Hosiya
10 “Israyeli musaansa mubi* uuzyala michelo.
Michelo yakwe niivula, mpimpawo mpayungizya zipayililo zyakwe,
Nyika yakwe niizyala michelo, mpimpawo mapila aakwe aasalala mpaayungizya kubota.
2 Myoyo yabo ilawupa-wupa;
Bazoojanwa kabali aamulandu.
Kuli uutazoopwaye zipayizyo zyabo akunyonyoona mapila aabo.
3 Nkinkaako, bazoowamba kuti, ‘Tatukwe mwaami, nkaambo teetwakamuyoowa pe Jehova.
Ani mwaami uzootuchitilaanzi biya?’
4 Baambuula majwi aatagwasyi, bakonka zikonke zyakubeja alubo bapangana zizuminano.
Nkinkaako, lubeta lubawo luli mbuli masokwe aajaya aali mumyuunda iilimidwe.
5 Bantu bakkala muSamariya bazoochiyowela chibumbwa chamwana wang’ombe chakuBbeti-aveni.
Bantu bamumo bazoochilila,
Mbuli mbubatazoochite bapayizi aabo babaleza beenzu, bakakondwa atala anchicho abulemu bwacho,
Nkaambo chizoozwa kulimbabo kachiya kubuzike.
6 Chizooyetwa ku-Asiriya kachili chipo kumwaami mupati.
Efremu uzoofwisigwa bweeme,
Alubo Israyeli uzooba aabweeme akaambo kamalayilile ngaakatobela.
7 Kwaamba choonzyo, Samariya amwaami wakwe bazoonyonyoonwa,*
Mbuli kasyuukila katyolwa kali aajulu aamaanzi.
8 Ndawu zili aajulu zyakuBbeti-aveni, eezyo zipa kuti Israyeli abisye, zizoonyonyoonwa.
Maamvwa amasokwe aayasa azoomena aajulu aazipayililo zyabo.
Bantu bazoobuzya zilundu kuti, ‘Amutuvumbe!’
Atulundu kuti, ‘Amutulimbe!’
9 Iwe O Israyeli, wakali kubisya kuzwa kumazuba aakuGibbeya.
Nibakali nkukooko, bakali kwiinkilila kunembo kuchita mbuboobo.
KuGibbeya, nkondo teeyakabasikila* pe bana bakutalulama.
10 Ndizoobalulamika nindayanda.
Mpawo bantu bazoobabunganina kuti babalwane,
Chiindi zibi zyabo zibili nizitazoogwabikwe aalimbabo.*
11 Efremu wakali mbuli ng’ombe mpwizi iiyiisidwe yakali kuyandisya kupola zilyo,
Nkinkaako, ndakasiya nsingo yakwe mbotu.
Lino ndizoopa kuti umwi muntu atante* aali Efremu.
Juda uzoolima, Jakkobo uzoohhalila umwi muntu.
12 Amubyale mbuto mubululami mpawo mutebule luyando lutamani.
Amulime nyika iitalimidwe
Chiindi chakuyanduula Jehova kachichiliwo,
Kusikila asike alubo amuyiisye mubululami.
13 Pesi mwabyala bubi,
Mpawo mwatebula kutalulama,
Alubo mwalya michelo yalweeno,
Nkaambo mwasyoma nzila yanu.
Abasilumamba banu biingi.
14 Bantu bako bazoosikilwa aalupyopyongano,
Alubo myuunzi yako yakukwabilila yoonse izoonyonyoonwa,
Mbuli kunyonyoona kwakachitwa aaShalumani wamung’anda ya-Abbeli,
Mubuzuba bwankondo chiindi manyina naakazavuulwa aamwi abana bawo.
15 Eezi nzizyo nzutazoochitilwe, O Bbeteli, akaambo kabubi bwako bupati.
Kwaamba choonzyo, mwaami wa-Israyeli uzoonyonyoonwa* kubuchedo.”