Mukambawusi

10 Mbuli nzinini zifwide mbuzipa kuti mafuta aanunkilila aasikupanga mafuta anunke akuti apupume, ambubo bufuba-fuba buniini bupambanisya busongo abulemu.

2 Moyo wamusongo upa kuti ayendele munzila iili njiyo,* pesi moyo wamufuba-fuba upa kuti ayendele munzila iitali kabotu.* 3 Nzila zyoonse nzyayendela mufuba-fuba zitondeezya kuti takwe maanu pe alubo ulalitondeezya kubantu boonse kuti mufuba-fuba.

4 Kuti bukali bwamweendelezi bwakuvutukila, utazwi pe aandawu yako, nkaambo kubatama kutanda zibi zipati.

5 Kuli chimwi chintu chikataazya nchindakabona aansi aano, kupambanisya nkubachita aabo beendelezya: 6 Bafuba-fuba bapegwa zyuuno zyiingi zyaajulu, pesi banotede balayinkilila kunembo kukkala aazyuuno zyaansi.

7 Ndakabona babelesi kabatantide aamabbiza, pesi balupati-pati kabeenda aamawulu mbuli babelesi.

8 Muntu uusya dindi ulakonzya kuwida mulindilyo alubo ooyo uudilisya muduli wamabwe ulakonzya kulumwa aanzoka.

9 Ooyo uupwaya mabwe alakonzya kumuchisa alubo ooyo uupanduula zisamu zilakonzya kumuchisa.*

10 Kuti chibelesyo chansimbi kachitabosyi mpawo muntu waleka kuchinona, weelede kubelesya manguzu miingi. Pesi busongo bupa kuti kube kuzwidilila.

11 Kuti nzoka yaluma muntu kayitanachitilwa zyamasalamusi, sikwiichitisya masalamusi tagwasyi pe.

12 Majwi aazwa munkanwa lyamusongo apa kuti ayandwe, pesi mulomo wamufuba-fuba umweetela lunyonyooko. 13 Majwi ngasaanguna kwaambuula ngabufuba-fuba alubo majwi ngaamba kumamanino ngakupenga alubo ayeta mapenzi. 14 Pesi mufuba-fuba unooswini kaambuula kupela.

Muntu tazi pe zitazoochitike kunembo, animpo ngwani uukonzya kumubuzya zitazoochitike kali wafwa?

15 Kubeleka changuzu nkwachita mufuba-fuba kulamuzakazya, nkaambo tazi pe kuti ulayijana biyeni nzila iimutola kumuunzi.

16 Chili aapenzi chisi chili aamwaami uuchili mulombe alubo chili aabalupati-pati bafumina kupobola! 17 Chilabotelwa chisi kuti mwaami wacho kali mwana wabalemekwa alubo chili aabalupati-pati balya aachiindi cheelede kuti bajane manguzu, kutali kuti bakolwe pe!

18 Bukandu bwiindilide bupa kuti kaluli kawobokele alubo butolo bupa kuti ng’anda izuze.

19 Chinkwa* nchakuti muntu abotelwe, wayini ipa kuti buumi bunoneezye, pesi mali ipa kuti muntu achite kufumbwa nchayanda.

20 Utatukili mwaami nikuba mumoyo wako* alubo utatukili muntu* uunotede kuli mung’anda yakoona, nkaambo muyuni ulakonzya kwaamba makani ngwaamba alubo chilenge chili aamababa* chilakonzya kwiindulula zyakaambwa.