Myeelwe
13 Mpawo Jehova wakaambuula aaMozesi kati: 2 “Tuma bantu kuti bazwe bakaakulange-lange nyika yaKkenani njindiyanda kupa ma-Israyeli. Weelede kutuma mwaalumi uumwi kuzwa kumusyobo umwi awumwi. Mwaalumi umwi awumwi, weelede kuti kali silutwe aakati kabo.”
3 Nkinkaako, Mozesi wakabatuma kabazwa munkanda yaParani kweendelana amalayilile aaJehova. Baalumi boonse bakali basilutwe bama-Israyeli. 4 Aaya ngiimazina aabo: kuzwa kumusyobo waRubbeni, Shamuwa mwana waZakkuri. 5 Kuzwa kumusyobo waSimiyoni, Shafati mwana waHori. 6 Kuzwa kumusyobo waJuda, Kkalebbu mwana waJefune. 7 Kuzwa kumusyobo wa-Isakkara, Igali mwana waJosefa. 8 Kuzwa kumusyobo wa-Efremu, Hosheya mwana waNuni. 9 Kuzwa kumusyobo waBbenjamini, Paliti mwana waRafu. 10 Kuzwa kumusyobo waZebbuloni, Gadiyeli mwana waSodi. 11 Kuzwa kumusyobo waJosefa wamusyobo waManase, Gadi mwana waSusi. 12 Kuzwa kumusyobo waDani, Amiyeli mwana waGemali. 13 Kuzwa kumusyobo wa-Asha, Seturi mwana waMikkayeli, 14 Kuzwa kumusyobo waNafutali, Nahibbi mwana waVofisi, 15 Kuzwa kumusyobo waGadi, Geyuweli mwana waMakki. 16 Aaya ngiimazina aabaalumi Mozesi mbaakatuma kuti bakalange-lange nyika. Mpawo Mozesi wakawuzika Hosheya mwana waNuni zina lyakuti Joshuwa.*
17 Mozesi naakabatuma kuti bakalange-lange nyika yaKkenani, wakati kulimbabo: “Amutante muye kuNegebbu mpawo mutante kamuya kuchilawu chili aazilundu. 18 Mweelede kulanga-langa mbiibede nyika eeyo mpawo mubone kuti bantu bakkala mumo balisimide na naakuti tabasimide pe, mbache na naakuti mbiingi 19 akuti nyika eeyo nimbotu na naakuti nimbi akuti myuunzi njibakkala tayikwabilidwe na naakuti ilikwabilidwe. 20 Alubo mukaakubone kuti nyika eeyo ilaamanyuwa* na naakuti tayikwe akuti muli minsamu na naakuti tamukwe pe. Mweelede kuba aachibindi alubo mukachele imwi michelo yamunyika eeyo.” Chiindi eechi chakali chiindi chakubizwa kwamasaansa aakusaanguna.
21 Nkinkaako, bakatanta baakulanga-langa nyika eeyo kuzwa munkanda yaZini kusika kuRehobbu aafwiifwi aLebbohamati.* 22 Nibakatanta akunjila muNegebbu, bakasika kuHebburoni ooko kwakali kukkala Ahimani, Sheshayi aTalimayi, bakali ma-Anakki. Hebburoni yakayakwa muminyaka iili musanu ayibili, Zowani yaku-Ijipita kayitanayakwa. 23 Nibakasika kuKalonga ka-Eshikkolo, bakagonka ntabi yakali aachikama chimwi chamasaansa. Chikama eecho chakeelede kubwezegwa aabaalumi babili achisamu chakunyampuzya kuswaanizya aamapomegraneti ankuyu. 24 Bakawuzika ndawu eeyo kuti Kalonga ka-Eshikkolo* akaambo kachikama ma-Israyeli nchibakagonka nkukooko.
25 Naakakkwana mazuba aali 40, bakabweeda kuzwa kukulanga-langa nyika. 26 Nkinkaako, bakabweeda kuli Mozesi akuli Aroni akumbungano yoonse yama-Israyeli munkanda yaParani kuKkadeshi. Bakabuzya mbungano yoonse nzibakajana mpawo bakabatondeezya michelo yanyika. 27 Nzezi nzibakabuzya Mozesi: “Twakanjila munyika njwaakatutuma, kwaamba choonzyo, iikunka malili abuchi alubo njeyi michelo yayo. 28 Nikuba oobo, bantu bakkala munyika eeyo balisimide alubo myuunzi yabo iikwabilidwe mipati loko. Mukuyungizya, twakabona ma-Anakki nkukooko. 29 Ma-Amalekki bakkede munyika yaNegebbu, maHiti, maJebbusi ama-Amori bakkede muchilawu chili aazilundu alubo maKkenani bakkede mumbali aalwizi amumbali aaJodani.”
30 Mpawo Kkalebbu wakeezya kutontobozya bantu nibakayimvwi kunembo lyaMozesi kati: “Atufwambaane tweende, tulayibweza nyika nkaambo kwaamba choonzyo, tulakonzya kwiizunda.” 31 Pesi bantu mbaakayinkide aabo bakati: “Tatukonzyi pe kwiinka kuyoolwana aabantu aaba, nkaambo balisimide kwiinda ndiswe.” 32 Mpawo bakaliswini kwaambuula majwi mabi kuma-Israyeli atala anyika njibakayinkide kuyoolanga-langa, kabati: “Nyika njitwakayinkide kuyoolanga-langa, ninyika iiyoosya zyakuti muyoofwa alubo bantu mbitwakabona mbalamfu zyiindilide. 33 Nkukooko, twakabona maNefilimu, bana bama-Anakki bazwa kumaNefilimu.* Kuti twalyeezyanisya ambabo, tuli mbuli nsozi biyo alubo ambabo mbubatubona.”