Hosiya
12 “Efremu ulikulya luuwo.
Buzuba boonse ulikwaandilila luuwo lwakubuzwezuba.
Uvuzya manwa alupyopyongano.
Ulikupangana chizuminano a-Asiriya alubo utola mafuta ku-Ijipita.
2 Jehova uyanda kubeteka Juda akaambo kamulandu wakwe,
Uzoobeteka Jakkobo kweendelana anzila zyakwe,
Alubo uzoomuchitila kweendelana amichito yakwe.
3 Kachili mwida wakajata kasindi kamukulana wakwe,
Alubo wakazundaana aaLeza anguzu zyakwe zyoonse.
4 Wakayinkilila kunembo kuzundaana angilozi mpawo wakazunda.
Wakalila alubo wakayikombelezya kuti imufwide luzyalo.
Leza wakamujana kuBbeteli alubo nkukooko, wakaambuula aandiswe,
5 Jehova Leza wamakamu,
Jehova ndiizina ndyayeeyegwaalyo.
6 “Nkinkaako, bweeda kuli Leza wako,
Yinkilila kunembo kuli aaluyando lutamani abululami,
Alubo ulangilile kuli Leza wako chiindi choonse.
7 Pesi mukuboko kwasikuuzya muli zikkelo zyalweeno,
Uyandisya kweena bantu.
8 Efremu uliswini kwaamba kuti, ‘Kwaamba choonzyo, ndanota,
Ndajana bunoti.
Alubo tabazoojani chintu chitali kabotu naakuti chibi mumilimu yangu yoonse njindibeleka changuzu.’
9 Pesi ndime Jehova Leza wako kuzwa munyika ya-Ijipita.
Ndizoopa kuti ukkale lubo mumatente
Mbuli kumazuba aachiindi chibikkidwe.*
10 Ndakaambuula aabapolofita,
Ndakavuzya zilengaano zyabo
Alubo ndakaamba zikozyano kwiinda mubapolofita.
11 KuGiliyadi kuli lweeno amanwa.
Bapayizya bapule bang’ombe kuGiligali,
Alubo zipayizyo zyabo zili mbuli milwi yamabwe mumifolo yamumuunda.
12 Jakkobo wakachijila kuchilawu* cha-Aramu,*
Israyeli wakabeleka nkukooko kuti ajane mwanakazi,
Alubo wakeembela mbelele kuti ajane mwanakazi.
13 Jehova wakagwisya Israyeli mu-Ijipita kabelesya mupolofita,
Alubo wakamukwabilila kabelesya mupolofita.
14 Efremu wachita chibi chindinyemya kapati,
Mulandu wakwe wakutila ganzi unooli aalinguwe chiindi choonse,
Mwaami wakwe uzoomuchitila kweendelana akusampawula kwakwe.”