Mukambawusi
5 Langa ntaamu zyako chiindi choonse nuya kung’anda yaLeza wakasimpe. Kuswena aafwiifwi kuti uswiilile kulikabotu kwiinda kupa chipayizyo mbuli mbubachita bafuba-fuba, nkaambo tabazi pe kuti nzibachilikuchita nzibi.
2 Utafwambaani pe kwaambuula nikuba kuzumizya moyo wako kuti ufwambaane kwaambuula kunembo lyaLeza wakasimpe, nkaambo Leza wakasimpe uli kujulu, pesi iwe uli aanyika. Nkinkaako, weelede kuchesya majwi aako. 3 Nkaambo kuba aamilimu myiingi kupa kuti muntu alote alubo kubbwabbwalika kwamufuba-fuba kubawo akaambo kakuvula kwamajwi. 4 Utanonoki pe kuzuzikizya kufumbwa nzwaakonkezya kuli Leza, nkaambo bafuba-fuba tabamubotezyi pe. Zuzikizya nzukonka. 5 Zilikabotu kuleka kukonka, kwiinda kukonka mpawo waleka kuzuzikizya nzwaakonka. 6 Utalekeli mulomo wako kuti upe* kuti ubisye alubo utaambi kuti ndakapambanisya kunembo lyangilozi.* Nkamboonzi nuyanda kunyemya Leza wakasimpe akaambo kamajwi ngwaamba akupa kuti anyonyoone milimu yamaboko aako? 7 Mbukunga kuba aamilimu myiingi kupa kuti muntu alote, angawo majwi miingi taagwasyi pe. Pesi yoowa Leza wakasimpe.
8 Kuti wabona kudyaamininwa kwabafwaba akutabeteka kabotu akutalulama mubbooma lyako, utagambi pe akaambo kazeezi, nkaambo walupati-pati ooyo ulikulangwa ayooyo uuli aajulu kwiinda nguwe alubo kuli bamwi bali aajulu kwiinda mbabo.
9 Mukuyungizya, boonse baabana zintu zibotu zyamunyika, naba mwaami ugwasigwa aazintu zizwa mumuunda.
10 Muntu uuyandisya nsiliva tayikkuti pe nsiliva, naba ooyo uuyandisya bunoti tazikkuti pe nzyajana. Azeezi tazigwasyi pe.
11 Kuti zintu zibotu zyavula ambabo bazibelesya balavula. Mbubotuunzi mbwajana munaazyo kunze kwakuzilanzya meso kupela?
12 Ng’onzi zyamubelesi nzinono, kazitakwe ndaba kuti nzyalya nziche na naakuti nzyiingi, pesi zintu zyiingi nzyalaazyo ooyo uunotede tazimupi ng’onzi pe.
13 Kuli penzi pati ndindakabona aansi aano: bunoti mbwaakabunganizya muntu, bwakamuchisa. 14 Bunoti oobo bwakaloba, nkaambo zintu teezyakeenda* kabotu pe. Alubo naakazooba aamwana mulombe, taakwe nchaakachilaacho pe.
15 Mbuli muntu mbazwa mwida lyabanyina, uzooyenda kali chintanda mbuli mbaakazwa. Taakwe nchakonzya kweendaacho aazintu zyoonse nzyaakabelekela changuzu.
16 Andilyo eeli ndipenzi pati, mbuli mbaakaza mbumbubo mbatazooyende. Alubo zigwasyaanzi biya kuti muntu abeleke changuzu, pesi kabelekela moya? 17 Mukuyungizya, buzuba abuzuba ulida mumudima kakataazikene loko, kali kuchiswa alubo kanyemede.
18 Nzezi zibotu alubo zyeelela nzindakabona: kuti muntu weelede kulya akunywa akubotelwa akaambo kamilimu yakwe yoonse iimizya njabeleka changuzu aansi aano mumazuba mache aabuumi bwakwe ngaakapegwa aaLeza wakasimpe, nkaambo oobu mbuubulumbu bwakwe.* 19 Alubo kuti Leza wakasimpe wapa muntu bunoti azimwi zintu zyakumubili mpawo wapa kuti akonzye kubotelwa akaambo kazintu eezyo, weelede kubweza bulumbu bwakwe,* abotelwe mumulimu wakwe ngwaabeleka changuzu. Eechi nchipo chizwa kuli Leza. 20 Nkaambo tazoowaboni* pe mbaayenda mazuba aabuumi bwakwe akaambo kakuti Leza wakasimpe wapa kuti akkale kabotelwa mubuumi bwakwe.