Hosiya
2 “Amubuzye babbululu banu kuti, ‘Muli bantu bangu!’*
Abachizi banu kuti, ‘Iwe numwanakazi wakafwidwa luzyalo!’*
2 Amubape mulandu banyoko, amubape mulandu,
Nkaambo teemwanakazi wangu pe, andime tandili mulumi wabo pe.
Beelede kusiya buwuule* bwabo
Akuleka bumambi mbubachita aakati kankolo zyabo,
3 Kuti teebachita oobo, ndilabazwaatununa zigogo babe mbuli mbubakabede mubuzuba mbubakazyalwa,
Ndizoopa kuti babe mbuli nkanda,
Babe mbuli nyika iitakwe maanzi.
Akuti bafwe aanyota.
4 Tandizoobafwidi luzyalo pe, bana bakwe balombe,
Nkaambo mbana babuwuule.*
5 Nkaambo banyina bakachita buwuule.*
Ooyo wakamita bana aabo, wakachita zintu zifwisya bweeme, nkaambo wakati,
‘Ndizootobela bayandwa bangu,
Aabo bandipa chinkwa changu amaanzi aangu,
Wuulu yangu amulembo wangu mubotu, mafuta aangu achakunywa changu.’
6 Nkinkaako, ndizoosinka nzila yako alubaya lwamaamvwa,
Alubo ndizooyaka muduli wamabwe kuti umusinkile,
Kuchitila kuti abule nzila zyakwe.
7 Uzoobatobela bayandwa bakwe, pesi tazoobajati pe,
Uzoobayanduula, pesi tazoobajani pe.
Mpawo uzoowamba kuti, ‘Ndilabweeda kumulumaangu wakusaanguna,
Nkaambo aachiindi eecho ndakakkede kabotu kwiinda lino.’
8 Taakazibona pe kuti ndime ndakamupede zilyo awayini mpya amafuta,
Akuti ndime ndakamupede nsiliva nyingi
Angolida njibakabelesya kuli Bbaala.
9 ‘Nkinkaako, ndizoobweeda ndikabweze zilyo zyangu aachiindi chazyo,
Awayini yangu mpya aachiindi chayo,
Alubo ndizoobweza wuulu yangu amulembo wangu mubotu, nzyaakali kulivumbaazyo kuti ateendi katazweete pe.
10 Lino ndizoovumbula zizo zyakwe zisisikene, bayandwa bakwe kabalangide,
Alubo taakwe muntu uutazookuvune pe mukuboko kwangu.
11 Ndizoomaninsya kubotelwa kwakwe koonse,
Mapobwe aakwe, mapobwe aakwe aakukkala kwamweezi, masabata aakwe amapobwe aakwe woonse.
12 Ndizoonyonyoona masaansa aakwe amikuyu yakwe, eeyo njaakaamba atala anjiyo kuti:
“Eeyi nimbadalo yangu njibakandipa bayandwa bangu,”
Ndizooyichincha ibe lusaka,
Alubo banyama bamusokwe bazooyimaninsya.
13 Ndizoomupa mulandu akaambo kamazuba ngaakali kupa zipayizyo kuzikozyano zyaBbaala,
Chiindi naakali kulibotya aamaring’i aakwe atuntu twakulibotya akutobela bayandwa bakwe,
Pesi ime wakandiluba,’ mbaamba Jehova.
14 ‘Nkinkaako, ndizoomukombelezya,
Ndizoomutola munkanda,
Alubo ndizoowambuulaawe munzila iimusika aamoyo.
15 Ndizoomubweedezya myuunda yakwe yamisaansa kuzwa aachiindi eecho kaziya kunembo,
Akkuti lya-Akkori* kuti libe manjililo aamutola kubulangilizi.
Uzoosandula kali nkukooko, mbuli kumazuba naakachili muniini,
Mbuli mubuzuba naakazwa munyika ya-Ijipita.
16 Alubo mubuzuba oobo,’ mbaamba Jehova,
‘Uzoondiita kuti Mulumaangu, tuzoondiiti lubo pe kuti Simalelaangu.’*
17 ‘Ndizoopa kuti aleke kwaamba mazina aazikozyano zyaBbaala amulomo wakwe,
Alubo tazichizooyeeyegwi lubo pe amazina aazyo.
18 Mubuzuba oobo, ndizoopangana chizuminano abanyama bamusokwe akaambo kambabo,
Abayuni bamujulu azintu ziyavula aanyika.
Ndizoogwisya daantambwa apanga ankondo munyika,
Alubo ndizoopa kuti boone* kabalyiibide.
19 Ndizookubweza kuti ube mwanakazi wangu kukabe kutamani,
Alubo ndizookakatila kulinduwe mubululami,
Muluyando lutamani amuluzyalo.
20 Ndizookakatila kulinduwe kandisyomeka,
Alubo kwaamba choonzyo, uzoomuziba Jehova.’
21 ‘Mubuzuba oobo, ndizoovwiila,’ mbaamba Jehova,
‘Ndizoovwiila majulu,
Mpawo majulu azoovwiila nyika,
22 Nyika izoovwiila zilyo awayini mpya amafuta,
Mpawo zintu eezi zizoovwiila Jezriyeli.*
23 Ndizoomubyala mbuli mbuto njindilibyalila aanyika,
Ndizoomufwida luzyalo ooyo wakatafwidwa luzyalo,*
Ndizooti kubantu batali bangu:* “Muli bantu bangu,”
Mpawo bazooti: “Uli Leza wesu.”’”