuyanda kumusubula. 8 Mwaami naakazwa mumuunda uuli aang’anda yamwaami wakaya kung’anda yakali kuchitilwa pobwe lyawayini mpawo wakabona Hamani kaliwaalide aachuuno mpaakabede Esita. Mpawo mwaami wakati: “Uyanda kuvumpila namalelo mung’anda yangu?” Mwaami mbaakaamba majwi aaya kupela, Hamani bakamuvumba kumeso. 9 Umwi wabalupati-pati bamwaami uutegwa Habbona wakati: “Hamani wakapanga chisamu chakwaanzika Modekkayi, mwaalumi uulya wakaamba makani aakafutula mwaami. Chiliimvwi aang’anda yaHamani, chilampa makkiyubbiti aali 50.”* Mpawo mwaami wakati: “Amukamwaanzike aalinchicho.” 10 Nkinkaako, Hamani bakamwaanzika aachisamu nchaakali wabambila Modekkayi mpawo bukali bwamwaami bwakaselela.