Zakkariya
12 Ngoyu mulumbe uuzwa kuli Leza:
“Ndeli jwi lyaJehova lili atala a-Israyeli,” mbaamba Jehova,
Ooyo wakatalamuna julu,
Ooyo wakabikka ntalisyo yanyika,
Alubo ooyo wakapanga muuya wabuumi uuli mumuntu.
2 “Lino ndilikupa kuti Jerusalema ibe nkomeki* iidadalisya bantu boonse bali muzisi ziizyungulukide; Juda aJerusalema zizoosinkilwa. 3 Mubuzuba oobo, ndizoopa kuti Jerusalema ibe bbwe demu* kubantu bamisyobo iisiyene-siyene. Aabo boonse beezya kulinyampula bazoolichisa loko; alubo zisi zyoonse zyaanyika zizoobungana kuti ziilwane. 4 Mubuzuba oobo,” mbaamba Jehova, “ndizoopa kuti mabbiza woonse ayoowe abasikwaatanta kuti bapenge. Meso aangu anooli aang’anda yaJuda, pesi ndizoowofwaazya mabbiza woonse aabantu bamisyobo iisiyene-siyene. 5 Alubo bazulwidi* baJuda mumyoyo yabo bazoowamba kuti, ‘Bantu bakkala muJerusalema manguzu eesu akaambo kaJehova wamakamu Leza wabo.’ 6 Mubuzuba oobo, ndizoopa kuti basilutwe baJuda babe mbuli mbawula iili aamulilo aakati kankuni, ambuli lambe liyaka aakati kamilwi yazilyo zyatebulwa, alubo bazoowumpa bantu boonse bali muzisi zibazyungulukide kuchilisyo akuchimweensi; alubo Jerusalema izookkalwa lubo mundawu yayo,* muJerusalema.
7 “Jehova uzoosaanguna kufutula matente aaJuda, kuchitila kuti bubotu* bwang’anda yaDavida abubotu* bwabantu bakkala muJerusalema butabi bupati loko kwiinda bwaJuda. 8 Mubuzuba oobo, Jehova uzoobakwabilila mumabazu woonse bantu bakkala muJerusalema; mubuzuba oobo, muntu uulebwa* aakati kabo uzooba mbuli Davida, ang’anda yaDavida izooba mbuli Leza, mbuli ngilozi yaJehova iibatungila kunembo. 9 Mubuzuba oobo, tandizooleki pe kunyonyoona zisi zyoonse ziza kuzoolwana Jerusalema.
10 “Ndizootila muuya waluzyalo awakukombelezya aang’anda yaDavida alubo aabantu bakkala muJerusalema, mpawo bazoolanga ooyo ngubakayasa alubo bazoomulila mbuli mbubalila mwana uuzyedwe aalikke; bazoowusa loko akaambo kanguwe mbuli mbubawusa akaambo kamwana wakusaanguna kuzyalwa. 11 Mubuzuba oobo, kulila kwamuJerusalema kuzooba kupati mbuli kulila kwaku-Hadadirimoni muNtandabale yakuMegido. 12 Nyika izoolila, mpuli imwi ayimwi izoolila ayilikke; mpuli yabamung’anda yaDavida ayilikke, abanakazi babo abalikke; mpuli yabamung’anda yaNatani ayilikke, abanakazi babo abalikke; 13 mpuli yabamung’anda yaLevi ayilikke, abanakazi babo abalikke; mpuli yabamung’anda yaShimeyi ayilikke, abanakazi babo abalikke; 14 alubo mpuli zyoonse zisyeede zizoolila, mpuli imwi ayimwi ayilikke, abanakazi babo abalikke.