Zakkariya
3 Mpawo wakanditondeezya Joshuwa mupayizi mupati kayimvwi kunembo lyangilozi yaJehova, anguwe Saatani kayimvwi kukuboko kwaJoshuwa kwachilisyo kuti amukasye. 2 Mpawo ngilozi yaJehova yakati kuli Saatani: “Jehova akukalalile iwe Saatani, iyi biya, Jehova ooyo wasala Jerusalema, akukalalile! Muntu ooyu teechisisi chiyaka chagwisigwa mumulilo na?”
3 Lino Joshuwa wakazweete zigogo zinankene doti kayimvwi kunembo lyangilozi. 4 Mpawo ngilozi yakati kuli baabo bakayimvwi kunembo lyayo, “Amumugwisye zigogo eezyo zinankene doti.” Mpawo yakati kuli nguwe, “Bona, ndachigwisya chibi chako,* mpawo ulazwaatikwa zigogo zibotu.”
5 Nkinkaako ndakati: “Azwaatikwe ngwaani iitakwe doti kumutwe.” Mpawo bakamuzwaatika ngwaani iitakwe doti akumuzwaatika zigogo; ngilozi yaJehova yakaliimvwi aafwiifwi. 6 Mpawo ngilozi yaJehova yakabuzya Joshuwa kuti: 7 “Nzezi nzyaamba Jehova wamakamu, ‘Kuti weenda munzila zyangu akuchita milimu yako kunembo lyangu, uzooba mubetesi mung’anda yangu alubo uzoobamba mabuwa aangu; ndizookuzumizya kuti unjile aakati kababelesi aaba bayimvwi aano.’
8 “‘Mvwa kaka, yooMupayizi Mupati Joshuwa, iwe abeenzinyokwe aabo bakkala kunembo lyako, nkaambo baalumi aaba nchitondeezyo; bona! ndilikweeta mubelesi wangu wiitwa kuti Chisyuukila! 9 Bona bbwe ndindabikka kunembo lyaJoshuwa! Aabbwe eelyo limwi alimeso aali musanu aabili; alubo ndilikulemba makani aalindilyo,’ mbaamba Jehova wamakamu, ‘ndizoogwisya mulandu wanyika eeyo mubuzuba bumwi biyo.’
10 “‘Mubuzuba oobo,’ mbaamba Jehova wamakamu, ‘Umwi awumwi wanu uzootamba simayakilane wakwe kuti aze azookkale munsi aamusaansa wakwe amunsi aamukuyu wakwe.’”