Mukambawusi

8 Ngwani uuli mbuli musongo? Ngwani uukuzi kubambulula penzi?* Busongo bwamuntu bupa kuti busyu bwakwe buboneke kabotu akuti busyu bwakwe bwaangikene bwaangunuke.

2 Ndaamba kuti: “Swiilila malayilile aamwaami akaambo kachikonke chakachitwa kunembo lyaLeza. 3 Utafwambaani kuzwa kunembo lyakwe. Utaswaanizigwi mukuchita zintu zibi, nkaambo ulakonzya kuchita kufumbwa nzyayanda, 4 nkaambo nzyaamba mwaami zyeelede kuchitwa, ngwani uunga ulamubuzya kuti, ‘Ulikuchitaanzi?’”

5 Muntu uuswiilila malayilile takooswaana mapenzi pe alubo muntu uuli aamoyo uli aabusongo, ulichizi chiindi chilikabotu ambuzyeelede kuchitwa zintu.* 6 Nkani imwi ayimwi ili aachiindi chayo anzila yayo yakwiilanga-langa,* nkaambo makataazyo aabantu miingi loko. 7 Mbukunga taakwe muntu uuzi zitazoochitike, animpo ngwani uukonzya kumubuzya mbuzitazoochitike?

8 Mbukunga taakwe muntu uukonzya kweendelezya nguzu zyabuumi* naakuti kuzikasya kuzwa, nkinkaako, taakwe uukonzya kuzunda buzuba bwakufwa. Mbukunga taakwe muntu uuli kunkondo uukonzya kwaangununwa pe, nkinkaako, bubi tabukonzyi pe kuzumizya aabo babuchita kuti bafutuke.*

9 Zintu zyoonse eezi ndakazibona alubo ndakalanga-langa milimu yoonse iichitwa aansi aano. Aachiindi eecho, muntu wakali kweendelezya muntunyina munzila iimweetela machise. 10 Ndakabona babi kabali kuzikkwa, aabo bakali kunjila akuzwa mundawu iisalala, pesi bakalubwa chakufwambaana mumuunzi mubakali kuchita oobo. Azeezi tazigwasyi pe.

11 Myoyo yabantu yakanza kuchita zibi akaambo kakuti bantu bachita zibi tabali kufwambaana pe kupegwa chisubulo. 12 Nikuba kuti sizibi ulakonzya kuchita zintu zibi kwaziindi zili 100 mpawo apone kwachiindi chilamfu, pesi ime ndilizi kuti aabo bayoowa Leza wakasimpe, ziyoobeendela kabotu nkaambo balamuyoowa. 13 Nikuba oobo, sizibi tazikoomweendela kabotu alubo takonzyi pe kuliyungizizya mazuba aakwe aali mbuli mweenzule,* nkaambo tamuyoowi pe Leza.

14 Kuli chimwi chintu chitagwasyi* chichitwa aanyika: Kuli bantu baluleme bajatwaanga bakachita zintu zibi mpawo kuli basizibi bajatwaanga bakachita zintu ziluleme. Azeezi lubo ndaamba kuti tazigwasyi pe.

15 Ime biya nditi kukondwa kulikabotu, nkaambo taakwe chintu chibotu aansi aano kwiinda kuti muntu alye, anywe akuti akondwe. Eezi nzizyo nzyayelede kuchita muntu nabeleka changuzu mumazuba aabuumi bwakwe ngapedwe aaLeza wakasimpe aansi aano.

16 Ndakabeleka aamoyo woonse kuti ndijane busongo akuti ndibone milimu yoonse iichitika aanyika, chimwi chiindi kanditooni pe sikati amansiku.* 17 Ndakalanga milimu yoonse yaLeza wakasimpe mpawo ndakabona kuti bantu tabakonzyi kuzimvwisisisya pe zintu zichitika aansi aano. Nikuba kuti bantu beezya biyeni, tabazimvwisisisyi pe. Nikuba kuti balyaamba kuti mbasongo zyakuti balakonzya kuziziba, tabakoozimvwisisisya chakumaninina pe.